Mapookyony 19

Uravi lwa Sodoma

1Naasa vasu valya vavii vakafika Sodomu nkwaany, na Loti nnyoo isaareny#19:1 Isaareny:Ando vamiku vekwanyaa irera-u mbony ta uruka. mwangony wa Sodomu ekai. Loti kavalollya kakwipoo nandevaambya, kawa si kifulu-fulu. 2Kaamba, “Vande vakwa, oshony kwakwa, mwaange mmba kwa ishinga lyany, mulale, muvesangya marende any. Na ngama nraasi mukupoo mukweengye.” Vakammbia, “Nshi indo-fo mmbo lukaa yoo poo kio tara-raa.”

3Kavalelemba deny, nawo vakasha vakaanga mmba kwakwe. Kavadeesya shoonga shisha, kavasongosya nkate ulatiri ntarang'u, vakalya. 4Elyi kulore vallala, vandu va muriny va Sodomu, vakashingillya mmba, vandu vakoo na vamiku, vandu woose wookye taari toose. 5Vakavaanga Loti vakammbia, “Vandu valya vasha kwafo kio ekyi nkwi vakai? Luveengye lukae nawo.” 6Loti kavasora mwangony karaya mwaango numa yakwe. 7Kaamba, “Naasa, shamutereva, vanavama vakwa, mulashetana uravi indo-fo. 8Loleny, shitiri vana va kyeny vavii kuloore valenkaa na nndu nndumi, shamutereva shivaende kwany, muvatannyi shaasa mulollya ni usumanu mison any, lyo vandu eva mulavatannyi kindo-fo, mashika elyi vakee mmba kwakwa.”

9Vakaamba, “Uka yaa!” Naasa vakaamba, “Nndu yeu ngara kweru; ate vai we mmbo akundye iluutya uvingo! Naasany mmbo lushekutanyaa yewe ukasha ngota wo.” Vakasembeiya nndu yeto nnu, Loti yeto, vakasembeya naambo vafishe mwaango. 10Kyeendi veny valya vavii vakaorwa maako awo, vakaomwa Loti neefo mmba, vakaraya mwaango. 11Vandu yewo vekee yoo mwangony vakawonisa ngapwa yeefwa miso, vadu na vaniini vakaaraya-u tasi veruuyaa mwaango.

Loti Ooka Sodomu

12Naasa vandu valya veny vavii vakavia Loti, kutiri nndu wafo ungyi yaa, sha nkwe, vana va kyuumi ao va kyika, ao vengyi vakee kunu muriny, kuvaute vaukefo; 13mashika mmbo lukeelyamara ando yaa, kimmba kiiyo kya vayo kyannanga mbee ya Nndumi Iruva, na Nndumi Iruva kaluruma lushelyamara-u. 14Loti keenda karera na wakwe vakwe valya verye yaalyika vefu vakwe, kavavia, “Kwiipony muuke ando yaa mashika Nndumi Iruva asherumataa muri yeu.” Kyaindi wo vakallolya sha nndu akeetavana-da. 15Ngama shuru vasu valya vakaitika Loti, vakammbia, “Kweete, ipoo nka wafo na vana yewo vafo vavii vakyeny, kulasherekya uraviny lwa muri yeu.” 16Kakuria-ria na veny valya vakantira Loti na nka wakwe wa vana vakwe va kyeny maako, shaasa Nndumi Iruva alekunda illyillya, vakanturushwa-fo vakanrwaa kipoo ya muri ulya. 17Llya vammaa insomuta umwi wa vasu valya kaamba, “Kukire kumuni, kulalole numa, nta kwulashesalala efo imungony fo, risheny kulya ifumbu-u, naambo mulasheirumaka.” 18Loti kavavia, “Woi mbee kilave indo-fo, 19Lola kishinga kyafo kyambonisa ilyilyo misony afo, neewe kweengera isarya lyafo kuleshitannya ishikira yeny, neeny shishidimaa irishya efo waambeu shikiyefo shilashefwa-fo.” 20Loleny kulya kwiifo muri munywa shishiidimaa irishya-fo mashika ukee kufii. Shiniingony muunu shirishye-fo. Eto ni muri muunywa deny nafo shishekiiya-fo.

21Kammbia, “Lola, shankwirikya na irero elyo nalyo, shire shilalyamara muri yeto kwawaaamba.” 22Angusyany, kundekiiya-fo, neeny nshitanaa kyindo-fo, kutani kwaanga-fo. Nkyo irina lya muri yeto lyikavaangwa Soari.

Sodoma na Gomora Kwalyamarwa

23Mwi mmbo wekesaama kyeeri kilya Loti aleanga Soari. 24Naasa Nndumi Iruva keende muro sha mbua efo Sodomu na Gomora wuuka iruveeu kwa Nndumi Iruva. 25Kawundwa miri yeyo na Imungo elyo lyoose neewo woose vekee miriny yeyo, na, myooro myoose yeemye-fo. 26Kyeendi nka wa Loti kalola numa, kava iwe lya mmbola.

27Abrahamu kasomuka ngama nandesalala mbee ya Nndumi Iruva. 28Nawe kalola taaari ya Sodomu na Gomora na uruka loose lwa Imungo elyo kalollya, ate ituuru lya nsu lyikeerwa na uwe. 29Kyikava elyi Iruva alerumata miri myoose ya Imungony yelyo, Iruva kakummbwa Abrahamu kauta Loti yefo urumatony llya alerumata miri ilya Loti ekai.

Vamoabu na Vaamori

30Loti kasaama auka Soari kafika ifumbuny, na vana vakwe vavii ando amwi nawe, kimmba aleereya ikaa efo Soari. Kakaa mbangeny, we na vana vakwe va kyeny vavii. 31Mwana mmbee kavia yeto n-du, “Nnde weeru mmbo ammikkwa na nkwiifo nndu nndumi wa ikaa neese shaasa kyikai ulaniny koose-fo. 32Ndifo, luniinge nnde weru nfinyu, lukae nawe, naambo luonisye ndeeru ngyeeri.” 33Vakaniinga nde yaawo nfinyu kio kilya, yeto nniini kakaa na ndeeye, nta ndeeye nalamanyi kyeeri alekaa nawe na nta kyeeri aleuka-u. 34Naasa elyi lya ndesi ulya nniini kavia ulya n-du, “Kwiishi, ukwau mmbo shilekaa na ndeyeakwa, lunniinge-se nfinyu kio ekyi neewe kukee nawe.” 35Vakanniinga lyingyi nde yaawo nfinyu kio kilya; ulya n-du nawe kandekaa nawe nta ndeeye nalamanyi kyeeri alekaa nawe, nta kyeeri aleuka-u. 36Naasa vana valya vavii va Loti vakakufinga kyuuka na nde yaawo. 37Ulya nniini kaira mwana kammbaanga irina lyakwe ni Moabu; yeto mmbwe ndeye wa Vamoabi fika inu. 38Na ulya n-du nawe kaira mwana kammbaanga irina lyakwe ni Benami; eto mmbwe ndeye wa Vaamoni fika inu.

वर्तमान में चयनित:

Mapookyony 19: MAS2

हाइलाइट

कॉपी