Luk̆a 2
2
Yesoşi Dobadu
1Hem ndğalepes, K̆aysar Ağust̆ek, mtel Romaşi kianas na skidunanpe dik̆oreʒxas-ya do geiçinadudort̆un. 2Kiriniusi Suriyeşi vali rt̆uşk̆ule ham iptineri ok̆oreʒxu vesdort̆un.
3K̆at̆a-iri, ti muşi ok̆oreʒxapuşeni dobadona mutepeşişa mendaxtes. 4Yosifi Davidiskirepeşen na rt̆uşeni, Galileas, Nazareti na coxons noğaşen Yudeaşa, Davidişi dobadona na ren Betleemişa mendaxtu. 5Hek uxvene na ren mekaderi muşi Maria k̆ala iç̆arasert̆u. 6Hentepe hek rt̆esşk̆ule Maria bereşa dizabunu. 7Maria uʒebi bere muşi kodorinu do k̆ondağis komek̆oru. Oxoris çkva sva na var rt̆uşeni otiales kogyonciru.
Mç̆k̆eşepe do Melaikepe
8Seri Betleemişi gomtepes na gamotanamt̆es mç̆k̆eşepe kort̆es. Surepe mutepeşis mç̆k̆eşumt̆es. 9Manceşi ar melaike hentepes keʒ̆aʒ̆iru. Manceşi didoba gutanu. Mç̆k̆eşepes dido aşkurines. 10Melaikek hentepes haşo uʒ̆u: “Mot gaşkurinet̆an, ma mtel milleti na oxelasen ar k̆ai ambai mogiğit. 11Handğa Davidişi noğas momşletinu tkvani kodibadu. Hea, Mance Xrist̆e ren. 12Otiales k̆ondağis gek̆oreri ar bere z̆iraten. Haya tkvanişeni simadi rt̆as.”
13Birdemşi melaike k̆ala dido çkva melaikepe eçkindes. Mtelik Ğormotis omʒkves do haşo tkves:
14“İri-xoloşen mağalis Ğormotis didoba avas,
Dixas hemus na moʒ̆ons mitxanepes misoba avas.”
15Melaikepe hekole igzales do ʒaşa goiktesşk̆ule mç̆k̆eşepek artikartis “Hayde, Betleemişa bigzalat. Mancek na domimçines ham ambai kobz̆irat”-ya tkves.
16Mç̆k̆eşepe k̆ap̆ineri heşo mendaxtes. Maria, Yosifi do bere ar svas koz̆ires. Bere otiales gecant̆u. 17Mç̆k̆eşepek bere z̆iresşk̆ule melaikek hem bereşeni na uʒ̆vespe dip̆aramites. 18Mç̆k̆eşepeşen ambai na ognespe gak̆virdes. 19Do Mariak mteli ham dulyape izmont̆u do guri muşis impulamt̆u.
20Mç̆k̆eşepek na ognes do na z̆ires iri-xoloşeni Ğormoti omʒkves do goiktes. Melaikek na meçu ambaepe mtini rt̆u.
Yeso Oxvames Ğormotis Nukadaman
21Bere ovro ndğaneri ivuşi sunneti duxenes; hemus coxo Yeso kogyodves. Ham coxo melaikek, bere nana muşişi korbas var eçkinduşakis gyudvalut̆u.
22Moseşi k̆anonis na ç̆arunsteri, hentepeşi oʒ̆imindanuşi ndğalepe açodesşk̆ule, bere Mances mekaduşeni Yeruşalimişa mendiones. 23Manceşi k̆anonis haşo ç̆arun: “Na dibadu iptineri biç̆i bere Mances nikadinasen.” 24Xolo Manceşi k̆anonis, “Jur t̆orocişi mota varna jur k̆urz̆uli tisya meçit”-ya ç̆arun. Yosifi do Mariati ham emri oxenuşeni Yeruşalimişa mendaxtes.
25Yeruşalimis Simeoni na gyoz̆in, ʒ̆ori do Ğormoti-maorope ar k̆oçi kort̆u. Xrist̆ek İsraili dolagas-ya do çumert̆u. Şuriʒ̆k̆onda hemuşi jin rt̆u. 26Şuriʒ̆k̆ondak Simeonis guris dolungonudort̆un ki, Manceşi Xrist̆e var z̆iraşakis var ğuraset̆u. 27Hamuşeni, Şurik Simeoni Oxvame k̆ele mendoşku. Nana do baba muşik Ğormotişi k̆anonis na ç̆arunsteri mekaduşeni ç̆ut̆a Yeso Oxvameşa komoones. 28Simeonik bere eʒ̆ikaçu, Ğormoti omʒku do haşo tku:
29“E Mance çkimi, haʒ̆i ma na momçi nena dovi,
Haʒ̆işk̆ule ma; ç̆k̆ori skani, misobate mağurinen,
30Hemuşeni ki, tolepe çkimite kobz̆iri, si na momoşletinit.
31Mtel xalk̆epekti z̆iranoren.
32Hea, majura milletepes na natanasen do xalk̆i skani İsrailiti didoba na meçasen te rt̆asen.”
33Yesoşi nana do baba Simeonişi nenapeşen gak̆virdes. 34Simeonik hentepe doʒ̆k̆ondinu do Marias haşo uʒ̆u: “Oʒ̆k̆edi, bere skaniş gurine İsrailis dido k̆oçepe melanoren do dido k̆oçepekti eiselanoren. Hea, na moivarinasen ar simadi rt̆asen. 35Haşopete dido k̆oçepes, mpuleri na uğunan ozmonupe gamulanoren. Muç̆o guris xami megaʒonansteri gaç̆vasen.”
36-37Ana na coxons ar kçini ambayociti Oxvames rt̆u. Asiri aşiretişen, Fanuelişi bozo rt̆u. İkomocu do şkvit ʒ̆anaşk̆ule şira kodoskidudort̆un. Haʒ̆i otxoneçi do otxo ʒ̆aneri rt̆u. Oxvameşen gale çkarte var gamulut̆u. Seri-ndğaleri p̆içveri, xvameri Ğormotis oxveʒ̆amt̆u.
38Hem oras Ana, Yosifi do Marias nanç̆u do Ğormotis axvamu. Bere Yesos noğiru do Yeruşalimişi moşletinu na çumert̆es iri k̆ala dip̆aramitu.
39Yosifi do Maria Manceşi k̆anonis na ç̆arun iri-xolo doçodinesşi Galileaşa, noğa mutepeşi Nazaretişa goiktes. 40E do, bere irdet̆u, iri-xolo açkinet̆u, moinç̆et̆u, Ğormotişi moʒ̆ondinu hemuşi jin rt̆u.
Yeso Oxvames Ren
41Yesoşi nana do baba k̆at̆a ʒ̆anas Fisixişi bayramis Yeruşalimişa nulut̆es. 42Bayramis adeti na rensteri Yeso vit̆ojur ʒ̆aneri ivuşi k̆at̆aneristeri hek mendaxtes. 43Bayramişk̆ule oxorişa goiktert̆esşi ç̆ut̆a Yeso Yeruşalimis kek̆askidu. Nana do baba muşik haya var oxoʒ̆ones. 44Bere k̆atape muşi k̆ala daʒ̆ones do ar ndğeri gza igzalesşk̆ule, bere ek̆raba do çinoberepe k̆ala ogorus kogyoç̆k̆es. 45Var az̆iresşi goreri-k̆itxeri Yeruşalimişa goiktes.
46Hea, sum ndğaşk̆ule Oxvames koz̆ires. Mamgurapalepe k̆ala koxet̆u do hentepes uucamt̆u, mutxanepe k̆itxumt̆u. 47Hemus na nuucamt̆espek, nosi do cevabepe muşi dido moʒ̆ondes. 48Nana do baba muşik hea z̆iresşi gak̆virdes. Nana muşik: “E skiri, çku haşo mot moğodit? Baba skani do ma mebazmonit do si ggorumt̆it”-ya.
49Yesokti hentepes “Ma mot mgorumt̆it?”-ya “Baba çkimişi oxoris na bort̆are var giçkit̆esi?” 50Mara hentepek ham nena var oxoʒ̆ones.
51Yeso hentepe k̆ala Nazaretişa kogextu. Hentepes koduceru. Nana muşik mteli ham ambaepe guri muşis komeşimpulu. 52Yeso nosite do t̆anite irdet̆u, Ğormotişi do k̆oçepeşi moʒ̆ondinu mogamt̆u.
Trenutno odabrano:
Luk̆a 2: LZZ
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Laz Luke © Bible Society in Turkey (Kitabı Mukaddes Şirketi) 2020
