यूहन्ना 20

यीसु के कब्र खाली

(मत्ती 28:1-10; मरकुस 16:1-8; लूका 24:1-12)

1हप्ता के पहिलय दिन अइतबार काहीं, मगदल गाँव के मरियम, भिनसरहय जब अँधिआर रहा हय, कब्र के लघे आईं, अउर पथरा काहीं कब्र से ढनगा देखिन। 2तब ऊँ दउड़त आइके समौन पतरस अउर ऊँ दुसरे चेला के लघे, जेसे यीसु जादा प्रेम रक्खत रहे हँय कहिन, “ऊँ पंचे यीसु के लहास काहीं कब्र से निकारिके लइगे हँय; हम पंचे नहीं जानी, कि उनहीं कहाँ धरिन हीं।” 3तब पतरस अउर ऊँ दूसर चेला उहाँ से निकरिके कब्र कइती चल दिहिन। 4अउर दोनव जने एक साथय दउड़त रहे हँय, पय दुसरकबा चेला पतरस से आँगे बढ़िके, कब्र माहीं पहिले पहुँचिगा। 5अउर उआ निहुरिके नीचे देखिस, कि उहाँ कफन के ओन्हा परे हँय, पय उआ भीतर नहीं ग। 6तब समौन पतरस उनखे पीछे-पीछे पहुँचे, अउर कब्र के भीतर गें, अउर कफन के ओन्हा परे देखिन। 7अउर उआ अँगउछा जउन उनखे मूँड़े माहीं बाँधा रहा हय, ओन्हन के साथ नहीं, पय अलग से एकठे जघा माहीं गुरमेटा धरा देखिन। 8तब दूसर चेला घलाय जउन कब्र माहीं पहिले पहुँच ग रहा हय, उआ भीतर ग, अउर देखिके बिसुआस किहिस। 9ऊँ पंचे अबय तक पबित्र सास्त्र माहीं लिखे, इआ बचन काहीं नहीं समझे पाइन तय, कि “ऊँ मरेन म से जरूर जिन्दा होइ जइहँय।” 10तब ऊँ दोनव चेला अपने घर लउटिगें।

मगदल गाँव के मरियम काहीं यीसु देखाई दिहिन

(मत्ती 28:9,10; मरकुस 16:9-11)

11पय मरियम रोबत कब्र के लघे बहिरे ठाढ़ रही हँय, अउर रोउतय-रोबत कब्र के भीतर कइती निहुरिके देखिन, 12त दुइठे स्वरगदूतन काहीं चमचमात उजर ओन्हा पहिरे, जहाँ यीसु के लहास धरी रही हय, उहाँ एकठे काहीं मूँड़े कइती, अउर दुसरे काहीं गोड़े कइती बइठ देखिन। 13तब ऊँ पंचे मरियम से कहिन, “हे बहिनी, तूँ काहे रोउते हया?” तब मरियम उनसे कहिन, “ऊँ पंचे हमरे प्रभू काहीं उठाय लइगे हँय, अउर हम नहीं जानित आहेन, कि उनहीं कहाँ धरिन हीं।” 14इआ बात कहिके मरियम पीछे कइती मुँड़िके देखिन, तब यीसु काहीं उहाँ ठाढ़ देखिन, अउर इआ नहीं जाने पाइन, कि ऊँ यीसु आहीं। 15तब यीसु उनसे कहिन, “हे बहिनी, तूँ काहे रोउते हया? केही ढुँढ़ते हया?” ऊँ उनहीं माली समझिके उनसे कहिन, “हे महाराज, अगर अपना उनहीं उठाय लइ गएन हय, त हमहीं बताय देई, कि उनहीं कहाँ धरे हएन, त हम उनहीं लइ जाब।” 16तब यीसु उनसे कहिन, “मरियम!” तब ऊँ पीछे मुड़िके, उनसे इब्रानी भाँसा माहीं कहिन, “रब्बूनी” जेखर मतलब हय “हे गुरू।” 17तब यीसु उनसे कहिन, “अबे हमहीं न छुआ, काहेकि हम अबय तक अपने पिता परमातिमा के लघे ऊपर नहीं गएन आय, बलकिन हमरे भाइन के लघे जाइके उनसे कहि दिहा, कि हम अपने पिता अउर तोंहरे पिता, अउर अपने परमातिमा अउर तोंहरे परमातिमा के लघे ऊपर जइत हएन।” 18तब मगदल गाँव के मरियम जाइके चेलन से बताइन, कि “हम प्रभू काहीं देखे हएन, अउर ऊँ, हमहीं ईं बातन काहीं बताइन हीं।”

चेलन काहीं यीसु देखाई दिहिन

(मत्ती 28:16-20; मरकुस 16:14-18; लूका 24:36-49)

19उहय दिना हप्ता के पहिल दिन अइतबार रहा हय, साँझिके चेला लोग यहूदी धारमिक अँगुअन के डेरन के मारे केमरा बंद कइके एकट्ठा बइठ रहे हँय, तब यीसु आएँ, अउर उनखे बीच माहीं ठाढ़ होइके कहिन, “तोंहईं पंचन काहीं सान्ती मिलय।” 20अउर इआ कहे के बाद यीसु आपन हाँथ अउर पाँजर उनहीं देखाइन: तब चेला लोग, प्रभू काहीं देखिके आनन्दित भें। 21अउर यीसु पुनि उनसे कहिन, “‘तोंहईं पंचन काहीं सान्ती मिलय।’ जइसन पिता परमातिमा हमहीं पठइन हीं, उहयमेर हमहूँ तोंहईं पठइत हएन।” 22इआ कहे के बाद यीसु उनखे ऊपर फूँकिन अउर उनसे कहिन, “‘पबित्र आत्मा ल्या’। 23जउने मनइन के पापन काहीं तूँ पंचे माफ करिहा, उनखर पाप माफ कीन जइहँय, अउर जिनखे पापन काहीं तूँ पंचे माफ न करिहा, उनखर पाप माफ न कीन जइहँय।”

थोमा काहीं यीसु देखाई दिहिन

24पय बरहँव चेलन म से एक जने, जिनखर नाम थोमा रहा हय, जउन दिदुमुस के नाम से घलाय जाने जात रहे हँय, जब यीसु चेलन के लघे आएँ तय, तब ऊँ नहीं रहे आँय। 25जब चेला लोग उनसे कहँइ लागें, कि “हम पंचे प्रभू काहीं देखे हएन”: तब थोमा उनसे कहिन, “जब तक हम उनखे हाँथेन माहीं खीलन के छेंदन काहीं न देख लेब, अउर उनमा आपन अँगुरी न डार लेब, अउर पाँजर माहीं आपन हाँथ न डार लेब, तब तक हम बिसुआस न मानब।” 26आठ दिना के बाद यीसु के चेला लोग, पुनि घर के भीतर रहे हँय, अउर थोमा घलाय उनखे साथ माहीं रहे हँय, अउर दुअरा के केमरा बंद रहे हँय, तब यीसु आएँ, अउर बीच माहीं ठाढ़ होइके कहिन, “तोंहईं पंचन काहीं सान्ति मिलय।” 27अउर यीसु थोमा से कहिन, “आपन अँगुरी हमरे हाँथे के छेंदन माहीं डारा, अउर आपन हाँथ हमरे पाँजर माहीं डारा, अउर संका करब छोंड़िके, बिसुआसी बना।” 28इआ सुनिके थोमा उनहीं जबाब दिहिन, “हे हमार प्रभू, हे हमार परमातिमा!” 29तब यीसु उनसे कहिन, “तूँ त हमहीं देखिके हमरे ऊपर बिसुआस किहा हय, पय धन्य हें, ऊँ पंचे जउन हमहीं बिना देखे बिसुआस करत हें।”

इआ किताब के उद्देस

30अउर यीसु अपने चेलन के आँगे अउरव खुब चमत्कार देखाइन तय, जउन इआ किताब माहीं नहीं लिखे गे आँय। 31पय ईं चमत्कार एसे लिखे गे हँय, कि तूँ पंचे बिसुआस करा, कि यीसुअय परमातिमा के लड़िका मसीह आहीं: अउर यीसु के ऊपर बिसुआस कइके, उनखे नाम से अनन्त जीबन पाबा।

वर्तमान में चयनित:

यूहन्ना 20: bag

हाइलाइट

कॉपी