Sione 6
6
Ko Hono Fafanga ‘o e Toko nimaafé
(Mātiu 14:13-21; Ma‘ake 6:30-44; Luke 9:10-17)
1Pea hili ʻa e ngaahi meʻa ko iā, naʻe folau atu ‘a Si̇̄sū ki he kauvai ‘o e Tahi Kāleli̇́, ʻa ia na‘e toe ʻiloa pē, ko e Tahi ʻo Taipiliō. 2Pea muimui kiate ia ha kakai tokolahi, koe‘uhi̇̄ he naʻa nau mamata ki heʻene ngaahi mana naʻe hoko heʻene fakamo‘ui mahaki̇́. 3Pea ʻalu hake ‘a Si̇̄sū ki ha funga mo‘unga, pea naʻe nofo hifo ai mo ʻene kau akó. 4Pea naʻe ofi ke fai ʻa e Pāsová, ko e kātoanga fakalotu ʻa e kakai Siú.
5Pea ʻi he vakai ‘e Si̇̄sū ‘oku fakaholo mai ha fu‘u kakai tokolahi kiate iá, naʻá ne fehu‘i ange kia Filipe: ‟Te tau ma‘u mei fē ha me‘atokoni ke fafanga ‘aki ʻa e fu‘u kakai ko ʻeni̇́?” 6Ka ko ʻene folofola peheé, ke siviʻi ʻaki ‘a Filipe, he kuó ne ‘osiʻ ʻafioʻi pē ʻe ia, ʻa e me‘a te ne fai̇́.
7Pea pehēange ‘e Filipe kiate ia: ‟Na‘a mo haʻamau ngāue totongi ki ha māhina ʻe valu, ʻe ʻikai feʻunga ʻa e paʻanga ʻe maʻu ai̇́, ke fafangaʻaki kinautolu.”
8Pea lea kiate ia ʻa e toko taha heʻene kau akó, ʻa ia ko ‘Anitelū, ko e tokoua ‘o Saimone Pitá, 9‟‘Oku ‘i ai ha tamasi‘i heni, ‘oku ‘i ai ha‘ane fo‘i mā uite ‘e nima mo ha ongo kiʻi mata‘i ika ‘e ua, ka ʻe ʻikai totofu ai ʻa e fu‘u kakai̇́ ni.”
10Pea folofola ‘a Si̇̄sū: ‟Fekau ʻa e kakai̇́ ke nau nofo ki lalo.” Pea ko e feitu‘u musie‘ia ia, naʻa nau nofo hifo ai̇́, pea ko e tokolahi ʻo e mātuʻa tangatá, ko e toko nima afe. 11Ko ia naʻe to‘o ‘e Si̇̄sū ʻa e maá, ʻo fai ʻene fakafetaʻi̇́, pea naʻe toki tufotufa ia ki he kakai naʻe nofo ai̇́. Naʻá ne fai pehē pē foki ki he iká, pea na‘e kai ʻa e fuʻu kakai̇́, ‘o nau mākona.
12Pea ʻi heʻenau mākona kotoa pē, naʻe fekau ‘e Si̇̄sū ‘ene kau akó, ke nau tānaki ʻa e toengá, ke ‘oua na‘a maumau ha meʻa. 13Ko ia, naʻa nau tātānaki ʻa e toetoenga ʻo e foʻi mā ‘e nima naʻa nau kai̇́, ʻo fonu ai ha ngaahi kato lalahi ʻe hongofulumāua.
14Pea ʻi he mamata ʻa e kakai̇́ ki he mana kuo fai ‘e Si̇̄suú na‘a nau pehē: ‟Tā ko e Palōfita mo‘oni̇́ ʻeni, ʻa ē naʻe lau ke ha‘u ki māmani̇́!” 15Ko ia, ʻi he ʻafioʻi ʻe Si̇̄sū ‘e omi ‘a e kakai̇́ ʻo feinga ke ʻave ia ʻo fakanofo ko honau Tuʻi̇́, naʻe toe ‘alu ia ki ha moʻunga ‘o nofo toko taha ai.
Ko e Laka Atu ‘a Si̇̄sū he Fukahi Vaí
(Mātiu 14:22-33; Ma‘ake 6:45-52)
16Pea ʻi heʻene efiafi hifó, naʻe ʻalu atu ʻene kau akó ki tahi; 17‘O nau heka ai ki ha vaka ʻo tuku folau atu ki he kauvai ʻe tahá, ki Kāpaneume. Pea kuo poʻuli ʻi he taimi ko iā, mo e te‘eki pē ke a‘u mai ‘a Si̇̄sū kiate kinautolu. 18Pea tō mai ha matangi mālohi pea houtuʻu ʻa e tahi̇́.
19Pea hili ʻenau ʻaʻalo ʻi ha kilomita ‘e nima pē ono nai, naʻa nau mamata kia Si̇̄sū ʻoku hāʻele mai ʻi he fukahi tahi̇́, ‘o fakaofiofi mai ki he vaká, pea naʻa nau manavahē ‘aupito. 20Ka naʻá ne folofola kiate kinautolu: ‟ʻOua ʻe manavahē. Ko au pē.” 21Pea nau loto leva ke fakaheka ia ki he vaká.
Pea fe‘unga mo iá, kuo tū‘uta ʻa e vaká ki he feitu‘u na‘a nau folau ki ai̇́.
Ko e Mā ‘oku Ma‘u ai e Mo‘uí
22Pea ʻi he ʻaho hono hokó, ko e fuʻu kakai na‘e kei nofo ʻi he kauvai ʻe tahá, naʻa nau fakatokangaʻi, tā ko e vaka pē ‘e taha na‘e tau ai̇́, pea naʻe ʻikai ke heka ‘a Si̇̄sū ki he vaka ko iā mo ʻene kau akó, ka ko ʻene kau akó pē naʻa nau folau atu ai̇́. 23Ka naʻe tau ofi mai ai ha fanga ki‘i vaka mei Taipiliō, ki he feitu‘u na‘e kai ai ‘e he kakai̇́ ʻa e mā ko ē naʻe fai fakafetaʻi ai ʻa e ʻEiki̇́. 24Pea ‘i he mamata ‘e he kakai̇́ kuo ‘ikai ke ‘i ai ‘a Si̇̄sū mo ‘ene kau akó he feitu‘u ko iā, naʻá nau heka leva ki he fanga ki‘i vaká, ‘o nau ō ki Kāpaneume ko e kumi kia Si̇̄sū.
25Pea ʻi heʻenau maʻu ia ki he kauvai ‘e tahá, naʻa nau ‘eke ange: ‟Tangata‘eiki, naʻá ke ha‘u fakakū ki heni̇́?”
26Pea pehē ange ‘e Si̇̄sū kiate kinautolu: ‟Ko hono mo‘oni̇́ ʻeni ʻoku ou talaatu kiate kimoutolú, ‘oku mou kumi kiate au ʻo ʻikai koe‘uhi̇̄ kuo mou mahinoʻi ʻeku ngaahi maná, ka ko e meʻa ʻi ho‘omou kai ʻo mākona ʻi he maá. 27ʻOua te mou ngāue ki he me‘atokoni ‘e ʻauha, ka ki he me‘atokoni ʻe tolonga ʻo aʻu ki he mo‘ui ta‘engatá, ʻa ia ʻe ‘oatu ʻe he Foha ʻo e Tangatá kiate kimoutolu, he ko e meʻa ia kuo fakamafai‘i ia ‘e he Tamai̇́, ke ne ‘oatu.”
28Ko ia, naʻa nau pehēange kiate ia: ‟Ko e hā leva ʻa e meʻa te mau fai kae lava ke mau fai ai ʻa e ngāue ʻa e ‘Otuá?”
29Pea tali ‘e Si̇̄sū ʻo ne pehē kiate kinautolu: ‟Ko e ngāue ʻeni ʻa e ‘Otuá: Ke mou tui ki he Toko Taha kuó ne fekau mai̇́.”
30Ko ia naʻa nau pehēange kiate ia: ‟Ko e hā ha mana te ke fai ke mau sio ki ai ka mau tui ai kiate koe? Ko e hā ho‘o me‘a ‘e fai̇́? 31Ko ʻetau ngaahi kui̇́, na‘a nau kai ʻa e mā mana ʻi he toafá, ‘o fakatatau ki he lau ʻa e Tohitapú, Naʻá ne ‘oange ʻa e mā mei he langi̇́ kiate kinautolu ke nau kai mei ai.”
32Ko ia, naʻe folofola ʻa Si̇̄sū kiate kinautolu: ‟Ko hono mo‘oni̇́ ʻeni ʻoku ou talaatu kiate kimoutolú, na‘e ‘ikai ko Mōsese naʻá ne foaki kiate kimoutolu ʻa e mā mei he langi̇́ ka ko ʻeku Tamai̇́ te ne foaki kiate kimoutolu ʻa e mā moʻonia mei he langi̇́.
33He ko e mā ʻa e ʻOtuá, ko e Toko Taha ia kuo ʻalu hifo mei he langi̇́, ke ne foaki mo‘ui ma‘a māmani.”
34Ko ia naʻa nau pehēange kiate ia: ‟‘Eiki, ke ke foaki mai maʻu pē ʻa e mā ko iā kiate kimautolu.”
35Pea folofola ‘a Si̇̄sū kiate kinautolu: ‟Ko au pē ‘a e mā ‘o e mo‘ui̇́. Ka ai ha taha ʻe haʻu kiate au, ‘e ‘ikai ʻaupito te ne toe fiekaia ‘o ta‘engata, pea ko ia ʻe tui kiate au, ‘e ‘ikai ʻaupito te ne toe fieinua ‘o ta‘engata. 36Ka kuo u talaatu kiate kimoutolu, pea kuo mou mamata foki kiate au ka kuo ʻikai te mou tui. 37Ko ia kotoa pē kuo foaki kiate au ‘e he Tamai̇́, ʻe haʻu ia kiate au, peá ka ai ha taha ʻe haʻu kiate aú, ʻe ʻikai ʻaupito te u tuli ia ke ʻalu.
38He na‘e ‘ikai te u ‘alu hifo mei he langi̇́, ke fai hoku lotó, ka ke fai ʻa e finangalo ‘o e Toko Taha naʻá ne fekau mai aú. 39Pea ko ʻeni ia ʻa e finangalo ‘o e Toko Taha naʻá ne fekau mai aú, ke ‘oua naʻa ‘auha ha taha he faʻahinga kuó ne foaki mai kiate aú, ka te u fokotu‘u hake kinautolu kotoa mei he maté, ‘i he ʻaho fakamui̇́. 40He ko e finangalo ʻeni ‘o ‘eku Tamai̇́, ko kinautolu kotoa pē te nau mamata ki he ʻAló, pea tui falala kiate iá, ke nau maʻu moʻui taʻengata, pea te u toe fakatoetuʻu hake kinautolu mei he maté, ‘i he ʻaho fakamui̇́.”
41Ko ia, naʻe felāuaki ai ʻa e kau Siú ʻo kau kiate ia koe‘uhi̇̄ ko ʻene pehē: ‟Ko aú, ko e mā kuo ‘alu hifo mei he langi̇́.” 42Pea nau pehē: ‟‘Ikai ko Si̇̄sū eni, ko e foha ‘o Siosifá, ʻa ia ʻoku tau maheni mo ‘ene tamai̇́ mo ‘ene fa‘eé? ‘Oku anga fēfē ai ke ne talamai eni, na‘e ‘alu hifo ia mei he langi̇́?”
43Pea tali ‘e Si̇̄sū, ʻo ne folofola kiate kinautolu: ‟ʻOua te mou felāuaki ʻiate kimoutolu. 44‘Oku ‘ikai lava ha taha ke haʻu kiate au, kae‘oua kuo taki mai ia kiate au ‘e he Tamai̇́, ʻa ia naʻá ne fekau mai aú, pea te u fokotu‘u hake ia mei he maté, ‘i he ʻaho fakamui̇́. 45ʻOku hikitohi ʻi he Kau Palōfitá, ‛Pea ʻe akonekina ʻa e kakai kotoa pē, ‘e he ‘Otuá.’ Pea ko kinautolu kotoa pē kuo fanongo ki he le‘o ‘o e Tamai̇́ ʻo ako meiate iá, te ne haʻu kiate au.
46He kuo teʻeki ke mamata tonu ʻe ha taha ki he Tamai̇́, tukukehe pē ʻa e Toko Taha naʻe haʻu mei̇́ he Tamai̇́, ko ia Toko Taha pē kuo femātaaki mo e Tamai̇́. 47Ko hono moʻoni̇́ ʻeni ʻoku ou tala kiate kimoutolú, ko ia ‘oku tui̇́, ‘okú ne ma‘u ʻa e mo‘ui ta‘engatá.
48Ko au pē ko e mā ‘o e mo‘ui̇́! 49Ko ho‘omou ngaahi kui̇́, naʻa nau kai ʻa e mā maná, ʻi he toafá, ka nau mate pē. 50Ka ko e mā ʻeni kuo ‘alu hifo mei langi̇́, koeʻuhi̇̄ ke kai ai ha taha, peá ke ʻoua naʻa toe mate. 51Ko au, ko e mā ʻo e mo‘ui, ʻa ia kuo ‘alu hifo mei he langi̇́. Ka ai ha taha te ne kai mei he mā ko eni̇́, te nau mo‘ui pē ‘o ta‘engata, pea ko e mā ʻa ia te u ‘oatú, ko hoku sinó ia, ʻa ia ʻoku foaki ke moʻui ai ʻa māmani.”
52Pea naʻe felāuaki leva ʻa e kau Siú fakaekinautolu pē, ʻo pehē: ‟‘E lava fēfē ‘e he tangatá ni, ke foaki mai hono sinó ke tau kai?”
53Ko ia, naʻe folofola ‘a Si̇̄sū kiate kinautolu: ‟Ko hono moʻoni̇́ ʻeni ʻoku ou tala kiate kimoutolu, kapau ʻe ‘ikai te mou kai he sino ‘o e Foha ‘o e Tangatá, mo inu hono totó, ʻe ʻikai te mou ma‘u ʻa e moʻui̇́, ʻiate kimoutolu. 54Ko ia ʻokú ne kai hoku sinó mo inu hoku totó, ʻokú ne ma‘u ʻa e mo‘ui ta‘engatá, pea te u fokotu‘u hake ia mei he maté, ‘i he ʻaho fakamui̇́. 55He ko hoku sinó, ko e me‘akai mo‘onia, pea ko hoku totó, ko e me‘ainu mo‘onia. 56Ka ai ha taha te ne kai hoku sinó mo inu hoku totó, te ne nofomaʻu ʻiate au pea mo au ʻiate ia.
57Hangē ʻoku moʻui ʻa e Tamai̇́, ʻa ia naʻá ne fekau mai aú, ko au foki ‘oku ou mo‘ui koeʻuhi̇̄ ko e Tamai̇́, ko ia, ka ai ha taha te ne kai hoku sinó, ‘e mo‘ui foki ʻa e taha ko iā koe‘uhi̇̄ ko au. 58Ko ʻeni ia ʻa e mā na‘e ‘alu hifo mei langi̇́. ʻOku ‘ikai hangē ia mo e mā na‘e kai ‘e ho‘omou ngaahi kui̇́, ka nau mate pē. Ko ia te ne kai ʻa e mā ko eni̇́, te ne mo‘ui pē ‘o ta‘engata.”
59Ko e ngaahi meʻa ni, naʻá ne folofolaʻaki, ʻi he falelotú, ‘i heʻene faiako ‘i Kāpaneume.
Ko e Folofola ‘a Si̇̄suú ko e Mo‘ui Ta‘e Ngatá ia.
60Ko ia, ko e tokolahi ʻokinautolu heʻene kau akó na‘a nau fanongo kiate iá, naʻa nau pehē: ‟Ko e toki akonaki faingataʻa eni. Ko hai ʻoku fie fanongo ki ai?”
61Pea ʻafioʻi ‘e Si̇̄sū ʻiate ia pē ʻoku felāuaki ‘ene kau akó ʻo kau ki he meʻa ni, pea naʻe folofola kiate kinautolu: ‟ʻOku mou mamahi mo kimoutolu koā koe‘uhi̇̄ ko ‘eku lea na‘e fai̇́? 62Kapau ko ia, ʻe fēfē ‘oka mou ka mamata ki he Foha ‘o e Tangatá ‘oku ʻalu hake ki he feitu‘u naʻá ne ʻi ai kimuʻa pea toki hokomai̇́? 63Ko e Laumālié ʻokú ne ngaohi ke moʻui, ka ko e kakanó, ‘oku ‘ikai te ne lava ha me‘a. Ko e ngaahi lea kuo u fai kiate kimoutolú, ko e Laumālie ia pea mo e moʻui. 64Ka ‘oku ‘i ai ha ni‘ihi ‘iate kimoutolu ‘oku ‘ikai tui kiate au.” He naʻe ʻafioʻi ʻe Si̇̄sū, talu pē mei he kamataʻangá, ‘a e faʻahinga ʻe ʻikai te nau tui kiate iá, pea mo ia te ne lavaki‘i iá.
65Pea ne toki pehē ange: ‟Ko hono ‘uhinga ia naʻá ku talaatu ai, ‘e ‘ikai lava ʻe ha taha ke haʻu kiate au kae‘oua kuo tuku kiate ia ‘e he‘eku Tamai̇́.”
66Pea tokolahi ʻa e kau ako ‘a Si̇̄sū na‘a nau liʻaki ʻenau muimui kiate iá, ʻo ‘ikai te nau toe fononga holo mo ia. 67Ko ia, naʻe folofola ʻa Si̇̄sū ki he toko hongofulu mā uá: ‟Fēfē kimoutolu? ‘Oku mou fie foki atu mo kimoutolu?”
68Pea tali kiate ia ‘e Saimone Pita: ‟‘Eiki, ke mau toe ō kia hai? Ko e ngaahi lea ʻo e moʻui taʻengatá, ʻoku meiate koe pē ia. 69Pea ʻoku mau tui kiate koe, he ʻoku mau ʻilo, ko koe ia, ʻa e Toko Taha Mā‘oni‘oni ʻa e ‘Otuá.”
70Pea tali ʻe Si̇̄sū ki he‘ene kau akó: ‟ʻIkai ko au naʻá ku fili kimoutolu ko e toko hongofulu mā uá? Kaneongo ia, ko homou toko taha, ko e tēvolo!” 71Ka ko ʻene lau ko iā, naʻe kau kia Siutasi, ʻa e foha ‘o Saimone ‘Isikālioté. He ko ia ia te ne lavaki‘i iá, ko e taha ʻo e toko hongofulu mā uá.
Trenutno odabrano:
Sione 6: TCNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tongan Contemporary New Testament © Bible Society of the South Pacific, 2011.
