LUK 17
17
A tangaloi mo vai taturegi tuana sulo galegaleasi
1I Jisas mo veve lawera nona rorongtagi vena, “A gineu esi u sao rain vomai rain vei tatureginire tangaloi ve rain soi sulo galegaleasi. Nge a hahagavi lawe ihine hi mo lai na gineu hi ram vomai. 2U garea ve rain ligo na vatu lawua ta lo mwagorona, ko rain tulie talolo tahi. Nge vin esi hageliu mena tangaloi hi mo vai tatureginie gatagale den rahine hi rau biti. 3Siu nen leohuri vurugegi lo havagineu nem vaie!
A tangaloi na ladovohogi na bugui tuana
“Tare ve i tuemu mo galegaleasi, gon hahara meie. Tare ve nge mo ladowenigi, gon ladovohogi na bugune. 4Tare ve u vei na gineu esi vovohigo vagabitu lo rani gatagale, nge vataha na tarogi vin vomai taligu, vin veve lawego vena, ‘Neu nau ladowenigi, gon ladovohogi na bugune.”
A tangaloi mo ladohogogi God mo hakovi na managi
5Ira gaihora ram veve lawe na Huqe vena, “Gon vai na nomai ladohogo na huhuire vage.”
6Siu a Huqe mo duvi lawera vena, “Tare ve nomiu ladohogo u mwere na toli baka u biti vohogi, nein veve lai lawe na vui gatabola hi vena, ‘Gon maraga dena ute tangaha, gon hivo gon labe lolo livugei tahi,’ ko a gai hi vin rongo huri na leomiu.
A tabana nona tangaloi tabanagi
7“Tare ve gatagale den gimiu a nona tangaloi tabanagi nge lolo talu mo ririvu, sige mo leohuri na sibsib. Siu lune mo mule dena talu nein he veve tea lawea vena, ‘Ei, gon vomai gon gagani.’ 8Hatie! Nge nem veve vena, ‘Gon vano gon vai rarai na gaku hinaga. Gon luqeluqe garea, gon leohurieu vurugegi lune nain gagani ko nain inuinu. Siu lo tagugi hi iniko gu bei gagani.’ 9Lune a tangaloi tabanagi mo tabe na nona ratahigi, nge a ratahigi hi he vevegareaginie tea. 10Nge u mwerehi vage mei gimiu. Lune nem vai na gineu ngerehi nau veve lawe gimiu ve nein veire, nein veve lai vena, ‘Igamai a tangaloi tabanagi hogosie. U tatarise ve dain vei mwere ngaha.’ ”
I Jisas mo vagamwasoire tangaloi vohavono hangavulu
11Lune i Jisas mo vano huri na vanue Jerusalem, mo huri lolo livugei venue Samaria ko Kalili. 12Ingeie mo vano sulolo togagi venue gatagale, mo haqe na tangaloi vohavono hangavulu. Ram labe vagahao 13ko ram ngaragi vena, “Jisas! Huhui! Gon hagavi gamai!”
14I Jisas mo lehire ko mo veve lawera vena, “Nen vano, nen haharagi gimiu lawera rugurugu.”
Lo tarogi hi ingere ram vano, a beture ram mwasara taligu. 15Gatagale denire mo leo huri ve u mwaso, mo vomai taligu lobei Jisas, mo waregareagi God gena dilo siaga. 16Mo sisiqeu ko mo taigi hivo lo tano vovohoi Jisas, mo veve gareaginie. A tangaloi hi nge talo vanua Samaria. 17I Jisas mo duvi lawea vena, “Ei, nam lado ve a tangaloi ingere hangavulu hi rau mwasara. ?Nge gaisiwo ingere hilogo? 18?Huri hava gineu rahe vomai tea taligu huri ve ran waregareagi God? Nge a tangaloi ngaha hatie a duvi Israel. ?Huri havai nge hogosie mo vomai taligu mo veve gareagi God?” 19Ko i Jisas mo veve lawea vena, “Gon maraga gon vano. A nomu ladohogo mo vagamwasoigo.”
A Ute noi God mo vomai
20Ira Varise lavasigi ram hui Jisas vena, “God vin voragi Ratahigi goro na tangaloi doluegi tagaha?” Siu nge mo duvi vena, “A gigilegi hatie ve vin haharagi lawe gimiu na tarogi ve i God vin voragi Ratahigi goro na tangaloi doluegi. 21A tangaloi vin he veve lai tea vena, ‘Leo, nge ngaha!’ sige, ‘Leo, nge vanhi!’ Hatie! God u voragi Ratahigi beno lolo livugemiu.”
22Siu i Jisas mo veve lawera nona rorongtagi vena, “A tarogi vin vomai ve nem tarani garagaraginie ve nen lehieu i Netui Tangaloi huri na bongiku gatagale hogosie, nge gimiu nein he lehe tea. 23Nge ira tangaloi rain veve lai vena, ‘Leo, nge vanhi!’ sige, ‘Leo, nge ngaha!’ Nge nen mese vano ve nein hikesie. 24Lune mo vile, mo leleohagi na mahava, mo tauvuigi lo tavulugi mo vano mo rovo lo tavulugi. Mwerehi vage, ineu i Netui Tangaloi nain veie lo bongiku. 25Nge nain rongo gagarasi tomue, ko a tangaloi ta bagataha rain tuli vohogieu. 26Mwere u vei lo taroi Noa, mwerehi vage vin vei lo taroku, i Netui Tangaloi. 27Rau gagani, rau inuinu, rau legi, u dadari lo taroi Noa mo kalo lolo aka ko a valolo u luluvi na vanue ko mo vagamatera doluegi. 28Siu vin vei lo taroku mwere u vei lo taroi Lot. Rau gagani, rau inuinu, rau volivoli, rau sosogagi, rau ririvu, rau hako valera. 29Lo rani hi Lot mo mwalue dena qatui venue Sodom, a avi mena qie rom rurungudu den eulu mwere na uhe ko rom vagamatera doluegi. 30Vin vei mwerehi tau lo rani hi ineu i Netui Tangaloi nain haharagieu siboku lawera tangaloi.
31“Lo rani hi a tangaloi gatagale mo labe lo ului valena, vin he hivo tea lolo valena vena lai na nona vivilakogi. Mwerehi vage a tangaloi nge lolo talune vin he vano tea lo valena taligu. 32Nen ladotaligu huri gahorai Lot. 33Ihine mo vai leo vena hakobibi na mwasoana vin vei salaginie, ko ihine mo vagasalagi na mwasoana vin hako bibie. 34Nam veve lawe gimiu vena, lolo bongi hi a tangaloi gairue roin maturu bubugi, vin leie tuegi, tuegi vin tino. 35A vavine gairue roin vei na hinaga bubugi, vin leie tuegi, tuegi vin tino.
36A tangaloi gairue roin tino lolo talu: vin lei vohoginie tuegi, tuegi vin tino.”
37Ira nona rorongtagi ram huie vena, “?Huqe, vin vei tahilogo?” I Jisas mo duvi vena, “Ngehi a betui gineu mate mo eno ko a mala rain sone bulutegi aie.”
Trenutno odabrano:
LUK 17: HNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific, 2013
