THAUREYMEI 21
21
Isak Puanhmei
1 Ringhpouc kamei rui kalatdyng theilayna, Sara khou suaihiamlouna, 2Sara kapumc nritna Abraham kamei karapouc key pwkhou nggaanvmei nac gaanv khat puanclou the. Ravguangc rui dincloumei ganv khou mi nac tei puanc the.#Ibr 11.11 3Abraham rui kazanc Isak twna phuaklou the. 4Isak tei zaeng tachat tangc pwkhou, Ravguangc tuang latdanv theilayna Abraham rui kagic ruamc the.#Tha 17.12; Lat 7.8 5Isak ta puanh khou tei Abraham katingkwm 100 tangc the. 6Sara rui sa the, “Ravguangc rui ata tineihlana tinuiclou the, khatni mi chamv hei chumei kathuic rui ai lev nuic nchamh puni the.” 7Kumna kamei rui sa dat re, “Sara rui kanac ta tinoucna lungc puni e twna thow rui Abraham khou sa punina cho? Tiki kamei karapouc key pwkhou akhou rui kanac mpouh akhat puanclou the.”
8Mi nac tei daicthau the, kumna kamei nouc taanmei nungc Abraham rui ngay raengc patna ngay the.
Hagar lev Ismael ta Thouc Ganhmei
9Zaeng neihkhat Izipmeipui Hagar rui puanhmei Ismael tei Sara nac Isak kaney palup bam khwan e. 10Hei tei Sara rui how lana Abraham khou sa the, “Mi bangcpui lev kanac ta thouc ganc tho. Anac Isak rui laa nimei nang tuang lanv tei mipui nac khang hei nzanhlou nuh mak ge.”#Gal 4.29,30 11Ismael hei ni kanac timei thu mi hei rui Abraham lung mpeyna tiryanra the. 12Tiki Ravguangc rui Abraham khou sa the, “Nang bangcpui Hagar lev mi nac khang tei nang lung ryanra riu. Sara rui samei tei taanclou tio, kalam thu ai rui nrianhloumei nang kikta tei Isak khou rui pat nina de.#Rom 9.7; Ibr 11.18 13Banghpui nac khou hei ni kanac mpouh mpeyna tiilou puni, kaniw tei ni zaatc akhat sw puni. Kamei hei ni nang nac de.”
14Nthuanh thwanzingh Abraham rui Hagar khang taektw asaekc lev guaihgic khau khou dui liat padiklouna tiilou the. Kamei rui hei tei kabou khou goulouna thouc ganc kan the. Hagar tei tatpatna Beersheba tuang tazikramv khou ruan tat bam khwan the. 15Duikhau khou dui tei zangv ngam pwkhou kamei rui mi nac ta tei thingphwam bangc khou ganclouna 16sauhpai kaap tangc biuhmei saanv mi nac khou tei rui duhmei thangc dungcna kumna sa the, “Anac theic nimei ta ai zauc ngam lak ge.” khoutei dungcna kamei kap the.
17Mi nac tei kapmei khwan tei Ravguangc tingkauh thangc rui chu the kumna Ravguangc tuang baanchara rui Hagar khou sa the, “Nang khang tabui tuang ryanramei naina cho, Hagar? Ping riu. Mi nac tei rui kapmei khwan tei Ravguangc rui chu the. 18Thau tho, tatna mi nac ta tei puancthauna swmlou tho. Kakikta khou rui ai rui zaatc daihmei kasiamhlou puni the.” 19Khoutei Ravguangc rui kamik tiraklou the, kumna kamei duikhunc akhat how the. Kamei tat lana guaihgic khau tei zu padiklou the kumna mi nac ta tizangv the. 20Ravguangc rui mi nac ta tei nkhavlouna kamei daicthau the. Kamei Paran tuang tazikramv khou lungcna luh pai sinmeipu sw the. 21Kapui rui kanow khang Izipmei luc ta phulou the.
Abraham lev Abimelek kak khou Latdyng Laamei
22Khoutei Abimelek katuang rihpy Phikol ta nduanghna Abraham khou guangna sa the, “Nang rui taanhmei kathuicna khou Ravguangc rui nkhavlou e.#Tha 26.26 23Kumna nang rui ata, anac nunc ta, khatni akikta guay ta guat lak ge twmei latdyng Ravguangc hu khou swlou o. Ai nang ta kungcna bam e kumna nang rui ni ata khatni nang lungc bammei kandic ti hei kungcna sw ni twmei latdyng swlou o.”
24Abraham rui sa the, “Ai latdyng sw the.”
25Abimelek bangc nunc rui duikhunc asut kanmei lam khou Abraham rui Abimelek khou raclou the. 26Abimelek rui sa the, “Mi kiu thow rui asut tu cho twmei ai thay mak ge. Nang mi lam khou hei akhou raclou zat mak ge cho, ai mi lam khou hei ntaw na rui chu tu de.” 27Khoutei Abraham rui Abimelek khang lauziu khatni guaih tiina kaney tei latdyng sw the. 28Abraham rui kalauziu pang khou rui lauziunac chanei gaengc langc pat the. 29“Hei tei tabui khang cho?” twna Abimelek rui kakhou thanv the.
30Abraham rui daw the, “Mi duikhunc hei ai rui khiucloumei tuang dyng e twmei lyanmei swna mi lauziunac chanei hei laalou o.” 31Mi bamv tei Beersheba twna kaw the, kalam thu mi bamv khou tei kaney gaanv nei latdyng sw the.
32Kaney mi latdyng hei Beersheba khou swlou tangna, Abimelek lev Phikol tei Philistia thangc tat dat kan the. 33Abraham rui Beersheba khou tamarisk bang lingclou the kumna tingsaeng Ravguangc, Ringhpouc ta kalum the. 34Abraham Philistia khou lungcsaengc sihlou khwan e.
Trenutno odabrano:
THAUREYMEI 21: RONGBSI
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.