John 9
9
Jesus ni golnag be’ nib mo’on nni gargeleg ma bmalmit
1Ma nap’an ni be yan Jesus me guy be’ nib mo’on nni gargeleg ma bmalmit. 2Me fith pi gachalpen ngak ni lungurad, “Tamchib, cha’nem nni gargeleg ma bmalmit e mini’ e puluwon e denen rok e yodoromnag? Denen rok ara denen ko gallibthir rok?”
3Me fulweg Jesus ni ga’ar, “Malmit nike tay e dariy rogon ko denen rok ara denen rok e gallibthir rok. Ke malmit ya nge yag ni ngan guy gelngin Got ni nge maruwel u fithik’ i downgin. 4Ya thingar da ngongliyed e pi maruwel rok e en ni ir e ke l’oegeg ku gub, u n’umngin nap’an ni kab rran; ya bayi neap’, ma dakuriy be’ nrayag ni nge maruwel. 5Ngiyal’ ni gu bay u roy u fayleng e gag e tamilang ngak e girdi’ nu fayleng.”
6Ma nap’an ni mu’ i weliy rok e re bugithin ney me thuw Jesus nga daken e but’ me athkuy bochu’uw i but’ ngay nge barbarnag; me liyef nga ruw raba’ i owchen fare mo’on, 7me ga’ar ngak, “Mman ngam luknag owchem u lan fa gi Ran ni Siloam.” (Fan e re ngachal ney e “Ka Nol’oeg.”) Ma aram me yan fare mo’on nge luknag owchen, me sul nike guy ban’en.
8Ma pi’in yad bbuguliyoror nge pi’in ur guyed ni i man ban’en u m’on ko ngiyal’ney nike guy ban’en e ra fithed ni lungurad, “Gathi ireray fare mo’on ni i par u but’ ngi i man ban’en?”
9Me ga’ar boch e girdi’, “I ir,” machane boch e girdi’ e lungurad, “Danga’, gathi ir, ya be’ nta’reb ya’arow.”
Ma aram me mang fare mo’on e ga’ar, “I gag e re mo’on nem.”
10Miyad fith ngak ni lungurad, “I di’in ma gguy ban’en?”
11Me fulweg fare mo’on ni ga’ar, “Fare mo’on ni Jesus fithingan e barbarnag e but’ nge liyef nga owcheg nruw raba’, me yog ngog ni nggu wan nga Siloam nggu luknag owcheg. Ma aram mu gu wan, ma yugu nap’an ni gu luknag owcheg mu gguy ban’en.”
12Miyad fith ni lungurad, “Ke yan e cha’nir ngan?”
Me fulweg ni ga’ar, “Da gu nang.”
Pi Farise nra gayed e n’en ni rin’ me chuw e malmit rok fa’anem
13Miyad fek fare mo’on ni immoy nib malmit i yan ngak e pi Farise. 14Re rran ni barbarnag Jesus e but’ nge tay nga mit fare mo’on nge guy ban’en e reb e Sabbath. 15Me ere fith e pi Farise fare mo’on bayay ko n’en ni rin’ me yag ni guy ban’en. Me yog ngorad ni ga’ar, “I tay e but’ nike barbarnag nga owcheg nruw raba’, mu gu luknag owcheg, me ere chiney e ke yag ni gguy ban’en.”
16Me ga’ar boch i yad fapi Farise, “Re mo’on nike rin’ e ren’ey e gathi yib rok Got, ya der fol ko motochiyel ko Sabbath.”
Machane boch i yad e lungurad, “Ra di’in me yag ni ngongliy be’ e maang’ang ni ireray rogon ni fa’anra ir be’ nib tadenen?” Ma aram miyad ruw raba’.
17Me ere ki fith fapi Farise fare mo’on bayay ni lungurad, “Kamog nike chuweg e malmit rom — kam guy ban’en, ere be lungum e ir mini’?”
Me fulweg ni ga’ar, “I ir ba profet.”
18Machane fa picha’ nu Israel e daburad ni nge riyul’ u wun’rad ni immoy e cha’nem nib malmit ma keyag ni nge guy ban’en e chiney, nge yan i mada’ ko ngiyal’ nra pininged e gallibthir rok fa’anem 19ngar fithed yow ni lungurad, “Fakmew e cha’ney? Ke lungumew e ni gargeleg ma bmalmit? Ere ke di’in nike yag ni nge guy ban’en e chiney?”
20Me fulweg e gallibthir rok ni lungurow, “Gamow manang ni ir fakmow, ma gamow manang nni gargeleg ma bmalmit. 21Machane da gu nangew e n’en ke rin’ ma keyag ni nge guy ban’en e chiney, ma da gu nangew e en ke chuweg e malmit rok. Ere mfithed; ya ke ilal, nrayag ni nge fulweg lungumed!” 22I yog e gallibthir rok e re bugithin ney ya kar tamdaggow ngak fapi cha’ nu Israel; ya ke mu’ i duwgiliy rok fa picha’ ni yad ma yog e thin nu Israel ni fa’anra yog be’ ni Jesus fare Messiah, ma aram e dabki yib ngalan tafen e mu’ulung bi’id. 23Aram fan ni ga’ar e gallibthir rok, “Ke ilal; ere mfithed!”
24Mu kur pininged fare mo’on nni gargeleg ma bmalmit nge yib ngorad me lungurad ngak, “Mog u mit Got ntin riyul’ e ngam weliy! Gamad manang nre mo’on nem i Jesus e reb e tadenen.”
25Me fulweg fare mo’on ni ga’ar, “Da gu nang ko ir reb e tadenen ara danga’. Machane ta’are n’en ni gu manang e ba’aray: ug moy ni gub malmit, ma chiney e ke yag ni gguy ban’en.”
26Miyad fith ngak ni lungurad, “Mang e rin’ ngom? I kuni’eg owchem ma gguy ban’en?”
27Me fulweg ni ga’ar, “Ke m’ay i yog rog ngomed, ma dabumed ni ngam motoyilgad ko n’en ni kugog. Ere mang ni gimed ba’adag ni ngkum rung’aged bayay? Sana ku er rogomed ni gimed ba’adag ni ngam manged boch pi gachalpen?”
28Miyad yog e thin nib kireb ngak me lungurad, “I gur gachalpen e cha’nem; ma gamad e gamad pi gachalpen Moses. 29Gamad manang ni welthin Got ngak Moses; ma re mo’on nem e mus ko gin ni yib riy ma da gu nanged!”
30Me fulweg fare mo’on ni ga’ar, “Uw rogon e biney! Da mu nanged e gin ni yib riy machane ke chuweg e malmit rog! 31Gadad manang ni Got e dar ma motoyil ngak e pi’in yad ba tadenen; ya ma motoyil ngak e pi’in yad ma tayfan ma yad ma rin’ e tin ni ba’adag ni ngar rin’ed. 32Ka nap’an ni sum e fayleng ma dawor nrung’ag ni ka’a ngongliy be’ owchen be’ nni gargeleg ma bmalmit ke guy ban’en; 33fa’anra de yib e re mo’on ney rok Got, ma dariy ta’a ban’en nrayag ni nge rin’.”
34Miyad fulweg ngak ni lungurad, “I gur e ni gargel nigem ngan chuguluyem u fithik’ e denen ma ga be guy rogon ni ngam machib ngomed?” Ma aram miyad chuweg u lan tafen e mu’ulung.
Man laniyan’ ni yima tay ko thin rok Got
35Me rung’ag Jesus ni kar chuweged fa’anem u lan tafen e mu’ulung. Me pir’eg Jesus fa’anem me ga’ar ngak, “Ke mich u wun’um e en ni Fak e Girdi’?”
36Me fulweg fare mo’on ni ga’ar, “Mog ngog ko ir mini’, nge yag ni mich u wun’ug!”
37Me ga’ar Jesus ngak, “Kam guy, me ir e en ni be non ngom e chiney!”
38Me ga’ar fare mo’on, “Somol, ke mich u wun’ug!” Me ragbug nga but’ u p’eowchen Jesus.
39Me ga’ar Jesus, “Ku gub ngaray nga fayleng ni nggu ki’eg e girdi’ ni fan e pi’in yad bmalmit e ngar guyed ban’en, ma pi’in yad be guy ban’en e ngar malmitgad.”
40Ma boch e Farise ni bay rok u rom e rrung’aged e re bugithin ney nike yog, miyad fith ni lungurad, “Mog ga be finey ni kimus ngomad ma gamad bmalmit fa?”
41Me fulweg Jesus ni ga’ar, “Fa’an mang e gimed bmalmit me ere de kireb e romed; machane ba kireb e romed ni bochan e ke lungumed e gimed be guy ban’en.”
Trenutno odabrano:
John 9: YAP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2007 Bible Society of Micronesia. Released under the Creative Commons CC-BY-SA license 4.0.
