LUKA 22
22
Ko te Pulepulega Masei ke Tamate a Iesu
(Mata 26.1-5; Male 14.1-2; Ioa 11.45-53)
1 #
Eso 12.1-27
Ko pili ki te 'Kaiga o Falaoa e se Faka'fete e fakaigoa ki te Paseka. 2Kae ne salasala ne faitaulaga sili mo faiakoga o te Tulafono, ne auala e tamate ei ne latou a Iesu; me ko ma'taku latou i te fenua.
Ko Lotomalie Iuta o Fakalata a Iesu
(Mata 26.14-16; Male 14.10-11)
3Ne ulu atu a Satani ki a Iuta tela e igoa ki te Sekala, ko ia se tokotasi o te tinoagafulu mo te tokolua. 4Ne fanatu a Iuta o fai'pati mo te faitaulaga sili mo takitaki o tino tausi o te Fale Tapu, ki se togafiti e puke ei ne latou a Iesu. 5Ne fia'fia latou ki ei, kae ofo atu o 'togi ki a ia tupe. 6Ne lotomalie ki ei Iuta, tela alamati ei a ia ki se taimi e faigofie o fakalata ne ia a Iesu ki a latou, kae ke se iloa ne tino.
Ko Fakatokatoka a Iesu o kai i te Paseka
(Mata 26.17-25; Male 14.12-21; Ioa 13.21-30)
7Ko oko mai te aso o te 'Kaiga o Falaoa e se Faka'fete, tela e tamate ei te tama mamoe o te Paseka mo fai te taulaga. 8Ne uga atu ne ia Petelu mo Ioane, kae fai atu, “Olo o fakatoka te Paseka mo tatou, ke 'kai ei tatou.” 9Ne fesili mai laua ki a ia, “Tefea te koga e manako koe ki ei, ke fakatoka ne maua?” 10Muna a Iesu: “Kiloke! Ka oko atu koulua ki te fa'kai, ka fetaui koutou mo te tagata e amo ne ia te fagukele vai. Tau'tali i a ia ki te fale e ulu ki ei, 11ko fai atu ei koulua ki te tino e o ia te fale, ‘Muna a te Faiakoga ki a koe, tefea te potu e tali ei malo, ke 'kai ei matou i te Paseka mo oku soko?’ 12Ka fakasino atu ei ne ia ki a koulua te potu lasi i luga, ko oti ne teu, ko fakatoka ei ne koulua.” 13Ne olo atu laua, maua a mea katoa kola ne taku atu ne Iesu, fakatoka ei ne laua a te 'kaiga o te Paseka.
Ko te 'Kaiga a te Aliki
(Mata 26.26-30; Male 14.22-26; 1Koli 11.23-25)
14I te okoga ki te taimi o te 'kaiga, ne nofo Iesu i tena nofoga i te taipola, fakatasi mo apositolo. 15Ne fai atu a ia ki a latou, “Ne manako malosi au o kai i te Paseka fakatasi mo koutou, ka koi tuai au o logo'mae! 16Me i a au e fai atu ki a koutou, ka se toe kai au ki ei, ke oko ki te fakakatoatoaga i te Malo o te Atua.” 17Ne puke a ia ki te ipu, ko fakafetai, kae fai atu, “Puke ki te ipu tenei; kae fakasolo i a koutou, 18me i a au e fai tonu atu ki a koutou, Ka se toe inu eiloa au ki te sua o te vine, ke oko eiloa ki te oko mai o te Malo o te Atua.” 19Ne puke a ia ki te falaoa, ko fakafetai, ko tofitofi, kae avatu ki a latou, ana muna, “Ko toku foitino tenei, ko tuku atu mo koutou; ke fai mo fakamanatuga ki a au.” 20#Iele 31.31-34 Ne pena foki o puke ki te ipu i te otiga ne 'kai, ko fai atu penei, “Ko te ipu tenei o te feagaiga fou i toku toto, ko fakamaligi mo koutou.#22.20: I nisi lomiga e seai iei ne pati o te faipatiga a Iesu mai tua ifoE tenei a toku foitinoi te foaitau e 19, mo te foaitau katoa o te 20.
21 #
Sala 41.9
“Kae kiloke! A te tino tela e fakalata ne ia au, tenei e 'kai fakatasi maua. 22Me mate eiloa au te Tama a te Tagata, e pela eiloa mo te loto o te Atua: kae kalofa eiloa i a ia tela e fakalata ne ia au.” 23Ne fakatau fesilisili ei latou i a latou eiloa, me ko oi te tino o latou ka fai ne ia a te mea tenei.
Ko te Fakakinauga me ko oi e Sili
24 #
Mata 18.1; Male 9.34; Luka 9.46 Ne fakataufinau foki latou me ko oi te tino o latou e sili. 25#Mata 20.25-27; Male 10.42-44 Ne fai atu a ia ki a latou, “A tupu o te lalolagi nei e isi ne olotou malosi o pule ki olotou tino; ka ko pule foki kona e fakaigoa ko ‘Taugasoa o Tino.’ 26#Mata 23.11; Male 9.35 Kae ke se pena koutou, ko te tino tela e sili i a koutou, ke fai a ia pela mo se tino tafa foliki, ko te tino tela e pule, ke fai a ia pela mo se tavini. 27#Ioa 13.12-15 Ko oi la e sili? Ko ia tela e kai, io me ko ia tela e laulau meakai? Ko ia tela e kai. Ka ko au nei, e i a koutou e pela mo se tavini.
28“Ne kau fakatasi foki koutou mo au i oku tofotofoga. 29E pela eiloa mo te tukumaiga ne toku Tamana te pule ki a au, e pela foki taku feagaiga ki a koutou. 30#Mata 19.28 Ka 'kai kae inu koutou i taku taipola i toku Malo, kae ka 'nofo foki koutou i nofoaga-aliki, o fakamasino atu matakaiga e sefulu lua o Isalaelu.”
Ko Folafola ne Iesu a te Fakafiti o Petelu
(Mata 26.31-35; Male 14.27-31; Ioa 13.36-38)
31“Simona, Simona, kiloke; a Satani ko manako ke lu ne ia a koutou e pela mo saito. 32Kae ne 'talo au mō koe, ko te mea ke se gata tou fakatuanaki, kae kafai ko toe mafuli mai koe, ke fakamalosi la ne koe ou taina.” 33Ne tali mai a Petelu, “Te Aliki, au ko toka ke olo tāua ki te falepuipui mo te mate!” 34Muna a Iesu, “Au e fai atu ki a koe e Petelu, ka koi tuai o tagi te moa i te po tenei, ka ko fakafiti fakatolu mai koe me se iloa ne koe au.”
Pausi Tupe, Taga, mo te Pelu
35 #
Mata 10.9-10; Male 6.8-9; Luka 9.3; 10.4 Ne fai atu a ia ki a latou, “I te taimi ne uga atu ei ne au koutou ke olo mo te seai ne pausi tupe, taga, io me ne taka, ne ma'tiva la koutou i se mea?” Olotou muna, “Ikai, e 'lei faeloa.” 36Ne fai atu a ia ki a latou, “Nei, so se tino e isi sena pausi tupe, io me se taga, e 'tau o ave sale ne ia, so se tino foki e seai sena pelu, e 'tau o fakatau atu tena gatu ke 'togi ei sena pelu. 37#Isa 53.12 Me i a au e fai atu ki a koutou, e 'tau o 'tu ki a au a muna konei o te Tusi, ‘Ne faitaugina foki fakatasi mo pagota, ’me ko taunu katoa a mea ne tusi ki a au.” 38Ne fai atu ona soko, “Te Aliki, kiloke, konei a pelu e lua.” Kae tali atu a ia, “Ko lava!”#22.38: Ko lava iei; io me Fakagata te mea nei.
Ko 'Talo a Iesu
(Mata 26.36-46; Male 14.32-42)
39I tena vauga ki tua, fanatu ei a ia ki te mauga o Olive e pela mo tena masani; tau'tali atu ei ona soko i a ia. 40Ko oko atu a ia ki te koga tena, fai atu a ia ki a latou, “A koutou ke 'talo i te mea ma oko mai te fakaosoosoga ki a koutou.” 41Ne fano a ia keatea mai i a latou, e pela mo te 'mao o te fatu ma pei, kae totuli ifo kae 'talo, 42ana muna, “Toku Tamana, kafai e loto koe ki ei, ave keatea te ipu tenei mai i a au, kae ke se fai la toku loto, ka ko tou loto.” 43Ne fakaasi mai a te agelu mai te lagi o fakamalosi ki a ia. 44I tena fi'ta malosi ko na gasolo atu ei a ia o 'talo; ka ko tena tauta e pela mo te motimotiga toto, e salisali ifo ki te laukele.)#22.44: I nisi lomiga e seai iei a te foaitau e 43-44.
45I te otiga ne 'talo, tu ake ki luga kae foki atu ki ona soko, maua atu ei latou e 'moe, me ko oko eiloa i te lotou fanoa'noa. 46Ne fai atu a ia ki a latou, “Se a te mea e 'moe ei koutou? Ala mai o 'talo, i te mea ma oko mai te fakaosoosoga ki a koutou.”
Ko te Pukega Fakapagota o Iesu
(Mata 26.47-56; Male 14.43-50; Ioa 18.3-11)
47Ka koi faipati atu a ia; kae oko mai te vaitino, e 'taki mai ne Iuta, ko te tokotasi o te tinogafulu mo te tokolua, kae ne vau ki a Iesu, ke sogi ne ia. 48Kae ne fai atu a Iesu ki a ia, “Iuta, e fakalata ne koe au te Tama a te Tagata ki te sogi?” 49I te laveaga ne latou kola ne fakatasi mo Iesu a te mea ka tupu, fai atu ei latou ki a ia, “Te Aliki, e a, ka fakaaoga ne matou a pelu?” 50Ka ko te sua tino o latou, ne kati ne ia te taliga o te tavini a te faitaulaga sili, to ei keatea te taliga fakaatamai. 51Muna a Iesu, “Ko lava!” Puke ei a ia ki te taliga o te tagata tena o faka'piki.
52Ne faipati atu a Iesu ki faitaulaga sili, mo takitaki o tino tausi o te Fale Tapu, mo toeaina kola ne o'mai ki a ia, “Ko o'mai koutou mo pelu mo pago e pela mo se pukega o se tino faomea? 53#Luka 19.47; 21.37 Ne 'nofo sale eiloa tatou i te Fale Tapu i aso katoa, e seki oko mai eiloa otou lima ki a au; ka ko te otou taimi tonu eiloa tenei, me i te malosi o te pouliga ko pule.”
Ko Fakafiti Petelu ki a Iesu
(Mata 26.57-58,69-75; Male 14.53-54,66-72; Ioa 18.12-18,25-27)
54Ne puke fakapagota ne latou a Iesu, kae takitaki ki te fale o te faitaulaga sili. Kae ne tautali 'mao atu Petelu. 55Kae i te otiga ne fa'ka ne latou a te afi i te kogaloto o te fale, 'nofo ei ki lalo, fakatasi atu ei foki Petelu ki a latou. 56Ka ko lavea a ia ne te tamafine e tokotasi me nofo mai i te koga e maina, faka'toka atu ei ona mata, kae fai atu, “Ko ia foki tenei ne fakatasi mo Iesu.” 57Kae ne fakafiti a Petelu penei, “Toku fafine, e se iloa ne au a ia.” 58Tai leva malie ake, ne kilo atu a te sua tino ki a ia, kae fai atu penei, “Ko koe foki te sua tino o latou.” Kae ne tali mai a Petelu, “Toku tagata, e se ko au!” 59Kati ko tasi te itula mai tua ifo, kae ne faipati malosi atu ei te sua tino penei: “E tonu eiloa, ne fakatasi te tagata nei mo ia, me i a ia se Kalilaia.” 60Ne tali mai Petelu, “Toku tagata, e se iloa ne au a te mea e fai mai ei koe.” I te taimi koi faipati ei a ia, kae tagi mai te moa. 61Ne mafuli atu te Aliki, ko onoono atu ki a Petelu, ka ko Petelu ko masaua ne ia a muna a te Aliki, me ne fai atu pela ki a ia, “Ka koi tuai o tagi te moa i te po nei, ka ko fakafiti fakatolu mai koe ki a au.” 62Ne fanatu ei Petelu ki tua o tagi mautuutu.
Ko te Kiniga mo te Fakatauemuga o Iesu
(Mata 26.67-68; Male 14.65)
63Ka ko tino kola ne leoleo ne latou a Iesu, ne fakatauemu ki a ia kae kini foki ne latou. 64Ne 'sai ne latou ona mata, kae fesili atu ki ei penei, “Mate mai: ko oi ne kini ne ia koe.” 65Kae uke foki olotou isi muna masei ne fai atu ki a ia.
Ko Iesu i Mua o te Fono
(Mata 26.59-66; Male 14.55-64; Ioa 18.19-24)
66I te aoakega, 'luku fakatasi ei toeaina Iutaia, faitaulaga sili, mo faiakoga o te Tulafono, kae takitaki atu a ia ne latou ki te lotou fono, fai atu ei latou ki a ia penei: 67“Kafai koe ko te Keliso, taku mai ki a matou.” Ne tali a ia ki a latou, “Kafai e taku atu ne au, e se talitonu eiloa koutou. 68Kafai foki e fesili atu au ki a koutou, e se tali mai eiloa koutou. 69Ka kamata atu nei au te Tama a te Tagata o nofo i te koga taua ko te feitu fakaatamai o te Atua Mana.” 70Ne fai mai latou katoa, “Ko koe tena ko te Tama a te Atua?” Kae ne tali atu a ia ki a latou, “Tena eiloa e fai mai ne koutou.” 71Olotou muna, “Ko se toe ma'nako tatou ki se isi molimau! Me ko lagona tonu ne tatou ana pati tonu!”
Trenutno odabrano:
LUKA 22: Tusi Tapu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tuvalu Revised Bible © Bible Society in the South Pacific
