Markus 3
3
1Tau ranie hatae isa honu wan sio Yahudiu oamuira Anahatana, Yesus inusui pan sio Yahudiu no numa mananoune, oyo isupu ia hanaie isa. Ia reimo, hanai rematai. 2Sio umau wason onina arena na nanie oapasana Yesus. Reiso oaka-akaohui. Pene tu-tu isuisene sio umau tau ranie hatae wan ita Yahudiu iamuira Anahatana rei. 3Oyo Yesus iasau osi ia wain hanai rematai rei. Iahata, “Aeu mai na ooa mai uae reini.” 4Oyo Yesus iasei tau sio onata arihoni akama Yahudi runa sio matuhete Musa ne maunauna ata, “Sani pusu Musa ne maunauna mo, iuna sae tau ranie hatae wan iamuira Anahatana sahoro iake? Iuna iake te, iuna kahatene? Iakahai mansia na iamahaiki te, itapiki na imatai?”
Ne sio panesi rei oamaturuso man. 5Iasau san rei pusi, oyo inoo neka-neka sio wason ohoriki rei. Anoi resaa. Ne anoi runaso tau unuo onata. Oyo iasau osi ia rei ata, “Asasona hanam mai.”
Ia rei iasasona hanai oyo sira tau hanai wan rematai rei, iake rei sirinia. 6Oyo sio onata arihon akama Yahudi rei ohokaso arihoni sio Yahudiu no numa mananoune rei, oyo oanamana runa Herodes ne mansiau, na nanie ohunu Yesus.
Yesus isuisene mansia reiso sio panesi opusui
7-8Yesus runa ne mampusua oeuso oarihon sio hutue rei, oyo oeuso pan waene. Ne sio Galileau panesi, sio on pan otoe Yudea, sio on roe kota Yerusalem, sio on pan otoe Idumea, sio on ria Wae Yordan on ria hae, runa sio on pan kota Tirus na Sidon oeu pusu Yesus sio oi. Sio rei pusiso ohokaso pan Yesus tau oatinu rerihoni iuna sae. 9Reiso Yesus iaisosi ne mampusua onoo na arupae isa matane osiki nea. Oyo orurui hainekei. Ikaitau pene tu-tu sio mansia hutue wason sinasi rei oesei, reiso iainisi arupae rei. 10Isuisene kupua inaya panesi, reiso sio kupua pusiso oruru heu umau, na oeu haineke Yesus na oakahuui. 11Sakahatena ranoo Yesus ata Ia mo, ihokai arihoni Anahatana. Reiso oakapona ata, “Ano sahoro Anahatana Anai!”
12Ne isoposo ata, “Pene oeu osima osi sio umau ata Au mo, Au seia.”
Yesus ihiti ne sio maisosia hutusa rahana ua
13Yesus isuisene sio kupua pusi, oyo inoai na roe pupue, samatoro ianaha runa sio umau wason ruai ne maue na opusui. Sio rei ohokaso roe, 14oyo ihiti sio hutusa rahana ua. Oyo iahata, “Uhitimo na okataku sui supan man na uaisosimo osima na Sou Iake rerihoni Au. 15Mka Anahatana irui kawasa osimo na onei sakahatena.”
16Sio hutusa rahana ua wason Yesus ihitiso rei mo, nanao:
Simon (Simon mo, Yesus ihete nanai tau Petrus),
17Yakobis runa wanin Yohanis (uaso noa ama tau Sebedeus. Yesus ihete nanao tau Boanerges Nene nohue mo, sio sani tinaa),
18Anreas,
Pilipus,
Bartolomeus,
Matius,
Tomas,
Yakobis (amai tau Alpeus),
Tadeus,
Simon, ia wain inesi sio Romau na pene orime ita Israel,
19runa Yudas Iskariot, ia wain mka iahen Yesus na sio ohunui.
Sio matuhete Musa ne maunauna oamanaru Yesus
20Yesus inuniki on roe pupue, oyo inusui pan numa isa. Ne mansia hutue ohoka oamanouso honu rotu-tu Yesus runa ne mampusua oai mosa tewa. 21Ne mansiau oatinu san rei, oyo oeu osotai. Tea mo, sio panesi oasau ata, “Imukei nea.” Sio oasau san rei tau iai tewa.
22Sio matuhete Musa ne maunauna wason ohokaso on roe kota Yerusalem oasau ata, “Beelsebul remasuniki! Ia mo, wain inei sakahatene tau Beelsebul, ia aia sakahatene, ne kawasa.”
23Oyo Yesus ioi sio hutue rei, samatoro iaunauso tau matieua. Iahata, “Sapan na ia aia sakahatene renei sakahatene? 24Munata sio niane owena-wenaso, areimo niane rei huie nea. 25Munata ipane isa rewena-wenai, areimo ipane rei tihoniki nea. 26Reiso munata ia aia sakahatene inei ruai ne mansiau na owena-wenaso, mka ia aia sakahatene ne kawasa tanso tewa nea.
27 Noo sani ia isa nanie inusui pan ia isa wain iamkona ne numa na ikimanaka ne apia. Ne kahurae ikanihoo ia mkonae rei ee. Ikanihooi, samatoro inusui ikimanaka ne apia.” (Yesus ianamana rerihoni ruai sani ia wain ikanihoo ia mkonae rei. Ikanihooi, areimo sani inana ia aia sakahatene ne kawasa.)
28 “Atinu mai ia-ia, nanie uasau osimo. Anahatana isiru heu rosa sae man. Orati sohi Anahatana, Anahatana isiru heu no rosa rei. 29Ne sani munata orati sohi Anahatana Ne Inaha, areimo Anahatana mka isiru heu no rosa rei tewa rotu-tu ria supan.”
30Iasau san rei tau sio oasau ata, “Sakahatene remasuniki.”
Yesus inai runa nea waniu
31Yesus iatuhete pan numa anoe, inai runa nea waniu ohokaso. Ooso pan mui, oyo oaisosi ia isa ioi Yesus. 32Sio mansia hutue wason orue ohoriki. Oyo ia rei iasau osiki ata, “Masi anoo. Inam runa me waniu wason pan mui oninaya.”
33Iahata, “Ia seia sahoro inaku? Ia seia sahoro waniku?” 34Oyo inoo ineka pusi sio wason orue ohoriki rei, oyo iahata, “Omi reini pusimo sahoro inaku runa wea waniu. 35Ia seia man wain ipusu Anahatana ne maue, ia rei sahoro anoku runai sani waniku, hotaku, runa inaku.”
Trenutno odabrano:
Markus 3: ANA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© (Active), Wycliffe Bible Translators, Inc., All rights reserved.
