LUKA, 22
22
O LE MATAUPU XXII.
O le faamanatuga; o le faalatainā o Iesu.
1Ua latalata le tausamiga o areto e le faafefeteina, e ta‘ua o le paseka. 2Ona saili lea e le au faitaulaga sili ma le au tusiupu pe faapefea ona latou fasioti ia te ia; auā ua latou matatau i le nuu. 3Ona uluitino ai lea o Satani ia Iuta e ta‘ua o le Sekara, o le tasi lea o le toasefulu ma le toalua. 4Ua alu ia, ua tautalatala ma le au faitaulaga sili ma ta‘ita‘i o ‘au i se togafiti na te faalataina ai o ia ia te i latou. 5Ona latou fiafia lea, ua latou tautalatala ma ia e avatu ai tupe. 6Ua lelei ia te ia, ona lamalama lea o ia se itu aso e faigofie ai, na te faalataina ai o ia ia te i latou, a o le i ai le motu o tagata.
7Ona oo mai ai lea o le aso o areto e le faafefeteina, e tatau ona fasi ai o le paseka. 8Ona aauina atu lea e ia o Peteru ma Ioane, ua faapea atu, Lua te o e sauni le paseka mo i tatou, tatou te aai ai. 9Ona la fai mai ai lea ia te ia, O ifea e te finagalo i ai ma te saunia? 10Ona fetalai atu lea o ia ia te i laua, Faauta, a oo oulua i totonu o le aai, tou te fetaiai ma le tagata o ave le vai omea, lua te mulimuli atu ia te ia i le fale e ulu atu ai o ia. 11Lua te fai atu i le matai o le aiga, Ua fai mai le a‘oa‘o ia te oe, Po o ifea le afeafe e api ai malo, ina ia matou aai ai le paseka, o a‘u ma o‘u soo? 12Ona tusi atu ai lea e ia o le afeafe tele aupitoaluga ua uma ona teu; lua te sauni ai le paseka. 13Ona la o ai lea, ua iloa ai pei ona fetalai atu o ia ia te i laua; ona la sauni ai lea o le paseka.
14Ua oo i le itu aso, ona taoto ai lea o ia e taumafa, sa faatasi ma ia le au aposetolo e toasefulu ma le toalua. 15Ua fetalai atu ia ia te i latou, O lo‘u manao, ua tele lava lo‘u manao e muai ‘ai lenei paseka ma outou, a o lei oo i lo‘u tiga. 16Auā ou te fai atu ia te outou, ou te le toe ‘ai ai lava, seia oo ina faaiuina i le malo o le Atua. 17Ona tago ai lea o ia i le ipu, ua faafetai, ua fetalai atu, Ia outou tago i lenei ipu, ma ia tufatufa ane ia te outou; 18auā ou te fai atu ia te outou, ou te le inu lava i le fua o le vine, seia oo mai le malo o le Atua. 19Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, O lo‘u tino lenei, ua foaiina atu mo outou; tou te faia le mea nei e fai ma faamanatuga ia te au. 20Sa faapea foi ona tago i le ipu, ina ua uma ona tālisua, ua faapea atu, O lenei ipu o le feagaiga fou lea i lo‘u toto, ua faamaligiina mo outou. 21A e peitai, faauta mai, o ia te au i le laulau nei le lima o lē faalata ia te au. 22E alu lava le Atalii o le tagata e pei ona tofia; a o lea tagata na te faalataina o ia, oi talofa ia te ia! 23ona latou fesueai ai lea, po o ai so latou o le a na faia lea mea.
24Sa latou fefinauai foi po o ai so latou e sili. 25A ua fetalai atu ia ia te i latou, O tupu o nuu ese ua aliitai i latou; o e pule foi ia i latou ua ta‘ua i latou o e agalelei. 26A e le faapea outou; peitai o lē sili ia te outou, ia avea o ia ia pei o le aupito itiiti; o lē pule foi, ia pei o le auauna ia. 27Auā po o ai lē sili; o lē taoto ea e ‘ai, po o lē auauna mai? E le o lē taoto e ‘ai ea? A o a‘u nei, o loo ia te outou pei o le auauna lava. 28O outou foi, ua outou tumau ia te au i o‘u tofotofoga. 29E faapei ona tofia mai e lo‘u Tamā o le malo ia te au, e faapea foi ona ou tofia outou, 30ina ia outou aai ma inu i la‘u laoai i lo‘u malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.
31Ua fetalai atu le Alii, Simona e, Simona e, faauta, ua manao tele Satani ia te outou, ia lulu ia te outou pei o le saito; 32a ua ou faatoga mo oe, ina ne‘i mavae lou faatuatua; a o oe foi, pe a liua mai oe, ona e faamalosi ai lea i ou uso. 33Ua fai mai o ia ia te ia, Le Alii e, ua ou sauni ta te o faatasi ma oe i le fale puipui atoa ma le oti. 34Ona fetalai atu lea o ia, Peteru e, ou te fai atu ia te oe, e le vivini moa i le po nei, seia e faafiti faatolu mai e te le iloa a‘u. 35Ua fetalai atu ia ia te i latou, Na ou aauina atu ia te outou e leai sa outou ete tupe, po o se ‘ato, po o seevae, pe na outou matitiva ea i se mea e tasi? Ua fai mai i latou, E leai lava. 36Ona fetalai atu ai lea o ia ia te i latou, A o lenei, ai se tagata e ana se ete tupe, ina tago ia i ai, e faapea foi sana ‘ato; o le tagata foi e leai sana pelu, ia avatu lona ofu e faatau a‘i mai. 37Auā ou te fai atu ia te outou, e tatau ona taunuu mai ia te au o le mea ua tusia, o lea, Na faitauina foi o ia faatasi ma e pagotata; auā foi o le a faaiuina mea ua tusia ia te au. 38Ua latou fai mai, Le Alii e, faauta, o pelu nei e lua. Ona fetalai atu lea o ia ia te i latou, Soia.
39Ua maliu atu o ia i fafo, ua savali atu i le mauga o Olive, ua faapea lana masani; ua mulimuli atu foi ona soo ia te ia. 40Ua oo atu ia i lea mea, ona fetalai atu lea o ia ia te i latou, Ia outou tatalo ne‘i oo mai le faaosoosoga ia te outou. 41Ona maliu ese lea o ia ia te i latou, e pei o le togi o le maa ona mamao, ona tootuli ai lea o ia ua tatalo, 42ua faapea atu, Lo‘u Tamā e, a e finagalo i ai, ia e ave ese lenei ipu ia te au; a e aua le faia lo‘u loto, a o lou finagalo. 43Ona faaali mai ai lea ia te ia o le agelu mai le lagi, ua faamalosi ia te ia. 44Ua puapuaga o ia, ua atili ai lana tatalo; o lona afu foi ua pei o ‘alu‘alu toto ua paū ifo i le eleele. 45Ua tulai o ia sa tatalo, ona maliu atu lea i ona soo, ua maua i latou ua momoe ina ua tiga i le alofa. 46Ona fetalai atu lea o ia ia te i latou, Se a le mea tou te momoe ai? ina tulai ia, ina tatalo, ne‘i oo mai le faaosoosoga ia te outou.
47O loo fetalai ia, faauta, o le motu o tagata, ma lē ua igoa ia Iuta, o le tasi o le toasefulu ma le toalua, ua muamua mai o ia ia te i latou, ma soso mai ia Iesu e sogi ia te ia. 48A ua fetalai atu Iesu ia te ia, Iuta e, e te faalataina ea le Atalii o le tagata ma le sogi? 49Ua iloa e i latou ua faatasi ma ia o le mea o le a fai, ona latou fai mai ai lea ia te ia, Le Alii e, pe matou te taia ea i le pelu? 50O le tasi tagata o i latou, ua ta e ia le auauna a le faitaulaga sili, ua tipiesea lona taliga taumatau. 51Ona fetalai atu lea o Iesu, ua faapea atu, Tuu mai ia, seia faia lenei mea. Ona tago ai lea o ia i lona taliga, ua faamalolo ia te ia. 52Ua fetalai atu Iesu i le au faitaulaga sili, ma ta‘ita‘i o ‘au o le malumalu, ma toeaina, e na o mai ia te ia Ua outou o mai ma pelu ma uatogi, peiseai o se puega o se fao mea? 53Sa tatou i le malumalu ma outou i aso fai soo, e lei oo mai lava o outou lima ia te au; a o lo outou itu po lenei, ma le pule a le pouliuli.
54Ona latou pue lea ia te ia, ua ta‘ita‘i ma ave ia te ia i le fale o le faitaulaga sili. A ua mulimuli mamao atu Peteru. 55Ua latou tafu le afi i totonu o le maota, ua latou nonofo i lalo, ua nofo foi Peteru faatasi ma i latou. 56A ua iloa atu o ia e le tasi auauna teine o nofo mai i tafatafa o le afi, ona pulatoa lea ia te ia, ua faapea ane, O lenei tagata foi sa faatasi ma ia. 57A ua faafiti atu o ia ia te ia, ua faapea atu, Funa e, ou te le iloa o ia. 58Ua toe itiiti, ona vaai mai lea o le tasi ia te ia, ua faapea mai, O oe foi le tasi o i latou. Ona fai atu lea o Peteru, Sole, e le o a‘u. 59Ua mavae, pe atoa le itu po e tasi, ona matuā fai mai ai lea o le tasi, ua faapea ane, E moni lava, sa ia te ia lenei tagata; auā o le Kalilaia foi o ia. 60Ona fai atu lea o Peteru, Sole, ou te le iloa le mea e te fai mai na. Ona vivini loa lea o moa, a o tauatala o ia. 61Ona fāliu lea o le Alii, ua silasila atu ia Peteru. Ona manatu mai ai lea o Peteru i le fetalaiga a le Alii, na ia fetalai mai ia te ia, E le vivini moa seia e faafiti faatolu mai ia te au. 62Ona alu ai lea o Peteru i fafo, ua tagi lotulotu ia.
63O tagata ua taofi ia Iesu, ua latou tauemu ma sasa ia te ia. 64Ua latou ufiufi ona fofoga, ona po mai ai lea i ona fofoga, ua fesili mai foi ia te ia, ua faapea mai, E te iite mai, po o ai na na po atu ia te oe? 65O isi foi upu e tele ua latou upu leaga ai ia te ia.
66Ua ao, ona faapotopoto ai lea o le taupulega o le nuu, o le au faitaulaga sili, ma le au tusiupu, ona ta‘ita‘i atu lea ia te ia i la latou fono, ua faapea mai, 67Afai o oe o le Keriso, fai mai ia ia te i matou. Ona fetalai atu lea o ia ia te i latou, Pe afai ou te fai atu ia te outou, tou te le tolitonu mai lava; 68afai foi ou te fesili ia te outou, tou te le tali mai lava, pe tatala mai ia te au. 69E amata i nei ona po ona nofo o le Atalii o le tagata i le itu taumatau o le Atua mamana. 70Ona fai mai lea o i latou uma, O oe foi ea le Alo o le Atua? Ua fetalai atu ia ia te i latou, O a‘u lea ua outou fai mai ai na. 71Ona latou fai ane ai lea, Se a le aoga o sa tatou toe molimau? auā o i tatou lava, ua tatou faalogo i lana lava upu.
Trenutno odabrano:
LUKA, 22: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.
