LUKA 17
17
Ko te Agasala
(Mata 18.6-7,21-22; Male 9.42)
1Ne fai atu a Iesu ki ona soko: “A fakaosoosoga ki te agasala e oko mai eiloa; kae kalofa eiloa i a ia tela e fakatupu ne ia te agasala. 2E sili atu moi 'sai se fatusolo lasi i tena ua kae pei ki te moana, i lo te fakatupu ne ia ke agasala a tino fo'liki konei. 3#Mata 18.15Ke tausi faka'lei koutou!
“Kafai e agasala sou taina, polopoloki atu, kafai e salamo, fakamagalo atu. 4Kafai foki e agasala fakafitu mai ki a koe i te aso, kae foki fakafitu mai foki ki a koe o fai mai, ‘Au ko salamo ki aku agasala,’ e 'tau la mo koe o fakamagalo atu.”
Ko te Fakatuanaki
5Ne fai mai a soko ki te Aliki, “Fakalasi ake te motou fakatuanaki.” 6Ne tali atu a te Aliki, “Kafai e fo'liki otou fakatuanaki e pela mo se fuaga o te sinapi, kae kafai se fakatuanaki tonu eiloa, ko tena uiga e mafai o fai atu koutou ki te lakau lasi penei, ‘Ke maunu nei koe kae fano o tu i te tai; ka fai eiloa pena.”’
Ko te Tiute o te Tavini
7“Kafai e isi se tino o koutou, e isi sena tavini fakamalū laukele io me tausi mamoe, e a, e fai atu a ia ki ei i te taimi e foki mai ei i te vao, ‘Vau fakavave o nofo ki lalo o kai’? 8E se pena! Kae ka muna atu koe penei, ‘Fakatoka taku 'kaiga ke toka, 'sai tou gatu laulau meakai, kae laulau mai aku meakai, ke kai au kae inu, ka palele ko kai ei koe kae inu.’ 9E fakafetai atu la a ia ki te tavini, i te mea ne fai ne ia a mea kola ne fakatonu atu ke fai? 10Ke pena foki koutou, kafai ko oti ne fai ne koutou a mea katoa kola ne fakatonu atu ke fai, fai atu la, ‘A matou nei ne tavini se aoga; ne fai fua ne matou te motou tiute.”’
Ko Faka'lei ne Iesu a Lepela e Tinoagafulu
11I te malagaatuga a Iesu ki Ielusalema, ne tipa atu i te va o Samalia mo Kalilaia. 12Ne ulu atu a ia ki se fa'kai e tasi, kae ne fakafetaui ne lepela e tinoagafulu, ne 'tu 'mao mai, 13kae ne ka'laga mai penei, “Iesu e te Aliki! a koe ke alofa mai ki a matou!”
14 #
Levi 14.1-32
Ne lavea ne Iesu latou kae fai atu, “Olo o fakaasi atu ki faitaulaga ke iloilo koutou.”
I te lotou ologa, 'lei ei olotou lepela.#17.14:Faka'ma: onoono ki te 5.12. 15A te tokotasi o latou, i tena laveaga i a ia ko 'lei, ne toe foki mai ki a Iesu, kae ne 'viki atu ki te Atua mo te leo malosi. 16Kae ne fakasiga ki vae o Iesu, kae fakafetai atu. A te tagata se tino Samalia. 17Ne fai atu ei a Iesu penei, “E tinoagafulu a tino ne faka'lei olotou lepela: ko fea la te tokoiva? 18Ai a ne vau tokotasi ei te tino o fenua fakaatea o fakafetai ki te Atua?” 19Ne fai atu a Iesu ki a ia, “Tu ki luga kae fano; ko tou fakatuanaki ko 'lei ei koe.”
Ko te Okomaiga o te Malo o te Atua
(Mata 24.23-28,37-41)
20Ne fesili mai ki a Iesu a nisi Falesaio me ka oko mai afea te Malo o te Atua. Ne tali atu a ia, “A te Malo o te Atua e se oko mai mo ni fakailoga ke lavea atu; 21e seai se tino e fai ake, ‘Kiloke, tenei i konei!’ io me ‘Tela i ko!’ kae kiloke, a te Malo o te Atua tena eiloa i loto i a koutou.”#17.21: i loto i a koutou; io me fakatasi mo koutou, io me ka 'sae faka'poi atu ki a koutou.
22Ne fai atu ei a ia ki soko, “Ka oko mai se taimi ka ma'nako ei koutou o fia 'kilo ki se aso e tasi o te Tama a te Tagata ko au tena, kae ka se lavea eiloa ne koutou. 23Kae ka muna mai foki latou ki a koutou, ‘Kiloke, tela i ko!’ io me ‘Kiloke, tenei i konei!’ Sa olo koutou ki ei, sa tau'tali atu foki ki ei. 24Me e pela mo te 'lapa mai o te uila, kae maina ei te lagi mai te sua feitu ke oko atu ki te sua feitu, ka pena foki eiloa te Tama a te Tagata i tena aso. 25Kae 'tau eiloa mo ia o logo'mae muamua i mea e uke, kae ka se talia foki ne te kautama tenei. 26#Kene 6.5-8 E pela foki mo te faiga i aso o Noa, ka pena foki eiloa mo te faiga i aso o te Tama a te Tagata. 27#Kene 18.20—19.25 Ne 'kai latou kae inu, ne a'vaga latou kae ne fakatau a'vaga foki fakapouliuli, ke oko eiloa ki te aso ne ulu atu ei a Noa ki te vaka, ne oko mai ei te lofiaga kae ne 'mate katoa ei latou. 28Ka pela foki eiloa mo aso o Lota; ne 'kai kae inu latou, ne fakatau mai kae fakatau atu, ne 'toki lakau kae faite fale foki; 29ka ko te aso ne fano keatea ei Lota mai Sotoma, ne 'to ifo a te afi mo te teio e pela mo ne vaiua mai te lagi, kae ne 'mate katoa ei latou. 30Ka pena eiloa i te aso e fakaasi mai ei te Tama a te Tagata.
31 #
Mata 24.17-18; Male 13.15-16 “I te aso tena, a ia tela i luga o te tuafale, mo a eiloa mana fanaifo o ave keatea ana mea kola i loto i te fale; pela foki mo ia tela i te vao, mo a mana toe foki mai. 32#Kene 19.26 Ke masaua ne koutou te avaga a Lota. 33#Mata 10.39; 16.25; Male 8.35; Luka 9.24; Ioa 12.25 So se tino e taumafai o fakasaosao tena ola ka maumau eiloa; so se tino foki e se manatu 'mafa ki tena ola ka sao a ia. 34Au e fai atu ki a koutou, i te po tena e tokolua a tino ka 'moe i te moega e tasi; e tokotasi ka ave keatea, ka ko te sua tino ka tuku. 35E tokolua fafine ka solo saito fakatasi; e tokotasi ka ave keatea, kae ka tuku te sua tino. 36E tokolua tagata ka ga'lue i te fatoaga: e tokotasi ka ave keatea, kae ka tuku te sua tino.” 37Ne fai mai a soko ki a ia, “Te Aliki, e fai i fea?” Ne tali atu a Iesu, “Ko te koga e takato i ei se foitino mate, e 'luku ki ei aeto.”
Trenutno odabrano:
LUKA 17: Tusi Tapu
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tuvalu Revised Bible © Bible Society in the South Pacific
