Johani 10
10
A ranga ga tiyivu.
1Hizinene nziku ka nwina: Loyi a nga engheniko hi nyangwa le rangeni ga tiyivu, kanilezi a kanziha hi yinwani ndlela, loyi hi muyivi ni khamba.
2Kanilezi loyi a enghenako hi laha nyangweni hi murisi wa tiyivu.
3A murinzeli wa nyangwa wa mu vululela; a tiyivu ti ingisa a gezu gakwe; a vitana a tiyivu takwe hi mavito ya tona, a ti humesa lahandle.
4Loku a humesile tiyivu takwe tontlhe, i ranga mahlweni ka tona, ni tiyivu ti mu lanzela, hakuva ta gi tiva a gezu gakwe.
5A munwani a ti na ku mu lanzela, kanilezi ti ta mu chava; hakuva a ti gi tivi a gezu ga vanwani.
6Jesu i lo va byela mufananiso lowu, kanilezi a va pimangi lezi a va byelileko zona.
7Hikwalaho Jesu i lo engeta aku ka vona: Hizinene nziku ka nwina: Mina nzi nyangwa ya tiyivu.
8Vontlhe lava va nzi rangeleko vayivi ni makhamba; kanilezi a tiyivu a ti va ingisangi.
9Mina nzi nyangwa, loku munhu a enghena ha mina, i ta hanyiswa; i ta enghena a huma, a kuma mikova. Xip. 14:6; Efe. 2:18
10A khamba gi tela ntsena ku ta yiva, ni ku tlhava, ni ku daya. Mina nzi tile kasi ti fela ku kuma wutomi, tiva nago hi kuteleko.
11Mina nzi murisi nene. A murisi loyi nene i nyikela kuhanya kakwe hi kota ya tiyivu. Isa. 40:11; Ezek. 34:12, 23
12Loyi a rihiwako, na a nga hi murisi, a tiyivu na ti nga hi takwe, loku a wona a mhisi na yi kari yita, wa tsika tiyivu, a tsutsuma; a mhisi yi khoma tiyivu, yi ti hangalasa. Zak. 11:16, 17
13I tsutsuma hakuva a nga wa kurihiwa, a nga cheli kota hi tiyivu.
14Mina nzi murisi nene; nza tiva a tiyivu ta mina, nzi tibyiwa hi tona, 2 Tim. 2:19
15kota lezi Dadani a nzi tivako, na mina nza mu tiva Dadani; nzi nyikela a kuhanya ka mina hi kota ya tiyivu. Mat. 11:27; Xip. 15:13
16Nzi na ni tiyivu tinwani, leti ti nga hiko ta lowu ntlhambi; na tona kambe nzi fanele ku ti neha, ti ta ingisa a gezu ga mina. Zonake ku tava ni ntlhambi munwe ni murisi munwe. Isa. 56:8; Ezek. 37:22; Efe. 2:14
17Dadani wa nzi ranza, hakuva nzi nyikela a kuhanya ka mina, kasi nza fela ku ku teka kambe. Isa. 53:7, 8, 12; Maheb. 2:9
18A ku na munhu a nzi tekelako kona, kanilezi nza ku nyikela ha nzoce. Nzi na nzi ntamu ku ku nyika, nzi na ni ntamu wa ku tlhela nzi ku teka. Nzi leletelwe lezo hi Dadani. Xip. 2:19; 6:38; 15:10; Miti. 2:24, 32
19Ku lo vuka kambe a kuhambana xikari ka vaJuda hi kota ya timhaka leti.
20A vanyingi va vona vaku ngalo: I na ni dimoni, i hungukile; hikuyini mu mu ingiselako?
21A vanwani vaku: A magezu laya a hi ya munhu wo ngha a hi ni dimoni. Kunene a dimoni ga zi kota ku hanyisa mahlo ya zikhumu ke? Ekso. 4:11; Tis. 94:9; Xip. 9:6, 7
Jesu a aliwa hi vaJuda.
22Ku wa hi kona a mubuzo le Jerusalema wa ku nyikelisisa tempeli, ku wa hi wuxika.
23Jesu i wa kari a fambafamba lomo tempeleni, a ligumba-gumbeni la Solomoni. Miti. 3:11; 5:12
24A vaJuda va lo ta mu ranzela, vaku ngalo kakwe: U ta hi rivata kala rini? Loku u hi Kristu, hi byele ziku dlunya,
25Jesu i lo va hlamula, aku: Nzi mu byelile, kanilezi a mu kholwi; a mitiro leyi nzi yi tirako hi vito ga Dadani, hi yona yi nzi mahelako wukustumunyu,
26Kanilezi a mu kholwi, hakuva a mu tiyivu ta mina Xip. 8:47; 1 Joh. 4:6
27A tiyivu ta mina ta ingisa a gezu ga mina; mina nza ti tiva, ta nzi lanzela.
28Nza ti nyika a wutomi ga pinzukelwa; cima ti nga tafa, ni kambe, a nga kona loyi a ta nga ti wutla canjeni ga mina. Xip. 6:37; 17:11, 12; 18:9
29Dadani, loyi a nzi nyikileko tona, ngwa hombe ku hunza vontlhe; i hava loyi a zi kotako ku ti wutla canjeni ga Dadani. Xip. 14:28; 17:2, 6
30Mina na Dadani hi munwe.
31A vaJuda va lo engeta va rola a maribye kasi ku mu gandla hi wona.
32Jesu aku ngalo kabye: Nzi mu kombisile a mitiro yinyingi yo saseka ya le ka Dadani; hi wihi wa yona mu nzi gandlako hi kota ya wona ke?
33A vaJuda va lo mu hlamula, vaku: A hi ku gandli hi kota ya ntiro wo saseka, kanilezi hi kota ya tihlamba; lezi wena na u hi munhu, u ti maha Nungungulu. Xip. 5:18
34Jesu i lo va hlamula, aku: A ku tsalwangi nayweni wa nwina ke, lezaku: Nzi te ngalo, Nwina mu vanungungulu? Tis. 82:6
35Loku a va vitanile aku vanungungulu, vona lava a mhaka ya Nungungulu yi nga tile kabye (ni mitsalo a yi na ku fuva), Rom. 13:1
36xana mu nzi byela, mina loyi Dadani a nzi basisileko ni ku nzi rumela tikweni, muku: Wa rukatela; hi lezi nzi nge ngalo: Nzi Nʼwana wa Nungungulu ke? Xip. 3:17; 5:17, 18; 6:27; Lu. 1:35
37Loku nzi nga mahi a mitiro ya Dadani, mu nga nzi kholwi;
38kanilezi loku nzi kari nzi yi maha, hambu loku mu nga kholwi ka mina, kholwani hi mitiro; kasi mu fela ku tiva ni ku vumela lezaku Dadani i kona ka mina, na mina ka Dadani. Xip. 5:36; 14:10, 11
39Va wa lava kambe a ku mu khoma; kanilezi i lo huma mandleni yabye.
40I loya kambe tlhatukweni wa Jordani, a ka wutshamu legi Johani a nga kari a bapatiza kona kusanguleni; a tshama kona. Xip. 1:28
41A vanyingi va lota ka yena, vaku ngalo: Johani a nga mahangi xiwoniso ni xinwe; kanilezi zontlhe lezi Johani a nga wulawula hi loyi munhu zinene. Xip. 3:30
42A vanyingi va lo kholwa ka yena laho.
वर्तमान में चयनित:
Johani 10: TSC72
हाइलाइट
शेयर
कॉपी
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
