Juan 6
6
Ginpakaon ni Jesus ang Lima ka Libo
(Mat. 14:13-21; Mar. 6:30-44; Luc. 9:10-17)
1Sa tapos sini, si Jesus nagtabok sa Linaw sang Galilea (nga ginatawag man Linaw sang Tiberias). 2Madamo nga mga tawo ang nag-apas sa iya, tungod kay nakakita sila sang iya gamhanan nga mga buhat sa pagpang-ayo sang mga masakiton. 3Nagtaklad si Jesus kag ang iya mga gintuton-an sa isa ka bakulod kag nagpungko sia upod sa ila. 4Ang Piesta sang Pascua sang mga Judio malapit na. 5Nanghulonghulong si Jesus kag nakita niya ang madamo nga mga tawo nga nagapalapit sa iya, gani nagpamangkot sia kay Felipe, “Diin bala kita makabakal sang kalan-on nga makaigo sa pagpakaon sini nga mga tawo?” (6Nagpamangkot sia sini sa pagtilaw kay Felipe, ang matuod amo nga si Jesus nakahibalo na kon ano ang iya pagahimuon.)
7Si Felipe nagsabat, “Bisan tigdiutay lang ang ihatag mo sa tagsa sa ila, ang tinapay nga nagabili sang 200 ka denario#6:7 DENARIO: Ang isa ka denario minimo nga suhol sang ordinaryo nga mamumogon para sa isa ka adlaw nga pag-obra (tan-awa ang 20:2). kulang pa.”
8Si Andres nga isa sang iya mga gintuton-an kag utod ni Simon Pedro nagsiling kay Jesus, 9“May bata diri nga lalaki nga may lima ka bilog nga tinapay nga sebada kag duha ka bilog nga isda. Pero ano bala ang pagkaigo sini sa amo nga kadamuon sang mga tawo?”
10Si Jesus nagsiling sa ila, “Papungkua ninyo ang mga tawo.” (Hilamunon yadto nga lugar.) Gani nagpungko ang tanan; mga 5,000 ka mga lalaki ang yadto didto. 11Dayon ginkuha ni Jesus ang tinapay, nagpasalamat sia sa Dios, kag ginpanagtag niya ini sa mga tawo nga nagapungko didto. Amo man ang ginhimo niya sa isda, kag ang tanan nakakaon suno sa luyag nila. 12Sang nabusog na sila tanan, nagsiling si Jesus sa iya mga gintuton-an, “Tipuna ninyo ang mga nabilin nga wala sing may mausik.” 13Gani gintipon nila ang tanan nga nabilin, kag ang sobra sang lima ka bilog nga tinapay nga sebada nga ginkaon sang mga tawo nagpuno sang dose ka mga alat.
14Sang makita sang mga tawo ining gamhanan nga buhat nga ginhimo ni Jesus, nagsiling sila, “Matuod gid nga sia amo ang Propeta#6:14 ANG PROPETA: Tan-awa ang 1:21. nga magaabot sa kalibutan!” 15Nahibaluan ni Jesus nga magaabot sila kag piliton sia nga manginhari nila. Gani nagkadto sia liwat sa mga bakulod nga nagaisahanon lang.
Si Jesus Naglakat sa Ibabaw sang Tubig
(Mat. 14:22-33; Mar. 6:45-52)
16Sang sirom na, ang iya mga gintuton-an nagdulhog pakadto sa linaw, 17nagsakay sa sakayan kag nagtabok sa linaw pakadto sa Capernaum. Gab-i na kag si Jesus wala pa makabalik sa ila. 18Sa amo man nga tion nagmadlos ang hangin kag nagdalagku ang balod. 19Sang nakabugsay na ang mga gintuton-an sing mga lima ukon anom ka kilometro nakita nila si Jesus. Nagalakat sia sa ibabaw sang tubig nga nagapalapit sa ila sakayan. Hinadlukan gid sila, 20pero si Jesus nagsiling sa ila, “Indi kamo magkahadlok, ako ini!” 21Dayon nalipay sila sa pagbaton sa iya sa sakayan, kag sa gilayon nagdungka sila sa ila kaladtuan.
Ginpangita sang mga Tawo si Jesus
22Sang madason nga adlaw, ang mga tawo nga nagpabilin sa tabok sang linaw nakatalupangod nga isa na lang ang sakayan nga nabilin didto. Nahibaluan nila nga si Jesus wala magsakay sa sakayan upod sa iya mga gintuton-an, kundi nga naghalin sila nga silahanon lang. 23May mga sakayan halin sa Tiberias nga nagdungka malapit sa lugar diin ang mga tawo nagkaon sang tinapay, sa tapos makapasalamat ang Ginoo. 24Sang matalupangdan sang mga tawo nga wala na didto si Jesus kag ang iya mga gintuton-an, nagsakay sila sa mga sakayan kag nagkadto sa Capernaum sa pagpangita sa iya.
Si Jesus ang Tinapay sang Kabuhi
25Sang makita sang mga tawo si Jesus didto sa tabok sang linaw, nagsiling sila sa iya, “Manunodlo, san-o ka pa nag-abot diri?”
26Si Jesus nagsabat, “Nagasiling ako sa inyo sang matuod: ginapangita ninyo ako, indi tungod kay nakita ninyo ang akon gamhanan nga mga buhat, kundi kay nakakaon kamo sang tinapay kag nabusog kamo. 27Magpangabudlay#Sir. 24:19-22. kamo indi tungod sa kalan-on nga nagakapan-os, kundi magpangabudlay kamo tungod sa kalan-on nga nagatener kag nagahatag sang kabuhi nga wala sing katapusan. Ini nga kalan-on igahatag sa inyo sang Anak sang Tawo, tungod kay ginbutang sang Dios nga Amay sa iya ang selyo sang iya awtoridad.”
28Gani nagpamangkot sila sa iya, “Ano ang amon dapat himuon agod mahimo namon ang mga bulohaton nga luyag sang Dios?”
29Si Jesus nagsabat, “Amo ini ang bulohaton nga luyag sang Dios nga inyo himuon: magtuo kamo sa iya ginpadala.”
30Nagsabat sila, “Ano nga gamhanan nga buhat ang imo pagahimuon agod makita namon ini kag magtuo kami sa imo? Ano ang himuon mo? 31Ang#Exo. 16:4, 15; Sal. 78:24; Klm. Sol. 16:20-21. amon mga katigulangan nagkaon sang mana sa desierto, suno sa ginasiling sang kasulatan, ‘Ginhatagan niya sila sing tinapay nga kalan-on halin sa langit.’”
32Si Jesus nagsiling, “Nagasiling ako sa inyo sang matuod: indi si Moises ang naghatag sa inyo sang tinapay halin sa langit,#6:32 indi si Moises ang naghatag sa inyo sang tinapay halin sa langit: ukonang ginhatag ni Moises sa inyo indi amo ang tinapay nga halin sa langit. kundi ang akon Amay amo ang nagahatag sa inyo sang matuodtuod nga tinapay halin sa langit. 33Kay ang tinapay nga ginahatag sang Dios amo sia nga nagapanaog halin sa langit kag nagahatag sing kabuhi sa kalibutan.”
34Nagsiling sila sa iya, “Sir, hatagi kami pirme sini nga tinapay.”
35Si Jesus nagsiling sa ila, “Ako amo ang tinapay sang kabuhi. Ang nagapalapit sa akon indi na gid paggutomon, kag ang nagatuo sa akon indi na gid pag-uhawon. 36Karon, nagsiling ako sa inyo nga nakita na ninyo ako, pero indi kamo magtuo. 37Ang tagsatagsa nga ginahatag sang Amay sa akon magapalapit sa akon, kag ang bisan sin-o nga nagapalapit sa akon indi ko gid pagsikwayon. 38Tungod kay nag-abot ako halin sa langit indi sa pagtuman sang akon kabubot-on, kundi sang kabubot-on sang nagpadala sa akon. 39Amo ini ang kabubot-on sang nagpadala sa akon: nga wala ako sing madula sang bisan isa sang tanan nga iya gintugyan sa akon, kundi nga akon sila tanan banhawon sa katapusan nga adlaw. 40Kay amo ini ang kabubot-on sang akon Amay: nga ang tanan nga makakita sa Anak kag magtuo sa iya magaangkon sang kabuhi nga wala sing katapusan, kag akon sila banhawon sa katapusan nga adlaw.”
41Sa sini ang mga Judio nagkulomuron batok kay Jesus, tungod kay nagsiling sia, “Ako amo ang tinapay nga naghalin sa langit.” 42Gani, nagsiling sila, “Indi bala ini si Jesus nga anak ni Jose? Kilala naton ang iya amay kag iloy. Paano bala makasiling sia karon nga nagpanaog sia halin sa langit?”
43Si Jesus nagsabat, “Indi kamo magkulomuron sa inyo kaugalingon. 44Wala sing may makapalapit sa akon, kon indi sia pagbuyokon sang Amay nga nagpadala sa akon, kag banhawon ko sia sa katapusan nga adlaw. 45Ang#Isa. 54:13. isa sang mga propeta nagsulat, ‘Pagatudloan sang Dios ang tanan nga mga tawo.’ Ang tagsatagsa nga nagapamati sa Amay kag nagatuon sa iya nagapalapit sa akon. 46Wala ini nagakahulogan nga may nakakita sa Amay. Sia nga naghalin sa Dios amo lang ang nakakita sa Amay. 47Nagasiling ako sa inyo sang matuod: ang nagatuo may kabuhi nga wala sing katapusan. 48Ako amo ang tinapay sang kabuhi. 49Ang inyo mga katigulangan nagkaon sang mana sa desierto, pero nagkalamatay sila. 50Pero ang bisan sin-o nga nagakaon sang tinapay nga naghalin sa langit indi mapatay. 51Ako amo ang buhi nga tinapay nga naghalin sa langit. Ang bisan sin-o nga magkaon sini nga tinapay magakabuhi sing dayon, kag ang tinapay nga akon ihatag amo ang akon unod para sa kabuhi sang kalibutan.”
52Ini nga ginpanghambal ni Jesus nagtuga sang mainit nga pagbinaisay sa mga Judio. Nagpinamangkutanay sila, “Paano bala ang paghatag sini nga tawo sa aton sang iya unod agod aton kaunon?”
53Si Jesus nagsiling sa ila, “Nagasugid ako sa inyo sang matuod: kon indi kamo magkaon sang unod sang Anak sang Tawo kag mag-inom sang iya dugo wala kamo sing kabuhi sa inyo kaugalingon. 54Ang bisan sin-o nga nagakaon sang akon unod kag nagainom sang akon dugo may kabuhi nga wala sing katapusan kag banhawon ko sia sa katapusan nga adlaw. 55Kay ang akon unod amo ang matuod nga kalan-on, kag ang akon dugo amo ang matuod nga ilimnon. 56Ang bisan sin-o nga magkaon sang akon unod kag mag-inom sang akon dugo nagapabilin sa akon kag ako sa iya. 57Ginpadala ako sang buhi nga Amay, kag tungod sa iya nagakabuhi man ako. Sa amo man nga bagay, ang bisan sin-o nga nagakaon sa akon magakabuhi tungod sa akon. 58Gani amo ini ang tinapay nga naghalin sa langit. Indi ini kasubong sang tinapay nga ginkaon sang inyo mga katigulangan, kag wala sapayan nagkalamatay man sila. Ang nagakaon sini nga tinapay magakabuhi sing dayon.”
59Ginsiling ini ni Jesus sang nagpanudlo sia sa sinagoga didto sa Capernaum.
Ang mga Pulong sang Kabuhi nga Walay Katapusan
60Madamo sang iya mga gintuton-an ang nakabati sini kag nagsiling sila, “Tama kabudlay sini nga pagtulon-an. Sin-o bala ang makahangop sini?”
61Bisan wala masugiri si Jesus, nahibaluan niya nga nagakulomuron ang iya mga gintuton-an nahanungod sini. Gani nagsiling sia sa ila, “Nasaklaw bala kamo sini? 62Abi kon makita ninyo ang Anak sang Tawo nga nagakayab pabalik sa iya ginhalinan? 63Ang#Klm. Sol. 9:13-18. Espiritu sang Dios amo ang nagahatag sang kabuhi. Ang unod indi makasarang sini. Ang mga pulong nga ginahambal ko sa inyo nagahalin sa Espiritu sang Dios nga nagahatag sang kabuhi. 64Pero ang iban sa inyo wala nagatuo.” (Kay sa ginsugoran nakilala ni Jesus kon sin-o ang indi magtuluo kag kon sin-o ang magaluib sa iya.) 65Kag nagsiling pa gid sia, “Amo ini ang kabangdanan kon ngaa nagsiling ako sa inyo nga wala sing may makapalapit sa akon, kon indi sia pagtugotan sang Amay.”
66Sugod sadto nga tion, madamo sang mga gintuton-an ni Jesus ang nagbiya sa iya, kag indi na mag-upod sa iya. 67Dayon nagpamangkot si Jesus sa dose ka mga apostoles, “Kamo man bala luyag magbiya sa akon?”
68Si#Mat. 16:16; Mar. 8:29; Luc. 9:20. Simon Pedro nagsabat sa iya, “Ginoo, kay sin-o bala kami makadto? Yara sa imo ang mga pulong nga nagahatag sang kabuhi nga dayon. 69Kag karon nagatuo kami kag nakahibalo nga ikaw amo ang Balaan halin sa Dios.”
70Si Jesus nagsabat sa ila, “Indi bala nga ako ang nagpili sa inyo nga dose? Pero ang isa sa inyo yawa!” 71Nagahambal sia nahanungod kay Judas nga anak ni Simon Iscariote, kay si Judas bisan isa sang dose ka mga apostoles, magaluib kay Jesus.
Trenutno odabrano:
Juan 6: MBBHIL12
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Maayong Balita nga Biblia © Philippine Bible Society, 2012
