JOHANA 6
6
1THUTHA wa maũndũ macio Jesu akiuma kũu agĩthiĩ mũrĩmo ũrĩa ũngĩ wa iria rĩa Galili, na norĩo iria rĩa Tiberia. 2Akĩrũmĩrĩrũo nĩ kĩrĩndĩ kĩingĩ ma, nĩ ũndũ nĩkĩonaga ciama iria ekaga andũ arĩa arũaru akĩmahonia. 3Nake Jesu akĩhaica kĩrĩma-inĩ, agĩikara thĩ ho na arutwo ake. 4Na rĩrĩ, Bathaka yarĩ hakuhĩ gũkinya, nĩyo gĩathĩ kĩrĩa kĩa Ayahudi. 5Jesu aagĩtiira maitho, ona atĩ gwĩ kĩrĩndĩ kĩingĩ gĩgũũka kũrĩ we, akĩũria Filipu atĩrĩ, Tũkũgũra mĩgate kũ, andũ aya makĩrĩe? 6Akĩmũũria ũguo atĩ amũgerie; amu we mwene nĩoĩ ũrĩa egwĩka. 7Filipu akĩmũcokeria atĩrĩ, Mĩgate ya ciringi magana merĩ ndĩngĩmaigana, atĩ nĩguo o mũudũ one kanini. 8Na mũrutwo wake ũmwe, wetagwo Andarea, mũrũ wa nyina na Simoni Petero, akĩmwĩra atĩrĩ, 9Haha he kahĩĩ ke na mĩgate ĩtano ya ngano ya cairi, na ciũngũyũ igĩrĩ; ĩndĩ tũirio tũu-rĩ, tũkĩrĩ kĩ, andũ maigana ũũ? 10Nake Jesu akiuga, Ĩrai andũ maikare thĩ. Na rĩrĩ, handũ hau haarĩ na nyeki nyingĩ. Arũme magĩgĩikara thĩ, mangĩhinga ta ngiri ithano. 11Nake Jesu agĩkĩiyũkia mĩgate ĩo, na aarĩkia gũcokeria Ngai ngatho, akĩgaĩra andũ acio maaikaire thĩ; o na ciũngũyũ nacio o ũndũ ũmwe, akĩmahe ciigana o ũrĩa mekwenda. 12Na maahũna, akĩĩra arutwo ake, Oyai cienyũ iria itigarĩte, gũtikore kĩndũ. 13Magĩkĩoya, makĩiyũria ciondo ikũmi na igĩrĩ cienyũ cia mĩgate ĩo ĩtano ya cairi, iria ciatigirio nĩ andũ acio maarĩire. 14Nao andũ maakĩona kĩama kĩu aaringire, makiuga atĩrĩ, Ti-itherũ, ũyũ nĩwe mũnabii ũrĩa wa gũũka gũkũ thĩ.
15Nake Jesu aakĩona atĩ nĩmakiriĩ gũũka kũmũtwara na hinya makamũtue mũthamaki wao, agĩcoka kĩrĩma-inĩ wiki.
16Na gũgĩkinya hwaĩ-inĩ, arutwo ake magĩikũrũka kinya iria-inĩ; 17magĩtonya marikabu, makĩgwata kũringa iria makinye Kaperinaumu. Na hĩndĩ ĩo nĩgwatukĩte, na Jesu ndarĩ aramacokerera. 18Narĩo iria rĩkĩenda kũgĩa makũmbĩ mũno nĩ ũndũ wa rũhuho rũnene rũahuhũkanagia. 19Na maarĩkia gũtwara marikabu handũ haigana ta mairo ithatũ kana inya-rĩ, makĩona Jesu agĩũka agĩkinyaga maĩ igũrũ agathengerera marikabu; magĩĩtigĩra. 20Nake akĩmera atĩrĩ, Nĩ niĩ; tigai gwĩtigĩra. 21Magĩgĩĩtĩkĩra atonye marikabu-inĩ, na kahinda o kau marikabu ĩgĩkinya rũtere kũu maathiaga.
22Mũthenya ũyũ ũngĩ kĩrĩndĩ kĩrĩa kĩarũngiĩ mũrĩmo ũrĩa ũngĩ wa iria gĩkĩona atĩ kũu gũtirarĩ na macua ĩngĩ, no ĩmwe iiki, na gĩkĩmenya atĩ Jesu ndanatonya macua ĩo hamwe na arutwo ake, no arutwo ake nĩmarathiire oike. 23No ningĩ kwĩ macua ingĩ ciokire ciumĩte Tiberia, igĩũka gũkuhĩ na kũu maarĩĩrĩire mĩgate Mwathani aarĩkia gũcokeria Ngai ngatho. 24Tondũ ũcio kĩrĩndĩ gĩakĩona atĩ Jesu ndarĩ kuo, o na arutwo ake, gĩgĩtonya macua icio arĩ kĩo, gĩgĩthiĩ Kaperinaumu gũcaria Jesu. 25Na maamũkora mũrĩmo ũrĩa, makĩmũũria, Rabii, ũũkire rĩ gũkũ?
26Nake Jesu akĩmacokeria akiuga, Ndamwĩra atĩrĩ, o ma, ma, Mũtikũnjaragia nĩ ũndũ mũronire ciama; mũkũnjaragia nĩ ũndũ mũrarĩire mĩgate, mũrahũna. 27Tigagai gũtungatĩra irio iria ithiraga; tungatagĩrai irio iria ciikaraga nginya muoyo wa tene na tene, iria Mũrũ wa Mũndũ akamũhe; amu nĩwe mwĩkĩre mũhũri nĩ Ithe, Ngai. 28Nao magĩkĩmũũria atĩrĩ, Twĩkage atĩa, nĩguo tũtuĩke nĩ mawĩra ma Ngai tũraruta? 29Nake Jesu agĩcokia akĩmera, Wĩra wa Ngai nĩ rĩrĩ, nĩ mwĩhoke ũrĩa areketie. 30Magĩkĩmũũria atĩrĩ, Wee-rĩ, kĩmenyithia gĩkĩrĩ kĩrĩkũ ũrutaga, nĩguo tuone tũgwĩtĩkie? Nĩ ũndũ ũrĩkũ wĩkaga? 31#Thama 16.4,15; Thab 78.24.Maithe maitũ ma tene maarĩaga irio iria cietagwo mana, me werũ-inĩ, o ta ũrĩa haandĩkĩtwo, atĩ, Aamaheire mũgate uumĩte Igũrũ marĩe. 32Nake Jesu agĩkĩmera, Ndamwĩra atĩrĩ, o ma, ma, Ti Musa wamũheire mũgate uumĩte Igũrũ; no nĩ Awa mũmũhei mũgate uumĩte Igũrũ ũrĩa wa ma. 33Amu-rĩ, mũgate wa Ngai no ũrĩa ũikũrũkaga uumĩte Igũrũ, ũgekagĩra kĩrĩndĩ gĩa thĩ muoyo. 34Nao magĩkĩmwĩra, Mũthuri ũyũ, tũheage mũgate ũcio o hingo ciothe. 35Nake Jesu akĩmera atĩrĩ, Nĩ niĩ mũgate wa muoyo; mũndũ ũũkĩte kũrĩ niĩ ndakahũta, na mũndũ wĩĩ’hokete, niĩ, ndarĩ hingo akanyota. 36Na nĩndamwĩrire atĩ kũnyona mũnyonete na mũtiĩtĩkie. 37Arĩa othe Ithe witũ a’heete no magoka kũrĩ niĩ; na mũndũ ũũkĩte kũrĩ niĩ ndingĩmũingata o na atĩa. 38Amu-rĩ, ndiumĩte Igũrũ ngoka gwĩka ũrĩa ngwenda niĩ mwene, no ũrĩa ekwenda ũrĩa wandekirie. 39Na ũrĩa ekwenda, ũcio wandekirie, nĩ atĩrĩrĩ, nĩ atĩ arĩa othe a’heete ndigate o na ũmwe, no ndĩmariũkie mũthenya wa kũrigĩrĩria. 40Amu ũrĩa Awa ekwenda nĩ atĩrĩ, atĩ mũndũ o wothe ũrorete Mũriũ, na akamwĩhoka, agĩe na muoyo wa tene na tene; na niĩ nĩngamũriũkia mũthenya wa kũrigĩrĩria.
41Na rĩrĩ, Ayahudi magĩteta nĩ ũndũ wake, nĩ tondũ oigire, Nĩ niĩ mũgate ũrĩa woimire Igũrũ. 42Makiuga atĩrĩ, Ũyũ anga towe Jesu, mũrũ wa Jusufu, na ithe na nyina nĩtũmoĩ? Nĩ atĩa tondũ rĩu ekuuga, Nĩnyumĩte Igũrũ? 43Nake Jesu agĩcokia ũhoro, akĩmera, Tigai gũtetanĩra. 44Gũtirĩ mũndũ ũngĩhota gũũka kũrĩ niĩ atagucĩrĩirio nĩ Ithe witũ ũrĩa wandekirie; na niĩ nĩngamũriũkia mũthenya wa kũrigĩrĩria. 45#Isa 54.13.Nĩ haandĩke atĩrĩrĩ maandĩko-inĩ marĩa ma anabii, Nao othe makarutwo ũhoro nĩ Ngai. Mũndũ o wothe ũiguĩrĩire ũhoro gwĩ Ithe witũ, agakĩĩruta-rĩ, ũcio nĩokaga kũrĩ niĩ. 46Na ti atĩ kwĩ mũndũ wanona Ithe witũ, tiga o ũrĩa uumĩte kwĩ Ngai; ũcio nĩonete Ithe witũ. 47Ndamwĩra atĩrĩ, o ma, ma, Mũndũ ũrĩa wĩtĩkĩtie e na muoyo wa tene na tene. 48Nĩ niĩ mũgate wa muoyo. 49Maithe manyu ma tene maarĩaga irio icio cietagwo mana, me werũ-inĩ, nao nĩmaakuire. 50Ũyũ-rĩ, nĩguo mũgate ũrĩa wa gũikũrũka uumĩte Igũrũ, nĩguo mũndũ aũrĩe, aage gũkanakua. 51Nĩ niĩ mũgate ũrĩa waikũrũkire uumĩte Igũrũ, wĩ muoyo; mũndũ aarĩa mũgate ũyũ, agatũũra tene na tene; na mũgate ũrĩa ngakĩruta nĩ mwĩrĩ wakwa, ndĩũrute nĩ ũndũ wa muoyo wa kĩrĩndĩ.
52Tondũ wa ũhoro ũcio Ayahudi makĩrika gũkararania o ene, makorania atĩrĩ, Mũndũ ũyũ ahote atĩa gũtũhe mwĩrĩ wake tũrĩe? 53Nake Jesu agĩkĩmera, Ndamwĩra atĩrĩ, o ma, ma, Mwaaga kũrĩa mwĩrĩ wa Mũrũ wa Mũndũ na mũnyue thakame yake, mũtirĩ na muoyo thĩinĩ wanyu. 54Ũrĩa ũrĩaga mwĩrĩ wakwa na akanyua thakame yakwa-rĩ, e na muoyo wa tene na tene; na nĩngamũriũkia mũthenya wa kũrigĩrĩria. 55Amu mwĩrĩ wakwa nĩ irio kũna, na thakame yakwa nĩ gĩa-kũnyua kũna. 56Ũrĩa ũrĩaga mwĩrĩ wakwa na akanyua thakame yakwa-rĩ, aikaraga thĩinĩ wakwa, na niĩ ngaikara thĩinĩ wake. 57Ta ũrĩa Ithe witũ ũrĩa wĩ muoyo aandekirie, na niĩ ngagĩa muoyo nĩ ũndũ wa Ithe witũ, noguo mũndũ ũrĩa nake ũndĩaga arĩgĩaga muoyo nĩ ũndũ wakwa. 58Ũcio nĩguo mũgate ũrĩa waikũrũkire uumĩte Igũrũ; ti ta ũrĩa maithe manyu maarĩaga, na magĩkua; ũrĩa ũrĩaga mũgate ũcio-rĩ, agatũũra tene na tene. 59Maũndũ macio aamoigire e thunagogi, akĩrutana kũu Kaperinaumu.
60Arutwo ake aingĩ maaigua ndeto icio, magĩkiuga atĩrĩ, Ũhoro ũcio wĩ hinya; nũ ũngĩhota kũũigua? 61Nake Jesu, tondũ nĩoĩ na ngoro atĩ arutwo ake nĩmarateta nĩ ũndũ waguo, akĩmera, Githĩ ũhoro ũcio ũgũtũma mũhĩngwo? 62Ĩ, mũngĩkĩona Mũrũ wa Mũndũ akĩambata kũrĩa aarĩ mbere? 63Roho-rĩ, nĩguo wĩkanagĩra muoyo; mwĩrĩ ndũrĩ ũguni; ndeto icio ndamũhe nĩcio roho na nĩcio muoyo. 64No rĩrĩ, inyuĩ kũrĩ amwe mategwĩtĩkia. Amu gwata kĩambĩrĩria, Jesu nĩaamenyaga arĩa matetĩkĩtie, na ũrĩa ũkamũkunyanĩra anyitwo. 65Agĩcoka akiuga atĩrĩrĩ, Nĩkĩo ndĩmwĩrire, atĩ, Gũtirĩ mũndũ ũngĩhota gũũka kũrĩ niĩ atarĩ mwendithie nĩ Ithe witũ.
66Maaigua ũhoro ũcio, arutwo ake aingĩ makĩhũndũka, magĩtiga gũcoka gũthiĩ nake. 67Tondũ ũcio Jesu akĩũria arĩa ikũmi na erĩ atĩrĩrĩ, Mũkwenda gũthiĩ, o na inyuĩ? 68#Mat 16.16; Mar 8.29; Luk 9.20.Nake Simoni Petero akĩmũcokeria atĩrĩ, Mwathani, tũgĩthiĩ kũrĩ ũ? Wee wĩ na ndeto cia muoyo wa tene na tene. 69Na ithuĩ nĩtwĩtĩkĩtie, tũkamenya nĩwe Ũrĩa Mũtheru wa Ngai. 70Nake Jesu akĩmacokeria atĩrĩ, Anga ndiamũthurire inyuĩ ikũmi na erĩ? na ũmwe nĩ wa mũcukani. 71Na ũcio aagwetaga nĩ Judasi wa Simoni Mũisikariota, nĩ gũkorũo nĩwe ũkamũkunyanĩra anyitwo, na aarĩ wa acio ikũmi na erĩ.
वर्तमान में चयनित:
JOHANA 6: OGKBIBLE
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 2019
