LUK 19
19
I Jisas ko i Sakeus
1I Jisas mo dadari Jeriko, ko mo vano tuturedu. 2Aiehi a tangaloi gatagale nge a muei tangaloi vilevile takis, ko ingeie a mwerai homu, a henana i Sakeus. 3Mo tarani garagara vena lehi Jisas, ve nge a hava tangaloi. Nge ingeie mo vai samwegi vena lehi Jisas huri a sinobu ram labe goroe ko vage huri nge a tangaloi qilodo. 4Siu mo toa tomue mo vano mo kalo lo gai gatagale a henagi sikamo, huri ve vin leo lai Jisas lune nge vin vano lo turegi hi. 5Lune i Jisas mo dadari aiehi, mo dada sueulu, mo veve lawe Sakeus vena, “Sakeus, gon hivo vuine siseri, huri nain toga lo valemu gaqarigi.”
6I Sakeus mo hivo siseri vuine, mo lai Jisas gina havuhevu rom vano lo valena. 7Lune a sinobu ram lehe mwerehi, ram tavuigi ram singotutubugi Jisas vena, “Nge mo vano ve vin toga lo valei tangaloi galegaleasi hi.”
8Siu i Sakeus mo maraga mo labe, mo veve lawe na Huqe vena, “Huqe, gom rongo. Nain bete na duvi noku hako gineu lawera tangaloi mahogi, ko tare ve nau keli nam balu na hako gineu noi hine tea, nain voli taliguginie lawea vagavesi lo ulugi.”
9I Jisas mo veve lawea vena, “Gaqarigi i God mo vagamwasoi na tangaloi doluegi lolo vale ngaha, huri a tangaloi naha vage nge talo duvi Ebraham. 10Huri ineu i Netui Tanaloi nau vomai ve nain hikesire tangaloi ngerehi rau sala ko nain vagamwasoire.
A gato tavalu huri na homu hi a kol
11Lune a sinobu ram rorongtagi Jisas, nge mo laqa tuturedu na gato tavalu ngaha lawera. Siserigi ngaha nge mo kakarani lobei vanue Jerusalem, ko ram lado ve a mwasoana garaqa God mo ratahigi lolona vin serelue siserigi. 12Siu i Jisas mo veve vena, “A tangaloi lawua gatagale vin vano lo vanue vagahao ve vin voragi ratahigi talo vanuana. Siu vin mule taligu lo tanona. 13Gitomue siu vin vano, mo ware na nona tangaloi tabanagi ingere hangavulu ko mo bete na homu hi a kol vatavatahaginire ko mo veve lawera vena, ‘Nen tabana lo mane ngaha ko nein vai leo nge nein haqe na semsemegi lune, vin dadari lune nain mule taligu.’ 14Nge a tangaloi talo vanuana ram lolo asiginie, siu ram hora na gaihora lo tagune huri ve ran veve vena, ‘Gamai gahe tarani na tangaloi ngaha tea ve vin voragi na nomai ratahigi.
15“A tangaloi lawua hi u voragi ratahigi ko u mule taligu. Siserigi mo warera na nona tangaloi tabanagi ve ran vomai lobena huri ve na haqe na semsemei homu hi rau tabana lune. 16A muegi mo vomai mo veve vena, ‘Huqe, nau haqe na homu hi a kol hangavulu tameie gatagale hi gu bete laweau.’ 17A ratahigi hi mo veve vena, ‘U garea liu, iniko a tangaloi tabanagi a hui garea! Gu hui garea lo gineu biti, nge nain teugo goin leogoro na qatui venue hangavulu.’ 18A tangaloi tabanagi tuegi mo vomai ko mo veve vena, ‘Huqe, nau haqe na homu hi a kol gailime tameie gatagale hi gu bete laweau.’ 19Nge mo veve lawea vena, ‘Nain teugo goin leogoro na qatui venue gailime.’
20“A tangaloi tabanagi vage mo vomai ko mo veve vena, ‘Huqe, a nomu homu hi a kol nge ngaha. Nau luqe vuniginie lolo mavusui galego. 21Nau matagu ginigo, huri a domimu u huire. Gom lai na hava gineu ngehi hate nomu, ko gom lai na mwasigi hi iniko go he rivu tea.’ 22Nge mo veve lawea vena, ‘Iniko a tangaloi tabanagi gu esi! Nain veveginigo gina nomu leo sibomu. Gu iloau huri a domiku u huire, nam lai na hava gineu ngehi hate noku ko nam lai na mwasigi hi na he rivu tea. 23?Huri havagi go he tau na noku homu tea lolo bangki, huri nain leie mena semsemegi lune nain mule?’
24“Siu mo veve lawera tangaloi ngerehi ram labe taie vena, ‘Nen lai vohogi na homu hi a kol denie ko nen bete lawe na tangaloi tabanagi hi a nona homu hangavulu.’ 25Nge ram veve lawea vena, ‘Huqe, ingeie a nona homu hangavulu beno!’ 26Mo duvi vena, ‘Nam veve lawe gimiu vena, ihine mo lai, vin bete lawea vage. Nge ihine he lai tea, vin lei vohogi nona lalaie denie. 27Nge irahine hi a noku tavului vuro rahe taranieu tea ve nain voragi na nora ratahigi, nen laire vomai tangaha ko nen wehire lolo nagoku.’ ”
I Jisas mo ahu lolo Jerusalem gina qoragiana
28I Jisas mo veve ngaha, vunu mo vano tuturedu sulo vanue Jerusalem. 29Mo vomai kakarani a Betvas ko a Betani sulo Vusi Oliv. Siu mo hora na nona rorongtagi gairue gitomue, 30mo veve lawera vena, “Neri vano lo togagi venue vantahi, ko lune neri ehu lolona, neri haqe na natui as rau ligo bibie, a tangaloi he toga te tau lo ulune. Neri torosie, neri leie vomai. 31Tare ve ihine vin veve lawe gimiru vena, ‘?Huri hava gineu nero mo torosie?’ Neri veve lawea vena, ‘A Huqe mo taranie garagara ginie.’ ”
32Rom vano rom haqe na gineu doluegi mwere i Jisas u veve lawera. 33Lune rom toro na natui as hi, a tangaloi a bulara as hi ram veve vena, “?Ei, nerum toro na as hi huri havai?”
34Siu rom duvi vena, “A Huqe mo taranie garagara ginie.” 35Siu rom lai na natui as vomai lawe Jisas. Vunu ram vugeri na luqara loului gaiherena, ko ram bului Jisas vena toga lo ulune. 36Lune mo dige, a tangaloi u sao ram vugeri na luqara lo turegi.
37Lune nge mo vomai kakarani lo vanue Jerusalem, lo turegi mo hivo lo Vusi Oliv a buri nona rorongtagi ram havuhevu ko ram waregareagi God gina dilo siaga huri na vaigivui ngerehi rau lehire, 38ram veve vena, “Waregareagi na Ratahigi mo vomai lo henai Huqe! A tamwata lo eulu ko a roroa lobei God!”
39Siu ingere Varise lavasigi meire sinobu ram veve lawe Jisas vena, “Huhui, gon suri na nomu rorongtagi ran rorogo.”
40Nge i Jisas mo duvi vena, “Nam veve lawe gimiu, tare ve ingere rain rorogo, mwerehi a vatu sibora rain teuvuigi ram ulo.”
I Jisas mo ngara huri na vanue Jerusalem
41Lune i Jisas mo vomai kakarani lo vanue hi, nge mo leo vano lo ulugi, mo ngara hurie, 42mo veve vena, “E, tare ve gaqarigi gu ilo vurugegi na turegi huri na tamwata! Nge siserigi ngaha goin he leo lai tea! 43Nge a tarogi vin vomai, a nomiu tavului vuro rain labe ko rain hakovi na ara vatu dali bulu goro gimiu ko rain tugoro gimiu lo mahogi doluegi. 44Rain toto gabureginigo meire netumu lolo lolomu.
Rain he siregi tea na vatu gatagale ve vin toga lo ulugi tuegi, huri go he ilo tea na tarogi hi ve i God u vomai ve vin sirogo.”
I Jisas mo vagamwasaragi na Sara Gogona
45Siu i Jisas mo ahu lolo Sara Gogona, ko mo tauvuigi mo vuro lue ingere hi ram sosogagi lolona, 46mo veve lawera vena, “U reve beno lo Reve reve Gogona ve i God u veve vena, ‘A valeku vin waregi ve a valei tataro.’ Nge gimiu nem vaie mo voragi malangai belu.”
47Vataha rani Jisas mo huhui lolo Sara Gogona. Ira muei rugurugu meire huhui talo Leo hora noi Mosis ko ira tomtomuegi nora sinobu ram tarani ve ran wehe. 48Nge rahe haqe lai na turegi tea huri vataha tarogi ingere sinobu ram ragahui ve ran rorongtaginie, rahe tarani tea ve rain vagasalagi na nona leo te gatagale.
Trenutno odabrano:
LUK 19: HNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific, 2013
