မာကု 6
6
နာဇရက်မြို့၌ ငြင်းပယ်ခံရတော်မူခြင်း
1ယေရှုသည် ထိုဒေသမှ ထွက်ခွာတော်မူ၍ မိမိနေရပ်မြို့ဖြစ်သည့် နာဇရက်မြို့သို့ ကြွတော်မူ၏။ တပည့်တော်တို့သည်လည်း နောက်တော်သို့လိုက်ကြ၏။ 2ဥပုသ်နေ့ရောက်သော် ကိုယ်တော်သည် ဂျူးဝတ်ပြုဆောင်၌ သွန်သင်တော်မူ၏။ ကြားနာသောသူများစွာတို့သည် အံ့အားသင့်ကြ၏။ ထိုသူတို့က “သူသည် ဤအရာများကို အဘယ်ကရသနည်း။ သူရရှိသောပညာသည် မည်သည့်ပညာဖြစ်သနည်း။ သူပြသသောအံ့ဖွယ်အမှုများကို မည်သည့်တန်ခိုးဖြင့် ပြုသနည်း။ 3သူသည် လက်သမားမဟုတ်လော။ မာရိ၏သား မဟုတ်လော။ ယာကုပ်၊ ယောသပ်၊ ယုဒနှင့် ရှိမုန်တို့၏အစ်ကို မဟုတ်လော။ သူ၏ နှမတို့သည်လည်း ငါတို့နှင့် တစ်ရပ်တည်းသားများပင် မဟုတ်လော” ဟု ပြောဆို၍ ကိုယ်တော်အပေါ် ဘဝင်မကျဖြစ်ကာ မယုံကြည်ဘဲနေကြ၏။
4ထိုအခါ ယေရှုက သူတို့အား “ပရောဖက်သည် မိမိနေရပ်မြို့၊ မိမိဆွေမျိုးအသိုင်းအဝိုင်းနှင့် မိမိအိမ်မှလွဲ၍ အခြားသောအရပ်တွင် ဂုဏ်အသရေရှိသည်” ဟု မိန့်တော်မူ၏။ 5ထိုသူတို့၏ မယုံကြည်နိုင်ခြင်းကြောင့် ဖျားနာသောသူအနည်းငယ်တို့အပေါ် လက်တော်တင်၍ ကျန်းမာစေခြင်းမှအပ ထိုဒေသ၌ အခြားအံ့ဖွယ်တန်ခိုးတို့ကို ပြတော်မမူနိုင်ပေ။ 6ကိုယ်တော်သည် သူတို့၏ မယုံကြည်နိုင်ခြင်းအပေါ် အံ့အားသင့်တော်မူ၏။
တပည့်တော်ဆယ့်နှစ်ပါးကို စေလွှတ်တော်မူခြင်း
ထို့နောက် ယေရှုသည် အနီးတစ်ဝိုက်ရှိ ကျေးရွာများသို့ လှည့်လည်၍ ဟောပြောသွန်သင်တော်မူ၏။
7တပည့်တော်ဆယ့်နှစ်ပါးတို့ကို ခေါ်တော်မူ၍ နတ်ဆိုးများကို နှင်ထုတ်နိုင်သောအခွင့်အာဏာကို ပေးလျက် နှစ်ယောက်စီ စေလွှတ်တော်မူ၏။ 8ကိုယ်တော်က “ခရီးအတွက် တောင်ဝှေးမှအပ မည်သည့်အရာကိုမျှ မယူကြနှင့်။ အစားအစာ၊ ခရီးဆောင်အိတ်မှစ၍ ခါးစည်း၌လည်း ငွေကို ထည့်မသွားကြနှင့်။ 9ဖိနပ်ကိုသာ စီး၍ အင်္ကျီအပိုကို ယူမသွားကြနှင့်” ဟု မှာကြားတော်မူ၏။
10ဆက်လက်၍ ယေရှုက တပည့်တော်တို့အား “မြို့တစ်မြို့သို့ ဝင်လျှင် ထိုမြို့မှ မထွက်ခွာမီတိုင်အောင် အိမ်တစ်အိမ်၌သာ တည်းခိုကြလော့။ 11သို့သော်လည်း မည်သည့်အရပ်၌မဆို သင်တို့ကို မကြိုဆို၊ သင်တို့ဟောသည့်တရားကိုလည်း မနာယူလျှင် ထိုအရပ်မှ ထွက်ခွာသောအခါ သူတို့တစ်ဖက်၌ ဆန့်ကျင်သည့် သက်သေအဖြစ် သင်တို့၏ခြေဖဝါးမှ ဖုန်မှုန့်ကို ခါချလော့” ဟု မိန့်တော်မူ၏။
12တပည့်တော်တို့သည်လည်း ထွက်သွား၍ လူတို့ကို အပြစ်များမှ နောင်တရ၍ ဘုရားသခင်ထံသို့ ပြောင်းလဲရန် ဟောပြောကြ၏။ 13နတ်ဆိုးများစွာကို နှင်ထုတ်၍ ဖျားနာသူများစွာကိုလည်း သံလွင်ဆီဖြင့် လိမ်းကာ ကျန်းမာစေကြ၏။
နှစ်ခြင်းဆရာယောဟန် ကွယ်လွန်ခြင်း
14ယေရှု၏ သတင်းတော်သည် ကျော်ကြားလာသဖြင့် ဟေရုဒ်မင်းကြားလေ၏။ လူတချို့က#6:14 အချို့သော လက်ရေးမူကျမ်းများတွင် “သူက” ဟု ပါရှိသည်။ “ဤသူသည် သေရာမှပြန်ရှင်လာသော နှစ်ခြင်းဆရာယောဟန် ဖြစ်၏။ ထို့ကြောင့် အံ့ဖွယ်တန်ခိုးများကို ပြနိုင်ခြင်းဖြစ်သည်” ဟု ပြောဆိုကြ၏။ 15သို့သော် တချို့က “သူသည် ပရောဖက်ဧလိယဖြစ်သည်” ဟု ဆိုကြ၏။ တချို့က “သူသည် ရှေးပရောဖက်ကဲ့သို့သော ပရောဖက်တစ်ပါးဖြစ်သည်” ဟု ဆိုကြ၏။
16ဟေရုဒ်မင်းသည် ယေရှု၏သတင်းတော်ကို ကြားသောအခါ “ငါခေါင်းဖြတ်၍ သတ်စေသော ယောဟန်သည် သေရာမှပြန်ရှင်ပြီ” ဟု ဆိုလေ၏။
17ယခင်က ဟေရုဒ်မင်းသည် ဟေရောဒိအတွက်ကြောင့် ယောဟန်ကို ဖမ်းဆီးချုပ်နှောင်၍ ထောင်ထဲသို့ထည့်ထားခဲ့၏။ ထိုဟေရောဒိမှာ ဟေရုဒ်မင်း၏ ညီဖြစ်သူဖိလိပ္ပု၏ ဇနီးဖြစ်သော်လည်း ဟေရုဒ်မင်းသည် သိမ်းပိုက်လေ၏။ 18ယောဟန်က ဟေရုဒ်မင်းအား “အရှင်မင်းကြီးသည် ညီဖြစ်သူ၏ ဇနီးကို သိမ်းယူခြင်းမှာ ဘုရားသခင်၏ ပညတ်တော်နှင့်မကိုက်ညီ” ဟူ၍ ဖော်ပြဆုံးမလေ၏။ 19ထို့ကြောင့် ဟေရောဒိသည် ယောဟန်ကို အငြိုးထား၍ သတ်လို၏။ သို့သော်လည်း သတ်ခွင့်မရနိုင်ဘဲရှိ၏။ 20ဟေရုဒ်မင်းသည် ယောဟန်ကို ဖြောင့်မတ်သူနှင့် သန့်ရှင်းသူတစ်ဦး ဖြစ်ကြောင်း သိမြင်၍ ရိုသေလေးစားသောကြောင့် အကာအကွယ်ပေး၏။ ယောဟန်၏ စကားကို ကြားသောအခါ စိတ်အနှောင့်အယှက်ဖြစ်ရသော်လည်း လိုလားစွာပင် နားထောင်လေ့ရှိ၏။
21သို့သော်လည်း နောက်ဆုံးတွင် ဟေရုဒ်မင်း၏မွေးနေ့ပွဲ၌ ဟေရောဒိအတွက် အခွင့်အရေးကြုံလာ၏။ ဟေရုဒ်မင်းသည် မှူးကြီးမတ်ကြီးများ၊ စစ်တပ်အရာရှိများနှင့် ဂါလိလဲပြည်၏ ခေါင်းဆောင်များကို ကျွေးမွေးဧည့်ခံလေ၏။ 22ထိုအခါ ဟေရောဒိ၏ သမီးသည် ဝင်၍ ကပြဖျော်ဖြေရာ ဟေရုဒ်မင်းနှင့် ဧည့်သည်တော်များသည် အလွန်နှစ်သက်ကြ၏။ ဟေရုဒ်မင်းက ထိုမိန်းကလေးအား “သင်လိုချင်သမျှကို တောင်းလော့။ ငါပေးမည်” ဟု ဆို၏။ 23ဟေရုဒ်မင်းက “နိုင်ငံတစ်ဝက်တိုင်အောင် သင်တောင်းသမျှကို ငါပေးမည်” ဟု ကျိန်ဆိုလေ၏။
24ထိုမိန်းကလေးသည် သွား၍ “မည်သည့်အရာကို တောင်းရမည်နည်း” ဟု မိခင်အား မေးရာ မိခင်က “နှစ်ခြင်းဆရာယောဟန်၏ ဦးခေါင်းကို တောင်းလော့” ဟု ဆို၏။
25မိန်းကလေးသည်လည်း ဟေရုဒ်မင်းထံ အလျင်အမြန်ပြန်လာ၍ “နှစ်ခြင်းဆရာယောဟန်၏ ဦးခေါင်းကို လင်ပန်းတွင်တင်၍ ယခုပင် ပေးစေလိုပါသည်” ဟု တောင်းဆိုလေ၏။
26ထိုအခါ ဟေရုဒ်မင်းသည် မိမိပြောခဲ့သည့်စကားအတွက် အလွန်ဝမ်းနည်းလေ၏။ သို့သော်လည်း ကြွရောက်လာသော ဧည့်သည်တော်များရှေ့တွင် မိမိပေးခဲ့သည့် ကတိသစ္စာကို ထောက်ရှုသဖြင့် တောင်းဆိုသည့်အရာကို မငြင်းပယ်နိုင်ပေ။ 27ထိုကြောင့် အာဏာသားတစ်ဦးအား ယောဟန်၏ဦးခေါင်းကို ယူလာရန် အမိန့်ပေး၍ ချက်ချင်း လွှတ်လိုက်၏။ ထိုသူသည်လည်း ထောင်သို့ သွား၍ ယောဟန်၏ ဦးခေါင်းကို ဖြတ်လေ၏။ 28ထို့နောက် ဦးခေါင်းကို လင်ပန်းဖြင့် ယူဆောင်လာပြီးနောက် မိန်းကလေးအား ပေးလေ၏။ မိန်းကလေးသည်လည်း ထိုဦးခေါင်းကို မိခင်အား ပေးလေ၏။ 29ယောဟန်၏ တပည့်တို့သည် ထိုအကြောင်းကို ကြားသောအခါ လာ၍ အလောင်းကို ယူကာ သင်္ချိုင်းဂူ၌ သင်္ဂြိုဟ်ကြ၏။
လူငါးထောင်ကို ကျွေးမွေးတော်မူခြင်း
30တမန်တော်တို့သည် ယေရှုထံတော်သို့ ပြန်လာ၍ မိမိတို့လုပ်ဆောင်ခဲ့သမျှနှင့် သွန်သင်ခဲ့သမျှကို လျှောက်ကြ၏။ 31လူများစွာတို့သည် ဝင်ထွက်သွားလာလျက် ရှိသောကြောင့် ယေရှုနှင့် တမန်တော်တို့မှာ အစာစားချိန်ပင် မရကြပေ။ ထို့ကြောင့် ယေရှုက “ဆိတ်ငြိမ်သောနေရာသို့ သွား၍ ခေတ္တမျှအနားယူကြစို့” ဟု မိန့်တော်မူ၏။
32ဤသို့ဖြင့် သူတို့သည် ဆိတ်ငြိမ်သောအရပ်သို့ အခြားလူမပါဘဲ လှေစီး၍ သွားကြ၏။ 33သို့သော် လူများစွာတို့သည် သူတို့သွားကြသည်ကို မြင်၍ ယေရှုနှင့်တပည့်တော်တို့ဖြစ်ကြောင်းကို သိကြ၏။ ထို့ကြောင့် မြို့ရွာများမှ ထွက်၍ ကုန်းကြောင်းဖြင့် လိုက်ကြရာ ယေရှုနှင့် တပည့်တော်တို့ထက်ပင် စော၍ ရောက်နှင့်ကြ၏။ 34ယေရှုသည် လှေပေါ်မှဆင်းသောအခါ လူအုပ်ကြီးကို တွေ့မြင်တော်မူလျှင် သူတို့သည် သိုးထိန်းမရှိသော သိုးများကဲ့သို့ ဖြစ်သောကြောင့် သနားကြင်နာစိတ်ရှိတော်မူ၏။ ထို့ကြောင့် သူတို့အား အကြောင်းအရာများစွာကို ဟောပြောသွန်သင်တော်မူ၏။
35ညနေခင်းရောက်သောအခါ တပည့်တော်တို့သည် ကိုယ်တော်ထံသို့ ချဉ်းကပ်၍ “ဤနေရာသည် လူသူကင်းဝေးသောအရပ်ဖြစ်ပြီး မိုးလည်းချုပ်ပါတော့မည်။ 36လူတို့သည် မြို့ရွာများသို့ သွား၍ စားစရာများဝယ်ယူနိုင်ရန် သူတို့ကို ပြန်လွှတ်တော်မူပါ” ဟု လျှောက်ကြ၏။
37သို့သော်ယေရှုက “ထိုသူတို့အတွက် စားစရာကို သင်တို့ပေးကြလော့” ဟု မိန့်တော်မူ၏။
တပည့်တော်တို့က “အကျွန်ုပ်တို့သည် သွား၍ ငွေဒင်္ဂါးပြားနှစ်ရာ#6:37 မူရင်းဂရိကျမ်းတွင် “ဒေနာရိပြားနှစ်ရာ” ဟု ပါရှိပြီး ဒေနာရိတစ်ပြား၏ တန်ဖိုးသည် လုပ်သားတစ်ဦး၏တစ်နေ့တာလုပ်အားခနှင့် ညီမျှသည်။ဖြင့် မုန့်ကိုဝယ်ကာ သူတို့အား ကျွေးရပါမည်လော” ဟု ဖြေဆိုကြ၏။
38ယေရှုက “သင်တို့တွင် မုန့်မည်မျှရှိသနည်း။ သွား၍ ကြည့်ကြလော့” ဟု မိန့်တော်မူ၏။
တပည့်တော်တို့သည်လည်း တွေ့သောအခါ “မုန့်ငါးလုံးနှင့် ငါးနှစ်ကောင် ရှိပါသည်” ဟု လျှောက်ကြ၏။
39ထို့နောက် ယေရှုက လူထုပရိသတ်တို့ကို မြက်ခင်းပေါ်တွင် အုပ်စုဖွဲ့၍ ထိုင်စေရန် တပည့်တော်တို့ကို မိန့်တော်မူ၏။ 40လူတို့သည်လည်း တစ်စုလျှင် တစ်ရာတစ်စု၊ ငါးဆယ်တစ်စုဖြင့် အသီးသီး အုပ်စုဖွဲ့၍ ထိုင်ကြ၏။
41ထို့နောက် ကိုယ်တော်သည် မုန့်ငါးလုံးနှင့် ငါးနှစ်ကောင်ကို ယူလျက် ကောင်းကင်သို့ မျှော်ကြည့်ကာ ကျေးဇူးတော်ကို ချီးမွမ်းတော်မူ၏။ ပြီးမှ မုန့်ကို ချိုးဖဲ့၍ လူထုပရိသတ်တို့ကို ဝေငှရန် တပည့်တော်တို့အား ပေးတော်မူ၏။ ငါးနှစ်ကောင်ကိုလည်း လူတို့အား ဝေတော်မူ၏။ 42လူအပေါင်းတို့သည် ဝလင်စွာ စားကြ၏၊ 43ထို့နောက် တပည့်တော်တို့သည် မုန့်နှင့်ငါး အကျိုးအပဲ့များကို တောင်းထဲသို့ ကောက်သိမ်းရာ ဆယ့်နှစ်တောင်းအပြည့်ရကြ၏။ 44မုန့်ကိုစားသော အမျိုးသားအရေအတွက်မှာ ငါးထောင်ရှိ၏။
ရေပေါ်တွင် လမ်းလျှောက်တော်မူခြင်း
45ထို့နောက် ယေရှုသည် လူထုပရိသတ်တို့ကို ပြန်လွှတ်တော်မူစဉ် တပည့်တော်တို့ကိုလည်း လှေပေါ်သို့ ချက်ချင်းတက်စေ၍ ကမ်းတစ်ဖက်၌ ရှိသော ဗက်ဇဲဒမြို့သို့ သွားနှင့်စေတော်မူ၏။ 46ကိုယ်တော်သည် လူထုပရိသတ်တို့ကို နှုတ်ဆက်တော်မူပြီးနောက် ဆုတောင်းရန် တောင်ပေါ်သို့ တက်ကြွတော်မူ၏။
47ညအချိန်ရောက်သော် တပည့်တော်တို့၏ လှေသည် အိုင်အလယ်၌ ရောက်နေ၏။ ယေရှုမှာမူ ကုန်းပေါ်၌ တစ်ကိုယ်တည်းရှိတော်မူ၏။ 48လေသည် ဆန့်ကျင်ဘက်တိုက်သောကြောင့် တပည့်တော်တို့သည် ပင်ပန်းစွာ အားစိုက်လှော်ခတ်ကြရသည်ကို မြင်တော်မူ၏။ နံနက်သုံးနာရီ#6:48 မူရင်းဂရိကျမ်းတွင် “ည၏ လေးပိုင်းမြောက်အချိန်” ဟု ဖော်ပြထားသည်။ခန့်တွင် ကိုယ်တော်သည် ရေပေါ်တွင် လမ်းလျှောက်တော်မူ၍ တပည့်တော်တို့ ရှိရာသို့ ကြွကာ သူတို့ကို ကျော်ဖြတ်ရန် ပြုတော်မူ၏။ 49ထိုသို့ ရေပေါ်တွင် ကိုယ်တော်လမ်းလျှောက်တော်မူသည်ကို တပည့်တော်တို့မြင်သောအခါ တစ္ဆေဟု ထင်မှတ်၍ အော်ဟစ်ကြ၏။ 50ထိုသူအပေါင်းတို့သည် ယေရှုကို မြင်သောအခါ ကြောက်လန့်ကြ၏။
ထိုအခါ ယေရှုက “မစိုးရိမ်နှင့်။ ငါပင်ဖြစ်၏။ မကြောက်ရွံ့ကြနှင့်” ဟု သူတို့အား ချက်ချင်းမိန့်တော်မူ၏။ 51ထို့နောက် သူတို့ရှိရာ လှေပေါ်သို့ တက်တော်မူလျှင် လေငြိမ်သွားလေ၏။ တပည့်တော်တို့သည် အလွန်မိန်းမောတွေဝေလျက် နေကြ၏။ 52အဘယ်ကြောင့်ဆိုသော် သူတို့သည် မုန့်နှင့်ပတ်သက်၍ ပြသောအံ့ဖွယ်တန်ခိုးကို နားမလည်ကြသောကြောင့် ဖြစ်၏။ ခံယူနိုင်ရန်လည်း သူတို့သည် ခေါင်းမာကြ၏။
53ကမ်းတစ်ဖက်သို့ ကူးကြပြီးနောက် ဂင်နေသရက်နယ်သို့ ရောက်သော် လှေကို ကမ်းကပ်ကြ၏။ 54လှေပေါ်မှ ဆင်းသောအခါ လူတို့သည် ယေရှုကို ချက်ချင်းမှတ်မိကြသဖြင့် 55ထိုနယ်တစ်ခွင်လုံးသို့ ပြေးသွားကြ၏။ ထို့နောက် ကိုယ်တော်ရှိတော်မူသည်ဟု ကြားသိရသောနေရာသို့ မကျန်းမာသူများကို အိပ်ရာနှင့်တကွ ခေါ်ဆောင်လာကြ၏။ 56လူတို့သည် ကိုယ်တော်ကြွတော်မူသည့် မြို့၊ ရွာ၊ ကျေးလက်ဒေသတိုင်း၌ မကျန်းမာသူများကို ဈေးအရပ်တို့တွင် ချထားကြ၏။ ထိုသူတို့က မကျန်းမာသူများအား ဝတ်ရုံတော်၏ အမြိတ်ကိုမျှ တို့ထိခွင့်ပေးရန် တောင်းပန်ကြ၏။ တို့ထိသောသူတိုင်းလည်း ကျန်းမာလာကြ၏။
वर्तमान में चयनित:
မာကု 6: BCB
हाइलाइट
शेयर
कॉपी
Want to have your highlights saved across all your devices? Sign up or sign in
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
