Matayo 4
4
Si̱taani̱ noohi̱ya Yesu
(Maliko 1:12-13; Luka 4:1-13)
1Du̱mbi̱ Mwoyo Ahi̱ki̱li̱i̱ye aahi̱ki̱li̱ya Yesu kughenda mu elungu, niikuwo Si̱taani̱ amwoheli̱ye yo. 2Obu Yesu aamali̱ye bilo maku̱mi̱ anaa mukilo na ntangaali̱ anasi̱i̱bi̱ye, njala yaamukwata. 3Niibuwo Si̱taani̱ aasi̱ye aamughila ati, “Okaakuba oli Mwana wa Luhanga, olaghile mabaale ghani ghafooke byokuliya.”
4Yesu aamughila ati, “Kihandi̱i̱ku̱u̱we ngu, ‘Muntu taakubaagha mwomi̱i̱li̱ haabwa byokuliya byonkaha, bhaatu haabwa kighambo eki Luhanga aku̱bu̱ghagha mu kanu̱wa ke.’#Kyabilaghilo 8:3 ”
5Du̱mbi̱ Si̱taani̱ aamutwala mu kibugha ki̱hi̱ki̱li̱i̱ye Yelusaalemu, aamu̱ni̱i̱ni̱ya haa kasui kakangami̱ye kaa Numba ya Luhanga, aamughila ati, 6“Okaakuba oli Mwana wa Luhanga, ohalale weesimbe hansi. Nanga kihandi̱i̱ku̱u̱we ngu,
“ ‘Akulaghila baamalai̱ka be bakuloleelele,
kandi bakukwatilile mu ngalo syabo,
niikuwo oteehuulila ebaale ohendeka kighele.’#Jabbu̱li̱ 91:11-12 ”
7Yesu aamukuukamu ati, “Kihandi̱i̱ku̱u̱we ngu, ‘Otalilengesa Mukama Luhanga waawe.’#Kyabilaghilo 6:16 ”
8Niibuwo Si̱taani̱ aamutwete haa mwena ghukangami̱ye, aamwoleka makama ghaa munsi ghoona na ki̱ti̱i̱ni̱sa kyagho. 9Aamughila ati, “Ebi byona nkukuha biyo, nuwaateei̱ye kundami̱ya.”
10Yesu aamughila ati, “Si̱taani̱, ondu̱ghʼo! Kihandi̱i̱ku̱u̱we ngu, ‘Olami̱yaghe Mukama Luhanga waawe, kandi aaniiye waaheeleli̱yagha enkaha.’#Kyabilaghilo 6:13 ”
11Du̱mbi̱ Si̱taani̱ aamu̱lu̱ghʼo, baamalai̱ka baasa ku̱mu̱heeleli̱ya.
Yesu naatandika kutebeja
(Maliko 1:14-15; Luka 4:14-15)
12Obu Yesu aaghu̱u̱ye ngoku Yohaana bamukwete ali mu nkomo, Yesu aakuuka mu di̱si̱tu̱li̱ki̱ti̱ ya Galilaaya. 13Aalu̱gha mu tau̱ni̱ ya Najaaleeti̱, aaghenda aakala mu tau̱ni̱ ya Kapelenau̱mu̱. Tau̱ni̱ eghi ekaba eli mu kyalo hambali ntu̱la ya Jabbu̱looni̱ na Nafutaali baabaagha bakaaye. 14Eki kyasu̱li̱i̱si̱ya eki mulangi̱ I̱saaya aabu̱ghi̱ye ati,
15“Enu̱we bantu bʼomu kyalo kya Jabbu̱looni̱ na kya Nafutaali.
Kyalo ekili mu kihanda kya kughenda haa nanja ya Galilaaya na maasi Yolodaani̱.
Ekili mu di̱si̱tu̱li̱ki̱ti̱ ya Galilaaya eghi bantu batali Bayu̱daaya bakani̱yemu.
16Bantu abali mu mweli̱ma ghwa kutamanya Luhanga,
baaboone kyeleeli̱ kyamaani̱ kya kumumanya.
Abaakalagha beelalikiliiye kifubilo kya Luhanga kya lu̱ku̱
bakutunga kyeleeli̱ kya kujunuwa.”#I̱saaya 9:1-2
17Ti̱ ku̱lu̱gha bwile obu na kweyongelayo, Yesu aatandika kutebeja naaghila bantu ati, “Mwekuukemu, nanga bu̱lemi̱ bwʼomu eghulu bwahi̱ki̱ye.”
Yesu naabilikila beeghesebuwa be bʼoku̱du̱bha
(Maliko 1:16-20; Luka 5:1-11)
18Kilo kimui Yesu naalubhatangila haa ki̱si̱yo kya nanja ya Galilaaya aabona baani̱na emui babili, Si̱mooni̱ Peetelo na Andeleya mbategha bu̱ti̱mba mu nanja nanga bakaba bali bakomani̱ baa nsu̱i̱. 19Aabaghila ati, “Munkwame, nkubafoola bakomani̱ baa bantu.” 20Du̱mbi̱ baati̱gha bu̱ti̱mba bwabo, baamukwama. 21Obu aalu̱ghi̱ye haala asanga baani̱na emui banji babili Yakobbo na Yohaana batabani̱ baa Jebbedaayo. Bakaba bali mu bwati̱ hamui na esebo Jebbedaayo, mbaghomola bu̱ti̱mba bwabo, aababilikila. 22Du̱mbi̱ baati̱gha esebo na bwati̱ bwabo, baamukwama.
Yesu naaki̱li̱ya balwaye
(Luka 6:17-19)
23Yesu aakwama mu di̱si̱tu̱li̱ki̱ti̱ ya Galilaaya yoona neegheesi̱ya mu malami̱li̱yo ghaa Bayu̱daaya. Aalangililagha Makulu Ghasemeeye ghaa bu̱lemi̱ bwa Luhanga, kandi naaki̱li̱ya bantu ndwala syona. 24Ti̱ makulu ghe ghaamalakaka kyalo kya Si̱li̱ya kyona, kandi bantu baamuleetela abalwaye ndwala sya milingo yoona. Abali mu busaali̱ji̱ bwamaani̱, aba bi̱li̱mu̱ bikwete, abalwaye mpu̱mbu̱, nʼabaghenagheneeu̱we, boona aabaki̱li̱ya. 25Biigambi̱ bya bantu abaalu̱ghi̱ye mu di̱si̱tu̱li̱ki̱ti̱ ya Galilaaya, mu di̱si̱tu̱li̱ki̱ti̱ ya Tau̱ni̱ Eku̱mi̱, Yelusaalemu, Bu̱yu̱daaya na luhande lwʼeli̱ lwa maasi Yolodaani̱, baamukwama.
Trenutno odabrano:
Matayo 4: TLJ
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© (Active) Wycliffe Bible Translators, Inc. All rights reserved.
