Ala Kalɔ Buse 37
37
Yoseƒ Úgye Kɔna
1Kanaan kalɔ kani kemmo na Yakob ɔti ɔ́kya ni, mmɔ kani na Yakob lɛnɔ úlie. 2Yakob lɛlɔ kɔtɛ na bɔdubo bunu mɛni.
Uwi ɔmmɔ kemmo ni, Yoseƒ ɔdi okloƒu ɔni náƒɔ akwa leevu-maatɛ. Na bebuo lɛlɔ na útaanu anwu ku nwuna banwani. Na bana ƒui bási beleku inyɔ bani na ɔti úti kaƒɔ kemmo. Beleku bammɔ ndi Bilha ku Silpa. Nwuna banwani bamɛni ɔbladu ɔɔɔdia ɔsu ni, úbasu ɔti ngba bɔni na belie.
3Ɔƒɛni ni, Yoseƒ ɔti Israel ni, ɔ́ɔbi lɛlɔ geen asa na ɔ́wɔ Yoseƒ ɔsu ni, ɔɔyɔ́ Yoseƒ geen. Ɔmmɔ ɔsu ni, ɔ́ya na bédi awu gyɔlɔɔ ɔdi ɔni mɔɔdia bɔnu geen béte Yoseƒ. 4Ka nwuna banwani bánu báti ka bana ɔti ɔɔyɔ́ Yoseƒ teetulo-ma ɔsu ni, balátɛmiku-nwu ku lɛdi buɛɛ munu munu. Na beekisi-nwu.
5Yoseƒ úgye kɔna kɔdi. Na ka ɔ́su nwuna banwani kɔna kɔmɛni ni, ɔ́ya na basɔ beekisi-nwu teebu. 6Limeyi lɛdi ni, ɔ́su nwuna banwani ɔnini, “Bise atu na binu kɔna kɔni na lígye. 7Lígye kɔna ka bunye bɔɔnwa kamu teenyimi esu esu teewi. Kɔnakunwi ni, mina lisu lɛ́ta línye ligeen. Na amii adi ébo ábaka ámana ami ɔdi. Na áyɔlɔ eli ákya ami ɔdi kalɔ.”
8Mmɔ ni, nwuna banwani béye-nwu banini, “Bɔkali na ada anii awɔ ndubo-bu lɛlɔ butaadi?” Ɔmɛni ɔsu bukisi bɔmmɔ bɔ́kɔ katɔ búbu na kɔna kɔni na úti ɔ́su-ma ɔsu.
9Na ɔmmɔ kama ni, ɔ́sɔ úgye kɔna kɔdi na ɔ́sɔ ɔ́su nwuna banwani ɔnini, “Bɛsɔ binu kɔna bamba kɔni na lígye. Lɛ́nu ka ɔƒɛ ku kɔbuli ku ayabi leevu-unwi eeboku lɛlɔ kalɔ teete-mi.”
10Ka útásu ɔti lɛnɔ kɔna kɔni na úgye na nwuna banwani anumi ni, ɔti ɔ́dɔnku-nwu na ɔ́su-nwu ɔnini, “Bi kɔna na égye mɛni. Litemi geen na lɛdi mɛni ka ƒ'ini ku ƒula banwani ku ami ɔlati bɔdubo lili kalɔ bɔkya bute-ɔ?” 11Ɔmmɔ ɔsu nwuna lɛlɔ líbo liigyie nwuna banwani anumi, nsu ɔti úti litemi lɛmɛni ɔ́kya kasusu kemmo.
Yoseƒ Banwani Béti Yoseƒ Béye
12Na uwi ɔmmɔ kemmo ni, Yoseƒ banwani bákpanku bana ɔti bebuo bésienku kadikɔ na alakpi akɔ na Sekem kudɔ. 13Na Israel ɔ́su Yoseƒ ɔnini, “Agyi kesii kani na ƒula banwani bákpanku bebuo bésienku kadikɔ na alakpi akɔ na Sekem kudɔ. Bo, na lɛtala-a bana kudɔ.”
Amu na údie kenye ɔnini, “Ati, ngyi mmɔ kaduɛ.”
14Mmɔ na ɔ́su-nwu ɔnini, “Sie na atánu si ƒula banwani ku bebuo bammɔ ƒui bakya kaduɛ na lɛla lɛdi lítabla ɔdi. Na asɔ enwini ebo abasu-mi.” Amu na údie-nwu ulu ɔ́si Hebron Ɔkwalɛ mmɔ.
Ka Yoseƒ údu Sekem mmɔ ni, ɔkya ɔɔka taamana alakpi akɔ mmɔ, 15na ukyuli ɔdi úbanu-nwu. Mmɔ na ukyuli ɔmmɔ úye-nwu ɔnini, “Bi na aawia?”
16Yoseƒ údie kenye ɔnini, “Mina banwani na mɔɔwia. Buvele, ánu kesii kani na béti bebuo bésienku kadikɔ?”
17Mmɔ na ɔnana ɔmmɔ ɔ́su-nwu ɔnini, “Báatɔlɔ mɛni. Na línu lɛnɔ ka baasu banini, ‘Bɛya na buteesie Dotan kalɔ kemmo.’ ”
Ɔmmɔ ɔ́su ni, Yoseƒ ɔ́sia nwuna banwani kama na útánu-ma na Dotan kudɔ mmɔ. 18Nsu ama báka-nwu bɔnu ka ɔkɛ ɔgyu ɔdubo. Na asa na webedu-ma kudɔ ni, báasa lili ka badu-nwu.
19Ka ɔ́ni úde-ma ni, básu lɛlɔ banini, “Bɛɛnu ukyuli ɔni muugyé ana mmɔ.” 20Na básu lɛnɔ banini, “Bibo na bɔdu-nwu na bubo-nwu bɔkya abiɔ amɛni ɔdi kemmo. Na bɔsu ka eƒiebuo ɔdi néƒie-nwu ɔ́kun. Na bɔsɔ bɔnu kalɛ na nwuna ana ani na úgye mmɔ adubɔbla kabla.”
21Ka Ruben únu kenye kamɛni ni, ɔ́sia ulu biala lɛlɔ ka údie-nwu ngba na bana enu kemmo. Ɔmmɔ ɔsu ɔ́su-ma ɔnini, “Bitaya na bubile-nwu ngba. 22Na bitaya na buwi ubugya kalɔ. Bibo-nwu bɛkya abiɔ amɛni ɔdi kemmo na ketele mɛni. Nsu bitetuku-nwu ulu bamba ɔdi lɛlɔ munu munu.” Ruben kasusu ndi ka ɔɔsu-ma lɛni na kama na udie-nwu ɔsɔku usienku bana ɔti.
23Ɔmmɔ ɔsu ka Yoseƒ úbedu-ma kudɔ ni, ɔkya nwuna awu gyɔlɔɔ ɔni náƒɔ kuye. Amu na bédie-nwu awu ɔmmɔ. 24Na béti-nwu bébo bákya libiɔ lɛni kemmo na ntu buuuwi mmɔ kemmo.
25Uwi ɔni na bélie kalɔ banii baadi ni, bánu ka bebuo ala betine beti ala pii adi badubo. Na badi Ismael kadi bekyuli bani nási Gilead. Bebuo bamɛni béti kutu akyala lidu pii ku ala awɛɛdi ƒɛƒɛɛ bésela Egyipte kalɔ lɛlɔ.
26Mmɔ ni, Yuda ɔ́su nwuna banwani ɔnini, “Bi na bɔdubo bɔkɛ si bɔ́du bula ɔnwani na búti ala búbi nwuna ubugya? 27Bɛya na buti-nwu buye bute Ismael kadi bekyuli bamɛni na abu buleti bula enu bulabla-nwu lɛla lɛdi. Kavumana kadi keeebo abu ku-nwu ntɛ, bula ɔnwani kani na ɔdi.” Amu na nwuna banwani bammɔ lɛnɔ bénu kalɔ.
28Ɔmmɔ ɔsu ka Midianƒuɔ beyedine bamɛni badaku bana kudɔ budu ni, báni Yoseƒ bálɛku ubu ɔmmɔ kemmo. Na béti-nwu béye béte-ma. Na bádi-nwu kuye sika ɔƒualadi ebi aavlanyɔ. Na Midianƒuɔ bammɔ béti-nwu bésienku Egyipte.
29Ka Ruben únwini úsie libiɔ lɛmmɔ kɔtu na ɔ́nu ka Yoseƒ ɔsɔ uuubo ubu ɔmmɔ kemmo ni, ɔdi lɛla lɛni nékpoku-nwu geen ɔsu ɔ́ni awu ɔni na ɔkya ɔ́bwɛ kalɛ na ama baabla. 30Na úsie nwuna banwani kudɔ útasu-ma ɔnini, “Ɔnamu ɔmmɔ ɔsɔ uuubo mmɔ! Dɛ mabla?”
31Ɔmmɔ kama ni, nwuna banwani bammɔ bádu ese ɔdi. Na béti Yoseƒ awu ɔmmɔ bákya ubugya ɔmmɔ kemmo. 32Béti awu ɔbuni ɔmmɔ bésienku bana ɔti na bátásu-nwu banini, “Awu ɔmɛni na bɔ́kɛ ka bɔ́si bɔdubo. Sia-nwu anumi kaduɛ na anu si ƒ'ubidi awu na ɔdi.”
33Amu ka bana ɔti ɔ́nu awu ɔmmɔ ni, ɔ́su ɔnini, “Mina ubi awu na ɔdi! Eƒiebuo ɔdi nádu Yoseƒ na ɔ́duli-nwu ɔ́kun lɛni!”
34Na litemi lɛmmɔ líkpoku-nwu geen, anwuɔsu ɔ́ni nwuna awu ɔ́bwɛ. Na úti adikpi únyimi na úwulo ubidi emeyi pii. 35Yakob bebi bananabi ku belekubi ƒui bébo bábasia-nwu kɔnu, nsu útada buwulo útaya. Na ɔ́su ɔnini, “Lɛla lɛmɛni lilása-mi buduo. Na ndubo buwulo laa ntéduo kaƒiɔtɔ kemmo na mina ubi kudɔ.” Ɔmmɔ ɔsu úwulo ubidi ɔmmɔ geen.
36Na uwi ɔni kemmo na Yakob ɔɔbla ɔmɛni ƒui ni, Midianƒuɔ bamɛni béeti Yoseƒ béye bete Egyipteni ɔni baalɔ Potiƒar na ɔdi Ɔga Ƒarao benengu akɔ unwi ɔni mɔɔnu bekyuli bani mɔɔgyumana ɔga unengudi lɛlɔ.
Trenutno odabrano:
Ala Kalɔ Buse 37: lef
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.