LUK 12
12
I Jisas mo veve matagute huri na doridorinai kaligoro
1Lo tarogi hi, a sinobu teri vagasao ram sonebubugi, ram vui susuni, a vevenagi rau sao lawagi. I Jisas mo laqa tomue lawera nona rorongtagi, mo veve vena. “Nen leo huri na isi nora Varise ngehi a doridorinai kaligoro.” 2A hava gineu u luqe goro tau, vin vuge talahaginie, ko a hava domiana u toga vunigi, vin mwelue talo ute lawua. 3A hava gineu neu veve lolo dodogi, a tangaloi rain rongoe lolo leleo. A hava gineu neu ngutugi lolo ute vono, vin laqagi lue lo vuhungai vale.
Ihine dain mataguginie
4“Ira buluana, nam veve lawe gimiu ve nen mese mataguginire ram wehi na betugi, nge lo tagugi hi rain he vai asiesigi gimiu tea taligu. 5Nain veve lawe gimiu ihine hi nein mataguginie. Nein matagugi God. Lo tagugi hi rau wehi na tangaloi, nge u managi ve vin tuli na tangaloi hi talolo gagarasi redu. Io, nam veve lawe gimiu, ngehi nein mataguginie!
6A manveve gailime rain sogagi laire huri na vatu ngavulu gairue. Nge gatagale denire God vin he galuveginie tea. 7Ko igimiu, u velu bulutegi beno a vulumiu doluegi lo qatumiu. Mwerehi, gimiu nen mese matagu, huri gimiu neu liuhage dena manveve u sao!
Huri irahine ram serelue sige ram taha Kraes
8“Nam veve lawe gimiu vena, tare ve ihine mo serelue lo nagora sinobu ve ingeie a noku tangaloi, ineu, i Netui Tangaloi, nain serelue mwerehi vage lo nagora engsel noi God. 9Tare ve ihine mo tahau lo nagora sinobu, ineu, i Netui Tangaloi, nain tahae vage lo nagora engsel noi God.
10“Tare ve ihine mo veve leo asi goroau, i Netui Tangaloi, vin ladovohogi na bugugi. Nge tare ve ihine mo veve leo asi goro na Vui Gogona, vin he ladovohogi na bugugi lai tea.
11“Lune rain lei gimiu ve ran ve lehi gimiu lo valei soneana sige lo nagora kavman sige ira lawua, nen mese lado vagatai gitomue ve nein duvire wuraha lune rain veve vovohoi gimiu sige ve nein veve wuraha. 12Huri a Vui Gogona vin huhui gimiu lo tarogi hi ve nein veve wuraha.”
A gato tavalu huri na mwerai homu a reragi
13A tangaloi denire sinobu mo veve lawe Jisas vena, “Huhui, gon veve lawe tueku na wahe na vivilakogi i tamamaru u siregi lawe gamaru.”
14I Jisas mo duvi lawea vena, “?Tueku, ihine u bete na leo siregi laweau ve nain vevegi, sige nain wahegi na nomiru vivilakogi lawe gimiru? 15Siu i Jisas mo veve lawera sinobu doluegi vena, “Nen leohuri! Nen tugoro gimiu sibomiu dena halai lado lawua doluegi. A vevenagi a mwasoana tangaloi he ilo tea lo nona vivilakogi, hate huri tare ve u mwerai homu te mwerehilogo.”
16Mo rovo, i Jisas mo veve na gato tavalu ngaha lawera vena, “A mwerai homu gatagale a nona tano mo bete na mwasi rivurivu garea. 17Siu nge mo tauvuigi mo ladolado sibona vena, “Hate tantanogi ve nain teu na mwasi buleku rivurivu doluegi aie. ?Nain vei mwerehilogo? 18Nain vei mwere ngaha. Nain tala vohogi na noku valei mwasi rivurivu ingere ngaha ko nain veire wagineu rain lawua taligu. Siu nain teu na mwasi buleku rivurivu lolona mena gineu gagarea lavasigi vage huri rain eno tabetabegi lolona. 19Siu nain veve laweau siboku vena, A tangaroa garea laweau! Ineu nau hakovi na gineu gagarea doluegi nau tarani huri na higao sao. Nain manga, nain gagani, nain inuinu, ko nain rong garea! 20Nge God mo veve lawea vena, ‘Iniko a reragi! Lolo bongi ngaha a mwasoamu vin rovo denigo. ?Siu ihine vin lei na vivilakogi ngerehi doluegi gu teu hurigo sibomu?”
21Ko i Jisas mo tarihougi vena, “Ngaha vin mwereire tangaloi ngerehi ram vusigi na nora vivilakogi hurire sibora, nge lo nagoi God rahe mwerai homu tea.”
Nen lado talui God
22Siu i Jisas mo veve lawera rorongtagi vena, “Giniehi, nam veve lawe gimiu ve nen mese romasi huri na mwasoamiu, huri hava gineu nen gani, sige huri hava gineu nen saru goro na betumiu ginie. 23A mwasoamiu u liu dena hinaga, ko a betumiu dena luqe. 24Nen lehi na qiru. Rahe rivu tea, rahe lai na mwasigi tea, rahe hako te vale ve ran tau bubugi na mwasigi lolona. Nge i God mo vanganire. Nge igimiu neu hageliu dena manu. 25?Siu ihine tea den gimiu, mo romasi huri na mwasoana, vin vei lei vena toga na mala qaravu? 26?Tare ve nen he vai lei tea na gineu biti mwerehi, huri hava gineu nem romasi huri na gineu wagineu ngerehi? 27Nen lehi na vire ram mauri mwerehilogo. Rahe tabana tea, rahe redigi tea luqara. Nge nam veve lawe gimiu vena a luqei Solomon, nge u ratahigi liuhage denire tangaloi doluegi, he raka tea mwere na vire mwere ngaha. 28?Tare ve i God mo gabugi na labute mwerehi, he eno tea vena ribi, gaqarigi mo labe lolo talu, mavugo rain tulire talolo avi, siu vin he gabugi gimiu tea vena liu denire, gimiu ira ladohogo biti?
29“Siu ne mese lado asi, ve nein gani sige nein inu na hava gineu, ko ne mese romasi. 30Huri a gineu ingere ngaha hi ira haroharo talo ure ngaha ram hike huri. Huri i Tamamiu mo ilo ve nem tarani na gineu ingere ngaha doluegi. 31Nge nen lado tomue huri na Ute noi God ko ingeie ve bete na gineu ngere ngaha doluegi lawe gimiu.
A lalaie lo eulu
32“Gimiu a noku burigi biti, ne mese matagu. Huri Tamamiu mo havuhevu huri ve vin bete na Ute ta eulu lawe gimiu. 33Nen sogagi na nomiu lalaie ko nen bete na homu lawera mahogi. Nen hako na tangai homu vin he mabobo lai tea. Nen hogoni bulutegi nomiu lalaie lo eulu. Aiehi rain he mabobo lai tea, a tangaloi belu vin he ahu lei tea vena balu, ko a bobo vin he gani lei tea 34Huri lo tanogi hi a nomiu lalaie ram eno aie, a lolomiu vin eno aiehi vage.
Ira tangaloi noi Jisas rain toga vagatai gesegi huri ve vin vomai taligu
35“Nen saru na luqemiu, nen bule na nomiu leleo, nen toga vagatai huri tabana, 36Mwere ira tangaloi tabanagi ram toga vagatai na nora huqegi ve vin vomai dena lagiana. Lune nge vin vomai taligu ko vin dingdingi, siserigi rain roa na mataivale lawea. 37Havuhevu meire tangaloi tabanagi hi, a nora huqegi mo haqera ram toga vagatai lune nge mo vomai! A hogo, nam veve lawe gimiu, nge vin tugu na luqana, vin veve lawera ve ran toga hivo, ko vin bete na hinaga lawera. 38Havuhevu meire, tare ve vin vomai lo livugei bongi sige lo toa tarere ko vin haqera ram toga vagatai. 39Neu ilo mwerehi. Tare ve a huqei vale u ilo beno ve a tangaloi belu vin vomai lo hava taro, nge vin rada goro, vate vai a tangaloi belu hi vin ahu lolo valena. 40Ko igimiu vage, nen toga vagatai, huri ineu, i Netui Tangaloi, nain vomai teligu lo tarogi hi gimiu ne he rarai tea hurie.”
A tangaloi tabanagi a hui garea sige a hui wiri
41I Bita mo veve vena, “?Huqe, gom laqa lo gato tavalu hi lawe gamai sige lawera tangaloi doluegi?”
42A Huqe mo duvi vena, “?Ihine hi a leogoro a hui garea ko u mataisao? Ingeie hi a huqei vale vin teue vin leogorora tangaloi tabanagi doluegi talo valena, ve vin bete na gara hinaga lawera lo tarogi vovohoi. 43Havuhevu mena tangaloi tabanagi hi nona huqe vin haqea mo vai mwerehi lune nge vin mule vomai teligu lo valena! 44A hogo, nam veve lawe gimiu vena, nona huqe vin teue vin leogoro vataha na nona lalaie doluegi. 45Nge tare ve a tangaloi tabanagi hi mo lado lolo domine sibona vena, ‘A noku huqe vin he vomai tea vena siseri,’ ko mo tauvuigi mo wehire tangaloi tabanagi lavasigi, a mwera ko a vavine, ko mo gagani, mo inuinu, ko mo inu dadavule, 46siu nona huqe vin mule vomai teligu lo tarogi nge he lado rarai te hurie ko lo mahoi reni nge he ilo tea. A huqe vin tei vurivurie, vin teue vin vano meire hi rahe ladohogo tea.
47“Tare ve a tangaloi tabanagi u ilo beno a hava gineu hi a nona huqegi mo tarani, nge he vagataie tea vena vai na gineu hi, vin vivihie vagasaosao. 48Nge tare ve a tangaloi tabanagi he ilo tea a hava gineu hi a nona huqegi mo tarani, nge mo vai na gineu esi u tatarise ve rain vivihie hurie, vin vivihie vagavihe tea. Tare ve a tangaloi mo lai na gineu sao, mo eno vin vei na gineu sao. Tare ve rau bete na gineu sao lawe hine, rain tarani ve a tangaloi hi vin vei na gineu sao vage.
I Jisas vin vei na tangaloi rain vilewahe
49“!Nam vomai ve nain tau na avi lo ure. Nam tarani garagara ve u gao beno, nge hate tau! 50Mo eno laweau ve nain lei na rongogagarasi mwere na halai garuhigogona, ko nam toga romasi teu vin dadari a garuhigogona ngaha vin rovo. 51?Segi nem lado ve nau vomai ve nain lai na tamwata siu lo ure? Hatie, tamwata nge a vilewahe. 52Den hibagataha, tare ve a tangaloi gailime lo vale gatagale, rain vilewahe, gaitolu den gairue, ko gairue den gaitolu. 53A tamagi vin vilewahe den netune, ko netune den tamana, i ide den netune vavine, ko netune vavine den ratahine, bubu den vagabuine, ko vagabuine den tubune.”
A tangaloi rain ilo vurugegi na gigilegi huri na tarogi hi.
54I Jisas mo veve vage lawera sinobu vena, “Lune nem lehi na dodoi langi mwasaru, siserigi nem veve vena, ‘A uhe vin vomai,’ ko vin uhe. 55Lune nem rongo na langi hi a gadue mo here, nem veve vena, ‘A mwamwavie lawua vin vomai,’ ko vin vei mwerehi. 56Gimiu ira kaligoro! Gimiu neu ilo vurugegi huri ve nein tovo na taro lune nem lehi na mahoi ure ko a mahava. ?Huri hava gineu gimiu nge he ilo vurugegi tea na gigilegi huri na tarogi hi?
Gon bulu garea mei na nomu tavului vuro
57“?Huri hava gineu gimiu sibomiu ne he vevegi tea na gineu u vovohoi ve gimiu nen veie? 58Tare ve a tangaloi gatagale mo tarani vena laigo ve nero vano lo kot nero vovohoigi na nomiru romasi, gon vai leo ve gon vovohoigi na romasi hi lune gimiru mosigei lo turegi. Tare ve goin he vai te mwere ngaha, nge vin reveigo vano lawe i vevegi, ko i vevegi vin laigo vano lawe na bolis, ko nge vin teugo lo valei vauveu. 59A hogo nam veve lawego vena, goin he mwalue lai tea vin dadari goin voli vagasigi na bugumu.”
Trenutno odabrano:
LUK 12: HNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific, 2013
