LUKA, 14
14
O LE MATAUPU XIV.
Ua faamalolo e Iesu le ma‘i i le sapati.
1Ua oo i le tasi sapati, ua maliu atu ai o ia i le fale o le tasi alii o le au faresaio e taumafa ai, ona latou lamalama lea ia te ia. 2Faauta foi, sa i ona luma le tasi tagata ua ma‘i i le fula. 3Ua fetalai atu Iesu i le au a‘oa‘o tulafono ma le au faresaio, ua faapea atu, Pe sa ea ona faamalolo i ma‘i i le sapati? 4Ua latou faalologo lava. Ona tago atu lea o ia ia te ia, ua faamalolo ia te ia, ma tuu atu e alu. 5Ua fetalai atu foi o ia ia te i latou, ua faapea atu, O ai so outou ua i ai se asini po o se povi, ua paū i le lua, e le sisi ae loa i luga i le aso sapati? 6A ua latou le mafai ona tali mai ia te ia i na mea.
7Ua fetalai atu ia le faataoto i e na tala‘iina, ina ua silafia e ia o i latou ua filifili i mea sili e taoto ai; ua faapea atu ia te i latou. 8Pe a fai atu se tasi ia te oe e alu i le faigaai, aua e te taoto i le mea sili, ne‘i i ai foi se tasi ua tala‘iina e ia ua sili ia te oe; 9ona alu atu lea o le na tala‘i ia te oulua ma ia, ma fai atu ia te oe, Ina sōsō atu ia ma le alii nei; ona e alu ai lea ma le mā i le mea e aupito faatauvaa. 10Peitai o oe, pe a tala‘iina oe, e te alu e taoto i le mea e aupito faatauvaa; ina ia fai atu le na tala‘i ia te oe, pe a sau o ia, Sole, ina alu ae ia oe i le mea e sili; ona mamalu ai lea oe i luma o e taooto e aai faatasi ma oe. 11Auā so se faamaualuga e ia ia te ia, e faamaulaloina lea; a o lē faamaulalo e ia ia te ia, e faamaualugaina lea. 12Ua fetalai atu foi o ia i le na tala‘i mai ia te ia, Pe a e sauni se faigaai, po o se talisuaga, aua e te tala‘i i au uo, po o ou uso, po o tagata o lou aiga, po o tagata mauoa tou te tuaoi, ne‘i latou toe tala‘i mai foi ia te oe, ona tauia mai lea o oe. 13Peitai o oe, pe a e sauni le faigaai, ina tala‘i ia i e matitiva, i e mumutu, i e pipili, ma e tauaso; 14e manuia ai oe; auā latou te le mafaia ona taui mai ia te oe; a e tauia oe i le toe tutū mai o e amiotonu.
15O le tasi o e na taooto e aai ma ia, ua faalogo o ia i na mea, ona fai mai lea o ia ia te ia, Amuia lē ‘ai i le malo o le Atua. 16A ua fetalai atu o ia ia te ia, Na saunia e le tasi tagata le talisuaga tele, na tala‘i atu foi e ia i tagata e toatele; 17ua oo foi i le itu aso e fai ai le talisuaga, ona auina atu lea e ia o lana auauna e fai atu i e na tala‘iina, Ia outou o mai, auā ua uma ona saunia o mea uma. 18Ona latou fealoalofa‘i ai lea, ua tasi le loto. Ua fai mai le tasi ia te ia, Ua ou faatau le fanua, e tatau ona ou alu atu e matamata ai; se‘i e faapea, ia tuu mai ia te au. 19Ua fai mai foi le tasi, Ua ou faatau povi e lima ni tailua, ou te alu e faataitai i ai; se‘i e faapea, ia tuu mai ia te au. 20Ua fai mai foi le tasi, Ua ou fai avā; o le mea lea ou te le mafai ai ona alu. 21Ua alu atu lea auauna ua faamatala atu ia mea i lona alii. Ona ita ai lea o le matai o le aiga, ua fai atu ia i lana auauna, Ina alu ia ia vave i ala ma alātua o le aai, ma ia au mai iinei i e matitiva, ma e mumutu, ma e pipili, atoa ma e tauaso. 22Ona fai mai lea o le auauna, Le alii e, ua uma ona faia o le mea na e poloai mai ai, a e lei nofoia le fale. 23Ua fai atu le alii i le auauna, Ina alu atu ia i ala tele ma magāala, ma ia pulunaunau atu latou te o mai, ina ia tumu lo‘u nei fale. 24Auā ou te fai atu ia te outou, E leai lava se tasi o ia tagata e na tala‘iina, e ‘ai i la‘u talisuaga nei.
25Ua o faatasi ma ia le motu o tagata e toatele; ona fāliu lea o ia, ma fetalai atu ia te i latou, 26Afai e sau se tasi ia te au, a e le ‘ino‘ino i lona tamā, ma le tinā, ma le avā, ma le fanau, ma uso, ma tuafāfine e oo lava i lona ola, e le mafai ona fai o ia mo‘u soo. 27O se le ave lona satauro, ma ua le mulimuli mai ia te au, e le mafai ona fai o ia mo‘u soo. 28O ai foi so outou ua fia fai se ‘olo, e le muai nofo i lalo e faitau tupe e totogi a‘i, po ua lava ana mea e faauma ai? 29ina nei tauemu mai ia te ia o tagata uma e maimoa, ina ua tuu le faavae, a e le mafai ona faauma ai, 30e faapea mai, O le tagata lenei, na amata ona fai, a e lei mafai ona faauma. 31Po o ai le tupu, o le a alu atu e tau ma le tasi tupu, e le muai nofo i lalo e filifili, pe mafai ia te ia ma ona tagata e sefulu afe, ona tau ma le ua sau e tau ma ia, ua ia te ia tagata e lua sefulu o afe? 32pe afai e leai, e tuu atu e ia le sāvali, manū o mamao ia, e faatoga atu ia ola le taua. 33E faapea foi so outou e le lafoai ana mea uma, e le mafai ona fai o ia mo‘u soo. 34O le mea lelei le masima; a e afai e magalo le masina, pe se a se mea e faamāi a‘i? 35E le aoga ia i le fanua, e le aoga foi e fai ma otaota e nasu a‘i; a ua lafoaiina i fafo. O lē ua i ai taliga e faalogo ai, ina faalogo mai ia o ia.
Trenutno odabrano:
LUKA, 14: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.
