LUKA 20
20
Iesu idia nanadaia, iena siahu be daika ese ia henia
1Dina ta, Iesu be Dubu Helaga lalonai ia hadibaia karaia, bona Sivarai Namona ia harorolaia. Vadaeni dubu biagudia bona taravatu hadibaia taudia bona hanua tau badadia ia dekenai idia lao, 2idia nanadaia, idia gwau, “Edena siahu dekena amo inai gaudia oi karaia?”
3Iesu ia haere, ia gwau, “Lau danu hereva tamona lau nanadaia umui dekenai, lau umui hamaoroa, 4Ioane ena bapatiso siahuna be guba dekena amo, o taunimanima dekena amo?”
5Idia sibona idia hereva henia, idia gwau, “Bema ita gwau guba dekena amo, ia be do ia gwau, ‘To edena bamona umui kamonai henia lasi?’ 6To bema ita gwau, ‘Taunimanima dekena amo,’ taunimanima ibounai ese nadi dekena amo ita do idia hodoa, badina be idia gwau Ioane be peroveta tauna.” 7Unai dainai idia haere henia, idia gwau, “Ia be edeseni dekena amo ai diba lasi.”
8Vadaeni Iesu ia gwau, “Lau danu inai gaudia lau karaia ena siahu be do lau hamaoroa lasi umui dekenai.”
Parabole: Vain ena uma gabu naria taudia dikadia
9Vadaeni Iesu ese taunimanima dekenai ia hereva henia lou, inai parabole ia hamaoroa idia dekenai, ia gwau, “Tau ta vain ena uma gabu ia hadoa, vadaeni vain ena uma gabu be naria taudia dekenai ia henia, do idia naria. Gabeai idau hanua dekenai ia lao, nega daudau unuseni ia noho. 10Uma gabu ena huahua neganai, ia ese iena hesiai tauna ta ia siaia lao, uma gabu naria taudia dekena amo vain ena anina do ia abia. To uma gabu naria taudia ese idia botaia, iena imana anina lasi idia siaia lou. 11Vadaeni hesiai tauna ma ta ia siaia, to idia ese idia botaia, idia hadikaia, iena imana anina lasi ma idia siaia lou. 12Hesiai tauna namba 3 danu ia siaia, to bero idia henia ia dekenai, bona idia negea lao murimuri dekenai. 13Vadaeni uma gabu biaguna ia gwau. ‘Lau be edena bamona do lau karaia? Lauegu natuna, egu lalokau, do lau siaia, do idia itaia, sedira do idia matauraia ia dekenai.’ 14To uma gabu naria taudia ese idia itaia, bona idia sibona idia herevahereva, idia gwau, ‘Iena natuna korikori be inai. Do ita alaia mase, vadaeni uma gabu be do ita abia iseda.’ 15Vadaeni idia veria lao uma gabu murimuri dekenai, idia alaia mase.
“Uma gabu ena biaguna be edena bamona do ia karaia idia dekenai? 16Ia be do ia mai, uma gabu naria taudia do ia alaia ore, uma gabu be idau taudia haida dekenai do ia henia.”
Inai hereva idia kamonai neganai, haida idia gwau, “Ia! Lasi! Unai bamona do ia vara lasi!”
17Iesu ese iena matana dekenai ia itadia noho, ia gwau, “Buka Helaga dekenai ia torea herevana ena anina be dahaka? Buka Helaga ia gwau:
“ ‘Ruma haginia taudia ese idia ura henia lasi nadi be,
ruma ena kona nadi ia halaoa vadaeni.’
18Unai nadi latanai do idia moru taudia be do ia makohia momokani, bona bema unai nadi be tau ta ena latanai ia moru neganai, unai tau be do ia patapata momokani, kahu bamona.”
19Taravatu hadibaia taudia bona dubu biagudia ese idia diba unai sivarai be idia edia kara. Unai dainai unai nega korikori dekenai, idia ura Iesu idia dogoatao. To idia gari bada unai taunimanima momo dekenai.
Kaisara ena takisi
20Vadaeni taravatu hadibaia taudia bona dubu biagudia ese Iesu idia itaia noho, bona dika taudia ia dekenai idia siaia. Edia dika idia hunia, edia toana Iesu vairanai be tau namodia bamona. Idia ura Iesu idia koia, vadaeni hereva ta do ia gwauraia, bona unai hereva dainai, Iesu do idia samania diba, gavana dekenai.
21Idia ese Iesu idia nanadaia, idia gwau, “Hadibaia tauna e, ai diba oiemu hereva bona oeimu hadibaia be idia maoromaoro, bona taunimanima edia hereva dekenai oi laloa lasi, to Dirava ena dala sibona oi hadibaia namonamo. 22Kaisara ena takisi moni do ita henia be ia maoro o?”
23To ia be edia koikoi ia diba, vadaeni ia haere, ia gwau, 24“Moni ta umui mailaia, lau itaia. Daika ena laulau bona daika ena revareva be inai?”
Idia gwau, “Kaisara ena.”
25Vadaeni Iesu ia gwau, “Kaisara ena, Kaisara dekenai do umui henia, to Dirava ena, Dirava dekenai do umui henia.”
26Vadaeni unai taunimanima momo edia vairana dekenai, inai dubu biagudia ese be dala lasi Iesu idia dogoatao, badina iena hereva be kerere lasi. Iena haere dekenai idia hoa bada, idia be mai edia hereva ta lasi.
Toreisi lou herevadia
27Unai murinai Sadukea taudia haida Iesu dekenai idia lao. Unai orea idia gwau be taunimanima idia mase neganai, do idia toreisi lou lasi. Vadaeni idia nanadaia, idia gwau, 28“Hadibaia tauna e, Mose ese taravatu ia henia ai dekenai, ia gwau, ‘Tau ta do ia mase, bona iena vabu do ia noho mai ena natuna lasi, vabu be unai mase tauna ena tadina ese do ia adavaia, iena natuna do ia havaraia, mase tauna ena.’ 29Guna, aiemai huana dekenai tadikaka be 7 idia noho, ia vara guna tauna ese hahine ta ia adavaia, to natuna lasi ia mase vadaeni. 30Iharuana bona ihatoina ese unai hahine idia adavaia, 31ia lao bona taudia 7 ese idia abia vadaeni. To ibounai idia mase, mai edia natuna lasi. 32Gabeai hahine danu ia mase vadaeni. 33Toreisi lou neganai, unai hahine be daika ena adavana? Badina be taudia 7 ese idia adavaia.”
34Iesu ia haere, ia gwau, “Inai tanobada taudia be hahine idia abia bona idia headava. 35To do idia toreisi lou, bona edia namo hegeregere mauri gabeai lalonai do idia vareai taudia be do idia headava lasi. 36Bona do idia mase lou lasi, idia be aneru danu do idia hegeregere, bona Dirava ena natuna do idia lao, badina idia be toreisi lou taudia. 37To mase dekena amo idia toreisi lou herevana be Mose ese ia hamomokania vadaeni au ginigini ia araia ena sivarai lalonai. Inai bamona ia gwau, ‘Lohiabada be Aberahamo ena Dirava, Isako ena Dirava, Iakobo ena Dirava.’ 38Unai dainai, ia be mase taudia edia Dirava lasi, to mauri taudia edia, badina taunimanima ibounai be ia dainai idia mauri.” 39Taravatu hadibaia taudia haida idia gwau, “Hadibaia tauna e, hereva maorona be unai.” 40Unai dekena amo idia nanadaia lou lasi, idia gari vadaeni.
Davida totona hereva
41To Iesu ese ia nanadaia idia dekenai, ia gwau, “Badina be dahaka taunimanima be idia gwau Keriso be Davida ena natuna, a? 42Davida be Salamo dekenai ia gwau:
“ ‘Lohiabada ese egu Lohiabada dekenai ia hamaoroa, ia gwau:
Lauegu imana idiba kahana dekenai do oi helai,
43ela bona oi dekenai idia tuari henia taudia ibounai,
be oiemu aena henunai gaudia dekenai do lau halaoa.’
44Bema Davida ese Keriso ia gwauraia ‘Lohiabada’, edena bamona Keriso be Davida ena natuna sibona?”
Taravatu hadibaia taudia edia kara
45Vadaeni taunimanima ibounai edia vairana dekenai Iesu ese iena diba tahua taudia ia hamaoroa, ia gwau, 46“Taravatu hadibaia taudia do umui naria namonamo. Idia be idia ura dabua lata herea karaia, vadaeni do idia loaloa gabudia dekenai taunimanima ese idia dekenai do idia hanamoa, bona dubu dekenai, bona aria neganai, gabu namo herea dekenai do idia helai. 47To idia ese vabu edia ruma dekenai gau idia abia haorea, bona taunimanima koia totona, guriguri lata herea idia gwauraia. Idia be edia davana metau do idia abia.”
Trenutno odabrano:
LUKA 20: HMOTU93
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
