IOANE, 7
7
O LE MATAUPU VII.
O le tausamiga o fale apitaga.
1Ua mavae ia mea, ona femaliuai ai lea o Iesu i Kalilaia; auā e lei finagalo o ia e femaliuai i Iutaia, auā ua mananao tagata lutaia e fia fasioti ia te ia. 2Ua latalata le tausamiga o Iutaia, o le tausamiga o fale apitaga. 3O le mea lea ua fai mai ai ona uso ia te ia, Ia e tuua lenei mea, ma e alu ane i Iutaia, ina ia vaavaai atu foi ou soo i au galuega e te faia. 4Auā e leai se tasi e fai faalilolilo se mea pe a manao o ia i le fia faaalia o ia; afai ua e faia ia mea, ia e faaalia oe e oe i le lalolagi. 5Auā o ona uso foi, latou te lei talitonu ia te ia. 6Ona fetalai atu ai lea o Iesu ia te i latou, E lei oo mai o‘u aso; a o aso uma lava e tatau mo outou. 7E le mafai le lalolagi ona ‘ino‘ino ia te outou; a e ‘ino‘ino mai ia te au, auā ou te molimau i ai ua leaga ana amio. 8O ae ia outou i lea tausamiga; ou te le alu ae nei i lea tausamiga, auā e lei oo mai o‘u po. 9Ua ia fetalai atu ia mea ia te i latou, a ua nofo pea o ia i Kalilaia. 10Ua o ae ona uso, ona maliu ae lea o ia i le tausamiga, e le i faaali, a e peiseai ua faalilolilo. 11Ona tausaili ai lea o Iutaia ia te ia i le tausamiga, ua faapea ane, O ifea o i ai o ia? 12Ua tele foi le femusuai o le motu o tagata ia te ia; ua faapea isi, O le tagata lelei o ia; a ua faapea isi, E leai, a ua ia faasese i le nuu. 13A e lei tautala faali se tasi ia te ia, ona o le mata‘u ia Iutaia. 14Ua oo i le aso tuloto o le tausamiga, ua maliu ae ai Iesu i le malumalu, 15ua a‘oa‘o ai. Ona ofo ai lea o Iutaia, ua faapea ane, Pe faapefea ea ona poto o lenei tagata, a e lei a‘oa‘oina o ia? 16Ua fetalai atu Iesu ia te i latou, ua faapea atu, O la‘u mataupu, e le o sa‘u lava, a o lana na auina mai a‘u. 17Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a‘u. 18O lē tautala fua ia te ia, ua saili e ia lona lava viiga; a o lē saili ia viia le na auina o ia, e faamaoni lea, e leai foi sana amioletonu. 19E lei tuuina atu ea e Mose le tulafono ia te outou, a e leai se tasi o outou e anaana i le tulafono; pe se a le mea tou te fia fasioti ai ia te au? 20Ona tali mai lea o le motu o tagata, ua faapea mai, O ia te oe le temoni; o ai ea e fia fasioti ia te oe? 21Ua tali atu Iesu ia te i latou, ua faapea atu, Ua ou faia le galuega e tasi, na outou ofo ai uma lava. 22O lea na tuu atu ai e Mose le peritome ia te outou, (e le ona ua mafua ia Mose, a o tamā,) o le sapati foi tou te faaperitomeina ai tagata. 23Pe afai e peritomeina se tagata i le sapati, ne‘i solia le tulafono a Mose, pe se a le mea tou te ita mai ai ia te au, auā na ou faamaloloina le tino atoa o le tagata i le sapati? 24Aua le soona faamasino, a ia faamasino i le faamasinoga tonu.
25Ona faapea ane lea o isi tagata o Ierusalema, E le o ia ea lenei latou te fia fasiotia? 26Faauta foi, o loo tautala faaali lava o ia, a e le fai atu sa latou upu ia te ia; po ua iloa lava e le au faipule o le Keriso moni lava lenei? 27Peitai ua tatou iloa le mea ua sau ai lenei tagata; a o le Keriso, pe a maliu mai o ia, e leai se tasi na te iloa pe maifea o ia. 28Ona alaga lea o Iesu, ina o a‘oa‘o i le malumalu, ua faapea atu, Ua outou iloa a‘u, ua iloa foi e outou le mea ua ou sau ai; ou te lei sau fua lava a‘u, a ua moni lava o ia ua auina mai a‘u, e lei iloa o ia e outou; 29a o a‘u, ua ou iloa o ia, auā mai ia te ia lava a‘u; o ia foi ua auina mai a‘u. 30Ona latou fia pue lea ia te ia; a e lei oo se lima o se tasi ia te ia, auā e lei oo i ona po. 31A e toatele ua talitonu ia te ia nai le motu o tagata, ma latou faapea ane, Pe a maliu mai le Keriso, e tele ea faailoga e faia e ia i faailoga ua faia e lenei tagata? 32Ua faalogo le au faresaio i le femusuai o le motu o tagata ia te ia i ia mea; ona aauina lea e le au faresaio ma le au ositaulaga sili o auauna e pue ia te ia. 33Ona faapea atu lea o Iesu ia te i latou, Toe itiiti nai aso ou te i ai ia te outou i lo‘u alu atu ai ia te ia ua auina mai a‘u. 34E saili outou ia te au, a e le iloa a‘u; o le mea foi ou te i ai a‘u, tou te le mafai ona ō i ai. 35Ona faapea ane lea o Iutaia o le tasi i le tasi, Po o fea a alu i ai o ia, e le mafai ai ona tatou iloa o ia? Pe alu ia i e ua taapeape i Eleni, e a‘oa‘o ai foi i Eleni? 36O le a lena upu na ia fai mai ai, E saili outou ia te au, a e le iloa a‘u; o le mea foi ou te i ai a‘u, tou te le mafai ona ō i ai?
37O le toe aso, o le aso tele o le tausamiga, ua tulai ai Iesu, ma alaga, ua faapea atu, Afai e fia inu se tasi, ina sau ia ia te au e inu ai. 38O se faatuatua ia te au, e faapei ona fai mai o le Tusi, E tafe mai o vaitafe mai totonu ia te ia, o le vai ola lava. 39Ua fetalai atu o ia lena upu i le Agaga, e maua e i latou ua faatuatua ia te ia; auā o ona po ia e lei maua ai le Agaga Paia, auā e lei oo Iesu i lona mamalu. 40E toatele o le motu o tagata ua faalogo i lea upu, ona faapea ai lea o i latou, E moni, o lea lava perofeta lenei. 41Ua faapea foi isi, O le Keriso lenei; a ua faapea isi, Pe tupu mai le Keriso mai Kalilaia? 42ua le fai mai ea le Tusi, e tupu mai le Keriso mai le fanauga a Tavita, mai Peteleema foi, o le aai, sa i ai Tavita? 43Ua vaeluaina ai le motu o tagata ia te ia. 44Ua fia pue atu ia te ia nisi o i latou, a e lei tago atu se lima o se tasi ia te ia.
45Ua foi atu auauna i le au ositaulaga sili ma le au faresaio; ona faapea mai ai lea o i latou ia te i latou, Pe se a le mea ua outou le ta‘ita‘i mai ai ia te ia? 46Ona tali atu lea o auauna, Ua leai lava se tagata e tautala pei o lena tagata. 47Ona tali mai lea o le au faresaio ia te i latou, Po ua faaseseina foi outou? 48Po ua talia o ia e se tasi o le au faipule, po o se tasi o le au faresalo? 49A o lenei vao tagata ua le iloa le tulafono, ua fetuuina lava i latou. 50Ua fai atu Nikotemo ia te i latou, o ia na alu ia te ia i le po, o le isi foi o i latou, 51Pe faasalaina ea se tagata i la tatou tulafono, a o lei muai faalogologo ia te ia, ma iloa ana mea ua faia? 52Ona tali mai lea o i latou, ua faapea mai ia te ia, E te se Kalilaia ea foi oe? Ia e saili ma ia e iloa, e le tu mai lava se perofeta mai Kalilaia. 53Ona taitasi lea ma alu i lona fale.
Trenutno odabrano:
IOANE, 7: SOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Samoan Edited Old Version © Bible Society of the South Pacific, 2017.
