LUKA 9

1NAKE agĩĩta arĩa ikũmi na erĩ mongane hamwe, akĩmahe hinya na wathani wa gwathaga ndaimono ciothe, na wa kũhonagia andũ mĩrimũ. 2Agĩcoka akĩmatũma mathiĩ makaheanage ũhoro wa ũthamaki wa Ngai, na makahonagie andũ arũaru. 3Nake akĩmera atĩrĩ, Mũtigakuue kĩndũ o na kĩ kĩa rũgendo rũanyu, o na mũtirima, kana mburungo, kana mũgate, kana mbia; na mũndũ ndagekuuĩre nguo igĩrĩ. 4Nayo nyũmba o ĩrĩa mũrĩtonyaga, ikaragai kuo, na muumage kuo mũgĩthiĩ. 5#Atũm 13.51.#Luk 10.4-11.Na andũ othe arĩa matarĩmũgwataga ũgeni-rĩ, mũkiuma itũũra rĩu, thukiai magũrũ manyu rũkũngũ rũitĩke, rũtuĩke rũa ũira kũrĩ o. 6Magĩkiuma hau maarĩ, magĩthiĩ makĩhunguraga mĩciĩ, makĩhunjagia Ũhoro-ũrĩa-Mwega, na makĩhonanagia kũndũ guothe.

7 # Mat 16.14; Mar 8.28; Luk 9.19. Na rĩrĩ, Herode ũrĩa mũthamaki nĩaaiguire ũhoro wa maũndũ marĩa mothe mekirũo: nake akĩrigwo mũno, nĩ ũndũ nĩkwoigagwo nĩ andũ amwe atĩ Johana nĩaariũkĩte, akoima kũrĩ arĩa akuũ: 8angĩ makoiga atĩ Elija nĩonekete; angĩ nao makoiga atĩ mũnabii ũmwe wa tene nĩaariũkĩte. 9Nake Herode akiuga atĩrĩ, Johana nĩndamũtinithirie mũtwe: kaĩ ũyũ njiguaga ndeto icio ũhoro wake arĩ ũ? Agĩkĩenda kũmuona.

10Nao atũmwo maacoka, makĩĩra Jesu maũndũ marĩa mekĩte. Nake akĩehera kuo agĩthiĩ nao itũũra rĩetagwo Bethisaida. 11No rĩrĩ, andũ a kĩrĩndĩ maamenya ũguo, makĩmũrũmĩrĩra: nake akĩmakũngũĩra akĩmaarĩria ũhoro wa ũthamaki wa Ngai; na arĩa maabatairio nĩ kũhonio, akĩmahonia. 12Narĩo riũa rĩgĩtua gũthũa; nao arĩa ikũmi na erĩ magĩũka kũrĩ we makĩmwĩra atĩrĩ, Ĩra andũ a kĩrĩndĩ mathiĩ, makinye mĩciĩ-inĩ, o na ng’ongo iria irĩ hakuhĩ, makaraare kuo, na mamathe irio: nĩ gũkorũo haha tũrĩ no werũ. 13Nowe akĩmera atĩrĩ, Mahei irio arĩ inyuĩ. Nao makĩmwĩra atĩrĩ, Tũtirĩ na kĩndũ, tiga mĩgate ĩtano na ciũngũyũ igĩrĩ; no anga tũthiire tũkagũrĩre andũ aya othe irio. 14Amu nĩhaarĩ arũme ta ngiri ithano. Nake akĩĩra arutwo ake atĩrĩ, Merei maikare thĩ, o gĩkundi andũ mĩrongo ĩtano, ĩtano. 15Nao magĩĩka ũguo, makĩmaikaria thĩ othe. 16Nake akĩoya mĩgate ĩo ĩtano na ciũngũyũ icio igĩrĩ, agĩcoka akĩrora Igũrũ, agĩcirathima, agĩcienyũranga, akĩnengera arutwo matwarĩre andũ a kĩrĩndĩ. 17Nao makĩrĩa makĩhũna othe: gũgĩcoka gũkĩoyũo cienyũ iria ciatigarire ciondo ikũmi na igĩrĩ.

18Na gũgĩkinya atĩrĩ, hĩndĩ ĩrĩa aahoyaga Ngai keheri-inĩ, arutwo ake magĩkorũo marĩ hamwe nake. Nake akĩmoria atĩrĩ, Andũ a kĩrĩndĩ manduaga ũ? 19#Mat 14.1,2; Mar 6.14,15; Luk 9.7,8.Nao makĩmũcokeria makiuga atĩrĩ, Moigaga atĩ wee nĩwe Johana Mũbatithania; na amwe angĩ moigaga atĩ nĩwe Elija; na angĩ moigaga atĩ mũnabii ũmwe wa tene nĩariũkĩte. 20#Joh 6.68,69.Nake akĩmoria atĩrĩ, Ĩ, inyuĩ na inyuĩ-rĩ, mũnduaga ũ? Nake Petero akĩmũcokeria akĩmwĩra atĩrĩ, Wee nĩwe Kristo ũrĩa wa Ngai. 21Nake akĩmakaania akĩmaatha atĩ matikere mũndũ o na ũmwe ũhoro ũcio, 22akiuga atĩrĩ, Mũrũ wa Mũndũ ndarĩ hingo atakona mathĩna maingĩ, na aregwo nĩ athuri na athĩnjĩri-Ngai arĩa anene o na aandĩki-marũa, na oragwo, na acoke ariũkio mũthenya wa gatatũ.

23 # Mat 10.38; Luk 14.27. Agĩcoka akĩĩra andũ othe atĩrĩ, Mũndũ o wothe angĩenda kũ’hikĩra nĩerege, na oyage, o mũthenya, mũtĩ wake wa kwambĩrũo, anũmagĩrĩre. 24#Mat 10.39; Luk 17.33; Joh 12.25.Nĩ gũkorũo mũndũ o wothe wendaga gũtũũria muoyo wake, ũcio nĩ kũũrũo akorũo nĩguo; na ũrĩa ũkorũo nĩ muoyo wake nĩ ũndũ wakwa, ũcio nĩakaũtũũria. 25Nĩ ũndũ-rĩ, mũndũ eguna na kĩ, angĩĩgwatĩra thĩ yothe, na ate muoyo wake mwene kana orũo nĩguo? 26Nĩ gũkorũo mũndũ o wothe angĩconoka nĩ niĩ, na aconokere ciugo ciakwa, nĩwe ũgaconokerũo nĩ Mũrũ wa Mũndũ rĩrĩa agoka arĩ na riri wake mwene, na wa Ithe, o na wa araika arĩa atheru. 27No ngũmwĩra atĩrĩ na ma, Andũ aya marũgamĩte haha, nĩharĩ amwe ao matagacama gĩkuũ o na atĩa, mataambĩte kuona ũthamaki wa Ngai.

28Na gũgĩkinya atĩrĩ thutha wa mohoro macio, ta matukũ manana maathira, agĩtwarana na Petero, na Johana, na Jakubu, akĩambata kĩrĩma nao, ahoere Ngai kuo. 29Na akĩhoyaga-rĩ, ũthiũ wake ũkĩgarũrũka ũrĩa wahaanaga, nacio nguo ciake ikĩerũha, igĩkenga mũno. 30Na rĩrĩ, hagĩkorũo athuri erĩ makĩaria nake, nĩo Musa na Elija; 31makĩmoimĩrĩra me na riri, makĩaria ũhoro wa ikua rĩake rĩrĩa akiriĩ gũkuĩra Jerusalemu. 32Nake Petero, na arĩa maarĩ hamwe nake, magĩkorũo mahĩtĩtwo nĩ toro; no rĩrĩa maarahũkire, makĩĩigua, makĩona riri wake, o na makĩona athuri acio erĩ marũgamĩte hamwe nake. 33Na gũgĩkinya atĩrĩ, hĩndĩ ĩrĩa andũ acio maatiganaga nake, mathiĩ, Petero akĩĩra Jesu atĩrĩ, Mũnene witũ, nĩtwagĩrĩirũo nĩ gũikara gũkũ; reka twake ithũnũ ithatũ, kĩmwe gĩaku, na kĩmwe kĩa Musa, na kĩmwe kĩa Elija: nake ndoĩ ũrĩa oigaga. 34Na akĩaragia maũndũ macio-rĩ, gũgĩũka itu rĩkĩmahumbĩra; nao magĩĩtigĩra nĩ ũndũ wa kũhumbĩrũo nĩrĩo. 35#Isa 42.1; Mat 3.17; 12.18; Mar 1.11; Luk 3.22.#2 Pet 1.17,18.Na mũgambo uumĩte itu-inĩ rĩu ũkiuga atĩrĩ, Ũyũ nĩwe Mũrũ wakwa, o ũrĩa ndĩĩthurĩire: mũiguagei. 36Na hĩndĩ ĩrĩa mũgambo ũcio waiguirũo, Jesu agĩcoka kuonwo arĩ wiki. Nao magĩkira, na matierire mũndũ o na ũmwe matukũ macio ũndũ o wothe wa maũndũ macio monire.

37Na gũgĩkinya atĩrĩ, mũthenya ũyũ ũngĩ maaikũrũka kĩrĩma, Jesu agĩtũngwo nĩ kĩrĩndĩ kĩingĩ ma. 38Na rĩrĩ, mũndũ ũmwe wa kĩrĩndĩ kĩu akĩanĩrĩra akiuga atĩrĩ, Mũrutani, ndagũthaitha ũrore mũrũ wakwa; nĩ gũkorũo nĩ mwana wakwa wa mũmwe: 39na rĩrĩ, arĩ na ngoma ĩmũnyitaga, na kahinda o kau agaitĩka gũkaya, nayo ngoma nĩĩmũthiorangaga, ĩgatũma arute mũhũyũ, na nĩ hinya mũno ĩkĩmũtiga, na nĩĩmũtihũrũrangagia ũũru. 40Na nĩndĩrathaithire arutwo aku mamĩrute; nao mararemwo. 41Nake Jesu agĩcokia akiuga atĩrĩ, Rũciaro rũrũ rũtetĩkagia na rũtũrĩku, ngũtũũra na inyuĩ ndĩmũkiragĩrĩria nginya hĩndĩ ĩ? Ta rehe mũrũguo haha. 42Na agĩũkaga-rĩ, ndaimono ĩkĩmũtungumania thĩ, ĩkĩmũthiora ũũru. Nowe Jesu agĩkaania ngoma ĩo thũku, akĩhonia kĩhĩĩ kĩu, agĩgĩcokeria ithe. 43Nao othe makĩgegeara nĩ ũndũ wa ũkaru ũcio mũnene wa Ngai.

Na hĩndĩ ĩrĩa andũ othe maagegaga nĩ ũndũ wa maũndũ marĩa mothe ekaga, akĩĩra arutwo ake atĩrĩ, 44Iguai wega na mũririkane mohoro maya: nĩ gũkorũo Mũrũ wa Mũndũ nĩakaneanwo moko-irĩ ma andũ. 45Nao matiigana gũtaũkĩrũo nĩ ũhoro ũcio, nĩ ũndũ nĩmaahithĩtwo matikaũmenye: na magĩĩtigĩra kũmũũria gĩtũmi kĩaguo.

46 # Luk 22.24. Na gũkĩgĩa ngarari kũrĩ o, atĩ nĩ ũrĩkũ wao ũngĩtuĩka mũnene kũrĩ arĩa angĩ. 47Nake Jesu aamenya meciria ma ngoro ciao, akĩrehe kaana agĩkarũgamia mwena-inĩ wake, 48#Mat 10.40; Luk 10.16; Joh 13.20.agĩcoka akĩmera atĩrĩ, Mũndũ o wothe ũngĩĩtĩkĩra kaana gaka nĩ ũndũ wa rĩĩtwa rĩakwa, nĩ niĩ etĩkĩra: nake ũrĩa ũngĩnjĩtĩkĩra niĩ, nĩetĩkĩrĩte Ũrĩa wandũmire: nĩ gũkorũo ũrĩa wĩ mũnyinyi kũrĩ arĩa angĩ thiritũ-inĩ yanyu, ũcio nĩwe mũnene.

49Nake Johana akĩmũcokeria akĩmwĩra atĩrĩ, Mũnene witũ, nĩtũronire mũndũ akĩruta andũ ndaimono na rĩĩtwa rĩaku, na tũramũkaania, nĩ gũkorũo ndatwaranaga na ithuĩ. 50No Jesu akĩmwĩra atĩrĩ, Mũtikamũkaanie: nĩ gũkorũo ũrĩa ũtarĩ ũthũ na inyuĩ, ũcio nĩ wanyu.

51Na gũgĩkinya atĩrĩ, rĩrĩa matukũ make ma gũtwarũo Igũrũ maakuhĩhĩirie kũhinga, agĩthiĩ o arũngĩrĩirie arorete Jerusalemu, 52akĩrekia arekio mathiage mbere yake: nao magĩthiĩ, magĩtonya itũũra rĩmwe rĩa Asamaria, mamũthondekere handũ. 53Nao andũ akuo makĩrega kũmũgwata ũgeni, nĩ ũndũ nĩonagwo ta arorete Jerusalemu. 54#2 Ath 1.9-16.Na rĩrĩ, arutwo ake Jakubu na Johana mona ũguo, makĩmũũria atĩrĩ, Mwathani, nĩũkwenda twĩtie mwaki uume Igũrũ ũmanine, [o ta ũrĩa Elija ekire]? 55Nowe akĩĩhũgũra akĩmakaania [akiuga atĩrĩ, Mũtiũĩ roho ũrĩa mũrĩ aguo, ũrĩa ũtariĩ; 56tondũ Mũrũ wa Mũndũ ndokire kũnina mĩoyo ya andũ, no kũmĩhonokia.] Magĩgĩthiĩ mũciĩ ũngĩ.

57Na hĩndĩ ĩrĩa maathiaga, marĩ njĩra, mũndũ ũmwe akĩmwĩra atĩrĩ, Nĩndĩĩkũrũmagĩrĩra kũrĩa guothe ũrĩthiaga. 58Nake Jesu akĩmwĩra aĩtĩ, Mbwe ii na marima, o na nyoni cia rĩera-inĩ nĩirĩ na itara; no rĩrĩ, Mũrũ wa Mũndũ ndarĩ handũ o na ha kũigĩrĩra mũtwe. 59Agĩcoka akĩĩra mũndũ ũngĩ atĩrĩ, Nũmĩrĩra. Nake mũndũ ũcio akĩmwĩra atĩrĩ, Mwathani, njĩtĩkĩria nyambe ’thiĩ ngathike awa. 60Nowe akĩmwĩra atĩrĩ, Tiga arĩa akuũ methikagĩre akuũ ao ene; nowe, thiĩ, ũkahunjanagĩrie ũhoro wa ũthamaki wa Ngai. 61#1 Ath 19.20.Na mũndũ ũngĩ nake akĩmwĩra atĩrĩ, Nĩndĩĩkũrũmagĩrĩra, Mwathani; no amba ũnjĩtĩkĩrie ’thiĩ ngoigĩre andũ arĩa marĩ gwitũ ũhoro. 62Nowe Jesu akĩmwĩra atĩrĩ, Mũndũ o wothe angĩnyita mũraũ na acoke arore na thutha, ndaagĩrĩirũo nĩ gũtuĩka wa ũthamaki wa Ngai.

वर्तमान में चयनित:

LUKA 9: OGKBIBLE

हाइलाइट

कॉपी