Luk̆a 7
7
Oşişdudişi Ocera
1Yeso, xalk̆is hantepe mteli duʒ̆uşk̆ule Kafarnaumişa mendaxtu. 2Hek ar Romuli oşişdudi kort̆u. Oşişdudis, dido na oroms ar ç̆k̆ori, zabuni uonut̆u. Ç̆k̆orik şuri ç̆k̆idomt̆u. 3Oşişdudik, Yesoşeni na gulun ambaepe ognu. ‘Moxtas do ç̆k̆ori çkimi dok̆aas’-ya do oxveʒ̆uşeni Yudeurepeşi tişinerepe mendoşku. 4Hentepe ides do Yesos axveʒ̆es. “Ham k̆oçi skani meşvelus koğirs. 5Xalk̆i çkunis oroms, sinagogiti hemuk mixenes”-ya uʒ̆ves.
6Hamuşk̆ule Yeso hentepe k̆ala mendaxtu. Oxorişa nanç̆uşi, oşişdudik k̆atape muşite Yesos ham ambai numçinu: “E Mance, si mot gaʒ̆uxet̆as! Ma, xoşi k̆uçxe çkimişa na moxtare k̆onari beciti k̆oçi var bore. 7Hamuşeni mati skanda var memalu. Si xvala emri komeçi, çkimi metele dik̆aen. 8Emri mu itkven, ma komiçkin. Ma emri momçaman do mati emri mepçam. Ar askeris ‘Mendaxti’-ma buʒ̆umer, mendulun. Çkva ar askeris ‘Moxti’ buʒ̆umer, komulun. Ç̆k̆ori çkimis ‘Haya dovi’-ma buʒ̆umer, dikoms.”
9Yesok, ham nenape ognuşi gak̆virdu. Uk̆açxe mus na noumt̆upes: “Tkva ar mutxa giʒ̆vat: İsrailis ma haşo didi ocera var miz̆irun”-ya uʒ̆u. 10Oşişdudik Yesoşa na oşku tişinerepe goiktesşi, hentepek zabuni na cant̆u ç̆k̆ori k̆aeri koz̆ires.
Yesok Şiras Skiri Uskedinams
11Hamuşen ç̆ut̆a oraşk̆ule Yeso, Naini na coxons ar noğaşa mendaxtu. Mamguralepe muşi do dido milletepek hemus noumt̆u. 12Noğaşi nek̆nas muç̆o nanç̆es, ar mitxanişi ğureri gamionamt̆es. Şira oxorcas xvala ham skiri uonut̆u. Noğaşi milletiti hem oxorca k̆ala rt̆u. 13Mances oxorca az̆iruşi, oxorca guris naç̆u. Oxorcas, “Mot ibgar!”-ya uʒ̆u. 14Nanç̆u do k̆iboris xe nonʒ̆uşk̆ule, na zdimt̆espe kododgites. Yesok, “Ç̆e biç̆i, si giʒ̆umer, edgiti!”-ya uʒ̆u.
15Ğureri edgitu, kodoxedu do op̆aramitus kogyoç̆k̆u. Yesok bere nana muşis komeçu.
16İris aşkurines do “Çkunden ar didi ambayoci kogamaxtu, Ğormoti xalk̆i muşis meşveluşeni komoxtu”-ya do Ğormotis omʒkves.
17Yesoşi ham ambai mteli Yudeas do gomtepes ignu.
Yeso do Mavaft̆ize Yani
18Yanişi mamguralepek, na ivu iri-xolo hemus duʒ̆ves. Yanik jur mamgurale muşis ducoxu. 19Hentepes, “Na moxtasen si rei, varna çkva miti pçvati, dok̆itxit”-ya uʒ̆u do Manceşa mendoşku.
20Hem k̆oçepe Yesoşa mendaxtes; hemus, “Mavaft̆ize Yanik, si haya mek̆itxuşeni momoşkves”-ya uʒ̆ves, “Na moxtasen si rei, varna çkva miti pçvati?”
21Do hem oras, Yesok dido k̆oçepe zabunobapeşen, derdepeşen do p̆at̆i ç̆ink̆apeşen dok̆au, dido utole k̆oçis tolepe gunʒ̆k̆u. 22Yesok, Yanişi mamguralepes haşo uʒ̆u: “Yanişa idit, na z̆irit do na ognitpe hemus duʒ̆vit! Utolepes tolepe ganʒ̆k̆enan, felci geçamerepe igzalnan, msursu na omç̆unspe ik̆aenan, t̆urapek ognaman, ğurerepe ğuraşen edgitunan do k̆ai ambai fuk̆arapes ignapinen. 23E şana bedi muşis, çkimi gurine k̆uçxe na va napodrik̆u.”
24Yanişi maambaepe mendaxtesşk̆ule, Yesok xalk̆is Yanişeni mep̆aramitus kogyoç̆k̆u. “Çolis mu oz̆iramuşeni idit? İxite na dolink̆ans verʒ̆amişi oz̆iramuşenii? 25Miʒ̆vit, mu oz̆iramuşeni idit? Paxali porçape na dolonkuns ar mitxani oz̆iramuşenii? Mara, mskva do paxali şeepe na dolikunaman do sefa na uğunanpe, mapapeşi oxorepes skidunan. 26Heşo renna mu oz̆iramuşeni idit? Ar ambayocii? Ho, haya giʒ̆umert, hea ambayocisti ucgin. 27Hemuşeni haşo nç̆arun:
‘Aha, maambae çkimi goʒ̆ogincğonam,
Hemu goʒ̆ogancğonasen do gza goʒ̆ogiisanasen.’
28Haya giʒ̆umert, oxorcaşi donorinepeşi doloxe Yanişen ucgişi mitiksani va ren. Mara Ğormotişi Mapobas eni tudeni, hemuşen mağalis ren.”
29Yanik na vaft̆izi ʒ̆opxu xalk̆i do taxsildarepeti, haya ognesşi Ğormotiş gza isa na ren konagnes. 30Mara Yanik vaft̆izi na var ʒ̆opxu Farisurepe do Ʒ̆k̆onda K̆anonepeşi mamgurapalepek Ğormotişi hentepeşeni na gyudgu p̆lani va nik̆ardes.
31Yesok, “Ham oraşi k̆oçepe mus mebugapa? Hantepe mus nugaman?”-ya tku. 32“ ‘Noğaşi oşkendas doxedunan do artikartis,
Tkva k̆avali gelagiçit, var isterit;
Bgaras dobdgitit, var ibgarit’-ya
na zop̆onan berepes nugaman.
33Mavaft̆ize Yani moxtuşi ip̆içvu do ğvinişen mendra dodgitu, hemus ‘Ç̆ink̆oni’-ya uʒ̆vit. 34K̆oçişskiri moxtuşi oç̆k̆omu do oşu. Hamusti ‘Aya ham korbadergi do ğvinimşumu k̆oçis oʒ̆k̆edit, taxsildarepe do k̆rimonepe k̆ala k̆ata divu’-ya uʒ̆vit. 35Mara çkinoba, k̆ai na uʒ̆onun irik domtinalu.”
Yeso do K̆rimoni Oxorca
36Farisurik Yeso gyarişa koducoxu. Hemuti Farisurişi oxorişa idu do magidas kodoxedu.
37Hem noğas p̆at̆i molaşineri, ar k̆rimoni oxorca kort̆u. Hem oxorcak ognu ki, Yesok Farisurişi oxoris gyari ipxors. Kçe mermerişi xeneri ar angite mskva şura na alen yaği komuğu. 38Bgarineri Yesos komok̆udgitu. K̆uçxepe muşi çelamurepete oşuvus kogyoç̆k̆u, tomalepete dukosu, gyacundu do mskvaşa yağite dukurçolu.
39Yesos oxorişa na ucoxu Farisurik haya z̆iruşi guriş doloxe “Haya ambayoci rt̆uk̆on mus na xe usumers ham oxorca min oren, muperi ren kaçkinet̆u. K̆rimoni ar mitxani na ren koxoʒ̆onamt̆u”-ya tku.
40Hamuşk̆ule Yesok Farisuris, “Simon, skanda ar mutxa otkvoni bore”-ya uʒ̆u.
Hemukti “Miʒ̆vi, mamgurapale çkimi”-ya.
41“Para na noʒxams ar mitxanis jur k̆oçis para nuʒxapurt̆u. Artis xutoşi, majuras jureneçidovit dinari noʒxudort̆un. 42Hentepe para na var uğut̆esşeni, juristi menoʒxepe duxaresu. Haʒ̆i hantepeşi namu çkva dido oroms?”
43Simonik, “Mondo, namusti dido uxaresu hemuk”-ya uʒ̆u.
Yesok, “İsa tkvi”-ya. 44Yeso oxorca k̆ele goiktu do Simonis haşo uʒ̆u: “Ham oxorca z̆iromi? Ma skani oxorişa komopti, k̆uçxepe obonuşeni ʒ̆k̆aritina var momçi. Ham oxorcak çelamurepete k̆uçxepe domişuvu, tomalepete domikosu. 45Si ma var memacundi, ham oxorcak oxorişa amaptişen doni k̆uçxepes macundems. 46Si tis zeytinişi yağitina var domisvi, ham oxorcak k̆uçxepe çkimis mskva şura na alems yaği kodomisu. 47Hamuşeni si ar mutxa giʒ̆umer, ham oxorcaşi dido na uğun k̆rimape xat̆ireli ren. Hemuşeni hak̆o mp̆oroms. Mʒika k̆rimapeşen na ixat̆irinu mitxanik, mʒika oroms.”
48Uk̆ule oxorcas “K̆rimape skani dixat̆irinu”-ya uʒ̆u.
49Yeso k̆ala gyaris na xenanpek “K̆rimapeti na uxat̆irams ham k̆oçi min oren?”-ya do ok̆op̆aramitus kogyoç̆k̆es.
50Yesokti oxorcas “Ocera skanik mogişletinu. Misobate idi!”-ya uʒ̆u.
Trenutno odabrano:
Luk̆a 7: LZZ
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Laz Luke © Bible Society in Turkey (Kitabı Mukaddes Şirketi) 2020
