Genesis 6
6
Kireb rok e Girdi’
1Re ngiyal’ i n’em e ke yo’or e girdi’ nga gubin yang u fayleng, ma yibe gargeleg e ppin.#Num 13:33 2Me guy boch e pi chon e tharmiy#6:2 Pi chon e tharmiy; ara Pi pumo’on ni pifak e pi got; ara pi pumo’on ni pifak Got. e pi ppin nem ni yad ba pidorang, ma aram miyad fek e pi’ arorad ni yad ba’adag. 3Me ga’ar SOMOL, “Dab gu tay e girdi’ ngar pired ni yad bfos ndariy n’umngin nap’an, ya dowrad e ra yim’. Chiney i yan nga m’on e dab kur pired ni yad bfos nge pag 120 e duw yangarrad.” 4Re ngiyal’ i n’em nge nga tomur riy e immoy e girdi’ ni n’un’uw ma tagyet u fayleng ni yad fa pi’in pifak fapi ppin nge pi chon e tharmiy. Yad e pi’in ur gelgad ko mael ma ba gilbuguwanrad kakrom.
5Fa’ani guy SOMOL ni kari gel e kireb rok e girdi’ u gubin yang, ni gubin ngiyal’ ma ba sug lanin’rad ko tin nib kireb, 6me taganan’ ngay nike sunumegrad ke tayrad nga daken e fayleng. Me par ni kari kolngan’ riy. 7Me ga’ar, “Bay gu thang owchen urngin e girdi’ ni kug sunumeg, ndemturug e gin’en ni yad bay riy. Ma bay kug thang owchen urngin e gamanman nge urngin e arche’, ya kug kolngan’ug ni kug sunumegrad.” 8Machane SOMOL e bfel’ Noah u wan’.
Noah
9-10Ba’aray e pi’in ni owchen Noah: dalip e pagel ni fak ni immoy, ni Shem nge Ham nge Jafeth. Noah e be’ nib mo’on ni bfel’ ni kemus ni ir e immoy ni kabfel’ u wan’ Got e ngiyal’nem; i par ni bay Got rok. 11Machane urngin e tin kabay e girdi’ e yad gubin ni yad ba kireb u p’eowchen Got, ma kireb rorad e ke wear nga gubin yang. 12Me par Got nge guy e girdi’ nu fayleng me guy ni yad ba kireb, ya kari yan i par e girdi’ ni kari kireb.
13Me ga’ar Got ngak Noah, “Kug turguy u wun’ug ni nggu thang owchen urngin e girdi’. Bay gu thang owcherad, ya re fayleng ney e ke sug ko ngongol rorad nib kireb. 14Mu toy e barkow ni fan ngom ni ngam ngongliy ko ren ni bfel’; ma ga senggilnag, ma ga achey langgin nge wuru’ ko pitch. 15Ngam toy ni 450 e fit n’umngin, ma medlip i ragag nge lal e fit radan, ma aningeg i ragag nge lal e fit tolngin. 16Ma ga ngongliy e chigiy u daken, ma ga tay thilin e chigiy nge marichlen e barkow u baraba’ ngu baraba’ ni ragag nge meruk e inch. Ngam toy ni dalip thal e faraf u lan, ma ga tay ba mab u p’eyon. 17Ya bay gu pi’ e ran nge yib nga daken e fayleng ni nge thang mit urngin ban’en nib fos. Ma urngin ban’en ni bay u daken e fayleng ni bay yim’, 18machane gur e bay gu ngongliy reb e m’ag u thildow. Ngam man ngalan e re barkow nem ni gimew le’engim, nge pifakmew ni pumo’on, nge pi le’engirad, 19ma nge un ngom reb e pumo’on nge reb e ppin u urngin mit e gamanman, nge dab ra uned ko yam’. 20Lal’agruw u urngin mit e arche’ ngu urngin mit e gamanman ni tin ba ga’ nge tin ba’achig ni go’ bay ranod ngalan e re barkow nem, nge dab ra uned ko yam’. 21Mu fek urngin mit e ggan ni fan ngom, nge ngorad.” 22Me rin’ Noah urngin e tin ni yog Got ngak ni nge rin’.
Trenutno odabrano:
Genesis 6: YAP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2007 Bible Society of Micronesia. Released under the Creative Commons CC-BY-SA license 4.0.