Luk̆a 12
12
Farisurepesteri Mot İvert
1Hem oras, uk̆oreʒxu k̆oçi kok̆ibğes do t̆ora artikarti eʒ̆izamt̆es, Yesok ipti mamguralepe muşis haşo uʒ̆u: “Farisurepeşi p̆rozimişen imt̆it. Hentepeşi p̆rozimi jurp̆iconoba ren. 2Mpuleri na ren do na var gamalasen, t̆k̆obaşa na ren do na var içkinasen mutu va ren. 3Hamuşeni, mʒ̆k̆upis mutu tkvit dotanaşk̆ule ignapasen; molazderi nek̆napeşi doloxe na nipurçinitpe otvaşen gamicoxinasen.
4K̆atape çkimi, tkva giʒ̆umert, xura ağurinenan do çkva mutu na var axenenan mitxanepeşen mot gaşkurinet̆an. 5Mişen gaşkurinan giʒ̆vati: Mitxani doğurinasşk̆ule ceennemis na dolat̆k̆oçinen Ğormotişen gaşkurinan! Ho, tkva giʒ̆umert, hemuşen gaşkurinan! 6Xut bağulya jur astanişa var gamiçeni? Mara Ğormotis hentepetina var goç̆k̆ondun. 7Moro, ti na ginçanan mteli tomalepeti k̆oreʒxeri uğun. Mot gaşkurinet̆an, tkva bağulyapeşen metimoni ret.
8Tkva giʒ̆umert, k̆oçepeşi ʒ̆oxle ma na mik̆abulasen iri-xolo, K̆oçişskirikti Ğormotişi melaikepeşi ʒ̆oxle ik̆abulasen. 9Mara ma k̆oçepeşi ʒ̆oxle miti momivarasen, Ğormotişi melaikepeşi ʒ̆oxle moivarinasen. 10K̆oçişskirişeni p̆at̆i nena na utkvalun ixat̆irinasen; mara Şuriʒ̆k̆ondas na gyok̆itxu p̆ot̆e var ixat̆irinasen.
11Sinagogis na renanpeşi, tişinerepe do mapapeşi ʒ̆oxle mendegionanşk̆ule, tkva ‘Ti çkuni mute, muç̆o pçvaten?’ varna ‘Mu ptkvaten?’-ya do mot megazmonet̆an. 12Şuriʒ̆k̆ondak hemindoras mutu otkvalu gik̆oreman dogoguranoren.”
Xampa Uğnose
13Na ok̆obğurt̆espeşen ar k̆oçik Yesos, “Mamgurapale çkimi, cuma çkimis uʒ̆vi do mirasi mati kok̆omirtas”-ya uʒ̆u.
14Yesok hemus haşo uʒ̆u: “Ç̆e k̆oçi! Ma tkvanişeni xakimi do xakemi mik momoşku?” 15Uk̆ule hentepes “İk̆atalit, k̆at̆a t̆amaxişen imt̆it. Mitişi skidala mali muşis var numbun”-ya.
16Uk̆ule hentepes ham memgapura dup̆aramitu: “Ar xampa k̆oçişi let̆apek k̆ai içanert̆u. 17K̆oçik muşeburaşi, ‘Mu p̆are, na içanupe so pşinaxare, sva va miğun’-ya do izmonamt̆u.
18Uk̆ule, ‘Haşo dop̆a’-ya, ‘Bağupe çkimi moboktare do hantepeşen çkva didilepe dop̆are, mteli maxsulepe do malepeti hek kok̆obobğare.’ 19Ti çkimis, ‘E gogağari, dido ʒ̆anapes na gibağun k̆onari mali kogiğun, raxat̆i skanis mendaʒ̆k̆edi, ç̆k̆omi, şvi, skidalaşi nostoni kogamuği-ma ptkvare’-ya.
20Mara Ğormotik hemus, ‘Ç̆e uğnose, hamseri şuri skani skanden ik̆vandinasen, na ok̆ogibğun hentepe mis duskidasen?’-ya.
21Ti muşişeni xazina na ok̆ibğams, mara Ğormotişi ʒ̆oxle xampa na va ren k̆oçis soğuni haşo ağoden.”
Mot Nozmort
22Yesok mamguralepe muşis haşo uʒ̆u: “Hamuşeni tkva haşo giʒ̆umert: ‘Mu p̆ç̆k̆omaten?’-ya do şuri tkvanişeni, ‘Mu dolobikunaten?’-ya do xura tkvanişeni mot nazmonert! 23Şuri oç̆k̆omales, xurati dolokunus ucgin. 24Urepes oʒ̆k̆edit, varti xaçkuman, varti gumuman, varti bağupe do naliape uğunan. Ğormotik xoloti hentepe oz̆ğams. Tkva k̆inçepes ucgirt! 25Namus ozmonute skidala muşi ar şvacitina manz̆inen? 26Ham ç̆ut̆a dulyaşeni menceli var gibağunan do majuranepeşi mot nozmort?
27Zambaxepe muç̆ote irdenan oʒ̆k̆edit! Varti içalişaman, varti nok̆epe txuman. Mara tkva giʒ̆umert, hek̆o didoba kuğurt̆u mara Solomonitina hantepesteri var dolukunapurt̆u. 28E ocera mʒika na uğunanpe, Ğormotik handğa onas na çans do oç̆ume odaçxures na dolit̆k̆oçinasen mt̆k̆a haşo dolokunu do p̆a tkvati dologokunanen. 29Hemuşeni, ‘Mu p̆ç̆k̆omat, mu pşvat?’-ya do mot nozmort. 30Kianaşi mteli xalk̆epe hantepes nouman. Mara Baba tkvanis, tkva hantepe na gik̆oreman kuçkin. 31Tkva hemuşi mapobas naonit, hemindoras hantepe tkvande niçinasen.
32Mot gaşkurinet̆as e ç̆ut̆a suri! Hemuşeni ki Baba tkvanik, mapoba tkva meçamus k̆ai uʒ̆onun. 33Malepe tkvani kogamaçit, sedek̆e meçit. Tkvanişeni na var bruʒ̆un kesepe, ʒapes uçodinu xazinape gavan. Hek varti mxiraces nanç̆inen, varti çiçis aç̆k̆omen. 34Xazina sotxa giğunan, guriti hek giğurt̆anoren.”
Toli Gonʒ̆k̆imeri Giğurt̆an
35“Got̆k̆apu şkas gok̆oreri, k̆andelepe dvineri giğurt̆an! 36Ç̆andaşen na goiktasen mance mutepeşi, moxtas do nek̆na nok̆ank̆as do var, nek̆na gonʒ̆k̆umuşeni na çums ç̆k̆orepesteri ivit. 37Şana bedi mutepeşis, mance muşi moxtasşk̆ule k̆uʒxu na renan ç̆k̆orepe! Mtinala muşi giʒ̆umert, mance mutepek şkas got̆k̆apu guk̆orasen, ç̆k̆orepe magidas doxunasen do hentepes uxezmet̆asen. 38Mancek serigverdişk̆ule varnati çkva yano moxtuk̆oti, gok̆uʒxineri na z̆irasen ç̆k̆orepe, e şana bedi mutepeşis!
39Hati giçkit̆an, oxormances mxirace nam saatis mulun kuçkit̆uk̆o, oxori muşi var goxirapams. 40Tkvati ek̆ak̆arxeri çvit, hemuşeni ki K̆oçişskiri umeşvenu moxtasen!”
41P̆et̆rek, “Mance çkimi”-ya, “Ham memgapura çkunişeni mip̆aramitamti, varna irişenii?”-ya.
42Mancekti haşo uʒ̆u: “Ora muşi moxtaşk̆ule kovali meçamuşeni mancek ç̆k̆orepes na geludginu ʒ̆ori do nosiari metele min oren? 43Mance muşik oxorişa goiktasşk̆ule dulya muşis na z̆irasen hem ç̆k̆oris, şana bedi muşis! 44Mtinala muşi giʒ̆umert, mance muşik hemus mteli malepe muşişi jin xeʒala meçasen. 45Mara hem ç̆k̆orik muşeburaşi, ‘Encami mance çkimişi moxtimuşa dido ora ren’-ya tkvas do majura ç̆k̆orepe do xalağepe obaxus kogyoç̆k̆asna, oç̆k̆omas, oşvas do ğvinişumeri kort̆asna, 46mance muşik, hea çkar na var çumert̆u ar ndğas, umeşvenu ar saatis moxtasen do ok̆oç̆k̆orasen. Heati ucerupe k̆ala ar dodvasen.
47Mance muşişi guris kuçkin do na var uxazirams, guri muşi na var uxenams ç̆k̆orik dido biga ç̆k̆omasen. 48Mara, k̆afule obaxoni ar dulya daxenuna, hemuk mʒika biga ç̆k̆omasen. Mis dido niçinu hemus dido ik̆vandinasen. Mitxas dido emaneti niçuna, hemuşen çkva dido ik̆vandinasen.
49Ma kianaşa daçxuri geonuşeni mopti. Ar t̆axa, ham daçxuri ast̆a-xolo aduk̆o! 50Mexondinuşi ar vaft̆izi goʒ̆omiz̆in. Ham vaft̆izi bivaşakis dido p̆ʒ̆orare! 51Dixaşa misoba moonuşeni mopti dogaʒ̆onesi? ‘Var’-ma giʒ̆umert, ma ok̆ortuşeni mopti. 52Haʒ̆işk̆ule ar oxoris xut şuri korenna, jur do sumi, sum do juri ok̆irtasen. 53Baba skiri muşi k̆ala, skiri baba muşi k̆ala, nana osuri muşi k̆ala, osuri nana muşi k̆ala, damtire nusa muşi k̆ala, nusa damtire muşi k̆ala ok̆iʒ̆k̆asen.”
Novelepeşi Oxoʒ̆onu
54Yesok xalk̆is hantepeti duʒ̆u: “Gyulva k̆ele ar mp̆ula na yulun z̆iratşk̆ule ‘Zifona mulun’-ya zop̆ont do heşoti iven. 55Omjoratişen ixi na bars z̆iratşk̆ule ‘Dido çxvapa ivasen’-ya zop̆ont do heşoti iven. 56E jurp̆iconepe! Dixaşi do ʒaşi oʒ̆k̆omilute mutxape oxoʒ̆onamt do haʒ̆ineri oras mu oxiʒ̆onen, muşeni var gamognamt?
57Ʒ̆ori mu ren, hayaşi k̆arari muşeni tkva var mek̆vatumt? 58Xasimi tkvani k̆ala xakimişa ulurtna p̆a gzas hemu k̆ala ozaduşeni içalişit! Varna hemuk, si xakimişa mendaktorums. Xakimik gardianişi xes komekçams, gardianikti cixas komolak̆t̆omers. 59Si giʒ̆umer, na eiʒxit k̆at̆a abazi var meçatşakis hekole var gamogalanen.”
Trenutno odabrano:
Luk̆a 12: LZZ
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Laz Luke © Bible Society in Turkey (Kitabı Mukaddes Şirketi) 2020
