YAHYA 6
6
Isa appakanre limansa'bu tau
6:1-15
(Mat. 14:13-21; Mark. 6:32-44; Luk. 9:10-17)
1Rimaenna injo a'lampai Isa anta'leang Tamparang La'ba Galilea, iamo intu Tamparang La'ba Tiberias. 2Lohe tau a'rurung-rurung minahang ri Ia, saba' iyai injo maemmu lajanjang sikonjo kajariang gele samara nulapaa'jari Isa mange risikuanna tau lataba injo garring. 3Jari Isa nai'i ri bonto attolong ri injo surang ana'-ana' gurunNa. 4Na Pa'lappasang, allo passua-suaranna tau Yahudi, gelemu sallo. 5Rihattu latangara'na Isa siappuna na lajanjangi ma'nassana lohe tau rieki a'rurung-rurung mange ri Ia, appaui Isa mange ri Filipus, ”Ri anteeki mae laammalli roti, solanna iyai inni akkulle nganre?” 6Passala injo lapaui Isa lalaso'rii Filipus, saba' Ia laisse'i apa nuparallu lalageokang. 7Appihali Filipus mange ri Ia, ”Roti anggarang ruambilangang sa'bu gele ganna' ri iyai intu, manna injo se're tau tassipolong so'di' jua risareangi.” 8Rie' sitau ri ana'-ana' gurunNa, iamo intu Andreas uranna siana' Simon Petrus, appau mange ri Isa, 9”Ri inni rie' se're ana' ki'di' ngerang bokong limambatu roti na juku' ruangkaju; mingka apamo battuanna injo ri tau lohe inni?” 10Appaui Isa, ”Suro ngase'i attolong tau lohe intu. Ri tampa' injo lohe ruku' apparang.” Jari attolong ngase'mu tau lohe injo, sangga tau bura'ne rie'i limansa'bu lohena. 11Rimaenna injo Isa laalle roti injo, masa barakka'i ampai lapa'dahu-dahuang mange risikuanna tau rie' attolong ri injo, appakonjo todo'i lageokang ri juku' injo, assillohe nulakaa'raki tau lohe injo. 12Sungka'i bassori ngase'mo appaui Isa mange ri ana'-ana' gurunNa, ”Parappungi la'binna roti injo solanna gele rie' nutappela'.” 13Laparappung ngaseki toje'mu, na la'binna sampulorua baku' rassi battu ri roti limambatu injo. Rihattu maenginnamo nganre tau lohe injo. 14Sungka'na tau lohe injo lajanjang kajariang gele samara lageokang injo Isa, appau ngasekimu, ”Ia inni toje'i Nabbi nularie' injo antama' mae ri lino inni.”
15Saba' Isa latarrusui ma'nassana iyai injo a'ra'i battu na a'ra'i laerang passai lalapaa'jari Isa Karaeng ri lino, Ia a'lampamu isse' mange ri bonto maraeng, kale-kalenNa.
Isa a'lingka ri baho ere
6:16-21
(Mat. 14:22-33; Mark. 6:45-52)
16Rihattu pakaramulanamo labangngi, ana'-ana' gurunna Isa a'lampai mange ri tamparang la'ba, ampai nai' ri lopi 17na anta'leangi ri Kapernaum. Hattu injo kalammammu na Isa gelepai rie' lapiuppai ngase'i, 18na tamparang injo bakka' bombanna rikanara anging parupusu. 19Sungka'i miseimo barang lima iyareka annang kilo metere derena, lajanjangimu Isa a'lingka ri baho ere laseppaki lopinna. Jari mallaki ngase'i. 20Mingka Ia appau mange ri iyai, ”Nakke jua inni, akomo malla'!” 21Injomo saba'na, iyai a'ra'mu lapanai' Isa ri lopinna, na sikalinna rampemu lopinna ri biring bone lalamangei injo.
Lohe tau labojai Isa
6:22-24
22Rimintara'namo mae tau lohe injo, tuammari injo juapa ha'leang, lajanjangi ma'nassana ri injo tide'mo lopi maraenganna lopi sibatu injo sumpae' na ma'nassana Isa gele minahang a'dongko' ri lopi injo surang ana'-ana' gurunNa, na ma'nassa ana'-ana' gurunNa jua a'lampai. 23Mingka rihattu injo lohemo pole lopi maraeng a'labu battu ri Tiberias seppa'i ri tampa'nai nganre roti, sungka'i Karaeng maeng lapamasa barakkakang ri roti injo. 24Rihattu lajanjanna tau lohe injo ma'nassana Isa tide'i ri injo na ana'-ana' gurunNa tideki todo'i, nai' ngasekimu ri lopi ampai a'lampa anta'leang mange ri Kapernaum labojai Isa.
Roti assare katallasang
6:25-59
25Sungka'i tau lohe injo lauppa Isa ri ha'leanna tamparang la'ba injo, appauimu mange ri Ia, ”Guru, ri sikuraiya narie'Ki mae konni?” 26Appihali Isa mange ri iyai, ”Sitoje'na Nakke appau mange ri kaui, a'bojaiko ri Nakke, gele kanara maengimmu anjanjang lohe tanra, mingka kanara maengimmu nganre roti na bassoriko. 27Anjamako, gele ri kanre akkulle injo lala'busu, mingka kanre attahang injo sa'genna mange rikatallasang tide' tappu'na, nulapassareang injo Ana' Rupatau mange ri kau; saba' Iamo maeng risegele ri Allataala Amma.” 28Jari akkuta'nangimu mange ri Ia, ”Apamo parallu tageokang, solanna kambe anjama rijama-jamaang nulakaa'raki injo Allataala?” 29Appihali Isa mange ri iyai, ”Iamo inni jamaang nulakaa'raki injo Allataala, iamo intu parallulaloko tappa' mange ri Ia ri Tumaeng lasuro injo Allataala.”
30Injomo saba'na, appau ngase'i mange ri Ia, ”Tanra apamo Ribua', solanna akkulle tajanjang surang tappa'kang mange ri Ditte? Apamo numaeng Rijama? 31#Kel. 16:4, 15; Mzm. 78:24Puwa-puwaba maeng ngase'i nganre Manna ri parang luara, assimpole rie' ta'ukiri: Iyai risare ri Allataala roti battu ri Suruga.”
32Jari appaui Isa mange ri iyai, ”Sitoje'na Nakke appau mange ri kaui, gele Musa assare ri kau roti Suruga, mingka AmmangKu assare mange ri kau roti toje' battu ri Suruga. 33Saba' roti nubattu injo ri Allataala iamo intu roti turung battu ri Suruga na assare katallasang mange ri lino inni.” 34Jari appau ngase'mu mange ri Ia, ”Karaeng, sareangkang roti injo situlusu'na.” 35Appaui Isa mange ri iyai, ”Nakkemo roti assare katallasang; inai jua battu mae ri Nakke, ia gelemu laminang pa're muliang, na inai jua tappa' mae ri Nakke, ia gelemu laminang tirere muliang. 36Mingka Nakke appau ri kaui: Sitoje'na kaui maeng anjanjang ri Nakke, mingka geleiko tappa'. 37Sikonjo nulapassareang Amma mae ri Nakke laa'rupai ri Nakke, na inai jua battu mae ri Nakke, ia gele laKupela'. 38Saba' Nakkemo naung battu ri Suruga gele langgeokang ria'ra'Ku mingka a'ra'na Tuassuro injo ri Nakke. 39Iamo inni lakaa'raki Tuassuro injo ri Nakke, iamo intu solanna risikuanna numaeng injo Ia lapassareang mae ri Nakke anda rie' nutappela', mingka solanna Kupakaattallasai ri allo kala'busang. 40Saba' iamo inni a'ra'Na AmmangKu, iamo intu solanna sikuanna tau, anjanjang Ana' na tappa'i mange ri Ia languppai tallasa mannannungang, na solanna Kupakaattallasai muliang ri allo kala'busang.”
41Jari a'husa-husa ngase'mu tau Yahudi injo ripassala'na Ia, ”Saba' Ia maengi appau, Nakkemo roti turung battu ri Suruga.” 42Appau ngasekimu, ”Gelejua Ia inni Isa, ana'na Yusuf, idong ammanNa baji' ri isse'na? Anteekamua konni-konnina Ia akkulle appau: Nakkemo turung battu ri Suruga?” 43Appahali Isa mange ri iyai, ”Akomo a'husa-husai.
44Gele rie' manna sitau akkulle battu mae ri Nakke, ampa ia gele ribeso' ri Amma tuassuro injo ri Nakke, na ia laKupakaattallasai ri allo kala'busang. 45#Yes. 54:13Rie' ta'ukiri lalang ri kitta'na sikonjo nabbi: Iyai ngase' lariajarai ri Allataala. Sikuanna tau, tumaeng allangngere na appilajara ri Amma, battui mae ri Nakke. 46Passala injo gele a'battuang ma'nassana rie' tau maeng anjanjang Amma. Ia jua injo turie' injo battu ri Allataala, Iamo maeng anjanjang Amma. 47Sitoje'na Nakke appau mange ri kaui: Inai jua tappa', ia languppa tallasa mannannungang.
48Nakkemo roti assare katallasang. 49Puwa-puwamu maeng ngase'i nganre Manna ri parang luara na mate ngasekimu. 50Innimo roti turung injo battu ri Suruga: Inai jua lakanre roti inni, ia gelemu lamate. 51Nakkemo roti katallasang numaeng injo turung battu ri Suruga. Ampa rie' se're tau lakanre roti inni, ia languppai tallasa mannannungang, na roti Kupassareang injo iamo intu assingKu, Kupassareang ritallasa'na lino inni.”
52A'beseremu tau Yahudi injo na lakuai, ”Anteekamua Ia inni akkulle lapassareang assinNa mae ri ditte larikanre.” 53Injomo saba'na, appaui Isa mange ri iyai, ”Sitoje'na Nakke appau mange ri kaui, ampa geleiko nganre assinna Ana' Rupatau surang nginung raraNa, gele rie' tallasa lalang ri kalemmu. 54Inai jua lakanrei assingKu surang lainungi raraKu, ia nguppai tallasa mannannungang na Kupakaattallasai muliang ri allo kala'busang. 55Saba' assingKu iamo kanreang toje' injo na raraKu iamo inungang toje' injo. 56Inai jua lakanre assingKu na lainung raraKu, ia ammarii ri Nakke na Nakke lalang ri ia. 57Assimpole Amma attallasa injo assuro mae ri Nakke na Nakke attallasa rikanara Amma, appakonjo todo'i inai jua lakanrea, languppai tallasa kanara ri Nakke. 58Iamo inni roti turung battu ri Suruga, gele roti assimpole nulakanre injo puwa-puwamu riolo na mate ngasekimu. Inai jua lakanre roti inni, languppai tallasa mannannungang.”
59Iangase'na inni lapaui Isa ri Kapernaum rihattunna Ia ngajara ri sapo passambajangang.
Ana'-ana' gurung a'boko injo ri Galilea
6:60-66
60Sungka'i maeng lalangngere sikuanna injo lohemo ana'-ana' gurunna Isa appau, ”Terasai pau inni, inaimo tau akkulle laappilangngeri?” 61Isa nulalang ri atiNa latarrusui ma'nassana a'husa-husa ana'-ana' gurunNa ripassala injo, jari appaui Isa ri iyai, ”Apa pau injo appakabata-bata ri kaui? 62Anteekamua, ampa mujanjangi Ana' Rupatau nai' mange ri tampa' ri antee mae riolo ammari? 63Nyaha Allataalamo assare tallasa, assi inni tide' jua matu-matunna. Pau Kupau injo mange ri kaui iamo Nyaha Allataala na tallasa. 64Mingka ri kau intu rie' tugele tappa'.” Saba' Isa latarrusui battu ripakaramulana, inai gele tappa' na inai lalapassareangi Isa. 65Maeng injo Ia appaui, Injomo saba'na maemmu Kupau mange ri kaui: ”Gele rie' manna se're tau akkulle mae ri Nakke, ampa Amma gele assare pangamaseang mange ri ia.” 66Pakaramula rihattu injo lohemo ana' gurunNa a'boko na gelemu minahangi ri Ia.
Pangakuanna Petrus
6:67-71
67Jari appaui Isa ri sampulorua injo suroNa, ”Apa kaui gele todo'ko a'ra' a'lampa?” 68#Mat. 16:16; Mark. 8:29; Luk. 9:20Appihali Simon Petrus mange ri Ia, ”Karaeng, laa'lampa mangekang ri nai? Ri Kau rie' Pau ritallasa mannannungang; 69na kambe inni tappa'makang na taisse'i ma'nassana Dittemo Tutangkasa battu ri Allataala.” 70Appihali Isa mange ri suroNa, ”Gelejua Nakkemo anjo'jo' ri kaui tusampulorua inni? Mingka, sala se'renna ri kaui intu Ibilisi.” 71Tulakuangang injo Isa iamo intu Yudas, ana'na Simon Iskariot; saba' iamo lalapassareangi Isa, manna injo ia se'rei suro battu risampulorua injo.
वर्तमान में चयनित:
YAHYA 6: LAI_SLY
हाइलाइट
शेयर
कॉपी
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
