LUKA 10
10
1NA rĩrĩ, maũndũ macio maathira, Mwathani agĩthura andũ angĩ mĩrongo mũgwanja, akĩmatũma o andũ erĩ, erĩ, mathiĩ mbere yake matũũra mothe o na kũndũ guothe kũrĩa aakiriĩ gũthiĩ we mwene. 2#Mat 9.37,38.Agĩkĩmera atĩrĩ, Magetha nĩ maingĩ, no aruti wĩra nĩ anyinyi: nĩ ũndũ ũcio thaithai Mwathani mwene magetha atĩ atũme aruti wĩra mathiĩ magetha-inĩ make. 3#Mat 10.16.Wĩthiĩrei: atĩrĩ, ndamũtũma ta tũbũri o kũrĩa kwĩ njũi. 4Tigai gũkuua o na kamondo ga thendi, kana mburungo, kana iratũ: na mũtikageithie mũndũ njĩra-inĩ. 5Na rĩrĩ, nyũmba o yothe ĩrĩa mũrĩtonyaga, ambagai kuuga atĩrĩ, Thayũ ũrogĩa nyũmba ĩno. 6Na kũngĩkorũo nĩkũrĩ mũndũ wendaga thayũ kuo, thayũ ũcio wanyu nĩũgaikara nake; na kũngĩkorũo gũtirĩ, thayũ ũcio wanyu nĩũkamũcokerera. 7#1 Kor 9.14; 1 Tim 5.18.Ningĩ ikaragai nyũmba o ĩo, mũrĩage na mũnyuage o kĩrĩa mũrĩheagwo: nĩ gũkorũo mũruti wĩra nĩaagĩrĩirũo nĩ kũheagwo mũcara wake. Tigai gũthama nyũmba ĩmwe mũgathiĩ ĩngĩ. 8Na ningĩ o itũũra rĩrĩa rĩothe mũrĩtonyaga, nao andũ akuo mamũgwate ũgeni-rĩ, rĩagai o irio iria mũngĩheo: 9na honagiai arĩa arũaru marĩ kuo, na mũmerage atĩrĩ, Ũthamaki wa Ngai nĩũmũkuhĩhĩirie. 10#Atũm 13.51.No rĩrĩ, itũũra rĩrĩa rĩothe mũrĩtonyaga, nao andũ akuo maage kũmũgwata ũgeni-rĩ, umagarai mũgathiĩ njĩra-inĩ ciarĩo, muuge atĩrĩ, 11#Mat 10.7-14; Mar 6.8-11; Luk 9.3-5.O na rũkũngũ rũa itũũra rĩanyu rũrĩa rũtũgwatĩte magũrũ, nĩtwarũhuura, rũtuĩke rũa kũmuumbũra: ĩndĩ mũmenye atĩrĩ, atĩ ũthamaki wa Ngai nĩũmũkuhĩhĩirie. 12#Kĩam 19.24-28; Mat 11.24; Mat 10.15.Ngũmwĩra atĩrĩ, atĩ Sodomu nĩgũkagĩa murũ, mũthenya ũcio, gũkĩra itũũra rĩu. 13#Isa 23.1-18; Ezek 26.1—28.26; Joel 3.4-8; Amos 1.9,10; Zek 9.2-4.Wee, Korazini, kaĩ wĩ na haaro-ĩ! O nawe, Bethisaida, kaĩ wĩ na haaro-ĩ! Nĩ ũndũ-rĩ, ciĩko cia hinya iria ciekirũo kwanyu ingĩekirũo Turo na Sidoni, andũ akuo nĩmangĩaherire tene, maikarĩte thĩ mehumbĩte makũnia, na makehurĩria mũhu mĩtwe. 14No rĩrĩ, Turo na Sidoni nĩgũkagĩa murũ cira-inĩ kũrĩ inyuĩ. 15#Isa 14.13-15.Nawe Kaperinaumu, ũũĩ nĩ gũtũũgĩrio ũgatũũgĩrio ũkinye Igũrũ? He! Nĩ kũharũrũkio ũkaharũrũkio ũkinye kwa-ngoma. 16#Mat 10.40; Mar 9.37; Luk 9.48; Joh 13.20.Mũndũ ũrĩa ũmũiguaga inyuĩ, nĩ niĩ aiguaga; na ũrĩa ũmũregaga inyuĩ, nĩ niĩ aregaga; na ũrĩa ũndegaga niĩ-rĩ, nĩaregaga Ũrĩa wandũmire.
17Nao andũ acio mĩrongo mũgwanja makĩhũndũka makenete, makiuga atĩrĩ, Mwathani, o na ndaimono nĩciathĩkaga nĩ ithuĩ nĩ ũndũ wa rĩĩtwa rĩaku. 18Nake akĩmera atĩrĩ, Nĩnyonete Shaitani akĩgũa ta rũheni ruumĩte Igũrũ. 19#Thab 91.13.Atĩrĩrĩ, nĩndĩmũheete wathani nĩ getha mũkinyangagĩrĩrie nyamũ-cia-thĩ, o na tũng’aurũ; o na ngamũhe wathani ũkĩrĩte hinya wothe wa thũ iitũ: na gũtirĩ kĩndũ gĩkamwĩka ũũru, o na atĩa. 20Ĩndĩ tigagai gũkena nĩ ũndũ ngoma nĩciathĩkaga nĩ inyuĩ; no mũkenage nĩ ũndũ marĩĩtwa manyu nĩmaandĩkĩtwo o Igũrũ.
21Na rĩrĩ, o thaa ĩo agĩkena, arĩ na Roho Mũtheru, akiuga atĩrĩ, Ndakũgatha, Awa, wee Mwathani wa Igũrũ o na wa thĩ, nĩ ũndũ nĩũhithĩte andũ arĩa ogĩ na imenyi maũndũ macio, ũkamaguũrĩria tũkenge: noguo, Awa, nĩ gũkorũo ũguo nĩguo wonire wagĩrĩire. 22#Joh 3.35; Joh 10.15.Nĩ’nengeretwo maũndũ mothe nĩ Awa: na gũtirĩ mũndũ ũũĩ Mũriũ tiga Ithe witũ; ningĩ gũtirĩ mũndũ ũũĩ Ithe witũ tiga o Mũriũ, o na ũrĩa o wothe Mũriũ endaga kũmũguũrĩria. 23Nake akĩĩhũgũrĩra arutwo ake, akĩmera atĩrĩ, hatarĩ muugio, Gũkena-rĩ, nĩ maitho marĩa monaga maũndũ marĩa inyuĩ muonaga: 24nĩ gũkorũo ngũmwĩra atĩrĩ, atĩ anabii o na athamaki aingĩ nĩmendaga kuona maũndũ marĩa inyuĩ muonaga, na matiamonire; magakĩenda kũigua maũndũ marĩa mũiguaga, na matiamaiguire.
25 #
Mat 22.35-40; Mar 12.28-34. Na rĩrĩ, mũrutani ũmwe wa watho akĩrũgama akĩmũgeria, akĩmũũria atĩrĩ, Mũrutani, ngwĩka atĩa nĩ getha ngagaĩrũo muoyo ũtagathira? 26Nake Jesu akĩmũũria atĩrĩ, Kwandĩkĩtwo atĩa watho-inĩ wa Ngai? Ũthomaga atĩa? 27#Gũcok 6.5; Alaw 19.18.Nake akĩmũcokeria akiuga atĩrĩ, Enda Mwathani Ngai waku na ngoro yaku yothe, o na muoyo waku wothe, o na hinya waku wothe, o na gwĩciria gwaku guothe; na ningĩ enda mũndũ wa itũũra rĩanyu, o ta ũrĩa wĩendete wee mwene. 28#Alaw 18.5.Nake akĩmwĩra atĩrĩ, Nĩwacokia ũhoro o wega: ĩkaga o ũguo na nĩũgũtũũra muoyo. 29Nake mũndũ ũcio, akĩenda gwĩtua mwega, agĩcoka akĩũria Jesu atĩrĩ, Mũndũ ũrĩa wĩtagwo ũũ, Mũndũ wa itũũra riitũ, nĩ ta ũrĩkũ? 30Nake Jesu akĩmũcokeria akiuga atĩrĩ, Kwarĩ mũndũ wathereraga athiĩ Jeriko, oimĩte Jerusalemu; nake agĩkorũo nĩ atunyani, nao makĩmũruta nguo ciake na makĩmũhũra, magĩthiĩ, makĩmũtiga atigairie hanini atumbũkane. 31Na gũgĩtuĩka atĩrĩ, atĩ nĩkwarĩ mũthĩnjĩri-Ngai wathereraga, akĩgera njĩra ĩo: nake ona mũndũ ũcio, akĩhĩtũkĩra o mũkĩra-inĩ ũrĩa ũngĩ wa njĩra. 32O ũguo taguo Mũlawii ũmwe nake agĩkinya o handũ hau, nake aamuona, akĩhĩtũkĩra o mũkĩra-inĩ ũrĩa ũngĩ wa njĩra. 33#2 Maũ 28.15.No rĩrĩ, Mũsamaria ũmwe agĩthiĩ ũgeni agĩkinya o hau aarĩ: nake aamuona, akĩringwo nĩ tha, 34agĩthiĩ harĩ we, akĩmuoha kũrĩa aatihangĩtio, agĩgũitĩrĩria maguta na ndibei; agĩcoka akĩmũhaicia igũrũ rĩa nyamũ yake mwene, akĩmũtwara o kinya nyũmba ya ageni, akĩmũmenyerera. 35Na mũthenya ũyũ ũngĩ akĩruta ciringi igĩrĩ akĩnengera mwene nyũmba ĩo ya ageni, akĩmwĩra atĩrĩ, Mũmenyagĩrĩre; na rĩrĩ, o kĩndũ kĩrĩa kĩngĩ ũngĩruta nĩ ũndũ wake, nĩngakũrĩha rĩrĩa ngacoka. 36Rĩu-rĩ, andũ acio atatũ-rĩ, ũgwĩciria nĩ ũrĩkũ wao wekire mũndũ ũcio wakorirũo nĩ atunyani o ta ũrĩa mũndũ angĩĩkwo nĩ mũndũ wa itũũra rĩao? 37Nake mũrutani ũcio wa watho akĩmũcokeria atĩrĩ, Nĩ ũcio wamũiguĩrĩire tha. Nake Jesu akĩmwĩra atĩrĩ, Thiĩ, ũgekanage o ta ũguo.
38 #
Joh 11.1. Na rĩrĩ, hĩndĩ ĩrĩa methiagĩra na njĩra agĩtonya mũciĩ ũmwe: na mũtumia wetagwo Maritha akĩmũgwata ũgeni nyũmba-inĩ yake. 39Nake aarĩ na mwarĩ wa nyina wetagwo Mariamu, nake aaikarĩte thĩ magũrũ-inĩ ma Mwathani, agathikagĩrĩria ũrĩa oigaga. 40Nowe Maritha nĩaahang’aga mũno akĩmathĩra andũ aingĩ; agĩũka harĩ Jesu akĩmwĩra atĩrĩ, Mwathani, kaĩ ũtekũũria atĩ mwarĩ wa maitũ nĩandigĩte ndĩmũmathĩre ndĩ nyiki? Ndũkĩmwĩre andeithie. 41Nowe Mwathani akĩmũcokeria akĩmwĩra atĩrĩ, Maritha, Maritha, nĩũtangĩkĩte na ũkenyarira nĩ ũndũ wa maũndũ maingĩ: 42no ũndũ ũmwe ũbataranĩtie: na rĩrĩ, Mariamu nĩethurĩire rũĩga rũrĩa rũega, o rũrĩa atangĩtunyũo.
वर्तमान में चयनित:
LUKA 10: OGKBIBLE
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 2019
