Lucas 19
19
Si Jesus kag si Zaqueo
1Si Jesus nagsulod sa Jerico kag nag-agi man lang sia didto. 2May pangulo sang manugsukot sang buhis didto nga manggaranon nga ginhingalanan kay Zaqueo. 3Nagtinguha sia sa pagtan-aw kon sin-o si Jesus, ugaling tungod kay putot sia kag madamo ang mga tawo, indi sia makakita sa iya. 4Gani nagdalagan sia una sa mga tawo kag nagsaka sa kahoy nga sikomoro, agod makakita sia kay Jesus nga magaagi sa sadto nga dalan. 5Sang pag-abot ni Jesus sa sadto nga lugar nagtangla sia kag nagsiling sa iya, “Zaqueo, panaog ka sing dalidali, tungod kay madayon ako sa imo balay karon nga adlaw.”
6Nagpanaog si Zaqueo sing dalidali kag ginbaton niya si Jesus sa daku nga kalipay. 7Ang tanan nga mga tawo nga nakakita sini nagkulomuron, “Ini nga tawo nagdayon sa balay sang isa ka makasasala.”
8Si Zaqueo nagtindog kag nagsiling sa Ginoo, “Karon, Ginoo, ihatag ko sa mga imol ang katunga sang akon mga pagkabutang kag kon may gindayaan ako, bayaran ko sia sing apat ka pilo.”
9Si Jesus nagsiling sa iya, “Ang kaluwasan nag-abot sa sining panimalay karon nga adlaw, kay ini sia kaliwat man ni Abraham. 10Kay#Mat. 18:11. ang Anak sang Tawo nag-abot sa pagpangita kag sa pagluwas sang nadula.”
Ang Palaanggiran Nahanungod sang mga Sensilyo nga Bulawan
(Mat. 25:14-30)
11Sang#Mat. 25:14-30. nagapamati ang mga tawo sa sini nga mga pulong, nagpadayon si Jesus sa pagsugid sa ila sing isa ka palaanggiran kay malapit na sia sa Jerusalem, kag naghunahuna sila nga ang Ginharian sang Dios manug-abot na. 12Gani nagsiling sia, “May isa ka dungganon nga tawo nga nagkadto sa malayo nga pungsod agod himuon sia nga hari kag dayon magapauli. 13Sa wala pa sia makalakat, gintawag niya ang iya napulo ka mga suloguon kag ginhatagan ang tagsatagsa sa ila sing 1,000 ka pisos kag ginsingganan, ‘Patikanga ninyo ini tubtob nga mag-abot ako.’ 14Karon, ang iya mga kasimanwa nagdumot sa iya, gani nagpaapas sila sing mga mensahero nga magasiling, ‘Indi kami luyag nga ini nga tawo maghari sa amon.’
15“Ang dungganon nga tawo ginhimo nga hari kag nagbalik sia. Sa gilayon nagsugo sia nga panawgon ang iya mga suloguon nga ginhatagan niya sing kwarta, agod nga mahibaluan niya kon pila ang ila naganansya. 16Ang nahauna nag-abot kag nagsiling, ‘Sir, nakaganansya ako sing 10,000 sa 1,000 ka pisos nga ginhatag mo sa akon.’ 17Nagsiling sia sa iya, ‘Maayo gid! Maayo ka nga suloguon! Tungod kay matutom ka sa diutay nga mga butang, magagahom ka sa napulo ka siudad.’ 18Ang ikaduha nga suloguon nag-abot kag nagsiling, ‘Sir, nakaganansya ako sing 5,000 sa 1,000 ka pisos nga ginhatag mo sa akon.’ 19Nagsiling sia sa sini nga suloguon, ‘Magagahom ka sa lima ka siudad.’ 20Ang isa pa ka suloguon nag-abot kag nagsiling, ‘Sir, yari ang imo kwarta. Gintago ko ini nga naputos sa panyo. 21Nahadlok ako sa imo tungod kay maid-id ka nga tawo. Ginakuha mo ang indi imo, kag ginaani mo ang wala mo masab-og.’ 22Nagsiling sia sa iya, ‘Matamad ka nga suloguon! Ang imo mismo ginsiling amo ang gamiton ko sa pagkondenar sa imo. Nakahibalo ikaw nga maid-id ako nga tawo, nga nagakuha sang indi akon kag nagaani sang wala ko masab-og. 23Ti, ngaa bala wala mo pag-ipatago sa bangko ang akon kwarta? Kuntani sa akon pagbalik mabaton ko ang akon kwarta nga may saka na.’ 24Kag nagsiling sia sa mga nagatilindog didto, ‘Kuhaa ninyo sa iya ang kwarta kag ihatag sa suloguon nga may 10,000 ka pisos.’ 25Pero nagsiling sila sa iya, ‘Sir, may 10,000 ka pisos na sia! 26Nagsabat#Mat. 13:12; Mar. 4:25; Luc. 8:18. sia, ‘Nagasiling ako sa inyo nga ang tagsatagsa nga may yara na, hatagan pa, pero ang tawo nga wala iya, bisan ang diutay nga iya kuhaon pa. 27Karon, nahanungod sadtong akon mga kaaway nga indi luyag nga ako manginhari nila, dalha sila diri sa akon atubang kag pamatya sila.’”
Ang Madinalag-on nga Pagsulod ni Jesus sa Jerusalem
(Mat. 21:1-11; Mar. 11:1-11; Juan 12:12-19)
28Sa tapos makahambal sini si Jesus, nag-una sia sa ila sa pagtaklad pakadto sa Jerusalem. 29Sang naghinampot sia sa Betfage kag Betania, sa Bukid sang mga Olivo, ginpauna niya ang duha sang mga gintuton-an 30kag ginsingganan, “Kadto kamo sa barangay nga yara sa unhan. Sa inyo pagsulod didto makita ninyo ang isa ka polyino nga nahigot kag wala pa gid masakyi ni bisan sin-o. Hubari ninyo ini kag dalha diri. 31Kon may mamangkot sa inyo, ‘Ngaa ginahubaran ninyo ini?’ singgani sia, ‘Ang Ginoo#19:31 Ang Ginoo: ukonAng tag-iya sini. may kinahanglan sini.’”
32Naglakat sila kag ila nakita ang tanan suno sa ginhambal ni Jesus sa ila. 33Sang ginahubaran nila ang polyino, ang mga tag-iya sini nagsiling sa ila, “Ngaa ginahubaran ninyo ini?”
34Nagsabat sila, “Ang Ginoo may kinahanglan sini.” 35Dayon gindala nila ang polyino kay Jesus, ginhampiluan sang ila mga kunop kag ginpasakay si Jesus. 36Sang nagasakay sia naghumlad ang mga tawo sang ila mga kunop sa dalan nga iya pagaagyan.
37Sang nagahilapit sia sa Jerusalem, sa kunsaran sang Bukid sang mga Olivo, daku nga grupo sang iya mga gintuton-an ang nagpasalamat sa Dios kag nagdayaw sa iya sa mabaskog nga tingog tungod sang tanan nga gamhanan nga mga buhat nga ila nakita. 38Nagsiling#Sal. 118:26. sila, “Dayawon ang Hari nga nagaabot sa ngalan sang Ginoo! Paghidait sa langit, kag pagdayaw sa Dios!”
39Karon ang iban nga mga Fariseo nga yara upod sa mga tawo nagsiling kay Jesus, “Manunodlo, pahipusa ang imo mga gintuton-an!”
40Si Jesus nagsabat, “Nagasiling ako sa inyo, kon maghipos sila, ang mga bato mismo magasinggit!”
Naghibi si Jesus tungod sa Jerusalem
41Sang malapit na gid si Jesus sa Jerusalem kag sang nakita niya ini, naghibi sia tungod sini nga siudad. 42Nagsiling sia, “Kon nahibaluan mo lang kuntani sa sini nga adlaw kon ano ang kinahanglan agod may paghidait ka! Ugaling sa subong indi ka sini makakita. 43Magaabot ang mga adlaw nga ang imo mga kaaway magalibot sa imo sing mga barikada, magakibon sa imo, kag magasalakay sa imo sa atubangan, sa kilid kag sa likod. 44Laglagon ka nila sing bug-os lakip ang mga tawo sa sulod sang imo mga pader. Wala na gid sing bato nga ila ibilin nga nagasampaw sa isa, tungod kay wala mo pagkilalaha ang tion sang pag-abot sang Dios sa pagluwas sa imo!”
Si Jesus Nagkadto sa Templo
(Mat. 21:12-17; Mar. 11:15-19; Juan 2:13-22)
45Dayon si Jesus nagsulod sa Templo kag iya ginpangtabog ang mga manugbaligya 46kag#Isa. 56:7; Jer. 7:11. nagsiling sia sa ila, “Nasulat sa mga Kasulatan, ‘Ang akon Templo manginbalay nga palangamuyoan.’ Pero ginhimo ninyo ini nga palanaguan sang mga makawat!”
47Adlaw-adlaw#Luc. 21:37. si Jesus nagpanudlo sa Templo. Ang pangulo nga mga pari, ang mga manunodlo sang Kasugoan, kag ang mga pangulo sang banwa nagtinguha sa pagpatay sa iya, 48pero wala sila makakita sang paagi sa paghimo sini, tungod kay ang tanan nga mga tawo nawili gid sa pagpamati sa iya.
Trenutno odabrano:
Lucas 19: MBBHIL12
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Maayong Balita nga Biblia © Philippine Bible Society, 2012
