Luk̆a 17
17
K̆rima do Oxat̆iru
1Yesok mamguralepe muşis haşo uʒ̆u: “K̆oçi k̆rimas na dolot̆k̆oçams ragepe va rt̆asşi var iven. E çxome, ham ragepes sebebi na avupes! 2Ç̆ut̆a ar k̆oçişi k̆rimaşa sebebi avaşakis, karmat̆eşi kva alis dolok̆ideri zuğas doluk̆ap̆uk̆o çkva k̆ai ren. 3İgurit! Cuma tkvanik k̆rima dogoğodesna hemus duperxit. Dipişmanasşk̆ule uxat̆irit. 4Ar ndğas şkit fara k̆rima dogoğodan do şkit fara pişmani tkvanda moxtasna, hemus uxat̆irit.”
5Elçepek Mances, “Ocera çkuni mominz̆init”-ya uʒ̆ves.
6Mancek hentepes haşo uʒ̆u: “Xardaliş tasi k̆onari ocera kogiğurt̆esk̆o, ham mjolişi ncas ‘Eiʒ̆k̆i do idi zuğas kodirgi’ uʒ̆vatşk̆ule, hemukti dogiceranert̆u.
7Ona na xonums varna mç̆k̆eşi na mç̆k̆eşums ar ç̆k̆ori onaşen goiktaşk̆ule, tkvanden namuk ‘Manişa moxti do magidas kodoxedi’-ya uʒ̆umers? 8Hemus ‘Lumcineri gyari domixaziri, got̆k̆apu skani komoit̆k̆i do ma p̆ç̆k̆oma-pşumt̆aşi mixezmet̆i. Uk̆açxeti si ç̆k̆omi do şvi!’ var uʒ̆umersi? 9Ç̆k̆oris kogeiçinadvatşk̆ule dulya muşi na vu ç̆k̆oris uxvamamti? 10Tkvati haşo, na gekçinadvespe mteli dovatşk̆ule, ‘Çku na var ipelen ç̆k̆orepe boret, xvala oxenu na goʒ̆omiz̆inanpe p̆it’-şo tkvit.”
Vit Msursuyari
11Yeruşalimiş k̆ele gza muşis na noums Yeso, Samaria do Galileaşi şkas sinorişen mek̆ilamt̆u. 12-13Ar oput̆eşa amaxtuşi vit msursuyari keʒ̆agu. Mendra dodgites do, “Mance çkuni Yeso, çkunda guris megaç̆vas!”-ya do ucoxes.
14Yesok hentepe z̆iruşi, “İdit, p̆ap̆apes kaʒ̆irit”-ya uʒ̆u. Vit k̆oçiti p̆ap̆apeşa ulurt̆esşi gzas diʒ̆imindanes. 15Hentepeşen arik na ik̆au z̆iruşi zori xomate Ğormoti mʒkveri goiktu. 16Yesoşi k̆uçxeşa p̆icik̆op̆a kodarçu do hemus axvamu. Ham k̆oçi Samaruri rt̆u. 17Yesok, “Na iʒ̆imindanespe vit k̆oçi va rt̆esi, çxoro k̆oçi so ren?”-ya do k̆itxu. 18“Ğormotişi omʒkuşeni ham k̆oçişen met̆a miti var goiktui?”-ya. 19Uk̆ule k̆oçis, “Edgiti do igzali”-ya, “Ocera skanik mogişletinu.”
Ğormotişi Mapoba Mundes Moxtasen?
20Farisurepek Yesos, “Ğormotişi Mapoba mundes moxtasen?”-ya do k̆itxes.
Yesok hentepes haşo uʒ̆u: “Ğormotişi Mapoba tolite na iz̆irensteri var moxtasen. 21K̆oçepesti, ‘Aha, hak ren’ varna ‘Ehe, hek ren’ var atkvanoren. Hemuşeni ki, Ğormotişi Mapoba tkvani doloxe ren.”
22Yesok mamguralepe muşis haşo uʒ̆u: “Heşo ndğalepe moxtasen ki, K̆oçişskirişi ar ndğatina oz̆iramu goganç̆elanoren, mara var gaz̆iranoren. 23K̆oçepek tkva ‘Aha, hak ren’, ‘Ehe, hek ren’-ya giʒ̆vanoren. Mot ulurt, hentepes mot notxozurt! 24K̆oçişskirik ndğa muşis, divalas do ʒa melendoşen moleşakis na otanamssteri heşo iz̆irasen. 25Mara ipti, hemuk dido nʒ̆orasen do ham oraşi k̆oçepek hea moivaranoren.
26Noeşi ndğalepes muç̆oti ivu, K̆oçişskirişi ndğalepesti heşope ivasen. 27Noe k̆aravis na gexedu ndğaşakis k̆oçepek ipxort̆es do şumt̆es, içilert̆es do ikomocert̆es. Uk̆ule t̆ufani divu, mteli eç̆k̆odes. 28Lot̆işi ndğalepesti haşope ivu. K̆oçepek ipxort̆es, şumt̆es, eç̆opumt̆es, gamaçamt̆es, tasi orgamt̆es, oxori ik̆odamt̆es. 29Mara Lot̆i Sodomişen na gamaxtu ndğas, ʒaşen daçxuri do ʒ̆urʒ̆apa domç̆imu, mteli eç̆k̆idu. 30K̆oçişskiri gamaxtaşk̆uleti haşope ivasen. 31Hem ndğas otvas na ren, oxoris na uğun şeepe muşi eç̆opumuşeni tudeşa mot gyulut̆as. Onas na renti oxori muşişa mot goiktas. 32Lot̆işi oxorcas tis na malupe goişinit! 33Şuri muşi na var abeden, hea gundunasen. Şuri na gundunasenti hea moşletinasen. 34Tkva giʒ̆umert, hem seris oncires na ok̆oncanan jur şurişen ari eizdinasen, majurani nişkvinasen. 35-36Ok̆ok̆ateri dik̆a na mkums jur oxorcaşen ari eizdinasen, majurani nişkvinasen.”
37Hentepek Yesos, “Mance çkuni, hantepe so ivasen?”-ya do k̆itxes.
Hemukti hentepes, “Leşi soti ren, urepeti hek ok̆ibğanoren”-ya.
Trenutno odabrano:
Luk̆a 17: LZZ
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Laz Luke © Bible Society in Turkey (Kitabı Mukaddes Şirketi) 2020
