ᓭᐣᐟ ᒑᐣ 1

1ᒥᒋᒫᐨ ᐅᐦᒋ ᑭ ᐊᔮᐤ ᐃᑌᐧᐃᐧᐣ, ᒥᓇ ᐃᑌᐧᐃᐧᐣ ᑭ ᐃᐧᒉᐁᐧᐤ ᑭᓭᒪᓂᑐᐊᐧ, ᐁᑯᓯ ᑭ ᑭᓭᒪᓂᑐᐃᐧᐤ ᐃᑌᐧᐃᐧᐣ. 2ᐁᐊᐧᑯ ᐊᐊᐧ ᒥᒋᒫᐨ ᐅᐦᒋ ᑭ ᐃᐧᒉᐁᐧᐤ ᑭᓭᒪᓂᑐᐊᐧ. 3ᐃᐧᔭ ᑲᐦᑭᔭᐤ ᑫᑲᐧᔭ ᑭ ᐅᓯᐦᑖᐤ; ᒥᓇ ᐁᑳ ᐃᐧᔭ ᐅᐦᒋ ᓇᒪ ᑫᑲᐧᐩ ᑭ ᐅᓯᒋᑳᑌᐤ ᑳ ᑭ ᐅᓯᒋᑳᑌᐠ. 4ᐃᐧᔭ ᑭ ᐱᒫᑎᓯᐃᐧᓂᐃᐧᐤ; ᒥᓇ ᒫᑲ ᐱᒫᑎᓯᐃᐧᐣ ᑭ ᐋᐧᓭᐢᑲᒫᑲᐧᐠ ᐊᔨᓯᔨᓂᐊᐧᐠ. 5ᐋᐧᐢᑌᐤ ᒫᑲ ᑭ ᐊᐧᓯᑌᐤ ᐊᐧᓂᑎᐱᐢᑳᕽ; ᒫᑲ ᐊᐧᓂᑎᐱᐢᑳᐤ ᓇᒪᐃᐧᔭ ᑭ ᑭᐢᑫᔨᑕᒧᒪᑲᐣ.

6 # ᒫᐟᔪ 3:1; ᒫᕒᐠ 1:4; ᓬᐅᐠ 3:1,2 ᑭ ᐊᔮᐤ ᐊᔨᓯᔨᓂᐤ ᑭᓭᒪᓂᑐᐊᐧ ᐁ ᐯ ᐃᓯᑎᓴᐦᐅᑯᐟ, ᒑᐣ ᐁ ᐃᓯᔨᐦᑳᓱᐟ. 7ᐁᐊᐧᑯ ᑭ ᐯ ᐋᒋᒧ, ᑭᑕ ᐋᑐᑕᕽ ᐋᐧᐢᑌᐤ ᑲᐦᑭᔭᐤ ᒫᑲ ᐊᔨᓯᔨᓂᐊᐧ ᐃᐧᔭ ᑭᑕ ᐅᐦᒋ ᑖᐯᐧᑕᒥᔨᐟ. 8ᓇᒪᐃᐧᔭ ᐃᐧᔭ ᑭ ᐁᐊᐧᑯᓂᐃᐧᐤ ᐊᓂᒪ ᐋᐧᐢᑌᐤ ᒫᑲ ᑭ ᐯ ᐃᓯᑎᓴᐋᐧᐤ ᑭᑕ ᐯ ᐋᑐᑕᕽ ᐊᓂᒪ ᐋᐧᐢᑌᐤ. 9ᐁᐊᐧᑯ ᑖᐯᐧ ᐋᐧᐢᑌᐤ, ᐃᐧᔮᓭᐢᑳᑯᒋᐠ ᑕᐦᑐ ᐊᔨᓯᔨᓂᐊᐧᐠ ᑳ ᐯ ᐱᐦᑐᑫᒋᐠ ᐅᑕ ᐊᐢᑭᕽ. 10ᐊᐢᑭᕽ ᐃᓴ ᑭ ᐊᔮᐤ, ᐃᐧᔭ ᒫᑲ ᑭ ᐅᓯᐦᑖᐤ ᐊᐢᑭ, ᓇᒪᐃᐧᔭ ᒫᑲ ᑭ ᑭᐢᑫᔨᒥᐠ ᐊᐢᑭ. 11ᑭ ᐯ ᓈᑌᐤ ᑳ ᑎᐯᔨᒫᐟ, ᒫᑲ ᓇᒪᐃᐧᔭ ᑭ ᐅᑎᓂᐠ ᑳ ᑎᐯᔨᒫᐟ. 12ᒫᑲ ᑕᐦᑐ ᑳ ᑭ ᐅᑎᓂᑯᐟ, ᐁᐊᐧᑯᓂ ᑭ ᒥᔦᐤ ᐃᑕᑭᒥᑯᐃᐧᐣ ᑭᑕ ᐅᑕᐋᐧᓯᒥᓯᒥᑯᔨᐟ ᑭᓭᒪᓂᑐᐊᐧ, ᐊᓂᐦᐃ ᐅᑎ ᑳ ᑖᐯᐧᔦᔨᑕᒥᔨᐟ ᐅ ᐃᐧᔪᐃᐧᐣ. 13ᐊᓂᑭ ᐁᑳ ᒥᑯᕽ ᑳ ᐅᐦᒋ ᓂᐦᑖᐃᐧᑭᒋᐠ, ᐊᐦᐳ ᐁᑳ ᐃᐧᔮᓯᐃᐧ ᐃᑌᔨᑕᒧᐃᐧᓂᕽ, ᐊᐦᐳ ᐁᑳ ᐊᔨᓯᔨᓂᐃᐧ ᐃᑌᔨᑕᒧᐃᐧᓂᕽ, ᑭᓭᒪᓂᑐᕽ ᐱᑯ ᐅᐦᒋ. 14ᐃᑌᐧᐃᐧᐣ ᑭ ᐃᐧᔭᓯᐃᐧᐤ, ᒥᓇ ᑭ ᑭ ᐃᐧᒋᐊᔮᒥᑯᓇᐤ (ᐁ ᑭ ᐋᐧᐸᐦᑕᒪᕽ ᒫᑲ ᐅ ᑭᐢᑌᔨᑖᑯᓯᐃᐧᐣ, ᑭᐢᑌᔨᑖᑯᓯᐃᐧᐣ ᐅ ᐯᔭᑯᑯᓯᓵᓇ ᐁᐧᔪᑖᐃᐧᕽ), ᐁ ᓵᑲᐢᑭᓀᐢᑲᑯᐟ ᑭᓭᐊᐧᑎᓯᐃᐧᐣ ᒥᓇ ᑖᐯᐧᐃᐧᐣ.

15ᒑᐣ ᑭ ᐋᒋᒣᐤ, ᐁ ᑭ ᑌᐯᐧᐟ, ᐅᒥᓯ ᐁ ᐃᑌᐧᐟ, ᐁᐊᐧᑯ ᐊᐊᐧ ᑳ ᑭ ᐊᒋᒪᐠ, ᑳ ᐯ ᐊᐢᑯᐃᐧᐟ ᓂᑳᐣ ᐃᐧᔭ ᐃᑕᑭᒋᑳᓱ ᐁ ᒪᐧᔦ ᐊᔮᔮᐣ ᒫᑲ ᑭ ᐊᔮᐤ. 16ᐅ ᒪᒪᐁᐧᔨᑖᑯᓯᐃᐧᓂᕽ ᒫᑲ ᑲᐦᑭᔭᐤ ᑭ ᑭ ᐅᐦᒋ ᐅᑎᓀᓇᐤ ᑭᓭᐋᐧᑎᓯᐃᐧᐣ ᒥᓇ ᑭᓭᐋᐧᑎᓯᐃᐧᐣ ᐅᐦᒋ. 17ᐅᔭᓱᐁᐧᐃᐧᐣ ᑭ ᒣᑭᓈᓂᐊᐧᐣ ᒧᓯᐢ ᐅᐦᒋ; ᒫᑲ ᑭᓭᐋᐧᑎᓯᐃᐧᐣ ᒥᓇ ᑖᐯᐧᐃᐧᐣ ᒋᓴᐢ ᙭ ᑭ ᐯᑕᐤ. 18ᓇᒪᐃᐧᑳᐨ ᐊᐃᐧᔭᐠ ᑭ ᐋᐧᐸᒣᐤ ᑭᓭᒪᓂᑐᐊᐧ, ᐱᑯ ᐯᔭᑯᑯᓯᓵᐣ. ᐅ ᑕᑯᓂᐁᐧᐃᐧᓂᕽ ᐁᐧᔪᑖᐃᐧᕽ ᑳ ᐊᔭᐟ, ᐃᐧᔭ ᐱᑯ ᑭ ᐊᒋᒣᐤ.

19ᐁᐊᐧᑯ ᐅᒪ ᐅᐟ ᐋᒋᒧᐃᐧᐣ ᒑᐣ, ᐃᐢᐱ ᒍᐊᐧᐠ ᒉᕒᐅᓴᓬᐊᒥᕽ ᑳ ᑭ ᐯ ᐅᐦᒋ ᐃᓯᑎᓴᐋᐧᒋᐠ ᐊᔭᒥᐦᐁᐃᐧᔨᓂᐊᐧ ᒥᓇ ᓬᐃᐸᑕ, ᑭᑕ ᑲᑫᐧᒋᒪᔨᐟ, ᐊᐁᐧᓇ ᑭᔭ? 20ᑭ ᐃᐧᐦᑕᒼ ᒫᑲ, ᓇᒪᐃᐧᔭ ᑭ ᐋᓀᐧᑕᒼ; ᒫᑲ ᑭ ᐃᑌᐧᐤ ᓇᒪᔦᐤ ᓂᔭ ᙭. 21#ᒫᓬᐊᑲᐩ 4:5; ᑎᔪᑕᕒᐊᓇᒥ 18:15,18ᑭ ᑲᑫᐧᒋᒣᐊᐧᐠ ᒫᑲ, ᐊᐁᐧᓇ ᒫᑲ? ᐃᓬᐊᐃᒐ ᒋ ᑭᔭ? ᐅᒥᓯ ᒫᑲ ᐃᑌᐧᐤ, ᓇᒪᐃᐧᔭ ᓂᔭ ᐁᐊᐧᑯ. ᑭᔭ ᒋ ᐊᓇ ᐅᑭᐢᑭᐁᐧᐦᐃᑫᐤ? ᑭ ᓇᐢᑫᐧᐊᐧᓯᒣᐤ ᒫᑲ, ᓇᒪᐃᐧᔭ. 22ᐅᒥᓯ ᒫᑲ ᑭ ᐃᑌᐊᐧᐠ, ᐊᐁᐧᓇ ᑭᔭ? ᑭᑕ ᑭ ᐊᒋᒧᐢᑕᐊᐧᑭᒋᐠ ᑳ ᑭ ᐯ ᐃᑎᓴᐅᑯᔮᐦᑭᐠ, ᑖᓂᓯ ᑭᔭ ᐁᑖᒋᒥᓱᔭᐣ? 23#ᐊᐩᓵᔭ 40:3ᐅᒥᓯ ᒫᑲ ᑭ ᐃᑌᐧᐤ, ᓂᔭ ᐊᓇ ᑳ ᒪᑌᐧ ᑌᐯᐧᐟ ᐱᑲᐧᑕᐢᑲᒥᑲᕽ, ᑲᐧᔭᐢᑲᐧᒧᑕᐋᐧᕽ ᐅ ᒣᐢᑲᓇᐤ ᑳ ᑎᐯᔨᐦᒋᑫᐟ, ᑳ ᑭ ᐃᑌᐧᐟ ᐅᑭᐢᑭᐁᐧᐦᐃᑫᐤ ᐊᐩᓵᔭ. 24ᐊᓂᑭ ᒫᑲ ᑳ ᑭ ᐯ ᐃᓯᑎᓴᐦᐅᐦᒋᐠ ᑭ ᐸᕒᐊᓯᐃᐧᐊᐧᐠ. 25ᑭ ᑲᑫᐧᒋᒣᐊᐧᐠ ᒫᑲ, ᐅᒥᓯ ᐁ ᑭ ᐃᑖᒋᐠ, ᑖᓀᑭ ᒫᑲ ᑳ ᐸᑊᑖᓯᐃᐧᐃᐁᐧᔭᐣ, ᑭᐢᐱᐣ ᓇᒪᔦᐤ ᑭᔭ ᐊᓇ ᙭, ᐊᐦᐳ ᐃᓬᐊᐃᒐ, ᐊᐦᐳ ᐊᓇ ᐅᑭᐢᑭᐁᐧᐦᐃᑫᐤ? 26ᒑᐣ ᑭ ᓇᐢᑫᐧᐊᐧᓯᒣᐤ, ᐅᒥᓯ ᐁ ᐃᑌᐧᐟ, ᓂᐱ ᓂᔭ ᓄᐦᒋ ᐸᑊᑕᐃᓯᐃᐧᐃᐋᐧᐣ; ᒫᑲ ᐯᔭᐠ ᑭ ᐃᐧᒋᑲᐸᐃᐧᐢᑖᑯᐋᐧᐤ, ᐁᑳ ᑳ ᑭᐢᑫᔨᒫᔦᐠ. 27ᐁᐊᐧᑯ ᐊᐊᐧ, ᑳ ᐯ ᐊᐢᑯᐃᐧᐟ ᐅ ᒪᐢᑭᓯᓀᔭᐱ ᐁᑳ ᐁ ᑌᐸᑫᔨᑖᑯᓯᔮᐣ ᑭᑕ ᐋᐱᑯᓇᒪᐧᐠ. 28ᐊᓂᑕ ᐃᓴ ᐯᑕᐹᕒᐊ ᑭ ᑕᓯ ᐊᔨᑭᓇᐧ ᐅᐦᐃ ᐊᑳᒥᕽ ᒑᕒᑕᓂᕽ, ᐃᑕ ᒑᐣ ᑳ ᑭ ᑕᓯ ᐸᑊᑕᐃᓯᐃᐧᐃᐁᐧᐟ.

29ᐃᐧᔮᐸᓂᔨᐠ ᒑᐣ ᐁ ᐋᐧᐸᒫᐟ ᒋᓴᓴ ᐁ ᐯ ᓇᑎᑯᐟ, ᐅᒥᓯ ᐃᑌᐧᐤ, ᒋᐢᐟ ᑭᓭᒪᓂᑐ ᐅ ᒫᔭᑎᐦᑯᓯᒪ, ᑳ ᐅᑎᓇᕽ ᐅ ᒪᒋᑎᐃᐧᓂᔨᐊᐧ ᐊᐢᑭᕽ ᑳ ᐊᔮᔨᐟ. 30ᐁᐊᐧᑯ ᐊᐊᐧ ᑳ ᑭ ᐋᒋᒪᐠ, ᐊᔨᓯᔨᓂᐤ ᑳ ᐯ ᐊᐢᑯᐃᐧᐟ ᐊᐊᐧᓯᒣ ᐃᐢᐱᑌᔨᑖᑯᓯᐤ ᐃᐢᐱᐨ ᓂᔭ: ᐁ ᒪᐧᔦ ᐊᔮᔮᐣ ᑭ ᐊᔮᐤ. 31ᓇᒪᐃᐧᔭ ᒫᑲ ᓂ ᑭ ᑭᐢᑫᔨᒫᐤ; ᒫᑲ ᑭᑕ ᑭᐢᑫᔨᒥᑯᐟ ᐃᐢᕒᐁᐃᓬᐊ, ᓂ ᐯ ᐅᐦᒋ ᐃᑐᐦᑖᐣ ᐁ ᐸᑊᑕᐃᓯᐃᐧᐃᐁᐧᔮᐣ ᓂᐱ ᐅᐦᒋ. 32ᒑᐣ ᒫᑲ ᑭ ᐊᒋᒧ, ᐅᒥᓯ ᐁ ᐃᑌᐧᐟ, ᓂ ᑭ ᐋᐧᐸᒫᐤ ᐊᐦᒑᕽ ᑭᐦᒋ ᑭᓯᑯᕽ ᐁ ᐯ ᐅᐦᒋ ᔮᓰᐟ ᐅᒥᒥᕽ ᐁ ᐃᓯᓈᑯᓯᐟ, ᐁ ᑭ ᑌᐧᐦᐅᑐᑖᑯᐟ ᒫᑲ. 33ᓇᒪᐃᐧᔭ ᒫᑲ ᓂ ᑭ ᑭᐢᑫᔨᒪᐤ; ᒫᑲ ᐊᓇ ᑳ ᑭ ᐯ ᐃᓯᑎᓴᐦᐅᐟ ᑭᑕ ᐸᑊᑖᓯᐃᐧᐃᐁᐧᔭᐣ ᓂᐱ ᐅᐦᒋ, ᐁᐊᐧᑯ ᑳ ᑭ ᐃᓯᐟ, ᐊᓇ ᑫ ᐊᐧᐸᒪᐊᐧᑌ, ᐊᐦᒑᐦᑲᐧ ᐁ ᐯ ᔮᓯᑐᑖᑯᐟ, ᒥᓇ ᑫ ᑭᐱᒋᑐᑖᑯᐟ, ᐁᐊᐧᑯ ᑳ ᐸᑊᑕᐩᐃᐧᐃᐁᐧᐟ ᑲᓇᒋ ᐊᐦᒑᐦᑲᐧ ᐅᐦᒋ. 34ᐁᑯᓯ ᓂ ᑭ ᐋᐧᐸᒫᐤ, ᒥᓇ ᓂ ᑭ ᐋᒋᒫᐤ, ᐁᐊᐧᑯ ᐊᐊᐧ ᑭᓭᒪᓂᑐᐃᐧᑯᓯᓵᐣ.

35ᒥᓇ ᐁ ᐊᑎ ᐊᐧᐸᓂᔨᐠ ᒑᐣ ᑭ ᓂᐸᐃᐧᐤ, ᐊᓯᒋ ᓂᓱ ᐅ ᑭᐢᑭᓄᐦᐊᒪᐋᐧᑲᓇ; 36ᐁ ᑲᓇᐋᐧᐸᒫᐟ ᒫᑲ ᒋᓴᓴ ᐁ ᐱᒧᐦᑌᔨᐟ, ᐅᒥᓯ ᑭ ᐃᑌᐧᐤ, ᒋᐢᐟ ᐅ ᒫᔭᑎᐦᑯᓯᒪ ᑭᓭᒪᓂᑐ! 37ᐊᓂᑭ ᓂᓱ ᑭᐢᑭᓄᐦᐊᒪᐋᐧᑲᓇᐠ ᑭ ᐯᑕᐁᐧᐊᐧᐠ ᐅᒥᓯ ᐁ ᐃᑌᐧᔨᐟ, ᑭ ᐱᒥᑎᓴᐁᐧᐊᐧᐠ ᒫᑲ ᒋᓴᓴ. 38ᐁᑯᓯ ᒋᓴᐢ ᑭ ᑫᐧᐢᑭᐤ, ᐁ ᐋᐧᐸᒫᐟ ᒫᑲ ᐁ ᐯ ᐱᒥᑎᓴᐦᐅᑯᐟ, ᐅᒥᓯ ᐃᑌᐤ, ᑫᑲᐧᐩ ᓀᑐᓇᒣᐠ? ᐅᒥᓯ ᑭ ᐃᑎᐠ, ᕒᐊᐸᐩ, (ᐁᐊᐧᑲᐧᓂᒪ ᐁ ᐃᑌᐧᕽ ᐁ ᐃᑌᐧᐢᑕᒪᐋᐧᑕᒥᕽ ᑫᐢᑭᓄᐊᒪᑫᔭᐣ,) ᑕᓂᑌ ᐃᐧᔨᑭᔭᐣ? 39ᐅᒥᓯ ᒫᑲ ᐃᑌᐤ, ᐯ ᐃᑐᐦᑌᐠ ᐁᑯᓯ ᒫᑲ ᑭ ᑲ ᐋᐧᐸᑌᓈᐋᐧᐤ. ᑭ ᐯ ᐃᑐᐦᑌᔨᐊᐧ ᒫᑲ ᐁ ᑭ ᐋᐧᐸᐦᑕᒥᔨᐟ ᐃᑕ ᐁ ᐃᐧᑭᐟ; ᐁᐊᐧᑳᐧᓂᒪ ᐁ ᑭᓯᑳᐠ ᒫᑲ ᐁᑯᑕ ᑭ ᐃᐧᒋ ᐊᔭᒣᐊᐧᐠ; ᓈᐣᑕᐤ ᒥᑖᑕᐟ ᑎᐸᐃᑲᐣ ᓵᓴᐩ ᐁ ᐅᑎᐦᒋᐸᔨᔨᐠ. 40ᐯᔭᐠ ᐊᓂᐦᐃ ᐁ ᐃᓯ ᓂᓯᔨᐠ ᑳ ᑭ ᐯᐦᑖᑯᐟ ᒑᐣ ᐁ ᐊᔭᒥᐟ ᑳ ᑭ ᐱᒥᑎᓴᐋᐧᔨᐟ ᒫᑲ, ᐁᐊᐧᑯ ᐊᐣᑕᕒᐅ, ᓴᐃᒪᐣ ᐱᑕᕒ ᐅᒋᐋᐧᒪ. 41ᓂᑳᐣ ᒥᐢᑲᐁᐧᐤ ᑎᐱᔭᐤ ᐅᒋᐋᐧᒪ ᓴᐃᒪᓇ, ᐅᒥᓯ ᒫᑲ ᐃᑌᐤ, ᓂ ᑭ ᒥᐢᑲᐊᐧᓈᐣ ᒥᓵᔭᐢ, ᐁᐊᐧᑲᐧᓂᒪ ᐁ ᐃᑌᐧᐢᑕᒪᐋᐧᑕᒥᕽ, ᙭. 42ᑭ ᐯ ᐃᑐᑕᐁᐤ ᒫᑲ ᐊᓂᑕ ᒋᓴᓴ ᐁ ᐊᔮᔨᐟ. ᐃᐢᐱ ᒫᑲ ᒋᓴᐢ ᐃᐧᔮᐸᒫᐟ, ᐅᒥᓯ ᑭ ᐃᑌᐤ, ᑭᔭ ᓴᐃᒪᐣ ᐅᑯᓯᓴ ᒑᓇ: ᓯᐸᐢ ᑭ ᑲ ᐃᓯᔨᐦᑳᓱᐣ, ᐁᐊᐧᑲᐧᓂᒪ ᐁ ᐃᑌᐧᐢᑕᒪᐋᐧᑕᒥᕽ, ᐱᑕᕒ.

43ᐁ ᐊᑎ ᐊᐧᐸᓂᔨᐠ, ᒋᓴᐢ ᐃᐧ ᐃᑐᐦᑌᐤ ᑲᓬᐊᓬᐃᕽ, ᒥᐢᑲᐁᐧᐤ ᒫᑲ ᐱᓬᐃᐸ, ᐅᒥᓯ ᐃᑌᐤ, ᐯ ᐱᒥᑎᓴᐦᐅᐣ. 44ᐯᐟᓭᑕ ᑭ ᐅᐦᒋᐤ ᐱᓬᐃᑊ, ᐅᐟ ᐅᑌᓇᐃᐧᐊᐧᕽ ᐊᐣᑕᕒᐅ ᒥᓇ ᐱᑕᕒ. 45ᐱᓬᐃᑊ ᒥᐢᑲᐁᐧᐤ ᓇᑕᓂᐁᓬᐊ, ᐅᒥᓯ ᒫᑲ ᐃᑌᐤ, ᓂ ᑭ ᒥᐢᑲᐋᐧᓈᐣ, ᐊᓂᐦᐃ ᒧᓯᐢ ᐅᔭᓱᐁᐧᐃᐧᓂᕽ, ᒥᓇ ᐅᑭᐢᑭᐁᐧᐦᐃᑫᐊᐧᐠ ᑳ ᑭ ᐋᒋᒫᒋᐠ ᒪᓯᓇᐦᐃᑲᓂᕽ, ᒋᓴᐢ ᓈᓴᕒᐁᑎᕽ ᐁᐧᐦᒋᐟ, ᐅᑯᓯᓴ ᒍᓯᑊ. 46ᓇᑕᓂᐁᓬ ᒫᑲ ᐅᒥᓯ ᑭ ᐃᑌᐤ, ᑫᑲᐧᐩ ᒋ ᑳ ᒥᐋᐧᓯᐠ ᑭᑕ ᑭ ᐯ ᐅᐦᒋᐸᔨᐤ ᓇᓴᕒᐁᑎᕽ? ᐱᓬᐃᑊ ᒫᑲ ᐅᒥᓯ ᐃᑌᐤ, ᐯ ᓇᑕᐃᐧ ᐋᐧᐸᐦᑕ. 47ᒋᓴᐢ ᑭ ᐋᐧᐸᒣᐤ ᓇᑖᓂᐁᓬᐊ ᐁ ᐯ ᓇᑎᑯᐟ, ᐅᒥᓯ ᒫᑲ ᐃᓯ ᐋᔨᒧᒣᐤ, ᐊᐧᐸᒥᕽ ᑖᐯᐧ ᐃᐢᕒᐁᐃᓬᐃᐃᐧᔨᓂᐤ, ᐁᑳ ᓈᓂᑐᐤ ᑳ ᐃᓯ ᑲᑲᔦᔮᑎᓯᐟ! 48ᓇᑕᓂᐁᓬ ᒫᑲ ᐅᒥᓯ ᐃᑌᐤ, ᑕᓂᑌ ᐁᐧᒋ ᑭᐢᑫᔨᒥᔨᐣ? ᒋᓴᐢ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᒪᐧᔦᐢ ᐱᓬᐃᑊ ᓇᑐᒥᐢᐠ, ᒣᑳᐧᐨ ᐁ ᐊᔭᐱᔭᐣ ᓯᐹ ᒥᓂᓴᑎᑯᕽ, ᑭ ᑭ ᐋᐧᐸᒥᑎᐣ. 49ᓇᑕᓂᐁᓬ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᕒᐋᐸᐩ, ᑭᔭ ᑭᓭᒪᓂᑐᐃᐧᑯᓯᓵᐣ; ᑭᔭ ᐅ ᑭᐦᒋ ᐅ ᑭᒫᒥᐋᐧᐊᐧ ᐃᐢᕒᐁᐃᓬ. 50ᒋᓴᐢ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᐁ ᑭ ᐃᑎᑖᐣ, ᑭ ᑭ ᐊᐧᐸᒥᑎᐣ ᓯᐸ ᒥᓂᓴᑎᑯᕽ, ᐁᐊᐧᑯ ᒋ ᑳ ᐅᐦᒋ ᑖᐯᐧᑕᒪᐣ? ᑭ ᑲ ᐋᐧᐸᐦᑌᐣ ᐊᐊᐧᓯᒣ ᑭᐦᒋ ᑫᑲᐧᔭ ᐃᔨᑯᕽ ᐅᐦᐃ. 51#ᒉᓂᓯᐢ 28:12ᐅᒥᓯ ᒫᑲ ᐃᑌᐤ, ᑖᐯᐧ, ᑖᐯᐧ, ᑭᐟ ᐃᑎᐣ, ᐹᑎᒫ ᑭ ᑲ ᐋᐧᐸᐦᑌᓈᐋᐧᐤ ᑭᐦᒋ ᑭᓯᐠ ᑭᑕ ᔪᑌᓂᑲᑌᐠ, ᐁᑯᓯ ᐅᑭᓯᑯᒪ ᑭᓭᒪᓂᑐ ᐁ ᐅᐱᐢᑕᐋᐧᔨᐟ ᒥᓇ ᐁ ᔮᓯᐢᑕᐋᐧᔨᐟ ᐃᔨᓂᐃᐧᑯᓯᓵᓇ.

Trenutno odabrano:

ᓭᐣᐟ ᒑᐣ 1: KKMs

Istaknuto

Podijeli

Kopiraj