Markus 2
2
Sio oamanaru Yesus tau iasau ata ne kawasa isiru heu rosau
1Yesus isuisene ia kupu unte pusi, oyo nene onona ate san rei, inuniki pan kota Kapernaum. Sio panesi onooi, reiso osima osi umau. Oahata, “Yesus waipan ihokai nea.”
2Reiso mansia hutue ohoka oamanouso haineke numa rei rotu-tu sio umau mo, osupu naniao tewa nea. Pan mui, haineke mitanunue iae, san rei sinia. San rei oyo, Yesus isima na Anahatana ne anamanaya osiso. 3Oyo sira tau sio umau ohoka orori ia talae isa. Sio ate ohanai, nanie ororiki mai Yesus. 4Ne okeka kua mansia hutue rei tewa. Reiso oeu mai tanui iake tewa. Oyo osaaso pusu oane na roe numa hahae, samatoro ohuka nene ainataya. Oyo oratiki tau ne kinoe mai Yesus. 5Oratiki oyo, Yesus inoo ata sio rei oparisaa ata Ia mo, imaha heu kupue rei. Taa san rei oyo, Yesus iasau mai ia talae rei ata, “Anaku, me rosau, usiru heure nea.”
6Ne sio matuhete Musa ne maunauna umau wason oru-rueso pan rei. Oatinu Yesus ianamana san rei, oyo oasei pan anoo ata, 7“Ia mo, masike nai osa. Ianamana san rei mo, sani Ia mo, Anahatana rei. Ia seia sahoro imaha isiru heu rosau sani Anahatana? Anahatana ruai sahoro ne kawasa isiru heu rosau.”
8Taa san rei oyo, Yesus ianei anoo. Reiso iasau osiso ata, “Nanie oarinii pan anomo san rei tahae? 9Sani uasau osi ia talae reini, ‘Me rosau, usiru heure nea.’ Ne sapani na oanei ata kani usiru heure te tewa? Ne sani uasau osiki, ‘Hanua! Ahitioa, ahetu me kinoe rei, oyo ruam aeu.’ Omi mka oanei ata Au we kawasa usuisene. 10Ne muie reini, unina na oanei ata, mai tuniai reini, Au, Tumata Reini mo, Anahatana Ihitiku, we kawasa usiru heu rosau.”
Oyo Yesus iasau osi ia talae rei ata, 11“Uasau osia, ahanua, ahetu me kinoe rei, na anunia.”
12Oyo ia rei ihanui, ihetu ne kinoe rei, oyo ihokai. Sio pusiso onooi ihanui, ihetu ne kinoe rei. Reiso osira. Oainaa runa Anahatana ata, “Mania upu Anahatana. Ano mo, ano iake tunne nai osa. Ano me kawasa mainae. Una nitae reini mo, ami anooi tewasi.”
Sio oamanaru Yesus tau iaiki ikata sio kahatena
13Yesus isuisene ia talae isa pusi, oyo ieui pan Wae Galilea honu. Ihokai pan waene nusue, oyo sio panesi ohokaso mai tanui na iatuheteso. 14Taa Yesus wain ieu ipusu arena pan rei, oyo inoo ia mainisi pea isa waipo iruei poe ne numa mainisi peau. Ia reimo, nanai Lewi. Amai tau Alpeus. Sio mainisi peau oakahai sio Romau na oamanou peau arihon sio Yahudiu. Sio Romau rei otapiso oakapena na onana kepen umau osi ruao oi. Reiso sio Yahudiu openeso tanso. Sio oahata sio mo, sio kahatena nai osa sani sio kimanakana. Yesus ioi ia rei ata, “Mai, na apusuku.”
Lewi iatinu san rei oyo, ihitioi ipusu Yesus rei sinia.
15Yesus wain iaiki pan Lewi ne numa, oyo sio mainisi peau runa sio wason nusa niane oahata sio kahatena rei ohoka oaiso okata Yesus runa ne mampusua oi, tau sio panesi wason oeu opusu-pusui oi. 16Sio matuhete Musa ne maunauna arihon sio ona akama Yahudiu onoo Yesus iaiki ikata sio mainisi peau runa sio wason nusa niane oahata sio kahatena rei. Reiso oasei tau Yesus ne mampusua ata, “Omi mo matuhetene rei, nanie iaiki ikata sio mainisi peau runa sio wason opalalosa oi tahae?”
17Yesus iatinu san rei oyo iahata, “Sani ia isa ikupui tewa, inina ia mamsuisene tewa. Ne ia wain ikupui sahoro ininai. Au mo, nooku sani ia mamsuisene rei oi. Uhokaku mai tuniai reini mo, nanie uoi sio wason opalalosa. Ne sio wason oahata ruao oamanisa mo, uhokaku na uoiso mo, tewa.”
Sio oamanaru Yesus tau ne mampusua oamaon tewa
18Taue isa Yohanis ia mamsohue ne mampusua runa sio onata arihon akama Yahudiu pusiso wason oamaon. Oyo sio umau ohokaso mai Yesus, nanie oasei tanui ata, “Yohanis ne mampusua runa sio onata arihon akama Yahudi no mampusua oamaon. Oo, Ano me mampusua mo, oamaon tewa tau sae?”
19Yesus nanie iatuheteso ata on ikata ne mampusua asi, ne mampusua oamaon iake tewa. Anoo rapunokoso iake tewa. Reiso iahata, “Tau sio mausahaya oaiseneso, sio wason opusu karisaa rei, oamaon tewa, tea! Munata ia hehuke wain ikataso asi, oaiso sinia, tea! Oamaon iake tewa. 20Ne mka sio umau osota ia hehuke rei, samatoro sio wason noi karisaa rei oamaon iake.
21 Ia sia man iaturui papi monae tau nipa sinte wan honue tewa. Sani iuna san rei, mka opapa papite rei, oyo renunui. Oyo papite rei wakihai mainae honu. 22Areimo nooi sani iaiinu tihu anggur wan honue tau tasi wan sio ounai arihon une-une unte wan monae nea. Tea mo, mka tihu anggur rei reuna tasi wan monae rei wakihai. Oyo tihu anggur rei reohui sai-saiki na tasi rei, iake tewa nea. Ne tihu anggur wan honue mo, kahurae aiinui tau tasi wan honue oi, na uare iaka sirinia.”
Sio oamanaru Yesus ata ipusu onone wan iamuira Anahatana tewa
23Taue isa, tau ranie hatae wan ita Yahudiu iamuira Anahatana, Yesus ieu ikata ne mampusua oeu opusu nisi gandum isa. Oyo ne mampusua ohuku gandum huaya na oai nene isia. 24Sio onata arihon akama Yahudi onoo san rei, oyo oasei ata, “Omuna na onana tau ranie hatae wan ita Yahudiu iamuira Anahatana reini? Opusu Musa ne maunauna tewa!”
25-26Iahata, “Omi onoo tau Anahatana ne anamanaya tewa, sapani na Daud inana poroti wani sio oruiki osi Anahatana. Poroti reimo, pusu Musa ne maunauna, hasae sio imam ruao man sahoro oaiki. Aikee Daud inanai. Inanai tau rei mo, tau Abiatar iuna sio imam no ia mainae. Daud runa sio wason okatai rei omakaneaso. Reiso inusui pan Anahatana ne numa mainisie, oyo iai poroti rei. Isama sio wason okatai rei oi. Ne ia isa iakapuku tanui tewa. 27Reiso ranie hatae wan ita Yahudiu iamuira Anahatana mo, Anahatana iunai osi mansia. Ihaye mansia tewa na opusu maunauna rerihoni ranie hatae wan iamuira Anahatana rei man. 28Reiso Au, Tumata Reini mo, Anahatana Ihitiku we kawasa tau ranie hatae wan ita Yahudiu iamuira Anahatana. We kawasa uasau ouna sae na ouna sae tewa.”
Trenutno odabrano:
Markus 2: ANA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© (Active), Wycliffe Bible Translators, Inc., All rights reserved.
