Mark 15
15
Jesus nni fek nga p’eowchen Pilate
(Matthew 27:1–2, 11–14; Luke 23:1–5; John 18:28–38)
1Ma nap’an ni yigi kadbul me mu’ulung nib gur e pi tolang ko prist nge pi’in pi’ilal, nge pi tamchib ko Motochiyel nge urngin girdi’en e mu’ulung ngar puruy’gad. Miyad yin’ e chen ngak Jesus ngar feked i yan ngar pi’ed ngak Pilate. 2Me fith Pilate Jesus ni ga’ar, “Mog, i gur fare pilung rok piyu Israel fa danga’?”
Me fulweg Jesus ngak ni ga’ar, “Er rogon ni kamog.”
3Ma aram e bo’or ban’en nib kireb ni i yog e pi tolang ko prist nike rin’ Jesus, 4miki fith Pilate Jesus bayay ni ga’ar ngak, “Mog, dab mpi’ e fulweg rom ko pi thin nem ni karogned? A mu guy urngin e pin’en ni karogned nib togopluw ngom!”
5Miki par Jesus nde fulweg ta’ab bug fapi thin, me par Pilate nike balyangan’.
Jesus nturguy ni ngan li’ ngem’
(Matthew 27:15–26; Luke 23:13–25; John 18:39—19:16)
6Gubin yay ni yira madnomnag e re madnom nem ni Paluk’af mma pag Pilate ta’reb e kalbus ni en ni bo’or e girdi’ ni yad be wenignag. 7Mu fithik’ e pi’in kalbus ni pi’in nra thanged e pogofan ko girdi’ u fithik’ e cham ni tay baraba’ e girdi’ ni yad be togopluw ko am e immoy be’ nib mo’on riy, ni Barabbas fithingan. 8Me mu’ulung e girdi’ ni bo’or ngar weniggad ngak Pilate ni nge rin’ e n’en nma rin’ ni fan ngorad ko ngiyal’nem, 9me fithrad Pilate ni ga’ar, “Mogned, gimed ba’adag ni nggu pag e en ni pilung rok piyu Israel?” 10Ya kari nang Pilate nike pi’ e pi tolang ko prist Jesus ngak ni bochan e ke awan’rad ngak Jesus.
11Me nonnon e pi tolang ko prist ngak fapi girdi’ ni yo’or ni ngar weniggad ngak Pilate nge mang Barabbas e ni pag. 12Me ere ki ga’ar Pilate ngak fapi girdi’ ni aram urngirad bayay, “Ere mang e nggu rin’ ngak fa’anem ni kamogned ni ir e pilung rok piyu Israel?”
13Miyad fulweg ngak u fithik’ e tolul ni be lungurad, “Mu richibiy ko kuruth!”
14Me fithrad Pilate ni ga’ar, “Ma mang oloboch e ke ngongliy nrib kireb?”
Fini aram e ra tolulgad ni kari ga’ lamrad ni be lungurad, “Mu richibiy ko kuruth!”
15Me ere tafinaynag Pilate ni nge yan nga laniyan’ fapi girdi’ ni yo’or, me pag Barabbas. Ma aram me yog ni ngan toy Jesus, nge mu’ me pi’ ni ngan richibiy ko kuruth.
Salthaw ni ur moninggad ngak Jesus
(Matthew 27:27–31; John 19:2–3)
16Me fek e salthaw Jesus i yan ngalan e yoror ko en ni pilung ko am, miyad kunuy e ba’ rorad e salthaw nga ta’bang. 17Miyad yin’ e mad nga daken Jesus nib ra’en purple, miyad fek yu pa’ i ban’en ni bay rachangalen ngar te’eliyawniged ngay. 18Miyad tabab ko siro’ ngak ni bod ni yima siro’ ko pilung ni be lungurad, “Nge n’uw nap’an ni par e pilung rok piyu Israel!” 19Me ere ur toyed e rouy nga lolugen, ma yad be thuw nga daken, ma yad be ragbug u p’eowchen ngu’ur siro’gad ngak. 20Ma fa’anra mu’gad i moningnag miyad luf fare mad nib n’uw u daken nib ra’en purple, miyad yin’ e mad rok nga daken. Miyad fek i yan ni ngranod rrichibiyed ko kuruth.
Jesus nrichibiy ko kuruth
(Matthew 27:32–44; Luke 23:26–43; John 19:17–27)
21Ma nap’an ni yad be yan miyad mada’nag be’ nib mo’on u kanawo’ ni Simon fithingan, ni be yib ngalan binaw ni yib u milay’, miyad gelnag e thin ngak nge fek e kuruth rok Jesus. (Cha’nem e Simon nu Cyrene, ni chitamngin Alexander nge Rufus.) 22Miyad fek Jesus i yib ngabangi n’en ni kanog yu Golgotha ngay, ni fan e re bugithin nem e fa gi n’en ni “Tagil’ e Lo’.” 23Miyad guy rogon ni nge unum e wayin ni kan athkuy ko flay ni kanog e myrrh ngay, machane de unum Jesus. 24Ma aram miyad richibiy ko fare kuruth miyad f’oth e mad rok rorad, ni yad be girngiy e pow ni nge duwgiliy e bin nge fanay bagayad. 25Ke mereb e kolok ni kadbul miyad richibiy ko kuruth. 26Ma n’en nni yoloy nga daken e kuruth rok ni kanog ni ir e ba togopluw ngak e ga’ar, “Pilung rok piyu Israel.” 27Mu ku yad richibiy l’agruw i moro’ro’ ntacham nga l’agruw i kuruth, ni bagayow nga ba’ ni mat’aw rok Jesus, ma bagayow nga ba’ ni gilay’ rok. 28#15:28 Boch e babyor e kan puthuy ngay e verse 28: Ma aram me yib i m’ug nib riyul’ e tin ni yog e babyor nib thothup ni ga’ar, “Min uneg ko pi’in kireb ni kar th’abed e motochiyel.” (mu guy e Luk 22:37).
29Ma pi’in yad be yib ngu’u ranod ko gin’em e ur chichingeged lolugrad mu urogned e thin nib kireb ngak Jesus ni be lungurad, “Aha, i gur faram e mfiney ni ngam buthug e Tempel ngam toy u lan dalip e rran nge m’ay! 30Ere mu luw ko re kuruth nir nga but’ nge siy ku mum’!”
31Ma ku aram rogon e pi tolang ko prist nge pi tamchib ko Motochiyel ni ur moning niged Jesus u fithik’rad ni be lungurad rorad, “Ke ayuweg e pogofan rok boch e girdi’, me ir e dabiyag ni nge ayuweg e birok’ e pogofan! 32Mmarow ngad guyed fare Messiah ni ir e pilung nu Israel ni nge luw u kuruth nga but’ e chiney, me michan’dad ngak!”
Ma ku errogon fa gali cha’ nni chagiyrow ngak Jesus ngan kuruthnagrow ni rognew e thin nib kireb ngak Jesus.
Jesus ni aw e fan rok
(Matthew 27:45–56; Luke 23:44–49; John 19:28–30)
33Ma nap’an ni misiw’ me neap’ u daken fare nam ni polo’, me par ni aram rogon ndalip e awa. 34Ma nap’an ni dalip e kolok me non Jesus nri ba ga’ laman ni be ga’ar, “Eloi, Eloi, lema sabachthani?” ni fan e pi thin ney e be ga’ar, “Got rog, Got rog, mangfan ni kam n’igeg?”
35Ma boch fapi girdi’ ni yad bay u rom e rrung’aged laman me lungurad, “Mu telmed, ya be pining Elijah!” 36Me mil bagayad nge yan i lthag bangi worrum ko wayin nib sobut’ puluwon, me tay nga taban ba ley i rouy nge yan i tay nga dap’i l’ugun Jesus me ga’ar, “Mu son gad! Ngad guyed ko ra yib Elijah ni nge fek u kuruth nga but’ fa danga’!”
37Me non Jesus ni ba ga’ laman, me aw e fan rok.
38Ma fa gi mad ni kan tining ngalang u Tempel e mogchoth u lang nga but’ nge par nike ruw yang. 39Ma en ni pilungen e salthaw nib sak’iy u but’ u m’on ko re kuruth nem e guy rogon ni non Jesus ni ba ga’ laman nge mu’ me aw e fan rok,#15:39 me aw e fan rok; boch e babyor e bay riy ni non ni ba ga’ laman nge mu’ me yim’. me ga’ar, “Re mo’on ney e riyul’ ni Fak Got ir!”
40Ma ku errogon bogi ppin ni ur moyed u rom ni yad be changar u orel ngaram, ni bay Salome nge Maria Magdalene, nge Maria ni chitiningin e bin bitir e James, nge Joses u fithik’rad, 41ni pi’in nnap’an ni immoy Jesus u Galile ma ur uned ngak ngu’ur ayuweged. Ma ku bo’or yugu boch e ppin ni ur moyed ko gin’em, nra uned ngak Jesus ngarbad nga Jerusalem.
Jesus nni yan nchibgiliy
(Matthew 27:57–61; Luke 23:50–56; John 19:38–42)
42Ke chugur ni nge gonowrug me taw Josef nu Arimathea, 43ni ir reb e girdi’ u lan e mu’ulung ni yima tayfan, ni ku be sonnag e ngiyal’ ni bayi taw e gagiyeg rok Got ni bay yib. Ma chirofen nem e eram e rofen ni dumm’adil (ni aram e rofen ni bay ngam’on ko Sabbath); me athamgil Josef nge yan i ning downgin Jesus ngak Pilate. 44Me gin Pilate ngay nike aw e fan rok Jesus. Me pining fa en ni pilungen e salthaw nge fith ngak ko ke aw e fan rok Jesus fa dawor. 45Ma nap’an ni nang rok fare pilungen e salthaw nike aw e fan rok Jesus, me yog ngak Josef nrayag ni nge yan Josef i fek downgin Jesus. 46Me ere chuw’iy Josef bangi mad nib wechwech, me yan i pilig downgin Jesus u kuruth, me bichibichiy fa gi mad ngak me yan i tay ngalan e low ni kan ker nga fithik’ e war u taban e rech me lulubiy baraba’ i Malang ni ba ga’ nge ning nga langan fare low ko yam’. 47I Maria Magdalene nge Maria ni chitiningin Joses e ra guyew e gin nni yan ntay downgin Jesus ngay.
Trenutno odabrano:
Mark 15: YAP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2007 Bible Society of Micronesia. Released under the Creative Commons CC-BY-SA license 4.0.
