ሉቃስት ወንጌል 24

ፈወነ 24

እየሱስ ክርጘይስ ጐጘ

(ማቲ. 28፡1-10፤ ማር. 16፡1-8፤ ይዃ. 20፡1-10)

1እንዝ ግረ እቍንድ እድ ኣስልጘው ሽቱድ ፃይጝ ኽየሲንቭት ግረቨዝ ጕጝ መቃቭሪል ፊር። 2መቃቭሪዝ ሚረድ ዲቭጝ በርጘው ቕርጘድም እድጐ ጊልብርሽ ዊኑ። 3መቃቭሪል ጃቝ ይጝ ቓልጛንድ ግን ኣደረት እርሸድ ችጚየቍም። 4እቍንድም እንዝ ግራ ጥውጝ ፅብጛ ብርቕርቕ የው ኣልቨ ሲረቍ ሊጘ እቅ ድጝግት ተርጝ ጝታጋቢል ችብር። 5«ፅበውድየንት ውር ማጥን የጝ ክረቊጅቅ ደምዝርነውድ? 6ጘጝ ክርጘይስ ጕኩ፤ እንልም እጀው፤ ገሊለ ፅባ ክታጭስ ድቈው ዊገድ ኣጅጥን። 7ኣይንድ፦ ‹እጅር ዅር ኽጥያትኝጥዝ ናኒል ዲቍሽት ይውሽትጠ፣ ሲቅልሽጠ፣ ጝዝግረም ሸወትረ ግርየይዝ ክርጘይስ ጕጠ፣ ጥውሸኵ› የው ዊግት ዊኑ» ይ።#ማቲ. 16፡21፤ 17፡22-23፤ 20፡18-19፤ ማር. 8፡31፤ 9፡31፤ 10፡33-34፤ ሉቃ. 9፡22፤ 18፡31-33።

8እቍንድም ኣይንድ እየሱስ ዊግተውድ ኣጅ። 9መቃቭሪስም ዋጥርጝ ፅጭ ለው ኻወርየታኒዝመ ጛጅቅ ዊነቍ ላጢዝቅ ድቍ። 10እኒንት ኻወርየታኒዝ ድቈቍ እቍንድም መግደላዊት ማርያም፣ ይዃነ፣ ያይቈቭትኘ ማርያም፣ ጛጅቅ ዊነቍ ላጥ እቍንም፣ ጛይ። 11እዛይ ግን እቍንድ ድቍጘው ዊገድ ጛጭስ ኽትፍትፍተ ተክ እትላንስቅ ኣምኒየቍም። 12ቢጥሮስ ግን ጕ መቃቭሪል ውጥያ ፊሩ፤ ጝግል ችጘጘም ፍጥ የው ኣቒድ ቓላንድ እርሸድ ጊንዝሽተው ኻር ኣልቨድ ጭቝ ቓሉ፤ ጘጝም ኣቐው ዊገይዝ ጊርምሻ ዋጥሩ።

እየሱስ ሊጘ ክንደጢዝ እትለጘ

(ማር. 16፡12-13)

13ኣይንት ግርየይዝ እየሱስት ክንደጢስ ሊጘድ ይማኹስ ትጐ ፊርጛ ዊን፤ ይማኹስ እየሩሳልየምስ ፅጭ ለው ኪለው ሚትር ኣጠ እክልድ ይር ችጝሽረይ ኪው ጚ። 14ጛይም እን ኣቐው ዊገይዙ ገቨድቅ ጕይጛ ዋርድጛ ዊን። 15እኒንትም ዊግትጛ ሚርምርሽጛ ሲጝቀ እየሱስ ጝቕም ጛጅቅ ላው ኣቕ ፃጛ ዊኑ። 16ጛይ ግን ጝታእልጣኒዝ ቓልጛ፣ ጝት ኣርቒየቍም ዊን። 17እየሱስም፦ «ፃጝርና ክታስ ክታይ ዊግትርነው እን ዊገድ ወረጘ የጝ?» የው ዋቕሩ፤ ጛይም ኻዝንጛ ቀጥ ይጝ ችብር። 18ጛጊስም ቀለየበ ይሽተው ላውድ እየሱስት፦ «እንዛይ ግርቂዝ እየሩሳልየምስ ኣቐው ዊገድ ኣርቓይረውድ ክት ክለ እን ኻግሪስ ኣቭንመ?» ዩ።

19እየሱስም፦ «ወረጘፈ?» ዩ፤ ጛይም፦ «ናዝሪትቱ እየሱስትል ኣቐው ዊገይዝቍዛ! ጘጝ እደረስመ ኽዝቪዝቅ በዊል ቃልዝመ ተግቫርዝቅ በርታቐው ነቭይ ዊኑ። 20ጝትም ካኽነጣነ ኻልቅጢዝመ ይናደጝጢዝ፣ ክርጝፍርድዝ ዲቍስጝ ይውጝ በርጝ ሲቅል። 21ይን ግን እስራየልት ኻርነይ ፊሰውድ ጘጝ ኣጡ ይን ቲስፈ ፃቭን ዊኑን፤ ኣነጚ እን ዊገድ ኣቐት ንጭ ሸወትረ ግርየ የጝ። 22ይናጅቅ ዊነቍ እቍኒስ ቈሽ ላው ላውድ ጊርምስጝኩ፤ ጛይ ንጭ ግረቨዝ መቃቭሪል ፊርጝ ዊን። 23እየሱስት እርሸድ ግን ችጚየቍም፤ ኣነጚ፦ ‹መላካን ቓልኑን፤ ጛይም፦ «እየሱስ ፅበው የጝ» ይጝ ይናጭስ ድቍ› ይጛ ተርጝ ጂጝዝ። 24ይናማኽሊስም ላው ላውድ ፊርጝ እቍንድ ዊግትጘጘ ኣቕ ችጝ፤ እየሱስት ግን ቓሊየቍም» ይጛ እየሱስስ ድቍ።

25እየሱስም፦ «እፈ ኣስክሳይርነቅ፣ ክታእዘንድም ነቭያታንድ ዊግትጘውድቅ ኣምነነዊስ ደየው እቅ ክታትርነ! 26ክርስቶስ እኒን ሚከረድቅ ለምርጠ፣ ጝዝ ግረ ቈሽ ጝክቭሪል ጥውጠ ጥውሸው ኣየውመ?» ዩ። 27ጝዝ ግረ ሙሴስመ ነቭያታኒስ ኪርም ቅዱሳን መፃፋኒዝ ጝቍዝ ፃፍሸውድየንትቅ ጣቅሳ ኣስርድዙ።

28እደይጛ ጝታፊርጘው ኪዊል ጣቅርጛንድ፣ እየሱስ ጛት ዲቍ ፊረው ተኩ። 29ጛይ ግን፦ «ኰረድ ጥውጠ ጕኩ፤ ድልም ኣጠ የጝ፤ እደስለ ይናጅቅ ጭጚ» ይጝ ኪው ሽጝ ጨው፤ ጘጝም ጝታጅቅ ጭጠ ጥዉ። 30እንዝ ግረ ጝታጅቅ መዲል ጐይ ፅባ ሚድ ጒ በርክ በር ኪል ይዉ። 31ኣይንድ ጝታእልጣንድ ቢት፤ ጘጝ እየሱስ ኣቐጘም ኣርቕ፤ እየሱስ ግን በውዝ ጝታበዊስ ሲውርሹ። 32ጛይም ጛስ ጛይ፦ «ጒደነይዝ ፃጝናንድ ድቋ፣ ቅዱሳን መፃፋኒስም ጣቅሳ ቲርጕማንድ ይናእዘንድ ልየ ቃጥልሻ ዊኒየውቀ» ይሽተይሽት።

33ጝዝለም ጕጝ እየሩሳልየም ዋጥርጝ ፊር፤ ፅጭ ለው ኻወርየታንድም ጝታፃምጢጅቅ ኣኽቭሽጝ፦ 34«ኣደረ እየሱስ እማንም ክርጘይስ ጕኩ፤ ስሙንስም እትልኩ» ይጛ ዊን። 35ሊጘ ክንደጥድም ጛት ችጘው ዊገይዝመ ኣደረ እየሱስ ሚድ ኪል ይዋንድ ኣወሽጝ ጝት ኣርቕጘጘ እጝቅትቅ ድቍ።

እየሱስ ጝክንደጢዝ እትለጘ

(ማቲ. 28፡16-20፤ ማር. 16፡14-18፤ ይዃ. 20፡19-23፤ ኻወ. 1፡6-8)

36ጛይም እኒንት ዊግትጛ ሲጝቀ፣ እየሱስ ጝቕም ጛታማኽሊል ችብር፦ «ዲግተ ክታጅቅ ኣነ» ዩ። 37ጛይ ግን መንፈስ ቓልጘው ተካንስቅ፣ ዳጝግፅጝ ጐውትዝ ስርሽ። 38እየሱስም፦ «ውር ቃጥ የጝ ዳጝግፅርነውድ? ውር ቃጥስ የጝ ክታእዘኒዝ ተጠራጥርሽርነውድ? 39ይናንጣኒዝመ ይልኵጣኒዝ ቓልድርን ያን ይቕም ኣቐጘ ኣርቕጥን፤ ይጊስ ቓልድርናንትጘ መንፈስ ስየዝመ ጛፅዝ እጀውም» ዩ። 40እንት የው በር ጝናንጣኒዝመ ጝልኵጣኒዝ ቓሊሱ። 41ጛይም ጭቕጘ ዲስ ይጛንስቅ ዲንቅሽጛ ገነ ኣምነነ ብጝ ዊን፤ እየሱስም፦ «እንል ውረውረ ዀነው ፃይርንኵርኑመ?» ዩ። 42ጛይም ጂሽተው ኻዘይስ ዊቱ ቀቭሽተው ይው። 43ጘጝም ለምር ጝታበዊል ኣቕ ኹ።

44እንዝ ግረ፦ «ክታጅቅ ፅባ ‹ሙሴት ኽግዝ፣ ነቭያታንዝመ መዝሙራን መፃፋንዝ ይማጥን ፃፍሸውድቅ ፋፅምሽጠ ጥውሸኵ› የር ድቈው ይቃልድየን እኒን የጝ» ዩ። 45ኣይንድም ቅዱሳን መፃፋንድ ኣስክስጥጘ ማጥን ጝታኣምረውድ ብዙ። 46እንት የውም ድቁ፦ « ‹ክርስቶስ ሚከረ ለምርጡ፤ ሸወትረ ግርየይዝም ክርጘይስ ጕጡ። 47ቈሽም እየሩሳልየምስ ኪርም ኻግራኒልቅ ጝሽዝ ንስኻዝመ ኽጥያቲስ ይቅር ይሽተነውዝ ኽዝቪዝቅ ድቍሽትጡ› ይሽት ፃፍሽኩ። 48ክትንም እን ዊገይዝቅ ሚዝረጫን የጝ። 49ያንም ይር ነየው ቲስፈድ ክታጭስ በርስጭር፤ ክትን ግን ንየይስ ኻይል ለምርትርኒስቅ እየሩሳልየም ዊንጥን።»#ኻወ. 1፡4።

እየሱስ ኣርገጘ

(ማር. 16፡19-20፤ ኻወ. 1፡9-11)

50እንዝ ግረ እየሱስ ጝክንደጥድ እየሩሳልየምስ ፊስ ቢታንየ ኣሽ ፃይ ፊሩ፤ ጝጊስም ጝናንጣንድ ዘርጋቕ በርኩ። 51ጛት በርካም ጛጊስ ቲት ሲመይ ትጐ ፉ።#ኻወ. 1፡9-11። 52ጛይም ጝጭስ ሲግድጝ ኽየው ዲስተዝ እየሩሳልየም ዋጥር። 53ዊትርቅ መቅደሲስ ቲቲጝቀ እደረት ሚዝየንዝጛ ዊን።

वर्तमान में चयनित:

ሉቃስት ወንጌል 24: ኽምጣኣኪ

हाइलाइट

कॉपी