Sione 2
2
Ko e Mali ‘i Kena
1Pea ‘i hono ʻaho tolú, naʻe fai ha mali ‘i he kolo ko Kena ‘i Kāleli̇́, pea naʻe ʻi ai ʻa Mele, ko e fa‘ē ʻa Sīsuú. 2Pea na‘e fakaafe‘i foki ki he mali̇́, ʻa Si̇̄sū pea mo ‘ene kau akó.
3Pea faifai pea maha ʻa e uainé, pea lea ange ʻa e faʻē ʻa Si̇̄suú kiate ia: ‟Kuo ‘osi ‘enau uainé.”
4Pea pehē ange ‘e Si̇̄sū ki ai: ‟Fineʻeiki, he ko e hā, ‘eta kaunga ki ai̇́? ʻOku te‘eki ke hokosia hoku taimi̇́!”
5Pea lea ange ʻene faʻeé ki he kau ngāue he ‘api̇́: ‟Ko e hā pē ha meʻa te ne tala kiate kimoutolu, mou fai ki ai.”
6Pea na‘e tu‘u ai ha ‘ū hina vai maka lalahi ‘e ono ʻa ia naʻe faʻa ngāueʻaki ki he ouau fakamaʻa ʻa e kau Siú. Na‘e fe‘unga ʻa e ‘ū hina ko iā mo e taki lita ‘e valungofulu ki he teau uofulu.
7Pea fekau ‘e Si̇̄sū kiate kinautolu: ‟Mou fakafonu ʻa e ‘ū hiná ʻaki ha vai.” Pea nau fakafonu ʻa e ʻū hiná, ʻo fonu mahuohua. 8Pea folofola ʻa Si̇̄sū kiate kinautolu: ‟Mou ʻutu ā, ʻo ʻave ki he matāpule ‘oku faitu‘utu‘uni he kātoangá, pea nau ʻutu ia ʻo ʻave.” 9Pea ʻahiʻahiʻi ‘e he matāpule na‘e tu‘utu‘uni he kātoangá ʻa e vai kuo ‘osi liliu ko e uainé, ka naʻe ‘ikai te ne ‘ilo pē ko e uaine ia mei fē, he ko e kau ngāué pē naʻa nau tou ʻa e vai̇́. Ko ia, naʻe ui ange ʻe he tangata naʻe tuʻutuʻuni ʻi he kātoangá, ʻa e ʻeikitaʻané.
10Pea ne lea kiate ia: ‟Ko e tokotaha kotoa pe ʻokú ne ʻuluaki tufa ʻa e uaine lelei̇́, pea ʻi he maʻu ʻe he kau fakaafe haʻanau uaine he uaine lelei̇́, pea te ne toki tufa leva ʻa e uaine anga maheni̇́. Ka kuó ke tuku ʻe koe ʻa e uaine lelei̇́ ke toki tufa mai ia hangē ko ʻeni̇́!”
11Na‘e fai ‘e Si̇̄sū ‘ene fuofua mana ko eni̇́, ‘i Kena ‘i Kāleli̇́, pea naʻá ne fakahā ai hono lāngilangi̇́ ʻo tui ai kiate ia ‘ene kau akó.
12Pea hili ʻa e meʻa ko iā, pea fononga atu ʻa Si̇̄sū mo ‘ene fa‘eé, mo hono ngaahi tehiná, mo ‘ene kau akó, ki he kolo ko Kāpaneume, ‘o nau nofo ai, kae ʻikai ke fuʻu fuoloa.
Ko Si̇̄sū ‘i he Temipalé
(Mātiu 21:12-13; Ma‘ake 11:15-17; Luke 19:45-46)
13Pea ʻi he ofi mai ʻa e kātoanga Pāsova ʻa e kau Siú, naʻe fononga hake ʻa Si̇̄sū ki Selusalema. 14Pea ʻi he Temipalé, naʻá ne ʻilo ai ha ni‘ihi ʻoku fefakatauʻaki pulu, mo e sipi mo e fanga lupe, pea nofo ai foki mo ha kau liliu pa‘anga. 15Pea ngaohi ‘e Si̇̄sū ha uipi, ʻaki ha ngaahi kafa, ʻo ne toki tuliʻaki kituʻa mei he temipalé ʻa e fanga sipi̇́ mo e fanga pulú, ʻo ne veteki ʻa e paʻangá mo fulihi ʻenau ‘ū tēpilé. 16Pea naʻe tala ki he kau fakatau lupé, ʻo pehē: ‟Mou ʻave ʻa e ngaahi meʻá ni mei heni, pea ʻoua te mou ngaohi ʻa e fale ‘o ‘eku Tamai̇́, ko ha fale fefakatauʻaki.” 17Pea manatu ʻa ʻene kau akó, kuo tohi ʻo pehē: ‟Ko e mamahiʻi ʻo ho falé, te ne fakaʻauha au.”
18Ko ia, na‘e ‘eke ange ‘e he kau Siú ʻo nau pehē kiate ia: ‟Ko e hā ha fakaʻilonga ʻokú ke tuku mai kiate kimautolu, ʻaki hoʻo fai ʻa e ngaahi meʻa ni?”
19Pea tali ʻe Si̇̄sū kiate kinautolu: ‟Holoki ʻa e Temipale ni̇, pea ‘i ha ʻaho ‘e tolu, te u toe fokotuʻu ai ia!”
20Ka naʻe pehē ange ‘e he kau Siú: ‟Ko e ta‘u ʻeni ‘e fāngofulu mā ono ʻa hono langa ‘o e Temipalé ni, pea te ke toe fokotuʻu ia koā ‘e koe ‘i ha ʻaho pē ‘e tolu?”
21Ka ko ʻene laú, naʻe kau ki he Temipale ʻa ia ko hono sinó.
22Ko ia, ʻi he hili ʻa e toetu‘u ʻa Si̇̄sū mei he maté, naʻe manatu ‘ene kau akó ki he‘ene lea ko eni̇́, pea nau tui ai ki he Tohitapú pea mo e meʻa na‘e folofola‘aki ‘e Sīsuú.
Ko e Mahino kia Si̇̄sū ʻa e Anga ‘o e Kakaí
23Pea lolotonga naʻá ne ʻi Selusalema he Kātoanga Pāsová, na‘e tui ha tokolahi kiate ia koe‘uhi̇̄ ko ‘enau sio ki he ngaahi mana naʻá ne fai̇́. 24Ka na‘e ‘ikai ke fakafalala ‘e Si̇̄sū ia kiate kinautolu koeʻuhi̇̄ he naʻá ne ʻafioʻi ʻa e meʻa kotoa pē. 25He na‘e ʻikai te ne fiemaʻu ke talaange ʻe ha taha ha ngaahi meʻa ʻo kau ki he tangatá, he ʻokú ne ʻafioʻi pē ʻe ia, ʻa e ngaahi meʻa ʻoku ʻi he loto ʻo e tangatá.
Trenutno odabrano:
Sione 2: TCNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tongan Contemporary New Testament © Bible Society of the South Pacific, 2011.
