Mapookyony 20

Abrahamu na Abimeleki

1Abrahamu kookafo keenda uruka lwa Negebu, kakaa nnang'ani ya Kadeshi na Shuri, kakaa efo Gerari. 2Abrahamu kaamba endi kya Sara nka wakwe, “Ni mfwamaye,” Naasa Abimeleki mangyi ya Gerari karika vandu vandeende Sara. 3Kyeendi Iruva kasheya Abimeleki na yoorya elyi kio kammbia, “Kwanfwa yewe kimaruma kya nka yeto kulemwipoo mashika ni nka wa nndu.” 4Abimeleki lyo nyemmupaanafo, kaamba, “Woi Nndumi, a mmbo kushewaa vandu va usumanu?” 5A nshi we muni aleshivia, “yeu ni mfwama?” Na nka yeu muni kaamba, “Yeu ni mwanama. Na nrima woorokye na maako alatiri mbese, nkyo shiletana indo.” 6Iruva kammbia yooryeny, “Na yeny shiishi-da, mmbo kuletana, indo na nrima woorokye, nkyo neeny shakwiima kulashilyamarye, shakwiima kulampaani. 7Naasa ulaalu viira nka yeto kwa nndu yeto, mashika we ni nkisuku, nawe mmbo ashekuterevyaa, kukyie. Kyeendi kwallema immbiira, manya sheelyi dede yewe mmbo kushefwaa ando amwi na fyoose kutiri.” 8Abimeleki kakwipoo nraasi, kavaanga mashinga akwe moose, kavavia vandu mbony tilya shoose vakaita na maarwi awo, na vandu yewo vakairyaa nnu; 9Naasa Abimeleki kavaanga Abrahamu kammbia, “Nkyokyi kwalutannya? Nkyokyi shikulyamarye kutani kwasheengye yeny na vandu va umangyi lwakwa ulyamari yelu uniini indi? Mmbo kwashitannya kindo kilavaa itana.” 10Abimeleki kavia Abrahamu, “Mmbo kulelollya inda kutani kwatana indo?” 11Abrahamu kammbia, “Mmbo shilelollya deny, yaa vandu mbereiye Iruva-fo, nawo mmbo vashidimaa ishiwaa kimaruma kya nka wakwa.” 12Nawe dede ni mfwama, mfu wa nde, lyo nshi wa ma-fo, lyo kava nka wakwa. 13Naasa kyikava kyeeri Iruva aleshiuta yefo kyeny kwa nde, shammbia, “Elyi llyo isarya lyafo kusheshitannyaa, wo ando lusheendaa kwaambe, Yeu ni mwanama.” 14Naasa Abimeleki kaipoo suva, na ng'umbe, na mashinga, a kyuumi na mashinga, a kyika kaniinga Abrahamu, kambiirya nka wakwe Sara.

15Abimeleki kaamba, “Uruka lwakwa kululollye, sauwa ando kukundye.” 16Nawe kavia Sara, “Lola! Shaniingya mwanamau fesa kyiku tive kindo kyeyuuta sony mbee ya yewo woose vakee neewe, neewe kushevaa wa usumanu mbee ya vandu woose.” 17Abrahamu katereva Iruva, na Iruva kashiisa Abimeleki, na nka wakwe, na mashinga akwe nawo vakaira vana. 18Ni llya Nndumi Iruva enfinga nsanga va vandu va kyeny kwa Abimeleki valaire vana, kyeendwa ni Sara nka wa Abrahamu.

वर्तमान में चयनित:

Mapookyony 20: MAS2

हाइलाइट

कॉपी