YAHYA 5
5
Appakagassingi tau garring ri allo Passambajangang ri kollang Betesda
5:1-18
1Rimaenna injo rie' se're allo passua'-suaranna tau Yahudi inni, na Isa a'lampai mange ri Yerusalem. 2Ri Yerusalem riampi'na Babaang Jimbala rie' se're kollang, lalang bisara Ibrani riare'i Betesda; rie' lima dego-degona 3na ri dego-dego lima injo lohe tau garring tinro-tinro: rie' tau buta, tau kempang na tau pesu'. [Iyai injo latajangi pata'ke'bo'na ere ri kollang injo. 4Saba' a'hattu-hattui naung malaeka'na Karaeng Allataala ri kollang injo na lapake'bo'i erena; inai jua tau kaminang riolo naung ri kollang injo ampa maemmu ta'ke'bo' erena, a'jari molei garrinna, manna garring apa jua.] 5Ri injo rie' se're tau tallumpulomu karua taunna garring. 6Rihattu lajanjanna Isa tau injo tinro-tinro ri injo na saba' Ia latarrusui ma'nassana ia sallomu assinsara assimpole injo, jari appaui Isa mange ri ia, ”A'ra'ko gassing?” 7Pappihalinna tau garring injo mange ri Ia, ”Karaeng, gele rie' tau lapanaunga ri kollang injo rihattu pakaramulanamo ta'ke'bo' erena, na ampa kodong laa'dangka-dangkama mange ri kollang injo, rie'mo tau maraeng naung lapilombaia.” 8Lakuamo Isa mange ri ia, ”Ambaungko, angka'i tappere'mu na a'lingkako.” 9Rihattu injo jua molemu garrinna tau injo ampai laangka' tappere'na na a'lingkai.
Mingka allo injo hattu Passambajanganna tau Yahudi. 10#Neh. 13:19; Yer. 17:21Injomo saba'na, sikonjo ponggahana tau Yahudi inni appaui mange ri tau bau injo mole garrinna, ”Allo inni hattu Passambajangang, jari gelei akkulle muangka' tappere'mu.” 11Mingka, ia appihali ri iyai, ”Tau lapakamole injo garringku, appau mae ri nakke: Angka'i tappere'mu na a'lingkamoko.” 12Akkuta'nang ngasekimu ri ia, ”Inaimo tau appau injo ri kau: Angka'i tappere'mu na a'lingkamoko?” 13Mingka tau bau injo ripakagassing gele laisse' inai lapakamole garrinna, saba' Isa tide'mu ritangnga-tangngana tau lohe ri tampa' injo. 14Maeng injo Isa assiuppai tau injo lalang ri Sapo Allataala ampai appau mange ri ia, ”U'rangi, kau molemu garrimmu; ammonomo'ko anggeokang kadorakaang muliang, solanna andai a'jari nula'bi sarroang ri kau.” 15Ansulukangi tau injo, ampai lalagara mange risikonjo ponggaha tau Yahudi ma'nassana Isamo lapakagassingi. 16Injomo saba'na, ponggaha tau Yahudi injo a'ra'i lasissa Isa, saba' Ia lageokangi passala injo ri allo Passambajangang. 17Mingka Ia appaui mange ri iyai, ”AmmangKu anjamai sa'genna allo inni, jari Nakke anjama todo'.” 18Injomo saba'na, ponggaha tau Yahudi injo pela' a'ra'mu pole lalahuno Isa, gele sangga rikanara lapa'tide'na jua allo Passambajangang injo, mingka pole kanara rilapauna ma'nassana Allataala injo AmmanNa na ri appakonjona lapassinrapangi kalenna Allataala.
Isa lasa'bii kalenNa
5:19-47
19Jari appihali Isa mange ri iyai, ”Sitoje'na Nakke appau mange ri kaui, Ana' tide' pakkullena laanjama se're passala battu ri kalenNa to'jua, ampa Ia gele lajanjang ta'ra jamana AmmanNa; saba' apa nulajama Amma, injo todo' lajama Ana'. 20Saba' Amma ngamaseang Ana' na Ia lapappijo'jokangi mange ri Ana' sikonjo jamaanNa, na Ia lapappiijo'jokang todo'i pole mange ri Ana' sikonjo jama-jamaang nula'bi bakkakang battu rijamaa-jamaang injo, sa'genna takkajannakiko. 21Saba' assimpole Amma appakaambaung sikuanna tau mate na lapakaattallassai muliang, appakonjo todo'i Ana' lappakaattallasa inai jua Ia lakaa'raki. 22Amma gele ngadeli manna ri inai jua, mingka maeng lapassareang ngase'mu pangadelang injo mange ri Ana', 23solanna sikuanna tau ngali' ri Ana' assimpole ngali'na ri Amma. Inai jua gele ngali' ri Ana', ia gele todo'i ngali' ri Amma, Tuassuro injo ri Ia.
24Sitoje'na Nakke appau mange ri kaui: Inai jua lapilangngeri pauKu na tappa'i mange ri Ia Tuassuro injo ri Nakke, ia languppai tallasa mannannungang na gele languppa hukkungang, saba' ia a'lette'mu battu rikamateang antama' rikatallasang. 25Sitoje'na Nakke appau mange ri kaui: Larie' hattunna narie'mu ma'nassana sikuanna tau mate laallangngere pau Ana' Allataala, na iyai tuappilangngeri injo ri Ia, laattallasai. 26Saba' assimpole Amma rie' tallasa lalang ri kalenNa, appakonjo todo'i rilasareanNa Ana' rie' tallasa lalang ri kalenNa. 27Ia maeng assare kahasa mange ri Ia langadeli, saba' Iamo Ana' Rupatau. 28Akolalo lannasa ripassala injo, saba' larie' hattunna ma'nassana sikuanna tau rie' lalang ri kuburu laallangngere sa'ranNa, 29#Dan. 12:2na iyai tumaeng injo anggeokang nubaji' laansulu'i na laattallasai muliang ritallasa mannannungang, mingka iyai tumaeng injo anggeokang nudaa attallasai larisare hukkungang.
30Gelea akkulle anggeokang manna se're ria'ra' kalengKu to'jua, Nakke langadeli assituru' surangang apa Kulangngere, na pangadelangKu adelei, saba' Nakke gelei Kuturuki a'ra' kalengKu, mingka a'ra'Na Tuassuro injo ri Nakke. 31Ampa Nakke assa'bi ripassala kalengKu to'jua, injo gelei toje' passa'biKu; 32rie' tumaraeng assa'bi ri Nakke na Kuisse'i ma'nassana passa'bi lasareang injo Allataala ripassala Nakke injo toje'i. 33#Yah. 1:19-27, 3:27-30Kau maengiko assuro tau mange ri Yahya na ia maeng assa'bi ripassala katojekang; 34mingka Nakke gelejuai parallu passa'bi battu ri rupatau, mingka Nakkemo appau ripassala inni, solanna kaui ripakasalama'. 35Yahyamo intu sulo a'bola'mu na assaui na kaui sinampe' juai a'ra' mujanjangi saunna. 36Mingka ri Nakke rie' se're passa'bi nula'bi paralluang battu ripassa'bina Yahya, iamo intu sikonjo jama-jamaang lapassareangi Amma mae ri Nakke, solanna Kugeokang. Jamaang injomo Kugeokang konni-konnina, na iamo injo assare passa'bi ri Nakke ma'nassana Amma assuro ri Nakke. 37#Mat. 3:17; Mark. 1:11; Luk. 3:22Amma Tuassuro injo ri Nakke, Iamo maeng assa'bi ri Nakke. Kaui gele minang mulangngere sa'ranNa, manna tappaNa gele minang mujanjangi, 38na pauNa gele tuli ammari lalang ri kaui, saba' geleiko tappa' mange ri Ia ri Tulasuro injo. 39Kau musalidiki sikonjo Kitta' Tangkasa, saba' pa'ngare'mu ma'nassana lalang ri injo languppaiko tallasa mannannungang, mingka manna appakonjo iangase'na Kitta' Tangkasa injo assare passa'bi mae ri Nakke, 40geleko a'ra' battu mae ri Nakke languppa tallasa injo.
41Nakke gelejua parallu rikangalikang battu ri rupatau. 42Mingka ripassala'mu, Kuisse'i ma'nassana lalang ri atimu gele rie' pangamaseang mange ri Allataala. 43Nakke rie' mae lalang arenna AmmangKu na kaui gele narima ri Nakke; ampa tau maraeng rie' saba' ri arenna to'jua, tantu baji' mutarimainna. 44Anteekokamua tappa', kau tusanging a'boja intu kangalikang ri tau maraeng na geleiko a'boja kangalikang nubattu ri Allataala tide' injo ruana? 45Ako sala pa'ngare' ma'nassana Nakkemo lamaressa ri kau ri a'rakanna Amma; tulamaressa injo mange ri kau iamo intu Musa, ya Musa tumange injoko ri ia appabora pattajalliang. 46Saba' ampa tappa'ko mange ri Musa, tantu latappa'mu mae ri Nakke, saba' ia maengi laukiri passala ri Nakke. 47Mingka ampa geleko tappa' rinulaukiri injo, anteekokamua latappa' rinuKupau injo?”
वर्तमान में चयनित:
YAHYA 5: LAI_SLY
हाइलाइट
शेयर
कॉपी
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
