Ala Kalɔ Buse 40
40
Ƒarao Ntɛ Ku Adila Lɛlɔ Banune Bégye Kɔna
1Uwi ɔdi kemmo na Yoseƒ ɔtɔ bɔkya kama ni, Egyipteƒuɔ ɔga ɔmɛni benengu akɔ inyɔ badi lɛnɔ bábakya-ma ɔtɔ, ɔsika báƒiɔ Ɔga Ƒarao. Unwi ɔdi ukyuli ɔni mɔɔda ɔga ɔmɛni ntɛ bɔni na ɔɔní teesienku-nwu. Na unyɔdi ɔdi ukyuli ɔni muuƒí nwuna bodobodo. 2Bɔƒiɔ bɔni na báƒiɔ mmɔ ni, bɔ́ya na Ɔga Ƒarao úti kɔnyi geen na bana lɛlɔ. 3Ɔmmɔ ɔ́su ɔ́ya na bákya-ma ɔtɔ na bagyumanane bammɔ ƒui unengu kesii. Na mmɔ kani na bákya Yoseƒ lɛnɔ ɔtɛ. 4Ɔgyumanane unengu ɔmɛni úti-ma ɔ́kya Yoseƒ kalɔ ka utaanu-ma lɛlɔ.
Ka bákya ɔtɔ mmɔ emeyi adi kama ni, 5Ɔga Ƒarao ntɛ lɛlɔ ɔnune ku bodobodo lɛlɔ ɔnune bani na bákya ɔtɔ mɛni bégye ana adi na limeyi linwi lɛlɔ. Na ɔdi biala kɔna kɔni na úgye kɔdanku kalɔ budie bamba.
6Ka kadi kégye na Yoseƒ úbo ɔnii ubanu-ma ni, ɔ́nu ɔ́ti ka lɛla lɛdi liikpóku-ma. 7Ɔmmɔ ɔsu úye benengu bani na anwu ku-ma ƒui ntɛ ɔtɔ mmɔ na bana ɔtɔlati kesii mmɔ ɔnini, “Bi ɔsu mɔɔnu aani si lɛlɔ lilayɔ-mii ɔmwi kaduɛ tɔ?”
8Amu na bédie kenye banini, “Bula inyɔ ƒui búgye ana ani na bútakɛ ukyuli ɔni nedie-nya kalɔ ute-bu.”
Mmɔ na Yoseƒ úye-ma ɔnini, “Bɛɛɛgyi ka Unwoti Katɔti muudie ala kalɔ? Bɛsu-mi bina ana ani na bígye.”
9Ka ɔ́su lɛni ni, ukyuli ɔni mɔɔnu ɔga ntɛ lɛlɔ mmɔ ɔ́sɔku kɔna kɔni na úgye mmɔ ɔ́su Yoseƒ ɔnini, “Lígye kɔna ka ni, kɔdingyii kɔdi kunye-mi anumi. 10Na kugyii kɔmmɔ kubo kɔgba ɛtɛ. Ka kɔgba kɔmɛni kúdie anumi kani na evete ammɔ ábi lɛlɔ, na kugyii kɔmmɔ kɔ́tu yuu, na kúwi anwula, na anwula ammɔ ábla ebi ku aboyo aboyo. 11Na ɔƒɛni ni, Ƒarao ɔɔƒɛɛ ɔni kemmo na ɔɔní ntɛ ɔkya-mi lɛkɔkɔ. Na lídie ebi ammɔ na lɛ́mana ntu bɔmmɔ líwi ɔɔƒɛɛ ɔmmɔ kemmo na líti lite-nwu.”
12Ka ɔ́wɔlɔ ni, Yoseƒ ɔ́su-nwu ɔnini, “Kɔna kɔni na égye kalɔ ndi ka kugyii kɔmmɔ kɔgba ɛtɛ kɔni na ánu ni, kunye kúte emeyi atɛ. 13Ɔƒɛni na emeyi atɛ kemmo ni, Ƒarao ɔdubɔtala kɔƒa ƒula anumi na ɔsɔku-ɔ unyene ƒula kabla kenye. Na adubuti ɔɔƒɛɛ akya Ƒarao kɔnu aani kalɛ kani na átaabla uwi ɔni na átaanu-nwu ntɛ lɛlɔ. 14Nsu si ala asɔ ábatɛ éte-ɔ kalɛ mɔɔsu mɛni ni, na enyimo na abla ami lɛnɔ lɛƒɔndia lɛdi. Mɔɔyɔ́ ka alɔ-mi lɛnyi buni ete Ƒarao na bada-mi bedie ɔtɔ ɔni na bákya-mi mɛni kemmo. 15Bunye na bénye-mi lɛlɔ bákpanku-mi básiku bula Hebri kadi kalɔ lɛlɔ béboku mɛni. Na mɛni lɛnɔ ńtabla lɛla lɛni naya na beti-mi babakya kesii kani na ntɛ mɛni.”
16Ɔmmɔ kama ka bodobodo uƒine ɔmmɔ únu kalɛ na Yoseƒ údie ɔnwani kɔna kalɔ na kɔdanku ala abuni ni, anwu lɛnɔ ɔ́su Yoseƒ ɔnini, “Ami lɛnɔ lígye kɔna ka nti kɔgyigyɛ ɛtɛ. 17Na kuna kemmo ni, bodobodo ɔni béƒi bákya kɔgyigyɛ kemmo béselaku Ƒarao ɔkya, nsu baasɛ bádi-nya bédie kɔgyigyɛ kɔmmɔ kemmo na mina lili.”
18Amu na Yoseƒ ɔ́su-nwu ɔnini, “Kɔna kɔni na égye ni, aku lɛnɔ kɔɔtina ka kɔgyigyɛ ɛtɛ kɔmmɔ kunye kute emeyi atɛ. 19Na emeyi atɛ ammɔ kemmo ni, Ƒarao ɔdubɔya na badu-ɔ. Na badubuti-ɔ baƒala kugyii lɛlɔ na baasɛ baduli ƒula lɛna bebweli kede kede.”
20Ɔƒɛni limeyi lɛtɛdi lɛmmɔ ni, lɛdi Ƒarao lɛwɔmeyi. Anwuɔsu ɔ́ya na bánwa adila na ɔ́lɔ nwuna benengu ƒui ka babadi limeyi bete-nwu. Na kasakɔ mmɔ ni, Ƒarao ɔ́ya na bákpanku ntɛ ku bodobodo lɛlɔ banune bammɔ bébenyene bana benengu bakladi bammɔ ƒui anumi. 21Na ɔ́ya na ukyuli ɔni mɔɔnu-nwu ntɛ lɛlɔ ɔ́sɔ úsie úténye nwuna kabla kenye. 22Na bodobodo lɛlɔ ɔnune anwu ni, ɔ́ya na bákya-nwu ɔbuli ɔkwɛ báƒala ugyii lɛlɔ kalɛ kani na Yoseƒ údie ana ammɔ kalɔ úte-ma.
23Ka ala amɛni ƒui ébo ábavi lɛni ni, ntɛ lɛlɔ ɔnune ɔmɛni útenyimo Yoseƒ aani kalɛ na ɔ́su-nwu. Mmomu ɔ́yiƒala-nwu.
Trenutno odabrano:
Ala Kalɔ Buse 40: lef
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.