Luka 24
24
Yesu sitemi
(Mateo 28.1-10; Marko 16.1-8; Yohane 20.1-10)
1Otsi ɔ kekleekle ligbi ɔ nɔ mɔtu mla a, yi ɔmɛ ba yɔkɔ ɔ he, nɛ a hɛɛ tsopa kɛ e he via nɛ a dla to ɔ kɛ ba. 2Nɛ a na kaa a kpɛne tɛ ɔ kɛ je yɔkɔ ɔ nya; 3se benɛ a sɛ mi ɔ, a nɛ́ Mawetsɛ Yesu gbogboe ɔ. 4Nɛ e ba mi kaa benɛ a pee yaa ngɛ enɛ ɔ he ɔ, oʼɛ, nyumuhi enyɔ nɛ wo tade klaiklai ba da a kasa nya. 5Se benɛ a ngɛ gbeye yee nɛ a ma a hɛ̃ si ɔ, nyumu ɔmɛ de mɛ ke: “Mɛni he je nyɛ ngɛ hɛ kalɔ ɔ hlae ngɛ ni gbogboehi a kpɛti? 6E be hiɛ ɔ, se mohu e te si! Nyɛ kai bɔ nɛ e de nyɛ benɛ e ngɛ Galilea a, 7ke: ‘Ja a ngɔ Nɔmlɔ Bi ɔ ngɔ wo yayami peeli a dɛ mi, nɛ a sɛu lɛ, nɛ ligbi nɛ ji ligbi etɛ ɔ nɛ e te si ekohu.’ ” 8Nɛ a kai e munyu ɔmɛ, 9nɛ a kpale a se kɛ je yɔkɔ ɔ he, nɛ a ya sɛɛ ni nɛ ɔmɛ tsuo ha ni nyɔngma kɛ kake ɔ kɛ nihi nɛ piɛ ɔ. 10Se Maria Magdalena kɛ Yohane kɛ Yakobo nyɛ Maria kɛ yihi nɛ piɛ a he ɔ ji nihi nɛ ba sɛɛ ni nɛ ɔmɛ ngɔ ha bɔfo ɔmɛ ɔ nɛ. 11Se kikɛmɛ a munyu nɛ ɔmɛ pee kaa nyazia ngɛ a tue mi, nɛ a he we yi. 12Se Petro te si nɛ e sa fo kɛ ya yɔkɔ ɔ he; nɛ benɛ e kɔkɔ e yi si nɛ e hyɛ mi ɔ e na kploba amɛ nɛ a pueɔ si ekpa ekpa. Nɛ e je lejɛ ɔ kɛ ho we mi ya, nɛ e nya kpɛ e he ngɛ nɔ nɛ ba a he.
Sislami kɛ Emao yami
(Marko 16.12-13)
13Nɛ oʼɛ, jamɛ a ligbi ɔ nɔ nɔuu ɔ, a kpɛti ni enyɔ ngɔ pue nɔ kɛ yaa kɔpe ko nɛ kɛ Yerusalem kemi maa pee sitomi nya kpaago nɛ a tsɛɛ lɛ Emao ɔ mi. 14Nɛ a ngɛ hihi nɛ ba amɛ kulaa a he ni sɛɛe ngɛ a kpɛti. 15Nɛ e ba mi kaa benɛ a ngɛ ni ɔmɛ sɛɛe nɛ a ngɛ a he sanehi bie ɔ, Yesu nitsɛ ba na mɛ, nɛ e kɛ mɛ nyɛɛ. 16Se a ha a hɛngmɛhi a nɔ nɛ a ko yo lɛ. 17Nɛ Yesu bi mɛ ke: “Mɛni nyɛ ngɛ sɛɛe ngɛ blɔ ɔ nɔ ɔ?” Nɛ a da si kɛ a hɛ mi mɔbɔmɔbɔ. 18Nɛ a ti nɔ kake nɛ a tsɛɛ lɛ Kleopa a ha heto nɛ e de lɛ ke: “Anɛ mo pɛ ji nibwɔ ngɛ Yerusalem nɛ li sanehi nɛ ba lejɛ ɔ ngɛ be nɛ ɔmɛ a mi ɔ lo?” 19Nɛ e bi mɛ ke: “Mɛni sanehi?” Nɛ a de lɛ ke: “Yesu Nazareno ɔ nɛ ji gbalɔ nɛ ngɛ he wami ngɛ ni tsumi kɛ munyu tumi mi ngɛ Mawu kɛ ma a tsuo hɛ mi ɔ he sane ɔmɛ, 20kɛ bɔ nɛ wa osɔfo nikɔtɔma amɛ kɛ wa ma nikɔtɔma amɛ ngɔ lɛ ha nɛ a bu lɛ gbenɔ fɔ, nɛ a sɛu lɛ ɔ. 21Se wɔɔ lɛɛ wa hɛ ngɛ nɔ kaa jinɛ lɛ ji nɔ nɛ ma kpɔ Israel ɔ nɛ; nɛ enɛ ɔ tsuo se ɔ, mwɔnɛ ji ligbi etɛ nɛ a pee ni nɛ ɔmɛ. 22Se jeha nɛ ɔ wa ti yi komɛ hu ha wa nya kpɛ wa he, ejakaa a ya yɔkɔ ɔ he mla mi, 23nɛ benɛ a nɛ́ e gbogboe ɔ, a ba nɛ a ba de ke bɔfohi komɛ hu je a he kpo tsɔɔ mɛ nɛ a de ke e hɛ ngɛ. 24Nɛ nihi nɛ kɛ wɔ ngɛ ɔmɛ a ti ni komɛ ya yɔkɔ ɔ he, nɛ a ya na kaa bɔ nɛ yi ɔmɛ de ɔ nɔuu; se Yesu ɔ nɛ a nɛ.”
25Kɛkɛ nɛ Yesu de mɛ ke: “Oo kuasiahi nɛ nyɛ ngɛ siɔɔ ngɛ nyɛ tsui mi ngɛ nihi tsuo nɛ gbali ɔmɛ de ɔ hemi kɛ yemi he. 26Anɛ pi nɛ e sa kaa Kristo ɔ nɛ na amanehlu nɛ ɔmɛ konɛ e sɛ e nyami ɔ mi lo?” 27Nɛ e bɔni kɛ je Mose kɛ gbali ɔmɛ kulaa nɔ, nɛ e tsɔɔ mɛ nihi nɛ ngɛ ngmami ɔmɛ tsuo mi ngɛ e he ɔ sisi.
28Nɛ a su kɔpe nɛ a yaa a, nɛ e pee kaa nɔ nɛ e yaa e hɛ kpɛ. 29Nɛ a nyɛ e nɔ, nɛ a ke: “O kɛ wɔ nɛ hi si, ejakaa je ngɛ jɔe nɛ e piɛ bɔɔ nɛ du ma bu.” Nɛ e ya kɔpe ɔ mi, nɛ e kɛ mɛ ya hi si. 30Nɛ e ba mi kaa benɛ e kɛ mɛ hii si ngɛ niyeni ɔ he ɔ, e kɛ̃ abolo nɛ e gbaa nɔ, nɛ e kuɔ mi nɛ e ngɔ ha mɛ; 31kɛkɛ nɛ a hɛngmɛ bli nɛ a yo lɛ; se e laa ngɛ a hɛ mi, nɛ a nɛ lɛ hu. 32Nɛ a de a he ke: “Anɛ wa tsui he dɔɛ la ngɛ wa mi benɛ e kɛ wɔ ngɛ munyu tue ngɛ blɔ ɔ nɔ nɛ e tsɔɔ wɔ ngmami ɔmɛ a mi ɔ?”
33Nɛ a te si ngɛ lɛ ngmlɛfia a nɔ nɔuu, nɛ a kpale a se kɛ ba Yerusalem, nɛ a ba na ni nyɔngma kɛ kake ɔ kɛ nihi nɛ kɛ mɛ ngɛ ɔ nɛ a bua a he nya; 34nɛ jamɛ a ni ɔmɛ de mɛ ke: “E ngɛ mi kaa Nyɔmtsɛ ɔ te si, nɛ e je e he kpo tsɔɔ Simon.” 35Nɛ mɛ hu a bɔ mɛ nɔ́ nɛ ba ngɛ blɔ ɔ nɔ ɔ kɛ bɔ nɛ pee nɛ a yo lɛ ngɛ abolo mi kuɔmi ɔ mi ɔ.
Yesu je e he kpo tsɔɔ e kaseli ɔmɛ
(Mateo 28.16-20; Marko 16.14-18; Yohane 20.19-23; Bɔfo 1.6-8)
36Nɛ benɛ a ngɛ munyu ɔ tue nɔuu ɔ, Yesu nitsɛ ba da a kpɛti nɛ e de mɛ ke: “Nyɛ he manye!” 37Se a hɛli si nɛ a ye gbeye, a susu kaa kpade a ngɛ nae ɔ nɛ. 38Nɛ e de mɛ ke: “Mɛni he je nyɛ tsui ngɛ poe? Nɛ mɛni he je hulɔ nɛ nyɛ ngɛ nɔ́ jee ngɛ nyɛ tsui mi? 39Nyɛɛ hyɛ ye ninehi kɛ ye nanehi kaa imi nitsɛ ʼi; nyɛɛ ta ye he nɛ nyɛɛ hyɛ; ejakaa kpade ko be he lo kɛ wu kaa bɔ nɛ nyɛ ngɛ hyɛe kaa i ngɛ nɛ ɔ.” 40Nɛ benɛ e de enɛ ɔ ɔ, e ngɔ e ninehi kɛ e nanehi ngɔ tsɔɔ mɛ. 41Se benɛ a he we yi kɛ mwɔɔ ngɛ bua jɔmi sɔuu he nɛ a hɛ mi pee mɛ yaa a, e bi mɛ ke: “Nyɛ ngɛ nɔ ko nɛ a yeɔ ngɛ hiɛ ɔ lo?” 42Nɛ a ha lɛ lo kpɔ fã ko nɛ a hoo; 43nɛ e sɔle, nɛ e ye ngɛ a hɛ mi.
44Nɛ e de mɛ ke: “Enɛ ɔmɛ ji ye munyuhi nɛ i kɛ nyɛ tu benɛ i kɛ nyɛ ngɛ lolo ɔ nɛ, kaa ja nihi kulaa nɛ a ngma ngɛ Mose Mlaa a kɛ gbali ɔmɛ kɛ La amɛ a mi ngɛ ye he ɔ na ba mi.” 45Kɛkɛ nɛ e bli a juɛmi nya, konɛ a na ngmami ɔmɛ a nya. 46Nɛ e de mɛ ke: “Bɔ nɛ a ngma ji nɛ ɔ nɛ, kaa Kristo nɛ na amanehlu nɛ e te si kɛ je gbeje ngɛ ligbi nɛ ji etɛ ɔ nɔ 47nɛ a fiɛ tsui tsakemi kɛ yayami pami ngɛ e biɛ ɔ mi ngɔ tsɔɔ mahi tsuo, nɛ a bɔni kɛ je Yerusalem. 48Nɛ nyɛ ji kikɛmɛ a ni nɛ ɔmɛ a he odase yeli. 49Nɛ oʼɛ, i ngɛ hae nɛ Tsaatsɛ si womi ɔ nɛ ba nyɛ nɔ; lɔ ɔ he ɔ nyɛɛ hi si ngɛ Yerusalem ma a mi kɛ ya su be nɛ a maa je hiɔwe ba wo nyɛ he wami.”
A ngɔ Yesu kɛ ho hiɔwe ya
(Marko 16.19-20; Bɔfo 1.9-11)
50Nɛ e ngɔ mɛ kɛ je kpo kɛ ho Betania kasa nya ya, nɛ e wo e ninehi a nɔ nɛ e gbaa mɛ. 51Nɛ e ba mi kaa benɛ e ngɛ mɛ gbaae ɔ, e je a ngɔ nɛ a ngɔ lɛ kɛ ho hiɔwe ya. 52Nɛ a ja lɛ, nɛ a kpale a se kɛ ho Yerusalem ya kɛ bua jɔmi babauu; 53nɛ a ngɛ sɔlemi we ɔ daa nɛ ɔ, nɛ a jɔɔ we Mawu yi jemi kɛ lɛ gbaami.
Trenutno odabrano:
Luka 24: DAN77
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Dangme New Testament © United Bible Societies, 1977.
