Yosua 10
10
Yosua rrampa tana Kanaan llo'na liu
1Nasa'dingmi Adoni-Zedek, raja kota Yerusalem kumua mangkami natalo Yosua to to-Ai, naancuru'i to kotana, napateii to rajana, susi to mangka napugauk lako to-Yerikho sola rajana. Nasa'ding tooi kumua mangkami sibasse to to-Gibeon sola to-Israel la sisoba', nada'tan torro sola to-Israel. 2Gaja laja'i to to-Yerusalem, nasaba' matonggo to kota Gibeon, pada tonggona to kota den rajana, la'bih matonggopa na kota Ai. Umbopi ia to taunna sigaja barani na macca parari. 3Iamo nasuai Adoni-Zedek to taunna male mparatu pepasanna lako Raja Hoham jio kota Hebron, Raja Piream jio kota Yarmut, Raja Yafia jio kota Lakhis, na Raja Debir jio kota Eglon, kumua, 4“Meta'da tulungna' mimale mai tamale rrarii to to-Gibeon, nasaba' sisoba'mi Yosua sola to-Israel.” 5Sirempunmi joo rajana to-Amori lima, iamo to raja kota Yerusalem, Hebron, Yarmut, Lakhis na Eglon sola sininna surudadunna, namangtenda ntalimbung kota Gibeon la rrarii.
6Denmi to-Gibeon disua male mbawa pepasan lako Yosua jio Gilgal to nanii mangtenda kumua, “Danggi' tapamesa-mesakan tee kami' kaunanta', madoi'ki' ratu ntulungkan, nasaba' ia to rajana to-Amori to torro ntee lako membuntunna mesa' penawami la rrarikan.”
7Malemi Yosua sola sininna surudadunna to sigaja barani jio mai Gilgal la parari. 8Mangkada-Mi PUANG Allataala lako Yosua Nakua, “Danggi' mukalaja'i, nasaba' la Kubenko kapataloan. Moi mesa' te'da la ntaloiko.” 9Sangbongi bangngi Yosua sola surudadunna lumingka jio mai Gilgal, na ia tonna ratumo lako kota Gibeon, ta'pa malemi rrarii to to-Amori. 10Napalumpisui PUANG Allataala to to-Amori tonna kitami to surudadunna to-Israel. Buda to-Amori dipatei jio Gibeon, na ia to tuo unapa diula'i do' awa' buntu jiong kota Bet-Horon ratu sau' kota Azeka na Makeda. 11Ia tonna sipalaian to to-Amori jio mai olona to-Israel, pamula jiong awa' buntu jiong Bet-Horon ratu sau' kota Azeka, Napabassanni tarruh-Hi PUANG Allataala uran batu simatonggo jao mai langi' arannai simatean. Ia to mate nakanna uran batu la'bih buda na ia to mate napa'dangngi to-Israel.
12Ia tonna ben-Mi PUANG Allataala kapataloan to to-Israel, meta'dami Yosua lako PUANG Allataala jio olona to-Israel namangkada nakua,
“Ee mataallo, tatta'ko jao patunna Gibeon.
Na iko bulan, danggi' mellele jao patunna Lombok Ayalon.”
13Na ia joo wattu ia to mataallo na bulan te'da namellele jio mai ngenanna, arannai nataloi ngasan to-Israel to ewana. Ia joo apa jaji, mangkami diuki' llan Bo' Yasar. Tatta' bangngi to mataallo jao tangnga langi', agi-agi sangngalloi kenden namane' lambun.#2Samuel 1:18 14Te'dapa naden allo jaji susi joo, to pura diboko', na la dioloinna lako kumua, Naturu'i PUANG Allataala to peta'danna mesa' tolino susi joo. Nasaba' PUANG Allataala Ia to parari mpangngewan to-Israel.
15Ia tonna mangkamo parari Yosua sola surudadunna, polemi lako tendana jio kota Gilgal.
Lima rajana to-Amori najokko Yosua
16Ia to lima rajana to-Amori male mpalaian kalena namembuni llan lo'ko' jio kota Makeda. 17Nakitai tau, namale mpaui lako Yosua nakua, “Ia to rajana to-Amori llanni lo'ko' jio kota Makeda membuni.” 18Nakuamo Yosua, “Lentennii batu matonggo nalepe'i to babana joo lo'ko', misuai to tau njagaii. 19Apa ia to kamu' danggi' mipaja nnula'i to ewami, rrarii jio mai boko', danggi' eloranni mentama kotana! Nasaba' PUANG Allataala to tasompa mpapatalo kamu' nnewa ewami.” 20Napateii Yosua sola to-Israel to to-Amori, apa den unapa to la'pah napole pole' tama kotana to matande tembo'na na mawatang nanii membuni, na te'da nadipatei. 21Salama' ngasanni to surudadunna to-Israel, napole lako kota Makeda to nanii Yosua mangtenda. Moi mesa' tau te'damo barani mangkada kumua la mangngewai lako to-Israel.
22Mangkai joo too nakuamo Yosua, “Alaimi to batu mileperanni joo lo'ko', misolanni mai joo raja lima to membuni llan.” 23Naalaimi tau to batu dileperanni joo lo'ko', nadisolan lako Yosua joo rajana to-Yerusalem, rajana to-Hebron, rajana to-Yarmut, rajana to-Lakhis na rajana to-Eglon. 24Ia tonna jiomo olona Yosua joo raja lima, natambai ngasanmi Yosua to to-Israel nasirempun, namangkada lako pangbarani surudadu to nasolan male parari kumua, “Male kamu' mai ntee, misileseii to cokkongna to raja.” Malemi lako to pangbarani surudadu na sileseii to cokkongna joo raja lima. 25Mangkai joo too, nakuamo Yosua lako pangbarani surudadu, “Danggi' mimalaja', barani kamu' mimasumanga', nasaba' susimi tee la Nagaukanni PUANG Allataala to sininna ewata'.” 26Napateimi Yosua joo raja lima, namane' pada ditoke' jao lima kaju dipennosokan nadipajao bang ratu lako karuen. 27Ia tonna la kabuhmo allo, napangparentanmi Yosua, nadipalao joo batang rabuk, na dica'bean tama lo'ko' to mangka nanii membuni, namane' dilepe' batu simatonggo. Ratu lako too allo den unapa jio to batu.
Budapa kota laenna to-Amori nataloi Yosua
28Ia joo wattu narari tooi Yosua to to-Makeda, nataloi sola rajana. Sininna tau llan joo kota napatei ngasan Yosua, te'da lalo moi mesa' naeloran tuo. Ia to rajana to-Makeda napasusii to napugauk Yosua lako rajana to-Yerikho.
29Mangkai joo too, nasalaimi Yosua sola surudadunna to kota Makeda namale rrarii to kota Libna. 30Nabenni PUANG Allataala kapataloan to to-Israel, nataloii joo kota sola rajana. Sininna tau llan joo kota dipatei ngasan, te'da lalo moi mesa' dieloran tuo. Ia to rajana napateii Yosua susi to nagaukanni lako rajana to-Yerikho.
31Mpatarruh omi kalingkanna Yosua sola surudadunna jaja mai Libna male sau' Lakhis. Na mangtenda jio mengguririkkina joo kota namane' rrarii. 32Ia tonna duang allomo rrarii to kota Lakhis, Nabenmi PUANG Allataala kapataloan to to-Israel. Apa to napugauk Yosua jaja kota Libna, ia toomo napugauk llo' kota Lakhis, napatei ngasanni to taunna. 33Ia joo wattu ratui Horam, rajana to-Gezer la mpangngewan to-Lakhis, apa natalo tooi Yosua, namate sola sininna surudadunna, moi mesa' te'da tuo.
34Malemi Yosua sola sininna surudadunna ssalai kota Lakhis natarruh sau' kota Eglon, namangtenda jio mengguririkkina joo kota, namane' rrarii. 35Ia bang unamo joo allo nataloii Yosua to kota Eglon, napatei ngasanni to tau llan joo kota, susi to napugauk lako to-Lakhis.
36Mangkai joo too nasalaimi Yosua sola surudadunna to kota Eglon, namale de' kota Hebron, nararii joo kota, 37nataloi. Napateii Yosua to rajana sola sininna taunna. Moi to kota sikandoppi'na narari tooi Yosua, napateii to sininna taunna, moi mesa' te'da lalo tau tuo. Naancuru'i Yosua joo kota susi to napugauk lako kota Eglon.
38Mangkai joo too, pole boko'mi Yosua sola surudadunna rrarii to kota Debir. 39Nataloii Yosua joo kota sola rajana, moi to kota sikandoppi'na narari tooi Yosua nataloi. Napatei ngasanni Yosua to tau llan joo kota, moi mesa' te'da lalo tau dieloran tuo. Apa to mangka nagaukanni Yosua to to-Hebron sola to-Libna susi toomi nagaukanni to to-Debir sola rajana.
40Susimi joo Yosua ntaloi rajana to-Kanaan, narampai to tanana. Iamo to membuntunna sola membuntu-buntunna tana Yehuda, padang makase Negeb na awa' buntu kalambunanna Tasik Mate. Te'da lalo moi mesa' tau naeloran tuo, nasaba' susimi joo to Napangparentan PUANG Allataala to nasompa to-Israel. 41Nataloi Yosua to to-Kanaan, mangpamula llo' mai Kades-Barnea, kota Gaza jio siandah randan tasik, moi too tana Gosyen, ratu re' Gibeon. 42Sipissenri Yosua male rrarii sininna joo kota, nataloi sola rajana, narampai to kampongna, nasaba' PUANG Allataala, to nasompa to-Israel, mpangngewanni. 43Mangkai joo too, polemi Yosua sola surudadunna lako tendana jio kota Gilgal.
Trenutno odabrano:
Yosua 10: mvpAD
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Wycliffe Bible Translators, Inc. All rights reserved.