Mapookyony 21

Iwonika lya Isaki

1Nndumi Iruva kasheya Sara shaasa aleamba, na Nndumi Iruva kantannya shaasa alemmbia. 2Sara kakufinga kairya Abrahamu mwana wa womi wa ukuuny lwakwe, kyeeri kilya alevio ni Iruva. 3Abrahamu kammbaanga irina ni Isaki, mwana ulya aleonika, ulya Sara alemwiirya. 4Kyeeri Isaki etiri mikonu nyanya, Abrahamu kanrina shaasa Iruva alemmbavasya 5Nawe Abrahamu ekee nndu wa myaaka iyana, kyeeri mwana wakwe, Isaki alewonika. 6Sara kaamba, “Iruva anshisimba seko, wo nndu ashiitaa mmbo asekaa neeny.” 7Kaamba-se, “Mmbi eviaa Abrahamu vai Sara eeshootaa vana? Mashika mmbo shilemwiirya mwana kyeeri kya ukuu lwakwe.”

8Mwana kang'ana, katorwa; Abrahamu kavika nndumwa nniini nkonu ulya Isaki atorika.

Hajiri na Ishmaeli Vafunwa

9Sara kalollya mwana ulya wa Hajiri Mmisri, ulya emwirya Abrahamu, vetavanaa na Isaki. 10Naasa kavia Abrahamu, “Umbuta kishinga ekyi na mwana wakwe, mashika mwana wa kishinga nnyaonaa ding'u na mwana wakwa Isaki-fo.” 11Na irero elyo lyikava ikasha deny kwa Abrahamu, kimaruma kya mwana wakwe. 12Iruva kavia Abrahamu, “Irero elyi lyilave ikasha misony afo-fo, kimaruma kya mwana yeto, na ishinga elyi lyafo. Kyoose ekyo Sara akuviaa arannya unyanga lwakwe, mashika yoo kwa Isaki ufyari lwafo lushevaangwaa. 13Na mwana yeto wa ishinga ashevaa ufyari uniini, mashika naakwaa ni-we ni wa ufyari lwafo.”

14Abrahamu kakupoo ngama nraasi keepoo nkate na ndivi ya mura kaniingya Hajiri kanrika yeeveny lyakwe, na mwana, kavasama; nawe kasomuka, karekya efo kasa ka Beer-sheba. 15Mura ulya ukasia efo ndiviny, kaara mwana yoo si ya isiki. 16Keenda nallole ekee kwaasha, ando a waasha lwa mita iyana; mashika mmbo alekusara, nalalollye mwana efwaa; nawe karewa ellolaa, kaonisa, unyanga kaiya. 17Iruva kaita unyanga lwa mwana, Nsu wa Iruva kavaanga Hajiri auka iruveeu kammbia, “Niinda, Hajiri? Kulairyee-fo, mashika Iruva amiita kiiyo kya mwana efo akai. 18Salala, kwiipoo mwana, kuntire maakony afo, mashika nshemwallwa nave ufyari uniini.” 19Iruva kantarammbwa miso, nawe kalollya kirori kya mura keenda kaishura ndivi mura, karita mwana. 20Iruva kakaa na mwana yeto, nawe kang'ana, kakaa kasa kava mwaasa na ura. 21Kakaa kasa ka Parani, maye kamwengye nka ambuta Misri.

Abrahamu Avikkyana Kyaasa na Abimeleki

22Kyikava kyeeri kilya Abimeleki, na Fikoli nniini wa ironda lyakwe lya askari, vakarera na Abrahamu, vakammbia, “Iruva mmbo akee neewe na fyoose kukeetana. 23Naasa ulaalu shilyiiyany mboo na Iruva, sheelyi nkusheshitannya ukasha nta mwana wakwa-fo, nta nshuku wakwa-fo, kyeendi shaasa shilekutannya mesha neewe kushitannyi, na uruka yelu kukeerua rua nnang'ni ya vayo.” 24Abrahamu kammbia, “Shilyiyaa mboo.”

25Naasa Abrahamu kalollya sheelyi Abimeleki ni nndu wa tangalu kyimaruma kya kirori kya mura kilya mashinga a Abimeleki valekilammya. 26Abimeleki kaamba, “Yeny nshiishi nndu yeto aletana kindo ekyi-fo, nta nnyaleshivia-fo, nta nshilemmiita kindo ekyi-fo, kuuta inu yeni.” 27Abrahamu kaipoo suva na ng'umbe kafiniingya Abimeleki, nafyo fi fivii fikava fyevasanda. 28Abrahamu kauta ngurana ta moonri mfungare to sheni. 29Abimeleki kavia, Abrahamu “Ngurana eti ta moonri mfungare kwativika sheni, nkyo kyaamba kyi?” 30Kammbia, “Ngurana eti mfungare ta moonri mmbo kutiwarya wokony lwakwa, tive ukureeki lweamba ni yeny shilesuma kirori ekyi kya mura.” 31Nkyo kavaanga ando alya Beer-sheba, mashika elyi valelyiiya-u mma ve vavii. 32Naasa vakakusanda alya Beer-sheba. Abimeleki na Fikoli nniini wa itorito vakwe vakakwiipo vakawuya urukeny lwa Vafilisti. 33Abrahamu kavaaya nri wa mfumu efo Beer-sheba, kavaangya-u irina lya Nndumi Iruva, Iruva wa llung'anu. 34Abrahamu kakaa akee muny kulya urukeny lwa Vafilisti ando a mikonu miingyi.

वर्तमान में चयनित:

Mapookyony 21: MAS2

हाइलाइट

कॉपी