Jénesii̱s 3
3
Bi̱ kamá ni̱xtjin nga tsintꞌiéꞌénjín xota̱ xi tjoón
1Ta̱nga ye̱e̱ achichí maña̱ kamá, ta̱bo̱a̱jiín ngayeje cho̱ kꞌijñá xí katsꞌénda Néná. Ngo ndi̱ya kuí ye̱e̱, bi̱ katsoó naa̱:
—A bo̱a̱ xó katsójnú Néná nga ka̱májín xi̱ni̱e̱jnú ngayeje to xi tsjá yá xí tjín nínga kjiꞌi yátjieé.
2Kó naa̱ bi̱ katsoó ye̱e̱:
—¡Ka̱ma xi̱ni̱e̱jne̱ ngayeje to xi tsjá yá xi tjín nínga kjiꞌi yátjieé! 3Ta̱nga Néná bi̱ katsójne̱: «Ngamasiee̱n kui yátjieé tikón ngo yá xí nde ka̱májín si̱ꞌanjo̱jnú, ti̱ nde ka̱májín xi̱ni̱e̱jnú too̱ kui yaá, ngatꞌa̱ tsi bo̱a̱ si̱ꞌánjnú, ko̱yajnú ki».
Ta̱nga kui ye̱e̱ bi̱ katsó ngasee̱ naa̱:
4—Kjo̱a̱ndiso boá kui nii̱, ko̱yajínjnú. 5Néná jè be nga ni̱xtjin nga xi̱ni̱e̱jnú too̱ kui yaá, xikónií tsi Néná ka̱májnú jún, kó xcha̱jnú ni xi ndaa̱ ko̱jo ni xi ndajiín.
6Kó kui naa̱ askotsijee̱n nga ma chinie kui too̱, kó nga tsjakon kamaá, kamáxke̱, sꞌe̱ katsꞌénkjiín ini̱ma̱a̱ nga kui too̱ xi tsja̱á kjo̱a̱kjínkón. Kó bo̱a̱ tsꞌén tsꞌenje̱n ngo too̱ kui yaá, sꞌe̱ iskjinie. Jaskan katsjaá xi̱ꞌii̱n, kó iskjinie kui nda̱a̱ nga. 7Kó kjiꞌa boá nga kamákjiín ni xi katsꞌén, kó kamábe yojoo̱ nga kjiyojoxtí. Sꞌe̱ iskjíbé xka̱a̱ yáꞌigo̱ xi askjóyá sꞌe̱ íꞌmá yojoo̱.
8Kó nguije jaꞌa tjo̱ xi foaꞌa nga manguixoón, kui nda̱a̱ ko̱jo chjo̱ón tsintꞌié nda̱a̱ Néná nga ki̱a̱ kistsoꞌbá ngu̱i̱ndie nínga tjitji̱e̱ nii̱, kó ngu̱i̱jii̱n yaá kisꞌińdoꞌmá nga joó. 9Ta̱nga Néná tsíchji̱a̱a̱ kui nda̱a̱, kó bi̱ katsoó nga asíyaá:
—Ñá tindyin ji.
10Kó bi̱ katsó kui nda̱a̱:
—Tsintꞌie an nda̱ tse̱ nínga tjitji̱e̱ nii̱, kó katsakjon an, ngatꞌa̱ kjiꞌixtí an, kó kuíni nga kisꞌijñaꞌma an.
11Kó bi̱ katsó Néná: ꞌYá xí katsóyaá nga katsjaxtí ji. A kichini jí too̱ yá xí kixiaan nga xi̱ni̱jín ji.
12Kó bi̱ katsó kui nda̱a̱:
—Na̱ xi katseꞌéní nga kotíjñajo an, kuí boá xi katsjána too̱ kui yaá, kuíni nga iskjíni̱e̱ an.
13Kósꞌe̱ Néná bi̱ katsoó kui naa̱:
—Míkjo̱a̱a̱ nga bo̱a̱ kjiꞌi kon ni xi kiniꞌín ji.
Kó bi̱ katsó kui naa̱:
—Ye̱e̱ boá xí tsꞌenṉcha̱jona. Kuíni nga iskjíni̱e̱ an kui too̱.
14Kósꞌe̱ Néná, bi̱ katsoó ye̱e̱:
«Jí, ta̱ngatꞌanii̱ nga bo̱a̱ kjiꞌi ni xi kiniꞌín ji,
jí boá xí ka̱majeé ngu̱i̱jii̱n ngayeje cho̱ xi ma ꞌbítji̱e̱,
ko̱jo cho̱ xi tamá.
Tji̱e̱nga ku̱i̱ndyin ji nga̱sondie,
nga̱ntsꞌoe boá xi kꞌuiféni ji yojòo̱ nga ku̱i̱ṉtje,
kó chojoo̱ tꞌananguii̱ xí xi̱ni̱ ji.
15»Kó án xí sa̱ꞌin an nga ji ko̱jo naa̱
kondra̱ ka̱manijnú xingu̱i̱jnú,
ko̱jo kondra̱ ka̱manii̱ xkjín tji̱e̱ tse̱ ko̱jo xota̱ tji̱e̱ tsi̱ꞌe̱ naa̱,
kó ngo kui xota̱ tji̱e̱e̱ xi sa̱ꞌínꞌoón taki ji,
kó ji si̱ꞌinꞌíi̱n tji̱ngu̱i̱ se».
16Kósꞌe̱ Néná, bi̱ katsoó naa̱:
«Kó jí, kjiꞌa nga kꞌuié jí ndí,
án xí sa̱ꞌin an nga ꞌniú ka̱ma xi so xi ndakjáa̱n
kó nda tsi bo̱a̱ ka̱maa̱, ti̱ kuí xí si̱ꞌinmején ji xi̱ꞌíi̱n tsi̱ꞌe̱ nga kꞌuieé ndí,
kó xi̱ꞌíi̱n boá xi ko̱tíxomaa».
17Kó Néná, bi̱ katsoó nda̱a̱:
«Kó jí, ta̱ngatꞌanii̱ ni xi kiniꞌín ji,
ngotꞌe̱ ꞌne̱ ndajín ka̱ma tꞌananguii̱.
Ngatꞌa̱ kandaꞌyéꞌíi̱n chjóo̱n,
kó kichini ji too̱ kui yaá,
kui xi íchjaá nga xi̱ni̱jín ji.
Kuíni nga tji̱e̱nga ku̱i̱ndyin ji nga̱sondie,
tsie kjo̱a̱ni̱ma̱ ku̱i̱tja̱tí
nga kꞌuítji̱e̱ ji ni xi xi̱ni̱ ji nga̱són tꞌananguii̱.
18Kꞌijñá xi ndajín xi tjiín ndaꞌyá xí sa̱ꞌínꞌoón, kó kuí boá xi tsja̱á tꞌananguii̱,
kó xka̱ xi kꞌuié ngu̱i̱jin kꞌijñaá xí xi̱ni̱ ji.
19»Tsie kjo̱a̱ni̱ma̱ ku̱i̱tja̱tí nga si̱ꞌinxé jí
tsi̱ꞌe̱ nga sa̱ko̱ó ni xi xi̱ni̱ ji.
Bo̱a̱ ka̱ma ngaskande ni̱xtjin nga ko̱ye jí,
kó ka̱ma nguiní ji chojo,
ngatꞌa̱ chojoo̱ boá xi katjóbé nga kamánda ji.
Ngatꞌa̱ ta̱ chojo tsí jí,
¡kó chojo ka̱ma nguiní ji!».
20Kósꞌe̱ Andaa̱n Eba̱#3:20 Kui én xí «Eba̱» ꞌmí nga én ebreoo̱ mejeén bo̱a̱ tsꞌén ndaꞌyaá nga «xi tikón» ꞌmí ítꞌa jaꞌén chjo̱ón, ngatꞌa̱ kuí boá xi ka̱ma na̱aa̱n ngayeje xota̱ xi kꞌuíndo nga̱sondiee̱.
21Jaskan Néná katsꞌéndaa̱ nda̱a̱ ko̱jo chjo̱ón ńjño xi tji̱xi̱ín cho̱, kósꞌe̱ katsꞌénkajá. 22Kó bi̱ katsó Néná:
«Ngotꞌe̱ ꞌné nga nda̱a̱ ko̱jo naa̱ je kamá xikoó ñá, nga je makjiín ni xi ndaa̱ ko̱jo ni xi ndajiín. Tsi skji̱ni̱e̱ too̱ yá xi tsjá kjo̱a̱mindyioo̱n, ka̱márií kꞌuíndo ngatsjé ni̱xtjin».
23Kó kuíni nga Néná tsangatji̱nguii̱ kui ngu̱i̱ndie nínga tjitji̱e̱ ni tjieé, tsi̱ꞌe̱ nga kui nda̱a̱ sa̱ꞌínxájin tꞌanangui xi kiniꞌándajo̱ni nga kamánda. 24Kósꞌe̱ Néná nguije tsangatji̱nguii̱ nda̱a̱ ko̱jo naa̱, xtji̱e̱e̱n nínga fotjo tsꞌueé ki̱a̱ Endee̱n índo kerubi̱n xi askondá kui ngu̱i̱ndiee̱, kó ti̱ íjñá ngo ki̱cha̱ ndojó xi tjítí xi kamátíyá kꞌi̱e̱ kamátíyá ngaján, xi askondá ndi̱ya̱á nínga tikón yaá kjo̱a̱mindyioo̱n.
Trenutno odabrano:
Jénesii̱s 3: MAIX
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014