ሉቃስት ወንጌል 23

ፈወነ 23

እየሱስ ቢላጠውስት በዊል ኣልተጘ

(ማቲ. 27፡1-2፤11-14፤ ማር. 15፡1-5፤ ይዃ. 18፡28-38)

1ጝግል ዊነቍድም ምሉዝ ጕጝ፣ እየሱስት ቢላጠውስትል ፃይጝ ፊስ። 2ቢላጠውስስም፦ «እን እጅርድ ይናኽዝቭድ ቀሳ፣ ንጕስ ቂሳርስም ግቭር ኪፍልሻይየጘ ኪልክላ፣ ቈሽም፦ ‹ያን ክርስቶስ ንጕስ የጝ› ያ ክንሳንድ ችጝን ፃይኑን» ይጛ ኪስጥጘ ኪርም። 3ቢላጠውስም እየሱስት፦ «ክት ኣይዅዳነ ንጕስመ?» የው ዋቕሩ፤ እየሱስም፦ «ክት ክቕም ይረጘ የጝ» የው ዊሱ። 4ቢላጠውስም ካኽነጣነ ኻልቅጢዝመ ኽዝቪዝ፦ «ያን እን እጅሪስ ላው ወንጀልም ችጚቀር» ዩ። 5ጛይ ግን፦ «እን እጅርድ ገሊለስ ኪርም እንል ኣሽ ይዅዳት ኽዝቭድቅ እዳቒጝቀ እጝቅትቅ ክንሳ ኽዝቭድ ኽምዘል ጕይሰኵ» ይጛ ኪው ሽጝ ኪስ።

6ቢላጠውስም ገሊለ ይጛንድ ወሽ፦ «እን እጅርድ ገሊለቱመ?» የው ዋቕሩ። 7ጝዝለም እየሱስ ተረውድ ኺረውድስ ቅመው ኻግሪስ ኣቐጘ ኣርቓንስቅ፣ ኺረውድስትል በርሱ፤ ኣይንድ ቈሽ ኺረውድስ እየሩሳልየም ኻትመይል ዊኑ። 8ኺረውድስም እየሱስት ቓላንድ ጭቕጘ ዲስ ዩ፤ ምላሰንድም እየሱስት ጂጘድ ጝዝ በውገ ወሽ ዊናንስቅ፣ እክሰው ግርየ ቓልጠ በና ዊኑ፣ ጝበዊል ኣቕም ታምራን ሰራሻንድ ቓልጠ በና ዊኑ። 9ኣይንድም እየሱስት ንቕፀቍ ዊቅ ዋቕሩ፤ እየሱስ ግን ላይ ዊገትም ዊሲየው። 10ካኽነጣነ ኻልቅጢዝመ ወሪትት ኽግ ክንሰጢዝም ጝግል ችብርጝ ኪው ሽጝ ኪስጛ ዊን። 11ኺረውድስም ጝዊተድሪጅቅ ኣቕ ነቅጘዝ ቂልዱ፤ ገይፀው ኣልቨም ሲስ ቢላጠውስ ትጐ ዊስ በርሱ። 12ኺረውድስስመ ቢላጠውስስም ኣይንቲስ ኪርምጝ ጛስ ጛይ ቀነቀንሽ፤ ጝዝ በውገ ግን ጐርኝጥ ዊን።

እየሱስት ክርጘ ፍርድ ፊርድጘጘ

(ማቲ. 27፡15-26፤ ማር. 15፡6-15፤ ይዃ. 18፡39-40፤ 19፡1-16)

13ቢላጠውስም ካኽነጣነ ኻልቅጥድ፣ ቅመትድ፣ ኽዝቭድም ሊንስ ኣኽቩ። 14እንት የውም ዊግቱ፦ «ክትን፦ ‹እን እጅርድ ኽዝቭድ ኽምዘል ጕይሰኵ› ይርን ይጐ ነስርኑ፣ ያንም ክታበዊል ፃቭ ሚርምሩን፤ ኣነጚ እን እጅሪስ ክትን ኣልስርነው ክሲስ ላው ወኝጀልም ችጚቀር። 15ኺረውድስም ውረውረ ወኝጀልቅ ባንስቅ ይናጐ ዊስ በርስኩ፤ እን እጅርድ ክርጘል ችጝዘው ውርም ኣይንት ወኝጀል ሰራሺየውም። 16ኣቓንስቅም ጊርፍንዝ ቐፃቕ በርስጨ የጝ» ዩ። 17እነይ ዊግተውድም ፈዝየት በሊዝ ላው እፁሸው እጅር እክስጠ ጥውሸው ዊናንስቅ የጝ።

18ኽዝቭድም ሊንስ፦ «እን እጅርድ እድጐ እክልሽ፤ በርቫንት እክሽ!» ያ ቓፁ። 19በርቫን ይሽተው እጅርድ ኻትመይል ኽምዘ ጕይሳንስቅ፣ ኒቭስም ቍዋንስቅ እፁሽ ዊነው የጝ። 20ቢላጠውስም እየሱስት እክስጠ በን፣ ኽዝቭድ ሊጘት ዋቕሩ። 21ጛይ ግን፦ «ሲቅል! ሲቅል!» ይጛ ቓፅ። 22ቢላጠውስም፦ «ውረይፈ? እን እጅርድ ሰራሸው ዊገድ ወረጘ የጝ? ያን ጝት ክርጘል ችጝዘው ወኝጀልም ችጚቀር፤ ኣቓንስቅም ቐፃቕ እክስጨ የጝ» የው ሸወት ዊግቱ። 23ጛይ ግን ጝታድመድ ኣጕስ ሽጝ፦ «ሲቅል» ይጛ ቓፅ፤ ጝታድመድም ቢላጠውስት ኻለይድ ላውጥሱ። 24ቢላጠውስም ጛይ ዋቕርጘውድ ኣጠ ማጥን ውሳኒ ዲቍሱ። 25እድየን ኽውክት ጕይሳንስቅ ኒቭስም ቍዋንስቅ፣ እፁሽ ዊነው እጅርድየንት ጛይ ዋቕርጘጘ እክሱ፤ እየሱስት ግን ጛይ በንጘጘ ሲቅልሽጠ ማጥን ዲቍስ ይዉ።

እየሱስ ሊጘ ወኝጀልኝጢዝ ማኽሊል ሲቅልሸጘ

(ማቲ. 27፡32-44፤ ማር. 15፡21-32፤ ይዃ. 19፡17-27)

26እየሱስት ፃይጝ ፊርጛንድም ስሙን ይሽተው ቀሪነቱ እጅር ገጠሪስ ተራንድ ችጝጝ፣ ሲቅልጥጘ ኣስልጘው ሚስቅልድየንት መውስጝ እየሱስት እግርገይል ቲክንዝ። 27ንቕፀቍ እቅዝመ ጝታእዘንድ ድቝልጛ ሊዘቍ እቍንም እግርገ እግርገይል ቲክንጛ ዊን። 28እየሱስ ግን ጝታጐ ብሩ የው፦ «እፈ እየሩሳልየምት እቍን ክታትርነ! ክታቕምስመ ክታቝርዝ ማጥን ሊዝጥንጚ ይቍዝስ ሊዝትርነ። 29እንወ! ‹ማኽንጣን እቍን፣ እዅሪየቍ ማፅንታን፣ ኒቭሲየቍ እቍጣንም ውርጘ ቀቫሸቍ ጛይ› ይርነው ግርየ ተርጡ። 30ኣይንድ ኣብቕድዛት፦ ‹ይናዲጊል ሊቭጥን› ኵምብልጥድዛትም፦ ‹ጭቭስጥን› ይጥጘ ኪርምጥቍ።#ዀስ. 10፡8፤ እት. 6፡16። 31ነስየ ቝጥን ቃነይዝ እኳ እንት ሽጘውዝየ ይዘው ቃነይዝ ኣቓን ኣወሽጥጘ ዊን?» ዩ።

32ላጥ ሊጘ ወኝጀልኝጥም ጝጅቅ ቁጥጘ ፃይጝ ፊር። 33ቀራንየው ይሽተው ስፍረይል ችጛንድም እየሱስት ጝግል ሲቅል፤ እዛይ ወኝጀልኝጥድዛትም ላውድ እየሱስት ለዊዝጐቱ ሊጘትረድ ቈሽ ጝፃግቪዝጐቱ ፃቭጝ ሲቅል። 34እየሱስም፦ «ኣየወ! እኒንትቅ ፃቭጘውድ ኣርቓቍ ኣጛንስቅ የጝ፤ ይቅር ይ!» ዩ፤ ጛይም ጝኣልቨድ እፀ ማልጝ ኣድልሽ።#መዝ. 22፡18። 35ኽዝቭድም ጝግል ችብር ቓላ ዊኑ፤ ኣይዅዳነ ኻልቅጥድም፦ «ላጥ እቅ ቓዙ፤ እደስለ ጘጝ እደረ ማርፀው ክርስቶስድ ኣቐውዝየ እስቲ ጝቕምት ቓዝነ» ይጛ ቂልድጛ ዊን።#መዝ. 22፡7።

36ዊተድርድም ቂልድጛ ዊን፤ ጝጐም ኣልትጝ፣ ዃምጥጠው ወይንዙ ሚዝ ይው።#መዝ. 69፡21። 37ጝትም፦ «ክት ኣይዅዳነ ንጕስ ኣረውዝየ እስቲ ክቕምት ቓዝ!» ይጛ ዊን። 38እየሱስት ኣውሪዝ ንየ ሚስቅሊልም፦ «እኒን ኣይዅዳነ ንጕስ የጝ» ይሽት ፃፍሸው ፅፈሽ እቝርጝ ዊን።

39ጝጅቅ ሲቅልሸቍ ወኝጀልኝጢስም ላውድ፦ «ክትሰ ክርስቶስ ኣይረርቀ? እደስለ ክቕምትም ይናትም ቓዛርመ!» የው ዛሹ። 40ሊጘትረድ ግን፦ «እፈ ክት ጝጘ ፍርድ ለምትራጐስ እኳመ እደረት ጐውታራ! 41ይን ቐፃሽናንስ ሰራሽነው ሰቪዝ ልክ ኣቓንስቅ ፍርድድ እማንተው የጝ፤ እን እጅርድ ግን ውረውረ ጭቕት ሰራሺየው» የው ቃርሹ። 42እየሱስትም፦ «ኣደረወ ክምጝግስቲዝ ተትራንት ኰር ይት ኻስቫ» የው ቓፁ። 43እየሱስም፦ «እማንዝ የኵን፤ ንጭ ገነት ጥውር ይጅቅ ፅብትር» የው ዊሱ።

እየሱስ ክረጘ

(ማቲ. 27፡45-56፤ ማር. 15፡33-41፤ ይዃ. 19፡28-30)

44ኣይንድም ጊዝያትድ ዋልጠ ሰት ኣቕ ዊኑ፤ ፃይጨ ሳይል ኣሽም ዝቨይልቅ ጥመ ኣቑ። 45ኰረይዝ ብርኻንድቅ ድዙ፤ መቅደሲዙ ገርደነድም ሊጘትል ቀድሹ።#ዘፀ. 26፡31-33። 46እየሱስም ጝድመድ ኣጕስ ሸው፦ «ኣየወ! ይኒፍስሸየንት ክናኒል ነቀኵን» የው ቓፁ፤ እኒንት የት ግረ ጝፈውጥድ ፍ።#መዝ. 31፡5።

47ጝግል ዊነው ላዝ ኻቀድም ኣቐው ዊግድቅ ቓላንድ፦ «እን እጅርድ እማንም ፃድቅ ዊኑ» የው እደረት ኪብርዙ። 48እኒንት ቓልጠ ጘጝ ስፍረይል ኣኽቭሽ ዊነው ኽዝቭድም እን ኣቐው ዊገድየንትቅ ቓላንድ ጭቕጘ ኻዝናንስቅ ጝእዘንድ ድቝላ ጝጝን ጝጝን ዋጥር ፊሩ። 49ኣነጚ እየሱስት ጣቀትዝ ኣርቐቍ ዊነቍ እቅዝመ ገሊለስ ኪርምጝ ጝት ቲክንጝ ተረቍ እቍንዝ እጝቅቅ እን ዊግድ ቓልጛ እክልድጝ ችብርጝ ዊን።#ሉቃ. 8፡2-3።

እየሱስ ዲቭሽተጘ

(ማቲ. 27፡57-61፤ ማር. 15፡42-47፤ ይዃ. 19፡38-42)

50እንዝ ግረ ላው ዮሴፍ ይሽተው ኣይዅዳነ ሸጐዊዝ ማኽረተ ኣቐው ቀሰው ፃድቅ እጅር ዊኑ። 51እን እጅርድ ጝታምኽሪልም ኣነ ጛይ ሰራሽጘው ሰቪልቅ ጥዊየውም ዊኑ፤ ጝኻግርድም ኣርማትያስ ይሽትረይ ላይ ኣይዅዳነ ኻትመትል ዊኑ፤ እደረት ምጝግስትት ተረነ ግርየድም ሊሚዳ ዊኑ። 52ጘጝም ቢላጠውስትል ፊር፦ «እየሱስት እርሸድ ኣለቀይ ነቅ» የው ጨዉ። 53እርሸድየንትም ጊምዝ ፃረው ኻር ኣልቨዝ ጊንዙ፤ ላው እጅርቅ ዲቪሽቲየው ፃፀድ ፊልፍልን ተስኑ ኣይር መቃቭርልም ዲቩ። 54እኒንት ፃቨውድም ቅዳምሲንቭትስ ኣስልሸነ ዊነው ኣርቭ ግርየዝ የጝ፤ ቅዳምሲንቭትም ጥውጠ ጕ ዊኑ።

55ገሊለስ ኪርምጝ ጝት ቲክንጝ ተረቍ እቍንድም ዮሴፍ ጅቅ ፊርጝ መቃቭርድ ቓል፤ እርሸድም ኣወሽጝ እቝርጘጘ ቓል። 56ጝዝለም ዋጥርጝ ሽቱዝመ እቓሰነው ዘይትዝ ኣስል፤ ወሪትት ኽግድ ኣዘጘም ቅዳምሲንቭትት ፈውጝ ግርይ።#ዘፀ. 20፡10፤ ዘዳ. 5፡14።

वर्तमान में चयनित:

ሉቃስት ወንጌል 23: ኽምጣኣኪ

हाइलाइट

कॉपी