Mark 11
11
Felfelan’ ni tay e girdi’ ngak Jesus ko ngiyal’ ni yan riy ngalan yu Jerusalem
(Matthew 21:1–11; Luke 19:28–40; John 12:12–19)
1Ma nap’an nra chuchugurgad nga Jerusalem ni kar tawgad nga Bethfage nge nga Bethany miyad yib ko burey nu Olives. Me l’oeg Jesus l’agruw i gachalpen ngar m’onow, 2ke ga’ar ngorow, “Mmarow ngalan e re binaw ni ba’aram ngam’on romew. Ma nap’an ni yig gimew ra yan ngalan binaw, ma bay mpir’egew ba pifak e dongki ni ka ni m’ag gafan ni dawori af be’ nga daken bi’id. Mi gimew pithig gafan ngam fekew ngaray. 3Ma fa’anra fithmew be’ ni ga’ar, “Mangfan e binir ni gimew be rin’? me lungumew, ‘Bay e tin nge rin’ e Masta#11:3 Masta; ara en nib milsuwon ngak. ngay, ni yugu ra mu’ riy me pi’ ngan fulweg ngaray.’ ”
4Mranow miyow pir’eg ba pifak e dongki ni bay u kanawo’ ni ka ni m’ag gafan ko mban e naun. Ma nap’an ni yow be pithig gafan, 5me fithrow boch e girdi’ ni yad be sasak’iy u rom ni lungurad ngorow, “Mang e kam rin’ew ni gimew be pithig gafan e re pifak e dongki nir?”
6Miyow fulweg ni bod ni yog Jesus ngorow, ma aram miyad pagrow ngranow. 7Miyow fek fare pifak e dongki i yan ngak Jesus, miyow yin’ wuru’ e mad rorow nga daken fare gamanman, me af Jesus nga daken. 8Ma bo’or e girdi’ nra filthed wuru’ e mad rorad nga daken e kanawo’, ma boch e girdi’ e ra th’abed pa’ngin e gek’iy ngar filthed nga daken e kanawo’. 9Ma pi’in yad bay ngam’on rok nge pi’in yad be lay u keru’ e ra tababgad ko tolul ni be lungurad, “Ke sorok Got! I Got e nge ayuweg e en ni ir e ke yib ni owchen Somol! 10I Got e nge ayuweg e gagiyeg ni bay yib, ni gagiyeg ni i tay David! Ke sorok Got!”
11Me yan Jesus ngalan yu Jerusalem, me yan ngalan e Tempel, ma nap’an ni mu’ i yaliy rok urngin ban’en, ma aram mranod fa ragag nge l’agruw i gachalpen nga Bethany, ya ke gonowrug.
Jesus ni kirebnag wa’athan ba ke gek’iy ni fig
(Matthew 21:18–19)
12Me reb e rran riy ni yad be sul u Bethany ma ke yib e bilig ngak Jesus. 13Me guy ba ke gek’iy ni fig nga orel, ni kabay yuwan, me yan Jesus i guy ko bay wom’ngin fa dariy; ma nap’an ni taw ngay ma kemus ni yuwan e bay, ma dariy wom’ngin; ya dawori taw ko ngiyal’ nma k’uf riy. 14Me ga’ar Jesus ko fare ke gek’iy, “Dakuriy be’ ni ngki kay wom’engim bi’id!”
Me rung’ag pi gachalpen e n’en nike yog.
Jesus ni yan nga Tempel
(Matthew 21:12–17; Luke 19:45–48; John 2:13–22)
15Ma nap’an nra tawgad ngalan yu Jerusalem me yan Jesus ngalan e Tempel me tabab i tuluf e pi’in yad be chuw’iy ban’en nge pi’in yad be folchuway’ nga ban’en u lan e Tempel. Me thikiy e tebel ko girdi’ nma thiliyeg e salpiy, nge chiya rok e pi’in yad be chuway’ ko bulogol, 16ma daki pag be’ ni nge yan u lan e Tempel ni be fek ban’en. 17Me fil ko girdi’ ni ga’ar, “Bay ni kan yoloy u lan e babyor nib thothup nike ga’ar Got, ‘Naun rog e bay nog nib naun ntafen e meybil rok e girdi’ ko gubin e nam.’ Machane kam thiliyeged kam ted nike mang bangi n’en nma mith e moro’ro’ riy!”
18Me rung’ag e pi tolang ko prist nge pi tamchib ko Motochiyel murung’agen e n’en ke rin’ u Tempel, ma aram miyad gay kanawo’en e n’en nra rin’ min li’ Jesus ngem’. Ya ra tamdaggad ngak ni bochan e gubin fapi girdi’ ni aram urngirad ni kar gin gad ngarogon e machib ni be tay.
19Ma fa’ani neap’ me chuw Jesus nge pi gachalpen u lan fare binaw.
N’en ni mit ngak pi gachalpen Jesus u murung’agen fare ke gek’iy ni fig
(Matthew 21:20–22)
20Me reb e rran riy, nri kab kadbul ni yad be yan u daken fare pa’ i kanawo’, miyad guy fare ke gek’iy ni fig nike yim’ u lang ke mada’ nga lik’ngin nga but’. 21Me yib ngan’ Peter e n’en ni yog Jesus me ga’ar ngak, “Tamchib, a mu guy, fare ke gek’iy ni mkirebnag wa’athan e ke l’ud!”
22Me fulweg Jesus ngorad ni ga’ar, “Mu ted fanmediyan ko re bugithin ney! Fa’anra mmich Got u wun’med 23mrayag ni lungumed ko re burey ney, ‘Mpuw ngalang ngam man mu aw nga maday!’ Ma fa’anra der maruwar u wun’med ni n’en ni kamogned e bay yodorom, ma yira rin’ fa pin’en ni kamogned. 24Aram fan ni gu be yog ngomed, ni ngiyal’ ni gimed ra meybil ni kam ninged ban’en ni ngan pi’ ngomed, me pagan’med ngay nike yag ngomed, ma aram e urngin fa pin’em ni yira pi’ ngomed. 25Ma ngiyal’ ni gimed ba sak’iy ni gimed be meybil, e fa’anra bay ban’en u laniyan’ bigimed nib togopluw ngak be’ ma nge n’ag fan rok fa’anem, ni bochan e ngki yag ni n’ag e Chitamangimed nu tharmiy fan e denen romed.”
26 # 11:26 Boch e babyor ni e ni puthuy ngay e verse 26: Fa’anra dab mu n’iged fan u wun’med e kireb nike rin’ boch e girdi’ ngomed, ma ku errogon e Chitamangimed nu tharmiy ni dabi n’ag fan e denen romed (mu guy e 6:15).”
Ba de’er u murung’agen mat’wun Jesus
(Matthew 21:23–27; Luke 20:1–8)
27Miyad sul nga Jerusalem. Ma nap’an ni be yan Jesus u lan e Tempel me yib e pi tolang ko prist, nge pi’in tamchib ko Motochiyel, nge pi’in pi’ilal ngak, 28miyad fith ngak ni lungurad, “Bu uw mat’wum ni ga be rin’ e pin’ey? Me mini’ e ke pi’ mat’wum ni ngam rin’?”
29Me fulweg Jesus ngorad ni ga’ar, “Nggu fith ta’a ban’en ngomed, ma fa’ani gimed ra fulweg ngog nrogon, ma aram e ra gog ngomed ko uw e yib mat’wug riy ni nggu rin’ e pin’ey ni gu be rin’. 30Mogned ngog ko uw e yib mat’wun John riy ni ngi i tawfe, i yib rok Got fe yib rok e girdi’?”
31Me tabab fa pi’inem i lulu’ag e thin u fithik’rad ni be lungurad, “Mang e nga dogned? Ya fa’an gadad ra fulweg ngak ni Got e pi’ mat’wun John, mra ga’ar ngodad, ‘Ere mangfan nde mich u wun’med e tin ni i yog John?’ 32Machane fa’an gadad ra ga’ar, ‘Girdi’ e pi’ mat’wun...’” (Ni bochan e yad be tamdag ngak e girdi’, ya gubin e girdi’ nike riyul’ u wun’rad ni John e immoy ni ir reb e profet.) 33Ma aram miyad fulweg ngak Jesus ni lungurad, “Da gu nanged.”
Me fulweg Jesus ngorad ni ga’ar, “Ere ku er rogog ndab gog ngomed ko uw e yib mat’wug riy ni nggu rin’ e pin’ey.”
Trenutno odabrano:
Mark 11: YAP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2007 Bible Society of Micronesia. Released under the Creative Commons CC-BY-SA license 4.0.
