यूहन्ना 19

मउत के सजा के हुकुम

(मत्ती 27:15-31; मरकुस 15:6-20; लूका 23:13-25)

1इआ सुनिके राजपाल पिलातुस यीसु काहीं चाबुक मरबाइन। 2अउर सिपाही लोग काँटन काहीं गुँथिके मुकुट बनाइके, यीसु के मूँड़े माहीं धरिन, अउर उनहीं बैगनी रंग के ओन्हा पहिराइन। 3अउर उनखे लघे आय-आइके कहँइ लागें, “हे यहूदी लोगन के राजा नबस्कार!” अउर थापड़ मारँइ लागें। 4तब राजपाल पिलातुस बहिरे निकरिके उनसे कहिन, “देखा, हम उनहीं पुनि तोंहरे लघे बहिरे लए अइत हएन; जउने तूँ पंचे जानिल्या, कि हम उनखे ऊपर कउनव दोस नहीं पाएन।” 5तब यीसु काँटन के मुकुट अउर बैगनी रंग के ओन्हा पहिरे बहिरे निकरें, अउर राजपाल पिलातुस कहिन, “देखा, ईंन आहीं ऊँ मनई।” 6जब प्रधान याजक लोग, अउर मन्दिर माहीं पहरा देंइ बाले सिपाही उनहीं देखिन, त चिल्लाइके कहँइ लागें, कि “ओही क्रूस माहीं चढ़ाबा, क्रूस माहीं”: तब राजपाल पिलातुस उनसे कहिन, “तुहिन पंचे उनहीं लइ जाइके क्रूस माहीं चढ़ाबा; काहेकि हम उनखे ऊपर कउनव दोस नहीं पाई।” 7तब यहूदी लोग उनहीं जबाब दिहिन, कि “हमरेव पंचन के बिधान हय, अउर उआ बिधान के मुताबिक ऊँ मारि डारँइ के काबिल हें, काहेकि ऊँ अपने-आप काहीं परमातिमा के लड़िका बनाबत हें।” 8जब राजपाल पिलातुस इआ बात काहीं सुनिन, त अउर जादा डेराइगें। 9अउर पुनि किला के भीतर गें, अउर यीसु से कहिन, “तूँ कहाँ से आया हय?” पय यीसु उनहीं कउनव जबाब नहीं दिहिन। 10तब पुनि पिलातुस उनसे कहिन, “तूँ हमसे काहे नहीं बोलते आह्या?” काहे तूँ नहीं जनते आह्या, कि “हमहीं तोंहईं छोंड़ि देंइ के अधिकार हय, अउर तोंहईं क्रूस माहीं चढ़ामँइ के घलाय अधिकार हय।” 11तब यीसु उनहीं जबाब दिहिन, कि “अगर तोंहईं परमपिता के तरफ से अधिकार न दीन जात, त तोंहार हमरे ऊपर कुछू अधिकार न होत; एसे जे हमहीं तोंहरे हाँथ माहीं पकड़ाइस ही, ओखर पाप जादा हय।”

12इआ सुनिके राजपाल पिलातुस यीसु काहीं छोंड़ देंइ के उपाय ढूँढ़ँइ लागें, पय यहूदी लोग चिल्लाय-चिल्लाइके कहिन, “अगर तूँ उनहीं छोंड़ि देहा, त तूँ राजा कैसर के साथी न कहइहा; अउर जे कोऊ अपने-आप काहीं राजा बनाबत हय, उआ राजा कैसर के बिरोधी आय।” 13ईं बातन काहीं सुनिके पिलातुस यीसु काहीं बहिरे, उआ जघा माहीं लइगें, जउन “पथरा के चबूतरा” कहाबत रहा हय, जउने काहीं इब्रानी भाँसा माहीं गब्बता कहत रहे हँय, अउर उहाँ राजपाल पिलातुस न्याय के सिंहासन माहीं बइठिगें। 14(काहेकि उआ दिना फसह नाम के तेउहार के तइआरी करँइ बाला दिन रहा हय, अउर दुपहर के करीब बारा बजे रहे हँय।) तब ऊँ यहूदी लोगन से कहिन, “देखा, ईंन आहीं तोंहार राजा!” 15पय ऊँ पंचे चिल्लाने कि “लइ जा! लइ जा! ओही क्रूस माहीं चढ़ाबा।” तब राजपाल पिलातुस उनसे कहिन, “का हम तोंहरे राजा काहीं क्रूस माही चढ़ाई?” तब प्रधान याजक लोग उनहीं जबाब दिहिन, कि “राजा कैसर काहीं छोंड़िके, हमार कोऊ दूसर राजा न होय।” 16तब पिलातुस यीसु काहीं उनखे हाँथ माहीं सँउप दिहिन, जउने ऊँ क्रूस माहीं चढ़ाए जाँय।

क्रूस माहीं चढ़ाबा जाब

(मत्ती 27:32-44; मरकुस 15:21-32; लूका 23:26-43)

17तब ऊँ पंचे यीसु काहीं लइगें, अउर यीसु आपन क्रूस उठाए यरूसलेम सहर से बहिरे उआ जघा तक गें, जउन “खोपड़ी के जघा” कहाबत रही हय, अउर ओही इब्रानी भाँसा माहीं “गुलगुता” कहत रहे हँय। 18उहाँ ऊँ पंचे यीसु के साथ दुइठे अउर मनइन काहीं, क्रूस माहीं चढ़ाइन, एकठे काहीं दहिने कइती, अउर दुसरे काहीं बाएँ कइती, अउर बीच म यीसु काहीं। 19अउर राजपाल पिलातुस एकठे अरोप-पत्र लिखिके, क्रूस माहीं लगाय दिहिन, अउर ओमाहीं इआ लिखा रहा हय, “यीसु नासरी यहूदी लोगन के राजा।” 20उआ दोस पत्र काहीं खुब यहूदी लोग पढ़िन, काहेकि जहाँ यीसु क्रूस माहीं चढ़ाए गे रहे हँय, उआ जघा सहर के लघेन रही हय, अउर उआ पत्र इब्रानी, लतीनी अउर यूनानी भाँसा माहीं लिखा रहा हय। 21तब यहूदी लोगन के प्रधान याजक लोग, राजपाल पिलातुस से कहिन, “उआ पत्र माहीं यहूदी लोगन के राजा न लिखा।” पय इआ लिखा “जउन यीसु कहिन हीं, कि हम यहूदी लोगन के राजा आहेन।” 22तब पिलातुस उनहीं जबाब दिहिन, “जउन हम लिख दिहेन, त लिख दिहेन, ओही बदल नहीं सकी।”

23जब सिपाही यीसु काहीं क्रूस माहीं चढ़ाय चुके, तब यीसु के जेतने ओन्हा रहे हँय, उनहीं लइके चार हिस्सन माहीं बाँट दिहिन, हरेक सिपाही के खातिर एक हिस्सा, अउर ऊँ उनखे कुरथा काहीं घलाय लिहिन, पय कुरथा बिना सिए ऊपर से नीचे तक बिना रहा हय: एसे ऊँ पंचे आपस माहीं कहिन, “हम पंचे एही न फारी, बलकिन इआ केही मिली, एखे खातिर परची डारी।” 24इआ एसे भ, कि जउने पबित्र सास्त्र माहीं लिखी बात पूर होय, कि

“ऊँ पंचे हमरे ओन्हन काहीं आपस माहीं बाँट लिहिन, अउर हमरे ओन्हा के खातिर परची#भज 22:18 डारिन।”

अउर सगले सिपाही अइसनय किहिन।

25पय यीसु के क्रूस के लघे उनखर महतारी, अउर उनखे महतारी के बहिनी मरियम, जउन क्लोपास के मेहेरिआ आहीं, अउर मगदल गाँव के मरियम ठाढ़ रही हँय। 26तब यीसु अपने महतारी अउर उआ चेला काहीं जेसे ऊँ जादा प्रेम करत रहे हँय, लघे ठाढ़ देखिके, अपने महतारी से कहिन; “हे अम्मा, देखा, ईं तोंहार लड़िका आहीं।” 27पुनि यीसु अपने ऊँ चेला से कहिन, “ईं तोंहार महतारी आहीं”, अउर उहय समय ऊँ चेला उनखर देख-भाल करँइ के खातिर उनहीं अपने घरय लइगें।

यीसु के मउत

(मत्ती 27:45-56; मरकुस 15:33-41; लूका 23:44-49)

28एखे बाद यीसु इआ जानिके कि अब सब कुछ पूर होइ चुका हय; एसे कि पबित्र सास्त्र माहीं लिखी बात पूर होय, कहिन, “हम पिआसे हएन।” 29उहाँ सिरका से भरा एकठे बरतन धरा रहा हय, एसे ऊँ पंचे एकठे सोक्खा काहीं, सिरका माहीं बुड़ाइके, जूफा नाम के बिरबा के लकड़ी माहीं धइके, उनखे मुँहे माहीं लगाइन। 30जब यीसु उआ सिरका पीन, तब कहिन, “पूर होइगा।” अउर ऊँ आपन मूँड़ नीचे काहीं झुकाइके, प्रान छोंड़ दिहिन।

भाला से छेदा जाब

31अउर एसे कि उआ फसह नाम के तेउहार के तइआरी के दिन रहा हय, पबित्र दिन काहीं उनखर लहासँय क्रूस माहीं न लटकी रहँय, काहेकि पबित्र दिन खुब महत्वपूर्न रहा हय। एखे खातिर यहूदी लोग पिलातुस से बिनती किहिन, कि ऊँ हुकुम देंय, कि उनखर टागँय, टोर दीन जाँय, अउर उनखे लहासन काहीं उहाँ से हटाय दीन जाय। 32तब कुछ सिपाही आइके पहिल मनई के टागँय टोरिन, एखे बाद दुसरे मनई के टोरिन, जउन यीसु के साथ क्रूस माहीं चढ़ाए गे रहे हँय। 33पय जब ऊँ सिपाही यीसु के लघे आइके देखिन, कि ऊँ मर चुके हँय, त उनखर टागँय नहीं टोरिन। 34पय उन सिपाहिन म से एक जने भाला से उनखे पँजरे माहीं छेदिस, त हरबिन उनखे खून अउर पानी निकरा। 35जउन मनई इआ देखिस रहा हय, उहय इआ गबाही दिहिस ही, अउर ओखर गबाही सच्ची हय; अउर उआ जानत हय, कि हम इआ बेलकुल सही कहित हएन, जउने तुहूँ पंचे बिसुआस करा। 36ईं बातँय एसे भईं, कि पबित्र सास्त्र माहीं लिखी बात पूर होय, कि “उनखर कउनव हड्डी न टोरी जई।” 37पबित्र सास्त्र म एकठे अउर जघा माहीं इआ लिखा हय, कि “जिनहीं ऊँ पंचे भाला से छेदिन हीं, ऊँ पंचे उनहिन काहीं देखिहँय#दरसनन 1:7।”

यीसु काहीं गाड़ा जाब

(मत्ती 27:57-61; मरकुस 15:42-47; लूका 23:50-56)

38एखे बाद अरमतिया गाँव के रहँइ बाले यूसुफ, जउन यीसु के ऊपर बिसुआस करत रहे हँय, (पय यहूदी धारमिक अँगुअन के डेरन के मारे इआ बात काहीं बताबत नहीं रहें, कि ऊँ यीसु के ऊपर बिसुआस करत हें) ऊँ पिलातुस से बिनती किहिन, कि “हम यीसु के लहास काहीं लइ जाँइ चाहित हएन”, तब पिलातुस उनखे बिनती काहीं सुनिके, कहिन “लइ जा”, अउर ऊँ आइके उनखे लहास काहीं लइगें। 39अउर नीकुदेमुस घलाय जउन पहिले यीसु के लघे रात माहीं गे रहे हँय, गन्धरस अउर एलबा नाम के महकँइ बाली दोनव चीजन काहीं मिलाइके, तीस किलो के करीब लइ आएँ। 40तब ऊँ पंचे यीसु के लहास काहीं लइके यहूदी लोगन के गाड़ँइ के बिधी के मुताबिक, यीसु के लहास माहीं महकँइ बाली चीजन काहीं कफन के साथ लपेटिन। 41उआ जघा माहीं जहाँ यीसु क्रूस माहीं चढ़ाए गे रहे हँय, उहाँ एकठे बगइचा रहा हय, अउर उहय बगइचा माहीं, एकठे नई कब्र रही हय, जउने माहीं अबे तक कोहू काहीं नहीं धरा ग तय। 42एसे यहूदी लोगन के पबित्र दिन के तइआरी करँइ के दिन होंइ के कारन, ऊँ पंचे यीसु के लहास काहीं उहय कब्र माहीं धरिन, काहेकि उआ कब्र लघे रही हय।

वर्तमान में चयनित:

यूहन्ना 19: bag

हाइलाइट

कॉपी