Jenesis 9
9
God i mekem promes wetem Noa
1 #
Jen 1.28
Nao God i blesem Noa wetem trifala pikinini blong hem, mo i talem long olgeta se, “Yufala i mas gat plante pikinini, blong bambae wol ya i kam fulap long olgeta. 2Olgeta anamol blong wol ya, wetem olgeta pijin mo olgeta fis bambae oli fraet long yufala. Olgeta samting ya oli stap long han blong yufala. 3Fastaem, mi mi givim ol kakae nomo long yufala blong yufala i kakae, be i stat naoia, mi givim ol samting ya tu long yufala, blong oli kam mit blong yufala blong kakae. 4#Lev 7.26,27; 17.10-14; 19.26; Dut 12.16,23; 15.23Be bambae yufala i no save kakae mit we blad blong hem i stap long hem yet. Yufala i mas letem blad blong hem i ronaot fastaem, finis bambae yufala i save kakae. Mi mi blokem samting ya, from we laef i stap long blad. 5Nao sipos wan man i kilim narafala man i ded, bambae mi mi panisim hem. Mo sipos wan anamol i kilim man i ded, bambae mi mi kilim anamol ya tu i ded. 6#Eks 20.13; Jen 1.26Man we i kilim narafala man i ded, ol man ples blong hem oli mas kilim hem i ded, from we mi mi mekem we man i tekem fasin blong mi, i olsem mi.
7 #
Jen 1.28
“Yufala i mas gat plante pikinini blong yufala, mo ol pikinini blong yufala oli mas gat plante pikinini blong olgeta bakegen, blong oli kam fulap long wol ya.”
8Mo God i talem long olgeta se, 9“Naoia mi mi mekem wan promes long yufala wetem ol pikinini we bambae oli kamaot biaen long yufala, 10mo long ol pijin mo ol anamol mo ol narafala samting we i gat laef we oli bin stap wetem yufala long sip ya. 11Tok blong mi i olsem. Mi mi promes se bambae mi no moa save sanem bigfala wota i kambak bakegen olsem blong draonem yufala. Neva bambae bigfala wota olsemia i spolem wol ya bakegen.”
12Mo hem i talem se, “Promes ya blong mi we mi mekem long yufala, bambae hem i no save finis samtaem, mo saen blong hem bambae i olsem. 13Bambae mi putum renbo blong mi i stap long klaod, mo renbo ya bambae i saen blong promes ya blong mi, we mi mekem long yufala. 14Sipos mi sanem ol klaod i kam long skae, nao renbo i kamaot long klaod, 15bambae mi mi save tingbaot promes ya blong mi, we mi mekem long yufala. Bambae mi no moa save spolem laef blong yufala bakegen samtaem long bigfala wota olsem. 16Sipos renbo i kamaot long klaod, bambae mi luk, nao mi save tingbaot promes ya blong mi we mi mekem long yufala. Promes ya blong mi bambae i no save finis samtaem.”
17Mo hem i talem bakegen long Noa se, “Naoia, renbo i saen blong promes ya blong mi, we mi mekem long yu wetem ol pikinini blong yu, mo long ol narafala samting long wol ya we i gat laef.”
Noa mo trifala pikinini blong hem
18Trifala pikinini blong Noa we trifala i stap wetem hem long bigfala sip ya, nem blong trifala, Sem, mo Ham mo Jafet. Ham ya, hem i bonem Kenan,* 19mo olgeta man long wol oli kamaot biaen long trifala ya.
20Noa ya, hem i man blong wokem garen, mo hem i fas man blong wokem plantesen blong grep,* we oli stap wokem waen long frut blong hem. 21Wan taem, taem hem i dring waen, hem i drong, nao i tekemaot olgeta klos blong hem, i stap slip neked nomo long haos tapolen blong hem. 22Nao taem Ham we i papa blong Kenan i luk we olfala blong olgeta i stap slip neked olsem, hem i go talemaot long tufala brata blong hem. 23Nao Sem mo Jafet, tufala i tekem kaliko, tufala i holem long solda blong tufala, i hang long baksaed blong tufala, mo tufala i wokbaot arier, tufala i go insaed long haos tapolen blong papa blong trifala, nao tufala i kavremap hem bakegen. Tufala i tanem fes blong tufala olsem, from we tufala i sem blong luk we papa blong olgeta i stap slip neked. 24Nao taem Noa i wekap bakegen, hem i harem nius blong samting ya we lasbon blong hem i mekem long hem, 25nao i singaot* trabol i kam long hem se,
“Kenan ya
wetem olgeta we bambae
oli kamaot biaen long hem,
oltaem bambae oli stap harem nogud tumas.
Olgeta bambae oli kam slef* nomo
blong olgeta we bambae oli kamaot
biaen long ol brata blong hem.#9.25: Narafala rod blong tanem tok ya long las haf blong vas ya i olsem. Olgeta bambae oli kam slef nomo blong olgeta we bambae oli kamaot biaen long tufala brata blong Ham.
26Yumi presem Hae God.
Hem i God blong pikinini ya blong mi Sem.
Olgeta we bambae oli kamaot biaen long Kenan
bambae oli kam slef blong olgeta
we bambae oli kamaot biaen long hem.
27Prea blong mi,
we bambae God i mekem olgeta
we bambae oli kamaot biaen long Jafet#9.27: Jafet. Long lanwis ya Hibru, nem ya klosap i olsem wan narafala tok we i min se “Oli kam plante”.
oli kam plante,
mo bambae oli stap gud
wetem olgeta we bambae oli kamaot biaen long Sem,
mo olgeta we bambae oli kamaot biaen long Kenan
bambae oli kam slef blong olgeta tu.”
28Nao biaen long taem blong bigfala wota ya, Noa i stap tri handred fifti yia bakegen. 29Mo taem hem i ded, hem i gat naen handred fifti yia blong hem.
Trenutno odabrano:
Jenesis 9: BBR
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bislama Revised Bible © Bible Society of the South Pacific, 2012.