Ala Kalɔ Buse 38
38
Yuda Ku Tamar Lɛlɔ Kɔtɛ 1Na uwi ɔmmɔ kemmo ni, Yuda ɔ́tɔlɔ nwuna banwani kudɔ úsie ɔnana ɔdi baalɔ banii Hira kudɔ na Adulam ɔma kemmo. 2Mmɔ na Yuda útánu Kanaanni ɔnana ɔdi baalɔ banii Sua ubidi ulekubi. Yuda úti uleku ɔmɛni na úsie-nwu kudɔ. 3Ulekubi ɔmɛni úbada kaƒɔ na ɔ́wɔ ɔnanabi. Na ɔ́sia-nwu lɛnyi ɔnii Er. 4Ɔ́sɔ úbada kaƒɔ ɔmmɔ kama na ɔ́wɔ ɔnanabi bamba ɔni baalɔ Onan. 5Kɔtɛdi ka ɔ́sɔ ɔwɔ ni, ɔ́wɔ ɔnanabi. Na baalɔ anwu banii Sela. Na ubi ɔmɛni ni, ɔma ɔni baalɔ banii Kesib kemmo na útáwɔ-nwu.
6Na uwi ɔmmɔ kemmo ni, Yuda úti uleku úte ubidi udeedi ɔni ndi Er. Na ulekudi ɔmmɔ baalɔ Tamar. 7Nsu Er ablala na Unwoti Katɔti anumi ni, ɔɔtina ka ubo kalala. Ɔmmɔ ɔsu ni, Unwoti Katɔti ɔ́ya na Er úkpi.
8Ɔmmɔ kama ni, Yuda ɔ́su ubidi unyɔdi ɔni ndi Onan ɔnini, “Sie na awɔ ku ƒula ɔnwani ulekudi bɛtɛ na abla kalɛ na ɔdi ka abla ete-nwu aani ɔgyani ɔnwani kalɛ. Na awɔ ku-nwu bɛwɔ bebi na ƒula ɔnwani ɔni nékpi lɛnyi kemmo.” 9Ɔƒɛni ni, Onan ɔgyi ka si anwu ku ɔnwani ulekudi ɔmmɔ báwɔ ni, bebi bammɔ baaadi anwu ɔlati badi. Ɔmmɔ ɔsu si baatɛ na lɛlɔ ntu bɔdubo-nwu ni, na ɔ́ta uleku ɔmmɔ lɛlɔ na ntu bɔmmɔ buwi kalɔ kalɛ na uleku ɔmmɔ ulada kaƒɔ na ɔwɔ ute ɔnwani. 10Na Katɔti ɔ́nu ka lɛla lɛni na Onan lɛnɔ ɔɔbla mɛni lɛdi kalala na nwuna anumi ɔsu ɔ́ya na anwu lɛnɔ úkpi.
11Ala amɛni bɔlɛ lɛni kama ni, Yuda ɔ́su Tamar ubidi ukpinele ɔmɛni ɔnini, “Teesie na etélie ƒ'ɔti kaduli aani ukpinele wetédu ka mina ubidi ukplodi Sela ɔ́bi lɛlɔ.” Nsu geen ni, Yuda ɔ́su lɛlɔ ɔnini, “Ɔƒɛni kalɛ Sela lɛnɔ wekpi aani nwuna banwani kalɛ.” Anwuɔsu Tama lɛnɔ ɔ́tɔlɔ úsie ɔti kaduli.
12Na uwi gyɔlɔɔ ɔdi kama ni, Yuda ulekudi ɔni ndi Sua ubidi ɔni na úti mmɔ lɛnɔ úbekpi. Amu na uwi ɔni na Yuda úbalɛ nwuna likpinele uwi kpakplaa ɔmmɔ kemmo ni, ɔ́ta úsie Timnat ɔma kemmo kesii kani na nwuna kabla bablane bani mɔɔbla baƒonu linwini bukulo kabla bakya. Na nwuna ɔkpana ɔni baalɔ Hira na ɔ́si Adulam mmɔ lɛnɔ ɔsiaku-nwu.
13Uwi ɔmmɔ kemmo ni, ukyuli ɔdi úbo na ɔ́su Tamar ɔnini, “Ƒula ɔgyanti úti ala úsela Timnat na betékulo nwuna baƒonu linwini.” 14Amu na ɔ́babla na ɔ́ta útédie likpinele adala úse. Na úti lɛduni lɛdi úbi lili ku anumi na ɔ́vumana lɛlɔ. Na ɔ́ta úsie uli Enaim ɔma kabanye na ulu ɔni néti úsela Timnat lɛlɔ. Tamar ukpinele ɔmɛni ɔ́nu ɔ́ti ka ina ka Sela ɔ́ɔbi lɛlɔ na ɔkana na uti-nwu na uwi ɔmmɔ kemmo ni, nwuna ɔgyanti Yuda útabasu-nwu tɔ lɛla lɛdi úti úbedu uwi ɔmmɔ kemmo na útélie Sela kudɔ aani ulekudi.
15Amu ka Yuda úbedu mmɔ na ɔ́nu-nwu ni, ɔ́bu ɔnii ɔyalɛ ɔdi na ɔdi, ɔsika úti lɛduni úbi anumi. 16Na ka útanu-nwu útati ɔnii ubidi ulekudi na ɔdi ɔsu ni, ɔ́ni úde-nwu na útásu-nwu ɔnini, “Bo na abatɛ-mi kudɔ.”
Amu na ubidi ule ɔmmɔ lɛnɔ úye-nwu ɔnini, “Na bi na adubo-mi bute si mabatɛ-ɔ kudɔ?”
17Mmɔ na Yuda údie kenye ɔnini, “Ndubuti ese ɔkɔdi ɔdi limene-ɔ lɛsiku mina bebuo akɔ.”
Amu na uleku ɔmmɔ lɛnɔ ɔ́sɔ úye-nwu ɔnini, “Adubuti lɛla lɛdi enyene lɛlɔ kama eti atina ka adubɔdi ƒula litemi lɛni na aasu mɛni lɛlɔ?”
18Mmɔ na Yuda úye-nwu ɔnini, “Bi na aayɔ́ ka liti linyene lɛlɔ kama?”
Amu na uleku ɔmmɔ ɔ́su-nwu ɔnini, “Lɛla lɛni na eeti teese ƒula kunweni ku ala bamba likpo ku kabuli kani nda-nwu lɛlɔ ku ƒula ugyii ɔdadi.” Ɔmmɔ ɔsu Yuda lɛnɔ únu kalɔ na úti ala ammɔ úte-nwu na anwu ku-nwu bátɛ na úbada kaƒɔ lɛnɔ. 19Na ka Yuda ɔ́tɔlɔ ni, ubidi ule ɔmɛni ɔ́sɔ útávumana adala na úti nwuna ukpinele ala ammɔ kani ɔ́kya.
20Na kalɛ na básu bése ɔsu ni, Yuda úti ese ɔkɔdi ɔmmɔ úte nwuna ɔkpana Adulamni ɔmmɔ ɔnii uti uboku ɔyalɛ ɔmmɔ na ɔƒɔ ala ani na úti únyene lɛlɔ kama mmɔ uboku-nwu, nsu nwuna ɔkpana ɔmmɔ útanu-nwu. 21Anwuɔsu na úye banana bani nli amadɔ mmɔ ɔnini, “Wɛ na ɔyalɛ ɔni na búbanu na Enaim ulu lɛlɔ na kabanye mɛni ɔ́vi?”
Amu na bédie kenye banini, “Ɔyalɛ ɔdi ulelie mɛni.”
22Ɔmmɔ ɔsu ɔ́sɔ únwini úsie na útásu Yuda ɔnini, “Ńtanu ɔyalɛ ɔmmɔ. Na lɛnɔ ni, banana bani nkya amadɔ mmɔ básu-mi ka ɔyalɛ ɔdi lɛnɔ útakya mɛni kudii.”
23Mmɔ na Yuda ɔ́su-nwu ɔnini, “Ya na uleku ɔmmɔ uti ala ammɔ ƒaa. Si ɔɔɔdi lɛni ni, bɔdubo lɛmala bunwini na bekyuli anumi. Na ami lɛ́nu ka lɛ́bla lɛ́siaku bula katɛmise lɛlɔ nka. Na bɔnu na átanu-nwu.”
24Ɔbla aani abuli atɛ kama ni, bekyuli badi bábasu Yuda banini, “Bɔ́nu ka ƒ'ubidi ule Tamar ɔ́ƒiɔ, ɔsika úti lɛlɔ ɔ́bla ɔyalɛ. Na ɔmmɔ ɔsu ɔda kaƒɔ ɔƒɛni.”
Mmɔ na Yuda ɔ́su-ma ɔnini, “Bɛlɛku-nwu biboku na bɛkyula-nwu na ukpi.”
25Ɔmmɔ ɔsu ka bététiku-nwu badububoku ni, ɔ́tala ukyuli ɔ́kya nwuna ɔƒanti Yuda ɔnini, “Ukyuli ɔni mbo ala ani na nda mɛni nákya-mi kaƒɔ. Anwuɔsu mɔɔwia ka asia-nya anu kaduɛ anu si adubɔnu ati ukyuli ɔni mbo lɛla lɛni na beesé kunweni ku ala bamba likpo mɛni ku kabuli kani nda-nwu lɛku ku ugyii ɔdadi ɔmɛni lɛlɔ.”
26Yuda ɔ́nu ala ammɔ ɔ́ti na ɔ́su ɔnini, “Uleku ɔmɛni use siin utulo ami ɔlati, ɔsika ami néteti-nwu ńtete mina ubi Sela na uti.” Na ɔmmɔ kama ni, anwu ku uleku ɔmmɔ básɔ bétesie lɛlɔ kudɔ.
27Ka uwi ɔni na ɔwɔ údu ni, bánu báti ka bebi inyɔ badi nkya-nwu kaƒɔ. 28Na kawɔlɔkɔ ni, ubi unwi údie kɔnu ɔ́lɛku. Na uleku ɔni mɔɔƒɔ́ kɔwɔ mɛni úti unwo kabuli kegyiedi kadi úbo ɔ́da-nwu kɔnu na ɔ́su ɔnini, “Ubi ɔmɛni náka bɔlɛ.” 29Nsu ka ubi ɔmmɔ ɔ́sɔku kɔnu ɔ́kya uni lɛlɔ kemmo ni, ubi unyɔdi mmomu náka bɔlɛ ka ɔ́wɔ-ma. Anwuɔsu na kɔwɔ ɔƒɔne ɔmmɔ ɔ́su ɔnini, “Ɔmɛni anwu bɔnwanɛ na ánwanɛ lɛlɔ álɛ.” Na básia-nwu lɛnyi banii Peres. 30Ɔmmɔ kama asa na ɔnwani ɔni kɔnu na lɛduni ligyiedi lɛda úbalɛ. Na básia anwu lɛnyi banii Sera.
Trenutno odabrano:
Ala Kalɔ Buse 38: lef
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.