WƖAA DƖ-SUOMUŊ 9
9
Wɩa bil niiŋ ʋ dɩ Nowa pɛgɛ
1Wɩa pɛ Nowa arɩ ʋ biiriŋ lɛ aŋ bʋl, “Má lʋl biiriŋ yʋgɛ dɩ ba kɛŋ doho a pʋŋa su tinteeŋ kala. 2Dʋnɩa kɩaa kala bagɩlaa, zaaraa, tinteeŋ tuuroo kala arɩ chenfilee sɩ hɛ mʋgʋ-balɩŋ tʋɔŋ jaŋ fɩfáma. Ma jaŋ kɛŋ ba kala doluŋ. 3Kʋŋ na-kala sɩɩ wiesu jaŋ ŋaa ma kʋdiilii arɩ mɩ sɩ joŋ pɩpaa na-kala pɩma ŋɩɩ. Mɩ lɛɛlɛ joŋ kʋŋkala pɩma nɛ.
4Ama má sɩ́ nammɩa ha sɩ kɛŋ chalɩŋ chaŋ, chalɩŋ nɛ ŋaa ʋ mɩɩsɩŋ. 5Nʋʋkala bɩ maga dɩ ʋ kpʋ ʋ dɔŋɔ. Bagɩl ma bɩ maga dɩ ʋ kpʋ nuhuobiine. Dɩ nʋʋ koo bagɩl koo pʋna nɛ kpʋ nʋʋ, ʋ maga dɩ ba kpʋʋ ma. Nʋʋkala bɩ maga dɩ ʋ kpʋ ʋ naambii, dɩ nʋʋ nɛ ŋaa ŋɩɩ, ʋ jaŋ joŋ ʋ mɩɩsɩŋ tiŋ.
6Dɩ nʋʋkala nɛ kpʋ ʋ dɔŋɔ,
ʋ maga ba kpʋʋ ma nɛ,
bɛɛ wɩaa Wɩa ŋaa nuhuobiine ʋ nagɛ ʋ-na Wɩa nɛ.
7Má lʋl biiriŋ yʋgɛ dɩ ba kɛŋ doho a pʋŋa su tinteeŋ kala.”
8Ŋɩɩ nɛ Wɩa bʋla pɩ Nowa arɩ ʋ biiriŋ, 9“Lɛɛlɛ mɩ bil niiŋ nɛ mɩ dɩŋ arɩ ŋ doho nɩaa kala pɛgɛ, 10a pɛ kɩalɩŋ kala sɩɩ wiesu lɛ: Zaaraa, bagɩlaa, pʋsʋŋ arɩ kɩalɩŋ kala sɩ to ŋ harɩŋ lɩɩ lɩɩŋ daboro-la tʋɔŋ. 11Niiŋ deeŋ nɛ mɩ bil mɩ dɩ ma pɛgɛ: Mɩ bɩra bɩ jaŋ leŋ dɩ lɩɩ-balɩŋ chei dʋnɩa kɩaa kala sɩ kɛŋ mɩɩsɩŋ a hɛ dɔŋɔ. Lɩɩ-balɩŋ bɩra bɩ jaŋ dii dʋnɩa kala.
12Wɩɩŋ deeŋ nɛ jaŋ ŋaa magɩlɩŋ a tɩŋ nii-la mɩ sɩ bile mɩ dɩŋ arɩ ŋ doho nɩaa pɛgɛ arɩ kɩalɩŋ kala sɩ kɛŋ mɩɩsɩŋ tinteeŋ lɛ a kaa mʋ wuu: 13Duoŋ-sɩa nɛ mɩ leŋ ʋ hɛ duoŋ-bɩlɩmbaanaa tʋɔŋ. Ʋ nɛ jaŋ ŋaa nii-la mɩ sɩ bile mɩ dɩ dʋnɩa nɩaa pɛgɛ magɩlɩŋ. 14Bʋa na-kala dɩ mɩ nɛ leŋe duoŋ-bɩlɩmbaanaa kʋ hɛ dɔŋɔ dɩ duoŋ-sɩa lɩɩ chɩŋ wɩa-nyuŋ, 15mɩ jaŋ liisi nii-la mɩ sɩ bile mɩ dɩŋ pɛgɛ arɩ kɩalɩŋ kala sɩ weye a ŋaa doho doho a hɛ dʋnɩa lɛ. Mɩ bɩra bɩ jaŋ leŋ dɩ lɩɩ-balɩŋ kʋ chei kɩalɩŋ mɩɩsɩŋ kala. 16Bʋa na-kala dɩ duoŋ-sɩa nɛ lɩɩ chɩŋ duoŋ-bɩlɩmbaanaa tʋɔŋ, mɩ jaŋ naʋ a liise yi nii-la sɩ bɩ dɛrɛ mɩ sɩ bile, mɩ dɩ kɩalɩŋ kala sɩ weye tinteeŋ lɛ pɛgɛ.”
17Ŋɩɩ nɛ Wɩa bɩra bʋla pɩ Nowa, “Duoŋ-sɩa deeŋ nɛ jaŋ ŋaa magɩl-la sɩ jaŋ dagɛ nii-la mɩ sɩ bile mɩ dɩ kɩalɩŋ kala sɩ weye a hɛ tinteeŋ lɛ pɛgɛ.”
Nowa hambolibiisiŋ
18Nowa hambolibiisi-la sɩ to ʋ harɩŋ kʋ lɩɩ lɩɩŋ daboro-la lɛ nɛ ŋaa Sɛm, Ham, arɩ Jafɛf (Ham nɛ lʋl Kɛnaŋ). 19Nowa hambolibiisiŋ deemba batori nɛ kʋ ŋaa dʋnɩa nɩaa kala doho.
20Nowa fa ŋaa paarʋ nɛ a bil baga a chɔnsɛ tɩɩnɛnɛɛ. 21Ŋɩɩ nɛ tapʋlɩɩ kʋbala ʋ nyʋa tɩɩnɛnɛ-la sɩnɩŋ a bugi, a kɛŋ timbogulo pɩŋ ʋ lɛbɩŋ tʋɔŋ. 22Ham sɩ ŋaa Kɛnaŋ nyɩmma na ʋ nyɩmma timbogulo a lɩɩ bʋla pɩ ʋ naambiiri-la balɩamɩŋ sɩ hɛ dɩ-jalɩŋ. 23Ŋɩɩ nɛ Sɛm arɩ Jafɛf joŋ gɛrɩŋ daŋ ba vaasɩŋ lɛ a vɛŋ tulo a joŋ sɩaa ta dɩ-wogo dɩ ba sɩ́ ba nyɩmma timbogulo na, aŋ kɛŋ gɛrɩ-la kʋ tɔ ʋ yarɩ-bire-la.
24Sɩŋ-la sɩ lɩɩ Nowa sɩaa lɛ, ka ʋ nɩɩ ŋɩɩ ʋ biiriŋ tʋɔŋ kʋbie-la sɩ ŋaa ʋ lɛ, 25ʋ sɩ,
“Mɩ ŋmɩɛsa hɛ Kɛnaŋ lɛ nɛ,
ʋ jaŋ ŋaa yosuŋ tʋɔŋ yomo ʋ naambiiriŋ tʋɔŋ.”
26Ŋɩɩ nɛ ʋ bɩra bʋl,
“Mɩɩ dɛnnɛ mɩ Tɩɩna, Wɩa-la sɩ ŋaa Sɛm Wɩa.
Kɛnaŋ jaŋ ŋaa Sɛm yomo.
27Wɩa jaŋ leŋ dɩ Jafɛf leriŋ jallɛ,
dɩ Jafɛf jʋʋ Sɛm daanyʋɔsʋŋ lɛ
aŋ ka dɩ Kɛnaŋ ŋaa Sɛm yoŋ.”
28Lɩɩ-bal-la sɩ chei dʋnɩa harɩŋ lɛ, Nowa hɛ ʋ mɩɩsɩŋ lɛ jɩsɩŋ zɔɔ-batori arɩ mahɩŋ balɩa arɩ fii nɛ. 29Nowa jɩsɩŋ kala ŋaa zɔlɔ nibi arɩ mahɩŋ balɩa arɩ fii nɛ aŋ-na sʋʋ.
Trenutno odabrano:
WƖAA DƖ-SUOMUŊ 9: SIS
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©Ghana Institute of Linguistics Literacy and Bible Translation 1984, 2014