JOHANA 5
5
1THUTHA wa maũndũ macio gũkĩgĩa na gĩathĩ kĩa Ayahudi, nake Jesu akĩambata Jerusalemu.
2Na rĩrĩ, kũu Jerusalemu, hakuhĩ na kĩhingo kĩa ng’ondu, kwĩ na iria rĩĩtagwo na Kĩhibirania atĩrĩ, Bethesida, na nĩrĩakĩrĩirũo ithaku ithano. 3Na kũu ithaku-inĩ icio nĩgwakomaga andũ gĩkundi kĩnene, arĩa arũaru, atumumu, na ithua, na arĩa monjete, [metereire rĩrĩa maĩ marĩtherũka. 4Nĩ gũkorũo gwakinya hingo na, kwĩ mũraika waikũrũkaga agatonya iria rĩu thĩinĩ akoinjuga maĩ; na hingo ĩo mũndũ o ũrĩa waamba gũtoboka kuo maĩ maarĩkia kuunjugĩka nĩaahonaga mũrimũ o ũrĩa arĩ naguo.] 5Na haarĩ mũndũ ũmwe watũire na mũrimũ mĩaka mĩrongo ĩtatũ na ĩnana. 6Jesu aamuona hau akomiĩ, na aamenya atĩ rĩu nĩaninĩte ihinda inene arũarĩte ũguo, akĩmũũria atĩrĩ, Nĩũkwenda kũhonio? 7Nake mũndũ ũcio mũrũaru akĩmũcokeria atĩrĩ, Mũthuri ũyũ, niĩ ndirĩ na mũndũ wa kũndonyia iria thĩinĩ, rĩrĩa maĩ mekuunjugĩka; ngĩthiĩ ho, mũndũ ũngĩ agaikũrũka mbere yakwa. 8Nake Jesu akĩmwĩra atĩrĩ, Ũkĩra, woe kĩbarĩ gĩaku, wĩtware. 9Na kahinda o kau mũndũ ũcio akĩhona, akĩoya kĩbarĩ gĩake agĩĩtwara.
Na rĩrĩ, mũthenya ũcio kwarĩ gwa thabatũ. 10#Neh 13.19; Jer 17.21.Nao Ayahudi magĩkĩĩra mũndũ ũcio wahonetio atĩrĩ, Ũmũthĩ nĩ gwa thabatũ; ndũrĩ na rũtha ũkuue kĩbarĩ gĩaku. 11Nake akĩmacokeria atĩrĩ, Ũrĩa wa’honia, nĩwe wanjĩra atĩrĩrĩ, Oya kĩbarĩ gĩaku, wĩtware. 12Magĩkĩmũũria, Mũndũ ũcio nũ wakwĩra, Oya kĩbarĩ gĩaku, wĩtware? 13Ĩndĩ ũcio wahonetio agĩkorũo ndamũũĩ: tondũ Jesu nĩethiĩrĩire, amu handũ hau haarĩ kĩrĩndĩ kĩingĩ. 14Thutha Jesu akĩmũkora hekarũ-inĩ, akĩmwĩra atĩrĩ, One, rĩu nĩwahonio; ndũkanacoke kwĩhia, ndũkae kuona ũndũ mũũru kũrĩ ũcio uuma naguo. 15Nake mũndũ ũcio agĩthiĩ, akĩĩra Ayahudi atĩ nĩ Jesu ũmũhonetie. 16Na tondũ wa ũhoro ũcio Ayahudi nĩmaaheaga Jesu thĩna, nĩ ũndũ atĩ nĩekaga maũndũ ta macio mũthenya wa thabatũ. 17Nake Jesu aamacokeirie ũhoro atĩrĩ, Awa nginya rĩu atũire o arutaga wĩra, o na niĩ nĩndutaga. 18Na tondũ wa ũhoro ũcio Ayahudi magĩcaria njĩra makĩria mamũũrage, nĩ ũndũ to kũhingũra ahingũraga mũhingo wa thabatũ, no ningĩ nĩetaga Ngai Ithe wake mwene, akeiganania na Ngai.
19Tondũ ũcio Jesu agĩcokia ũhoro akĩmera, Ndamwĩra atĩrĩ, o ma, ma, Mũriũ ndangĩhota gwĩka ũndũ eĩrĩte we mwene, tiga ũrĩa onaga Ithe agĩĩka; nĩ gũkorũo maũndũ o marĩa we ekaga, nomo Mũriũ nake ekaga o ũndũ ũmwe. 20Nĩ gũkorũo Ithe nĩenda Mũriũ, akamuonagia maũndũ mothe we mwene ekaga; na nĩakamuonia ciĩko nene kũrĩ ici, inyuĩ mũgege. 21Amu-rĩ, o ta ũrĩa Ithe okĩragia arĩa akuũ akamekĩra muoyo, noguo Mũriũ nake ekagĩra andũ muoyo, o arĩa ekwenda gwĩkĩra. 22Amu-rĩ, Ithe ningĩ ndarĩ mũndũ atuagĩra cira; ũtui wothe wa cira-rĩ, nĩanengerete Mũriũ, 23nĩ getha andũ othe mekĩrĩre Mũriũ, o ta ũrĩa mekĩrĩire Ithe. Ũrĩa ũtekĩrĩire Mũriũ ndekĩrĩire Ithe ũrĩa wamũrekirie. 24Ndamwĩra atĩrĩrĩ, o ma, ma Mũndũ ũiguĩte uuge wakwa na agetĩkia ũrĩa wandekirie, e na muoyo wa tene na tene, na ti wa gũcirithio; nĩarĩkĩtie kuuma gĩkuũ-inĩ agatonya muoyo-inĩ. 25Ndamwĩra atĩrĩ, o ma, ma, Kwĩ hingo ĩroka, o na rĩu no nginyu, andũ arĩa akuũ makaigua mũgambo wa Mũrũ wa Ngai; na arĩa mekũigua magĩe na muoyo. 26Amu-rĩ, o ta ũrĩa Ithe e na muoyo thĩinĩ wake mwene, noguo aaheire Mũriũ o nake muoyo agĩe naguo thĩinĩ wake mwene; 27na akĩmũhe hinya atuagĩre andũ cira, tondũ nĩwe Mũrũ wa Mũndũ. 28Mũtikagege nĩ ũhoro ũcio; amu kwĩ hingo ĩroka arĩa othe me thĩinĩ wa mbĩrĩra makaigua mũgambo wake, 29#Dan 12.2.na moime kuo, arĩa mekaga wega moimĩre iriũkĩro rĩa muoyo, na arĩa mekaga ũũru moimĩre iriũkĩro rĩa gũcirithio.
30Ndingĩhota gwĩka ũndũ ndĩĩĩrĩte niĩ mwene: ũrĩa njiguaga, noguo nduaga; narĩo itua rĩakwa nĩ rĩa kĩhooto, nĩ gũkorũo ti kwenda gwakwa mwene kũmbataragia, no kwenda kwa ũrĩa wandekirie. 31Ingĩkorũo ngĩyumbũrĩra ũhoro wakwa niĩ mwene-rĩ, ũira wakwa ndũngĩtuĩka wa ma; 32ndĩ na ũngĩ uumbũraga ũhoro wakwa, na nĩnjũĩ atĩ ũira ũrĩa oimbũraga ũhoro wakwa no wa ma. 33#Joh 1.19-27; 3.27-30.Inyuĩ nĩmwarekanirie kwĩ Johana, nake nĩ ũhoro-ũrĩa-wa-ma oimbũrire ũira waguo. 34No rĩrĩ, ũira ũrĩa niĩ njĩtĩkagĩra ti wa mũndũ; no nĩndoiga ũguo nĩ getha mũkahonoka. 35We-rĩ, nĩwe warĩ tawa ũrĩa wakanĩte na ũkamũrĩka, na inyuĩ nĩmwetĩkĩrire gũkenio nĩ ũtheri wake ihinda. 36No rĩrĩ, ũira ũrĩa ndĩ naguo niĩ wĩ bata kũrĩ ũcio wa Johana; nĩ gũkorũo mawĩra marĩa Ithe witũ a’heete ndute ndĩkie, o mo maũndũ macio njĩkaga-rĩ, macio nĩmoimbũraga ũhoro wakwa atĩ nĩ Ithe witũ ũndeketie. 37#Mat 3.17; Mar 1.11; Luk 3.22.O nake Ithe witũ ũcio wandekirie, we mwene nĩoimbũrĩte ũhoro wakwa. Inyuĩ mũtirĩ mwaigua mũgambo wake, kana mũkona ũrĩa atariĩ. 38O naguo uuge wake ũrĩa oigĩte mũtitũũraga naguo ngoro-inĩ cianyu; amu-rĩ, nĩmũregete gwĩtĩkia ũrĩa aarekirie. 39Mũtuĩragia Maandĩko-inĩ, nĩ ũndũ mwĩgeragĩria atĩ mũrĩ onu muoyo wa tene na tene thĩinĩ wamo; na Maandĩko macio nĩmo moimbũrĩte ũhoro wakwa; 40na rĩrĩ, mũtingĩĩtĩkĩra gũũka kũrĩ niĩ, nĩguo muone muoyo. 41Ti atĩ niĩ ndenda kũgoocwo nĩ andũ. 42No rĩrĩ, inyuĩ nĩndĩmũũĩ, ngamenya atĩ wendo wa Ngai mũtirĩ naguo ngoro thĩinĩ. 43Njũkĩte na rĩĩtwa rĩa Awa, na mũtikũnjĩtĩkĩra, angĩgoka ũngĩ na rĩĩtwa rĩake mwene, ũcio nĩmũkamwĩtĩkĩra. 44Inyuĩ mwakĩhota atĩa gwĩtĩkia, mũgĩĩtĩkagĩra kũgoocana inyuene, na mũtimathage kũgoocwo kũrĩa kuumaga kwĩ Ngai ũrĩa ũrĩ o ũmwe wiki? 45Mũtigecirie atĩ nĩ niĩ ngamũthitaka gwĩ Ithe witũ; e ho mũmũthitaki, na nĩwe Musa, o ũrĩa mwĩhokete. 46Amu mũngĩĩtĩkĩtie Musa, niĩ mwanjĩtĩkia, tondũ nĩ ũhoro wakwa aandĩkire. 47No rĩrĩ, akorũo mũtiĩtĩkĩtie mohoro macio we aandĩkire, niĩ ciugo ciakwa mũgagĩciĩtĩkia atĩa?
वर्तमान में चयनित:
JOHANA 5: OGKBIBLE
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 2019
