Genesis 11
11
1Tukamïrï mos arhi ïmo ñoki ñokaiña oidakami oidigi dama. 2Dai ka iimïitadai ïgai xarhi utamajadïrï xako óídakaiña ïgai dai tïï ïmo gïï dïjoi xako Babilonia tïgidu oidigi. Dai ami óídatu.
3Daidi pokaitiña ïgai,
—Tïtai iduñi upasai dai mïida bai kaapakatu ïgai— ikaitiña. Dai bhodïrï tukukami arasdakarukïdï ix makïdï oidigi ïrabiadïrï busanïi darasaiña ïgai go upasai. 4—Tïtai kïï mui tutusa bhaabhaki dai bhodïrï kïïsagi ïmo gïï tïsadikarukami baaki kïï tïkabakami ix makïdï aiyagi mïï daan tïbagiana— ikaitiña. —Bai podukai gïr aatagada odami aipakoga nïiditai gïr aaduindaga. Dai podukai ïpï maiti ixtuidimu jaa xi maigobai gïr imitudagi chïchïki ïjïkobai aipako— ikaitiña ïgai.
5Dai Gïr Nukadakami tïbai dai nïnïidi go bhaabhaki ïmadï ix makïdï idui go odami go tïkabakami baaki.
6Dai bhodïrï itïi ïgai,
—Mos ïr ïmo aadunumï odami dai arhi ïmo ñoki bia. Mai tipu ixtuma sobhidagi go aaduindadï ix makïdï iduñagi ïgai. Ïïgi ixtumaxi iduña ïrhiada ïgai go maaxi iduñimu. Ka maitï maatï xako ukami kugaitudamu gobai— itïi ïgai. 7—Gï agai tïxi mïï taana ajiagi aatïmï dai ïjïkobai maakiagi ñokidï odami. Kaxkïdï tudu mai maatï gïn kaïkagi aipakoga— itïi Gïr Nukadakami.
8Podukai Gïr Nukadakami aipako darai odami chïchïkiatai aipako oidigi dama. Dai ka dagito go odami go gïï kii daidi maigo bubuaka. 9Babilonia tïgidukami go gïï kii ïgai. Dai ami Gïr Nukadakami mai maatigian dukai kaidatu aatagidï odami dai aipako gïn otoi oidigi dama. Kaxkïdï potïgidukana go bhaabhaki ïgai.
वर्तमान में चयनित:
Genesis 11: NTP
हाइलाइट
शेयर
कॉपी
Want to have your highlights saved across all your devices? Sign up or sign in
Copyright: Ethnos360 Sanford, Florida
